1 Pedro 2
2
1Kanya adággen moy dán u atanan a mágkadukás, u pakándaya, pakánwari-ware, kákkaiyamut, sakay pakán upos ti awan ti pinagseserbiyan tu agum. 2Dapat kam a mauwaw tu Upos nu Diyos, konna tu kákkauwaw nu anak ti gatas, tánni bumegsák u pánnampalataya moy hanggan matanggap moy u kaligtasan. 3Dipo kinagi na tu Kasulatan, “Naranasan moy dán u kabaitan nu Panginoon.”
4Kanya umadene kam nikuna; siya u mangatád ti biyag sakay siya u konna tu bito a inadiyan nu tolay hide pero pinile nu Diyos a pinakamahalaga tu pangileng na. 5Nadid, ay tehhod kamon a bigu a biyag a gábwat tu Diyos. Sakay nagkaessa kam a nagin konna tu essa a Templo. Kumán kam a bito a biyag a ginimet a templo na. Konna kam be tu essa a saserdote a nelaan para tu Diyos. U alay a ispiritwal a makasaya tu Diyos ay u págserbi moy nikuna alang-alang ni Jesu-Cristo. 6Dipo kinagi na tu Kasulatan a,
“U pinile ko a bito ay indátton ko ti Sion dipo mahalaga itod a bito.
Ni ti deyaman u maniwala ti pinile kuwan iye ay awan mapasanike.”
7Kanya i bituwan itod ay mahalaga nikitam a maniwala hide. Pero tu awan hide maniwala ay hide u mangpatunay tu Kasulatan,
“U bito a inumádden nu mágbilay hide ay siya bál u mahalaga a mangtággád tu bilay.”#2:7 Basaán tu Efeso 2:20, Pahayag 21:14.
8Sakay nakasulat be a,
“Itod labe a bito u kesángdulan sakay kehakpaan nu tolay hide.”
Nesángdul hide dipo awan hide sumunud tu upos nu Diyos, sakay iye u inhanda nu Diyos para nide.
9Pero hikam u lahe hide a pinile nu Diyos, a magin saserdote na a magserbi tu tatahoden a Hare, essa a bansa para tu Diyos. Pinile kitam nu Diyos a magin sakup na sakay mángpakapos-pos tu makataka-taka hide a ginimet na a mágkaganda. Siya be u náng agton nikitam tu makataka-taka a demlag na nikuna a katoy kitam palla tu kadiklámman. 10Tu itod ay bakán kam palla a sakup nu Diyos pero nadid ay sakup na kamon. Awan nikam tu itod u kagbi nu Diyos, pero nadid ay hod dán nikam u kagbi na.
U Tagapagserbi hide nu Diyos
11Kákkapatkákka ko hide, bakán a munduwáy u permamente tam a págyanan nan kumán kitam la a bisita ti iye. Kanya mákkekagbiyák nikam, adággen moy dán u mágkadukás a kagustuwan nu bággi moy dipo ina u mangsida tu kássunud moy tu Diyos.#2:11 Basaán tu Hebreo 11:13. 12Dapat kitam a mabiyag ti maayus tu atubang nu Hentil hide, ta maski ni bintangán dikam ti madukás, pero ketan de u mágkaganda moy a gimet ay magpure hide tu Diyos káddemát nu aldew a kássole na.#2:12 Basaán tu Juan 17:22, Hebreo 2:10.
13Alang-alang tu Panginoon ay magpasakup kam tu tehhod hide a tungkulin tu banuwan moy sakay tu Hare a siya u pinakataas a pinuno tu lugar tam. 14Sunudán moy be u gubernador hide a pinaangay na tán magparusa tu makángimitán hide ti madukás sakay hide be u magparangal tu makán gimitán hide ti maganda. 15Gusto nu Diyos a gimitán tam u tama tán tumahan u tolay hide a apehet ti pággisipan a mágga-upusán ti baka-bakán kontara tu upos nu Diyos. 16Mabiyag kitam a konna tu tolay hide a tehhod a kalayaan. Pero diyan moy gimitán u kalayaan a iye tu pággimet ti madukás nan mabiyag kam bilang alipin nu Diyos. 17Igalang moy u atanan a tolay sakay mahalán u kákkapatkákka tam ni Cristo. Mabiyag kam a tehhod a ánteng tu Diyos sakay tehhod a pággalang tu Hare.#2:17 Basaán tu Tito 3:1.
Ahigán Tam u Pághirap ni Cristo
18Hikam a utusan hide, igalang moy sakay sunudán u amu moy sakay pasakup kam nide, bakán la a tu mágkabait hide nan pate be tu amu moy a awan makákkagbiyán. 19Dipo u magtiis ti págpahirap maski ni awan siya ti ginimet a madukás ay kahabagen nu Diyos ni tiniis na iye dipo tu kássunud na tu kagustuwan nu Diyos. 20Awan ti seserbi u págtiis moy ti parusa ni dipo tu ginimet moy a madukás. Dipo awan kam kasayaan nu Diyos. Pero ni pápparusaan kam maski maganda u gággimitan moy, ay kasayaan kam nu Diyos.#2:20 Basaán tu Filemon 1:15-16. 21U págtiis ti hirap ay kaguman tu pángpile nikam nu Diyos; dipo maski ti Cristo ay nagtiis ti hirap para nikam, I págtiis naan iye ay essa a halimbawa a dapat moy a ahigán. 22Maski nikan ay awan siya nagkasala sakay nagbule-bule. 23Awan siya gummante nikuna a dustaán siya, sakay awan siya ti kákkagi nikuna a pahirapan de nan impabahala na u atanan tu Diyos dipo u Diyos la u tapat a huwes. 24Ti Cristo ay naparusaan dipo tu kasalanan tam. Nepako siya tu kudus tánni hummintu kitamon tu págkasala a konna tu patay a awan dán magkasala, sakay sumunud kitamon tu kagustuwan nu Diyos. Sakay dipo tu talingu na hide ay nagpiyya kitamon.#2:24 Basaán tu Hebreo 5:7-8. 25Dipo kumán kam a tupa a nágketawtaw pero nadid ay inipun kamon a huway nu Diyos tu pamamag-itan ni Jesus a pastol tam a mággalaga tu kaliduwwa tam.#2:25 Basaán tu Hebreo 13:20, 1 Pedro 5:4.
اکنون انتخاب شده:
1 Pedro 2: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.