प्रेरित 8
8
साउलले बिसासिहरुकन दुख दिन सुरु गर्यो
1स्तिफनसको हत्यामै साउल पुनि राजि छियो। तेइ दिन यरुसलेममै भया मन्डलिको बिरुद्दमै ठुलो दुख सुरु भयो, र मुख्य चेलाहरु बाएक अरु बिसासिहरु स्हबै यहुदिया र सामरिया ठौरबाट छडिछिट्टन भया।
2कोइ धार्मिक मान्ठहरुले स्तिफनसकन ल्हियार गडाल्या, तब तेइको निम्ति ठुलो सोक गर्या।
3तर साउलले इसुमै बिसास गन्न्या मान्ठहरुकन नास गरिरया छियो। तेइले घर घरमै पसेर लोग्न्या र स्हैनिहरुकन रक्छुदै झ्यालखानमै हालिदिन्छियो।
सामरियामै फिलिपले प्रचार गर्या
4तब तिँ छरिछिट्टन भया बिसासिहरु गयर स्हबैतिर प्रभुको बचन स्हुनाउन लाग्या। 5फिलिप पुनि सामरियाको सहरमै गयोर ताँइका मान्ठहरुकन ख्रिस्टको बार्यामै प्रचार गर्यो। 6फिलिपले भुन्या बचन स्हुन्या र तेइले गर्या चिनारिहरु देख्यार, मान्ठहरु एकै मुनका भइ तेइखा कुडा ध्यान दिइकन स्हुन्या। 7क्यानकि मथ्थै जुनाबाट नराम्मा आत्माहरु ठुलो डाको गरि कोक्काउँदै निस्कि गया, अनि मथ्थै जुना कुज्याहरु र लङ्गडाहरु पुनि भलो भया। 8यइबिअ सामरिया सहरका मान्ठहरु जात्ति खुसि भया।
9तेइ सहरमै सिमोन नाउँ गर्या एकजुना मान्ठ छियो। तेइले पैलै देखि तेइ सहरमै जादु गरिकन सामरियाका मान्ठहरुकन छक्क पाड्या छियो, र तेइले स्हबै भुन्दा ठुलो मै हुँ भुन्नोछियो। 10तेइ मान्ठकन नानादेखि ठुला स्हबैले यइथो भुनि मान्ना छिया, “यइ मान्ठस्हात परमेसोरको ठुलो सक्ति छ, जैकन म्हाँ सक्ति भुन्नाछिया।” 11पैलै देखि तिनुहरुले तेइकन मान्ना छिया, क्यानभुन्या तेइले जादु गरेर मान्ठकन छक्क पाड्डो छियो। 12तर तिनुहरुले परमेसोरको राज्या र इसु ख्रिस्टको नाउँमै राम्मो रैबार स्हुनाउन्या फिलिपको कुडामै बिसास गर्या, तब मथ्थै लोग्न्या र स्हैनिहरुले बप्तिस्मा ल्हिया। 13सिमोनले पुनि बिसास गर्यो र बप्तिस्मा ल्हियो, तब तेइ फिलिप स्हात रैइरयो, अनि फिलिपले ठुला ठुला चिनारिहरु र अचुम्मका काम गर्या देख्योर तेइकन अचुम्म लाग्यो।
14सामरियाका मान्ठहरुले परमेसोरको बचनकन पत्याया भुन्न्या स्हुन्यार यरुसलेममै रया मुख्य चेलाहरुले पत्तुरुस र युहन्नाकन तिनुहरुति पठाया। 15पत्तुरुस र युहन्ना सामरिया सहरमै पुग्यापछि बिसासिहरुले पबित्त आत्मा पाउन् भुनि तिनुहरुका निम्ति प्रार्थना गर्या। 16क्यानकि तेइबेलास्हम्म तिनुहरुमद्दि कोइमाथि पुनि पबित्त आत्मा आया छियानुन्। र तिनुहरुको बप्तिस्मा प्रभु इसुको नाउँमै मात्तै भयाछियो। 17तब पत्तुरुस र युहन्नाले आम्ना हात बिसासिहरुमाथि राख्या, र तिनुहरुले पबित्त आत्मा पाया।
18अनि मुख्य चेलाहरुले हात राख्ता मान्ठहरुले पबित्त आत्मा पाया देख्यार सिमोनले यइथो भुन्दै तिनुहरुकन रुपियाँ दिन खोज्यो, 19“मुकन पुनि यइ सक्ति देउ, र मोइले पुनि जैकन हात राख्न्याछु तेइले पबित्त आत्मा पाओस्।”
20तर पत्तुरुले भुन्या, “तेरा रुपियाँ तोइस्हातै नास होस्, क्यानकि परमेसोरको बरदान रुपियाँले किन्न स्हकिन्छ भुनि तोइले स्हुचिस्। 21यइखो बार्यामै न त तेरो केइ हक छ न त भाग नै छ, क्यानकि परमेसोरको अगाडि तेरो हिर्दय ठिक रैनछ। 22यइबिअ तेरा पापको निम्ति पछ्ताप गर, अनि प्रभुमै प्रार्थना गर। सक्बर तेरो हिर्दयको यइथो बिचार माप हुन्छ होला। 23क्यानकि मोइले तोकन अधर्म र रिसले भरिया देख्याँ, अनि पापले तोकन कब्जा गर्या छ।”
24तब सिमोनले तिनुहरुकन भुन्यो, “तुमिहरुले मेरो निम्ति प्रभु स्हात प्रार्थना गद्देउ, र तुमिहरुले भुन्या केइ कुडा मुमाथि आइ नलागोस्।”
25अनि तिनुहरुले स्हाँचि दिदै प्रभुको बचन भुनि स्हक्यापछि सामारिहरुका मथ्थै गाउँहरुमै राम्मो रैबार स्हुनाउदै यरुसलेमतिर फर्क्या।
फिलिप र इथियोपियाका ठुला हाकिम
26तेइपछि प्रभुका एकजुना सोर्गका रैबार्याले फिलिपकन भुन्या, “उठेर दच्छिनतिरको यरुसलेमबाट गाँजा जान्या रुखो ठौरको बाटोमै जा।” 27-28अनि फिलिप उठ्योर गयो, तब एकजुना इथियोपियालि नपुंसककन#८:२७-२८ नपुंसककन स्हैनि र लोग्न्या भुनि छुट्याउन अप्ठ्यारो हुन्छ र यिनुहरुले स्हुन्तान जुन्माउन स्हक्तैनुन्। भेट्यो, जो इथियोपिया देसकि म्हाँरानि कन्दाकिका ठुला हाकिम र मथ्थै स्हुम्पतिका कोसाद्याछ्या छियो। अनि तेतिबेला तेइ यरुसलेममै आराधना गन्न गया छियो। र ताँइबाट यरुसलेमतिर फर्कि आउँदै छियो, र आम्नो रथमै बसि यसैया परमेसोरका रैबार्याले लेख्या किताब पडिरया छियो। 29तब पबित्त आत्माले फिलिपकन भुन्या, “जा र रथको पछि लाग।” 30अनि फिलिप तेइति डगुडिकन गयो, र तेइकन परमेसोरका रैबार्या यसैयाले लेख्या किताब पडिरया स्हुन्योर स्होद्यो, “तुमिले पडिरया कुडा बुज्याछौ?”
31तब नपुंसकले भुन्यो, “कोइले नभुनिकन मु क्यागरि बुइन स्हक्छु र?” अनि तेइले फिलिपकन आपुस्हातै रथमै बैन बिन्ति गर्यो। 32अनि तेइ नपुंसकले धर्मसास्तरको यइ भाग पडिरया छियो,
“ज्यागरि भेडो काट्न ल्हिइन्छ,
या भेडो उन मुड्न्यास्हात चुप्प लाग्दोछ,
तेइथैगरि तेइ चुप्प लाग्यो।
33तेइको हेलाको अबस्तामै तेइकन न्याय मिल्योन।
तेइको बुङ्सको बयान कोइले गन्न्या?
क्यानभुन्या तेइको जिबन धत्तिबाट बिलायो।”#यसैया ५३:७-८
34तब तेइ नपुंसकले फिलिपकन भुन्यो, “दयागरि मुकन भुन, परमेसोरका रैबार्याले यइ कैको बार्यामै भुन्या हुन्, आम्नै बार्यामै कि अरु कैको बार्यामै?” 35तब फिलिपले मुख खोल्योर धर्मसास्तरको यइ पाठबाट तेइकन इसुको बार्यामै राम्मो रैबार स्हुनायो। 36अनि तिनुहरु बाटामै जानाजनै पानि भया ठौरति पुग्या। तब तेइ नपुंसकले भुन्यो, “हेर, नेइति पानि रैछ, मुकन बप्तिस्मा ल्हिनबाट क्याले रोक्न स्हक्छ?” 37[फिलिपले भुन्यो, “यति पुरै हिर्दयाले बिसास गद्दाछौ भुन्या तुमिले बप्तिस्मा ल्हिन स्हक्छौ।” नपुंसकले जबाक दियो, “इसु ख्रिस्टनै परमेसोरका छोरा हुन् भुनि मु बिसास गद्दोछु।”]
38अनि फिलिपले रथ रोख्न लायो, तब फिलिप र तेइ नपुंसक दुबै ओल्ल्या र पानि भया ठौर गया, अनि फिलिपले तेइकन बप्तिस्मा दियो। 39जब तिनुहरु पानिबाट बाइर निस्क्या, तब प्रभुको आत्माले फिलिपकन पक्डेर ल्हिया, र तेइ नपुंसकले फिलिपकन फेरि देख्योन, र तेइ खुसि हुँदै आम्नो बाटो लाग्यो। 40तर फिलिप अस्दोदमै देखला पड्यो, र कैसरिया नपुगुन्जै स्हबै सहरमै राम्मो रैबार स्हुनाउँदै गयो।
اکنون انتخاب شده:
प्रेरित 8: JUML
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2024 (Active), Mother Tongue Translators Society and Wycliffe Bible Translators, Inc. All rights reserved.
