1 Tesalonica 2
2
U Págserbi ni Pablo ti Tesalonica
1Kákkapatkákka mi hide, hikamon u makatukoy a te pakinabang kam tu káangay me hina nikam.#2:1 Basaán tu Gimet 16:19-24; 17:1-9; Roma 1:1. 2Tukoy moy be a pináppasakitan di kame sakay ináinsulto ti Filipos, pero maski ni makpal a hadlang ay inatádden kami pade nu Diyos ti begsák isip a ipakapospos nikam u Maganda a Baheta a gabwat nikuna.#2:2 Basaán tu Gimet 16:16-40. 3U impakapospos me nikam ay awan kakabuliyan. Awan kame nagtoldu tánni lokuwán mikam la, oni pagustuwan u madukás a gimet. 4Tinanggap kame nu Diyos sakay pinagkatiwalaan tu págpakapospos tu Maganda a Baheta. Inpakapospos me iye, bakán a para pasayaán u tolay hide nan u Diyos a makatukoy tu bawat puso tam. 5Tukoy moy be a maski nikan ay awan kame naggamit ti makaakit a paggupos tanni maakit mikam. Sakay awan kame ti madukás a hangad tu págpakapospos me. U Diyos u tistigu me. #2:5 Basaán tu Gimet 20:33. 6Awan me hinangad a puriyán moy kame oni puriyán nu agum a tolay.#2:6 Basaán tu 1 Corinto 9:1. 7Maski bilang apostol ni Cristo ay tehhod kame a karapatan a umasa ti konna hod pero awan mi iye ginimet. Nan nagin mabait kame nikam, a konna tu essa a ina a magalaga tu anak na hide.#2:7 Basaán tu 1 Tesalonica 2:11; Galacia 4:19. 8Dipo grabi ti kadakál u págmahal me nikam ay inlaan mi dán u sadile me tu pángpakapospos me nikam tu Maganda a Baheta. Sakay bakán la a ina, nan iyalay mi pa u biyag me alang-alang nikam dipo mahal mikam a tahod.#2:8 Basaán tu 2 Corinto 12:15; 1 Juan 3:16.
9Kákkapatkákka mi hide, siguradu a matandaan moy palla ni kodya kame a nagpagud a nagtrabaho aldew ay ti gibi tánni awan kami la makadágge nikam mentaras a ipakapospos me nikam u Maganda a Baheta a gábwat tu Diyos. 10Hikam u tistigu me sakay u Diyos, a tapat kame sakay awan ti mepintas tu ugale me sakay maayus u pákpággagum me nikam a mánnampalataya hide. 11Tukoy moy dán be a nagin konna kame tu essa a ama tu balang essa nikam. #2:11 Basaán tu 1 Corinto 4:14. 12Pinabegsák me u isip moy, pinagkagiyan mikam sakay nákkekagbi kame nikam a mabiyag kam ti tapat tu atubang nu Diyos. Dipo siya u nangpile nikam tánni masakup kam tu kaharian na sakay tu kaluwalhatian na.#2:12 Basaán tu 1 Pedro 5:10.
13Kaya ngane, pirme kame a magpasalamat tu Diyos, dipo nikuna a ipakapospos me nikam u Upos na, ay tinanggap moy iye dipo naintendiyan moy a tatahoden iye a Upos nu Diyos, bakan a upos nu tolay. Kaya ngane u kapangyariyan nu Upos na ay ketan tu maayus moy a kákkabiyag a mánnampalataya hide. #2:13 Basaán tu 1 Tesalonica 1:2. 14U nangyare nikam kákkapatkákka mi hide, ay konna tu nangyare tu gurupo nu mánnampalataya hide ni Cristo a mágyan ti Judea. Pinasakitan kam nu kabanuwan moy hide a konna tu taga-Judea hide pinasakitan hide nu kasa-Judio di labe hide.#2:14 Basaán tu 1 Tesalonica 1:6; 1 Corinto 7:17; Galacia 1:22; Gimet 17:2 Tesalonica 1:4. 15U Judio hide u nangpabuno tu Panginoon a ti Jesu-Cristo sakay tu prupeta hide tu itod. Sakay hide be u nangpasaket nikame. Sasala nu Diyos u ugali de, sakay kadima hide nu atanan a tolay!#2:15 Basaán tu Lukas 24:20; Gimet 2:23; 7:52. 16Pilitán di kame a pugáddan tánni awan me mepangaral u Maganda a Baheta nu kaligtasan tu Hentil hide. Naputat dán hide ti kasalanan, kaya nadid ay meangay dán nide u iyamut nu Diyos. #2:16 Basaán tu Gimet 9:23; 13:45, 50; 14:2; 5; 19; 17:5, 13; 18:12; 21:21, 27; 25:2, 7; 1 Corinto 10:33; Genesis 15:16; 1 Tesalonica 1:10.
Masoh a Bumisita a Huway ti Pablo tu Taga-Tesalonica hide
17Nadid kákkapatkákka mi hide, maski sabadit la a panahun a neadeyo kame nikam ay grabi dan i ammaw miyay nikam, konna bi hod u pagkasoh me a ketan mikam a huway. Tatahoden a neadeyo kame nikam pero lagi mikam a aisipán. #2:17 Basaán tu 1 Corinto 5:3. 18Sakay tunay u pagkasoh me a makasole hina. Bakán la a pumensangan a beses a binalak ko a bumisita hina nikam. Pero pirme kame a páppugáddan ni Satanas. 19Gugusto me a ketan mikam dipo hikam la u dahilan nu kasayaan me sakay hikam be u áasaan me para hikame ay maatadden ti gantimpala. Sakay u kurona a mepagmadakál me tu atubang nu Panginoon kássole na. #2:19 Basaán tu Filipos 4:1; 1 Tesalonica 3:13; 4:15; 5:23; Mateo 16:27; Markos 8:38. 20On, hikam u karangalan sakay kasayaan me.#2:20 Basaán tu 2 Corinto 1:14.
اکنون انتخاب شده:
1 Tesalonica 2: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.