प्रेरित 12
12
हेरोद राजाले मन्डलिका मान्ठकन दुख दिया
1तिँ दिनहरुमै हेरोद राजा अग्रिपाले मन्डलिका कोइ कोइ मान्ठहरुकन पग्डेर तिनुहरुमाथि अत्याचार गन्न लाग्या। 2हेरोदले युहन्नाका दाजु याकुबकन तरबारले मार्न लाया। 3यइ कामले यहुदिहरु खुसि भया देखेर पत्तुरुसकन पक्डन्या तरखर गर्या। यइ कुडा भैइरया बेला अखमिरि रोटाको त्युबारको सुमय छियो। 4हेरोदले पत्तुरुसकन पक्ड्यार झ्यालखानमै हाल्दिया, र मुक्तिको त्युबार पछि पत्तुरुसकन जुन्ताका अगाडि ल्याउन्या बिचार गरेर तिनुको रछ्या गन्न सिपाइका चार ठाउँमै चार चारजुना सिपाइहरु जुम्मा लाइदिया। 5यइगरि पत्तुरुस झ्यालखानमै राखिया, तर तिनुको निम्ति मन्डलिका मान्ठहरुले परमेसोरस्हात बडो जोसिलो भयर प्रार्थना गरिरया छिया।
पत्तुरुस झ्यालखानबाट छुट्या
6हेरोदले पत्तुरुसकन मान्ठका अगाडि ल्याउनु भुन्दा अगेल्लो रात, पत्तुरुस दुइटा स्हाँङ्लाले बानिकन दुइजुना सिपाइहरुका म्हाँजौनै सियाछिया। सिपाइहरु पुनि धेला अगाडि ढुकिकन झ्यालखानको सुरछ्या गरिरया छिया। 7एक्कासि प्रभुका एक सोर्गका रैबार्या देखिया र झ्यालखानका कोठा उज्यालो भया, अनि सोर्गका रैबार्याले पत्तुरुसको कुम हल्लाउँदै, “स्हाँटा उठ!” भुनेर उठाया। तेइबेला पत्तुरुसका हातमै बान्या स्हाँङ्लाहरु चुँडियर छत्तिया। 8सोर्गका रैबार्याले भुन्या, “पाउडो बान र पौला लाउ।” अनि पत्तुरुसले तेइथै गर्या। तिनुले फेरि भुन्या, “तुम्मो ओड्न्या ओडेर मेरो पछि पछि आउ।” 9अनि पत्तुरुस सोर्गका रैबार्याका पछि पछि लाग्यार झ्यालखानबाट बाइर निक्ल्या। तर सोर्गका रैबार्याले गर्या यिँ कुडा स्हाँच्चै हो भुन्न्या तिनुकन थाँ छियोन, तर दर्सन देख्थैछु भुनि तिनुले स्हुच्या। 10जब पैलो ठौरमै र दोर्स्हो ठौरमै लाग्या सिपाइहरुकन न्हाँगेर सहरमै पैन्या फलामे धेलामै पत्तुरुस र सोर्गका रैबार्या पुग्या, अनि तेइ धेलो आपै उग्ड्यो र तिनुहरु बाइर निक्लिया र एक गल्लि पर गयापछि सोर्गका रैबार्याले पत्तुरुसकन छोडिगया।
11तेइबेला पत्तुरुसका चेत खुल्या तब तिनुले भुन्या, “अब मुकन स्हाँच्चिकै थाँ भयो, प्रभुले आम्ना रैबार्याकन पठायर हेरोद राजाको हातबाट र यहुदिहरुले ज्या गन्न खोज्या तिँ स्हबैबाट मुकन छुट्कारा दिया छुन्।”
12यइ कुडा तिनुकन थाँ भयापछि, मर्कुस भुनिन्या युहन्नाकि आमा मरियमका घर गया। ताँइ मथ्थै जुना जुम्मा भैइ प्रार्थना गरिरया छिया। 13पत्तुरुसले धेलो ढक्कढकाउँदा रोदा नाउँ भयाइ कमारि धेलो उगाड्न आइ। 14पत्तुरुसको डाको रयापछि तेइ खुसि भयर धेलो न उगाडि दगुडेर गैइ, “पत्तुरुस धेलामै ढुक्या छुन्” भुनि। 15तर तिनुहरुले भुन्या, “तो बौलिगइस् कि क्या हो?” तर तेइले स्हाँच्चि हो भुनिकन जिद्दि गरि। तब तिनुहरुले भुन्या, “तेइथो भया तिँ पत्तुरुसकन हेरबिचार गन्न्या परमेसोरका रैबार्या हुनान्।”
16तर पत्तुरुसले धेलो ढक्ढकाइ रया। अनि तिनुहरुले धेलो उगाड्या र पत्तुरुसकनै देख्ता तिनुहरु छक्कै पड्या। 17पत्तुरुसले छुबुक्क लाग् भुनि हातले स्हान गर्या, अनि प्रभुले तिनुकन क्यागरि झ्यालखानबाट बाइर ल्याया तेइ तिनुहरुकन भुन्या, “यिँ कुडा याकुब र मन्डलिका बिसासि दाजुभाइहरुकन पुनि भुनिदिनु” भुन्यार तिँ ताँइबाट अक्कै ठौर गया।
18अनि भोलि ब्याना भयापछि पत्तुरुसकन क्या भयो भुनि झ्यालखानको सिपाइहरुका बिचौनो ठुलो हल्ला खल्ला भयो। 19हेरोदले पत्तुरुसकन खोइन पठाया, तर पत्तुरुसकन काँइ पुनि फेला पाड्यानुन्। तेइबिअ झ्यालखानामै हेराल्ला लाग्या सिपाइहरुकन स्होदपुछ गर्या तर केइ पुनि जबाक नदिया हुनाले तिनुहरुकन मार्न लाया।
अनि हेरोद यहुदिया छोडि कैसरिया सहर गैकन ताँइ बैन लाग्या।
हेरोद राजा मर्या
20हेरोद राजा टुरोस र सिदोन देसका मान्ठहरुस्हात जात्ति झोकाया छिया। अनि तिँ दुइ सहरका नेताहरु मिलेर राजास्हात मिलाप गन्न खोज्या। तिनुहरुले राजाकै मान्ठ बलस्तसकन आपुस्हात ल्हियर राजास्हात भेट गद्देउ भुन्या। क्यानकि तिँ दुबै सहरका मान्ठहरुले खान्याकुडा हेरोद राजाको ठौरबाट नै माग्नु पड्डोछियो।
21अनि तोक्या दिनमै हेरोदले राजाको लाउन्या टाला लाइकन मान्ठहरुका अगाडि राजगद्दिमै बसेर अरु मान्ठहरुकन सिछ्या दिया। 22अनि यइ स्हुनेर मान्ठहरुले “यइ त परमेसोरको बोलि हो, मान्ठको बोलि हैन” भुन्यार कोक्काया। 23तर परमेसोरको महिमा नगर्या हुनाले तेइबेलै प्रभुका एक सोर्गका रैबार्याले हेरोदकन हान्या र स्याउँ स्याउँ किडा पडेर मर्यो।
24तर परमेसोरको बचन फिँजिदै गयो र मथ्थैले बिसास गर्या।
25बारनाबास र साउल आम्नो काम स्हकेर यरुसलेमबाट फर्क्या। अनि तिनुहरुले मर्कुस भुनिन्या युहन्नाकन पुनि स्हातै ल्हिया।
اکنون انتخاب شده:
प्रेरित 12: JUML
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2024 (Active), Mother Tongue Translators Society and Wycliffe Bible Translators, Inc. All rights reserved.
