मत्ती 16
16
फरीसी माणसे ने सदुकी ईसु धड़े सरगेन सहलाणीन मांग करे
(मरकुस 8:11-13; लुका 12:54-56)
1फरीसी माणसे ने सदुकी माणसे ईसु धड़े आया, ईसु काजे पारखणे करीन असा पुछ्या, “हामुक सरगेन काहींग सहलाणी देखाड़ तत्यार हामु तार पर भुरसु करजे की तु भगवानेन अगु सी आवलु छे।” 2ईसु तीनुक कह्यु, “सांती वेळाय तुहुंंक कहं, ‘मुसुम वारु रवसे, काहाकी सरग रातलो छे।’ 3ने संदारे एगात कह्वे, ‘आज आंधी आवसे, काहाकी सरगे रातलो आदळो छावाय रयो।’ तुहुंं सरग भीणी देखीन जाण लेवु, बाकुन तुहुंं हीनी टेमेन सहलाणीन बारामां राज काजे देखीन नी जाणाये। 4हीनी पीड़ीन भुंडा ने छीनाळ्या माणसे सहलाणी हेरे, बाकुन योनान सहलाणी काजे छुड़ीन#16:4 छोड़कर तुहुंंक अळी काय बी सहलाणी नी जड़े।”
जी वात कय्न ईसु तीनुक छुड़ीन हेरा चेला पुठ्ये दीसरे जागे जाती रयु।
ईसु फरीसी माणसे ने सदुकी सीकापण सी चेतीन रवजु करीन सीकाड़े
(मरकुस 8:14-21)
5चेला दरीयान पली धड़े गुया, बाकुन चे रुटा ली जाणु वीसरी गुयला। 6ईसु तीनुक कह्यु, “देखु, फरीसी माणसे ने सदुकी पंथवाळा खाण्या-सुडा सी चेतीन रवजु।”
7चे आपसा-आपसा कह्णे बाजी गुया, “आपणु रुटा नी लाया तेरेमां ईसु असु कय रयु।”
8ईसु तींद्रा वीच्यार काजे जाणीन कह्यु, “कम भुरसु करने वाळा, तुहुंं तुंद्रा मन मां असा काहा वीच्यार करु की रुटा नी लाया करीन ईसु असु कर रयु? 9काय तुहुंं हाल लग नी समज्या? काय तुहुंं काजे तीनु पांच हजारेन पांच रुटा हेर नी आवता, तीने टेमे तुहुंं कतरा मटला चार्या भरला? 10मे तीनु चार हजार माणसे काजे सात रुटा, आफरीन खावाड़लु तीने टेमे तुहुंं कतरा चार्या भरला? 11तुहुंं काहा नी समजता की, मे तुहुंंक रुटान बारामां जो नी कह्यु, बाकुन मे ते फरीसी माणसे ने सदुकी माणसेन खाण्या-सुडा सी चेतीन रवजु करीन कह्यु।”
12तत्यार चे समजी गुया की ईसु, रुटान पीठाम भेसकण्या खाण्या-सुडान बारामां सी नी, बाकुन, फरीसी माणसे ने सदुकी सीकापण सी चेतीन#16:12 सावधान रवजु करीन कवलु।
पतरस ईसु काजे मसी माने
(मरकुस 8:27-30; लुका 9:18-21)
13ईसु केसर्या फीलीप्या परदेस मां आयु, ने हेरा चेला सी पुछणे आपसान बारामां असु पुछ्यु, “माणसे माणसेन पुर्या काजे काय कय रया?” 14चे कह्या, “काहनाक ते युहन्ना बपतीस्मा आपणे वाळु कह्वे, ने काहनाक एलीयाह, ने काहनाक यीर्मयाह नीते भगवानेन अघी सी आवणे वाळी वात देखाड़न्या मां सी काहनुक एक हसे करीन कहें।”
15ज सामळीन ईसु तीनुक कह्यु, “बाकुन तुहुंं मेसे काजे काय कह्वु?” 16सीमोन पतरस कह्यु, “तु जीवता भगवानेन पुर्यु मसी छे।”
17ईसु तीना पतरस काजे कह्यु, “ए सीमोन, योनान पुर्या, तु वारु छे; काहाकी सीकार ने लुही नी, बाकुन मारु बास सरगे मां छे, चु जी वात तुसे बताड़्यु। 18ने मे तुसेक कहं की तु पतरस छे, ने मे हीना दगड़ा पर आपणी मंडळी बणावीस, ने पाताळेन जुर तीना पर जुर नी कर सके। 19मे तुसे काजे सरगेन राजेन कुची आपीस, ने ज काय तु कळी पर बांदीस, च सरगे मां बांदायसे, ने ज काय तु धरती पर छुड़सी, च सरग मां उघड़से।”
20तत्यार ईसु आखा चेला काजे चेताय्न कह्यु, की कुयक बी घुण कहुं की मे मसी छे।
ईसु आपसान मर्या-सर्याम सी जीवतु हवणेन बारामां पेहलु कवे
(मरकुस 8:31-33; लुका 9:22)
21तीनी टेमे सी ईसु आपणा चेला काजे समजाड़ने बाजी गुयु, “जरुरी छे की, मे यरुसलेम मां जाम ने डाहा-बुड़ा माणसे, ने मुख्या पुजारान, ने यहुदी नीयमेन मास्तर्या मेसे काजे एला पाड़से, ने मार नाखसे; ने तीसरे दाहड़े मे मर्या-सर्याम सी जीवतु हय जायस।”
22पतरस ईसु काजे अगु ली जाय्न असु कय्न लड़्यु, “भगवान असु नी करे! मालीक तारे साते असो कदी नी हवे।”
23ईसु पछु फीरीन पतरस काजे कह्यु, “ए भुतड़ा, मारे धड़े सी छेटु जाती रव! तु मारे वाटे अड़चन बण रयु, काहाकी तु ते भगवानेन वात पर नी, बाकुन माणसेन वात पर मन लागाड़ीन कहणे बाजी रयु।”
24तत्यार ईसु हेरा चेला काजे असु कह्यु, “कदी कुय मारु चेलु बणीन मारे पछळ आवणे हींडे, ती आपणे आप काजे भुल जाय ने आपसान कुरुस हाकलीन, मारा कह्याम चालनु पड़से। 25काहाकी जु कुय बी आपणा जीव काजे बचाड़ने चाहसे, चु तेरा जीव काजे खुय देसे, ने जु कुय बी मारे वाटे जीव खुवसे, चु तीना जीव काजे हेर लेसे। 26कदी माणुस आखी कळीन चीज काजे हेर लेय, ने आपसान जीव काजे खुय देय, ती तीना काजे काय फायदु जड़से? नीते माणुस आपणा जीवनेन आवजी मां काय आपसे। 27माणसेन पुर्यु आपणा सरग काहवाळ्या साते आपणा बासेन सेक-सींगार मां आवसे, ने तीनी टेमे हीयु आखा काजे हींद्रा काम काजे देखीन ईनाम आपसे ने ते तीनु माणसेक डंड जड़से। 28मे तुंद्रे सी छाचलीन कहं, की जे जां उबा हय रया, माणसे मां सी काहनाक असा छे, की जां लग माणसेन पुर्या काजे तेरा राज मां आवतेलु नी देखी नी लेय, तत्यार लग नी मरे।”
اکنون انتخاب شده:
मत्ती 16: BSP25
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.
