Matta 8
8
Yesu A Gung Nǝb Nɨ A Mwata Mwataɨ
(Mar 1:40,41)
1Kwama Yesu a gǝla a dʌbʌl yemi, nǝbɔ a lada nyɔ na a bwang gǝmɨ. 2Kaa balɨ bʊtɔgɔ a mwata mwataɨ a bɛ ba jʊng a kǝga gǝn, nǝngɔ a sʊwa gɔ, “Tɛlalɔ, na ń jǝlaɨ, mʊ nǝn kwaan nɨ mʊ gung i lɛɨ sǝ n yǝlam sagsag.” 3Nǝngɔ Yesu a gung kang gǝnɔ a ke gǝn nǝnɨ gɔ, “N jǝla, gun.” Tʌgo a kang a daa gɔ nǝngɔ a gun a bɔɔla mwatatǝm gǝnɔ gǝmɨ. 4Nǝngɔ Yesu a sʊwa gǝn gɔ, “Bɛ ka ń sʊwa lɛ kaa nǝl. A laa jǝl yɔ, ya nʊng dul mʊnɔ a daa nǝkǝlagɔ woi, sǝ ń tǝla twama, kanga Musa a nʊng gɔ ja maaɨ, sǝ a yǝlam nǝtǝm nyiyo a gungtǝm mʊnɔ gǝm.”
Yesu A Gung Bʊla Kaa Dʊʊ Sʊwajaamɨ
(Luk 7:1-10)
5Nǝn kwama Yesu a dɔ Kafarnahumi, kaa dʊʊ sʊwajaam a bɛ ba bʌ gǝn tɨkalɨ gɔ, 6“Tɛlalɔ, bwɛ jwaalɛ mǝndɨ daam a daa fiyodaalɨ a lɔ, mɨ dwal lɛ a yǝla, gʌ lɛ dangǝn.”
7Nǝngɔ Yesu a sʊwa gɔ, “Mǝ yɔ yɔ sǝ n gung gǝn.”
8Nǝngɔ dʊʊ sʊwajaamɔ a sʊwa gǝn gɔ, “Tɛlalɔ, mǝ la bɔ nyɔ mʊ bɛ lɛ a lɔ mɨɨ. Sʊwa kɛl, bwɛ jwaalɛ mǝndɨ nyʊwa nyʊwa lǝma. 9Mǝ tǝmɨ mǝ na a kang fɔlɔn kaa nǝlɨ, mǝ nǝngǝn nǝn sʊwajaamtɨnɔ a mʊgɔ fɔlɔn mɨ. Mǝ sʊwa sʊwa kaa mǝʊ, ‘Yɔ,’ a yɔ. Mǝ sʊwa sʊwa kaa mǝʊ, ‘Ba,’ a bɛ. Mǝ sʊwa sʊwa kaa bwɛ jwaalɛ mɨɨ mǝʊ, ‘Maa nyɔ,’ a maa.”
10Nǝn kwama Yesu a nyʊwa jʊ nɨɨ, a ta kang a nyiyo, a yǝla a sʊwa nǝbɔ bwang gǝm lɛɨ gɔ, “N bɨlǝngǝn mǝ sʊwa jen nɛɨ, a mʊgɔ nǝbɔ Israilaɨ mǝ nya bɔ gʌleng nǝ nǝtǝm bɨlǝngkɛl wo na nʊ nɨ! 11Mǝ sʊwa jen nɛ nǝbɔ a lada bɛ bɛ a twal jǝbɔ diyeng, ba yɨ a ja jǝjalǝn jǝbɔ Ibrahim, jǝbɔ Ishaku jǝbɔ Yakubu a mʊgɔ fɔlɔn lɔ Kwaamaɨ. 12Nǝb nɨ na yǝlam nǝb fɔlɔn lɔ Kwaamaɨ lɛ ja kɔɨ,#8:12 Daa nɨ gǝ nʊng nǝbɔ Israilaɨ, wʊnɨ a kɔ yotǝm Yesui. jǝ mal ji mal a mʊgɔ kumtojili, a daa nɨ jǝ jim wi lɛ jǝbɔ kʊʊtǝm nungʌni.”
13Nǝngɔ Yesu a sʊwa nǝ dʊʊ sʊwajaam nɨ gɔ, “Yilo, kanga mɔ nǝ bɨlǝngkɛlɨ, maa maa nyɔ!” Tʌgo a kang nǝngɔ bwɛ jwaalɛ gǝnɔ a gun a bɔɔla gǝnɔ gǝmɨ.
Yesu A Gung Yul Bitrusi
(Mar 1:29-31; Luk 4:38,39)
14Nǝn kwama Yesu a dɔ lɔ Bitrusi, nǝngɔ a kuwo yul Bitrusi, wʊnɨ nǝn bɛshenii daam a wɨlǝn. 15Nǝngɔ a ke kang gǝnɨ nǝngɔ bɛshenigɔ a bǝla gǝnɨ. Nǝngɔ a gun a nǝ gǝn jǝjalǝnɨ.
Yesu A Gung Nǝbɔ A Lada Nǝn Kwaamɨ
(Mar 1:32-34; Luk 4:40,41)
16Nǝn kwaamɨ nǝngɔ nǝbɔ a bɛ Yesu gǝm nǝn nǝbɔ nǝn yʊwa bwɨlaɨ, nǝngɔ a sʊwa kɛlɨ, nǝngɔ yʊwa bwɨlagɔ a bǝla jii. A gung nǝb nɨ gwam mɨ kwamɨgǝnɨ. 17Jʊ nɨ a bwɨ sǝ a yii kɛlɔ ja sʊwa a nyiyo nǝkuwotǝmkǝga Ishayaɨ gɔ,
“A dem bɔɔlatɨn bǝnɔ,
a jǝgǝm twɨlatɨn bǝnɔ.”
Nǝb Nɨ Sʊwa Lɛ Gɔ Jǝ Bwangtǝn Bwang Yesui
(Luk 9:57-62)
18Nǝn kwama Yesu a kuwo nǝbɔ a lada a bɛ ba kang gǝnɨ, nǝngɔ a sʊwa bɛtɔ mɛlalɨ gǝnɔ gɔ jǝ yab wɨmagɔ. 19Nǝngɔ kaa nǝ mɛlalɨ diil a bɛ a daa gǝ woi, a sʊwa gǝn gɔ, “Feyi, daa nɨ mʊ yɔm lɛ gwamɨ, mǝ bwang mʊn bwang.”
20Yesu a sʊwa gǝn gɔ, “Fʌlʌmtɨnɔ nǝn bʊwantɨn, lǝbɨtɨnɔ nǝn lɔtɨn. A Bʊla Nǝlɨ mɨ nǝn daa nɨ yam dul gǝnɔ lɛɨ.”
21Nǝngɔ kaa bwɛ mɛlalɨ gǝnɔ a sʊwa Yesu gɔ, “Tɛlalɔ, bǝla ɨ wo n fʌlʌm tɛtɛ mɨ dɨn!”
22Nǝngɔ Yesu a sʊwa gǝn gɔ, “Bwang mɨ. Bǝla bʌlʌntɨnɔ ya fʌl bʌlʌn jinɔ.”
Yesu A Ga Yʊwa Mwɛmɔ
(Mar 4:35-41; Luk 8:22-25)
23Nǝngɔ Yesu a dɔ tɨyamwɛngɔ jǝbɔ bɛtɔ mɛlalɨ gǝnɔ dakinii. 24A kʊta bɔ, yʊwa bwɨlagɔ a gun a mʊgɔ wɨma. Mwɛmɔ mʊla lɛ, dɔ mʊgɔ tɨyamwɛngɔ lɛ, Yesu daa dum lɛ. 25Nǝngɔ bɛtɔ mɛlalɨgɔ a shu ya gung gǝnɨ, nǝngɔ ja sʊwa gǝn gɔ, “Tɛlalɔ, bʊʊ nǝn bǝn! Ya bǝ bʊla lɛ.”
26Nǝngɔ a sʊwa ji gɔ, “Jǝ́ nǝb nǝtǝm bɨlǝngkɛl nǝn dǝm nyɔ! Wɛ a bwɨ jǝ́ nyʊwa taal lɛɨ?” Nǝngɔ a gun a ga yʊwa mwɛmɔ jǝbɔ mwɛmɔ mʊla lɛɨ gǝm wulongi, yʊwagɔ jǝbɔ mwɛ nɨ mʊla lɛɨ, a tɨ.
27Nǝbɔ a ta kang a nyiyo jǝ bʌbko lɛ gɔ, “Nʊ nɨ nuwo yʊwagɔ jǝbɔ mwɛ wɨmagɔ nyʊwa gǝn nɛɨ?”
Yesu A Gung Nǝb Nɨ Nǝn Yʊwa Bwɨlaɨ
(Mar 5:1-20; Luk 8:26-39)
28Nǝn kwama Yesu a yabǝm wɨmagɔ a bɛ a kʌng wini a tǝm Garasinaɨ, nǝngɔ nǝbɔ yo nǝn yʊwa bwɨlaɨ ja jel a kalfʌto ja bɛ a daa gǝ woi. Ja yǝlam jǝ taal, nǝbɔ mɨ mwɨ lɛ a yɔ a golagɔ jǝ woi. 29Nǝngɔ ja ga kwaalɨ gɔ, “Bʊla Kwaamaɨ, n wɛ a mʊrka nǝn jǝbɔ mʊɨ? Mʊ bɛ sǝ ba ń nǝ nǝn gaalan kumɔ a lǝga bɔ a laɨ?”
30Daagɔ a kʊta bɔ jǝbɔ daa nyiyolitɨnɔ jam jam lɛɨ. 31Nǝngɔ nǝblaamɔ a kela Yesu gɔ, “Na ń jǝg nǝnɨ, bɛ ń tʊng nǝn a daa nyiyolitɨnɔ woi.”
32Nǝngɔ a sʊwa ji gɔ, “Jǝ́ yɔ.” Nǝngɔ ja bǝla nǝbɨɨ, ya ja dɔ nyiyolitɨnɨ, nǝngɔ kʌm nyiyolitɨnɔ a mwala yagɨ yagɨ a gǝlalangɔ gǝmɨ, ya jǝ tǝla a mʊgɔ wɨmaɨ, jǝ bʊlala wo a mʊgɔ mwɛɨ. 33Nǝngɔ nǝb nɨ tɔɔ nyiyolitɨnɔ lɛɨ, ja mwala ja dɔ mʊgɔ tuulɔngɨɨ, ja sʊwa nǝbɔ fulon kanjǝl nɨ a bwɨ nǝn nǝb yʊwa bwɨlan nɨɨ. 34Nǝngɔ nǝbɔ gwam a jel yotǝm Yesui. Nǝn kwama ja tǝga gǝnɨ, nǝngɔ ja kela gǝn gɔ a bǝla tǝm jini.
اکنون انتخاب شده:
Matta 8: DBD
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2024 Luke Initiative for Scripture Translation
