यूहन्‍ना 5

अड़तीस साला ची बिमारी ठीक हुली

1कोच्छ समय चे बाद, यहूदिया चा हेक तेंहवार हुता ते ईशु यरुशलेम नु गेला। 2यरुशलेम मां भेङ फाटक चे गोढु हेक कोण्ड छै, जको इब्रानी भाषा मां बैतसैदा किहवावे, ओचे चुधारु पाँच ओसारे छी। 3यांचे मां ब़ोहत सारे बिमार, अन्धे, लंगड़े ते सूखे अंग आले पाणीया चे हलणे ची आस मां पले रेहते 4कांकि वे सोचते नरीकारा चे चुणने आले समय उपर स्वर्ग़दूत कोण्ड मां उतरती कर पाणीया नु हलावे, पाणीया चे हलते ही जको कुई ओचे मां पेहले उतरी ऊं ठीक हुती जई, चाहे ओची कुई वी बिमारी कां ना हुवीया।#5:4 कोच्छ हस्तलेखा मां हा वाक्य ना मिली 5उठे हेक बन्दे हुते जको अड़तीस साला कनु बिमारी मां हुते। 6ईशु ने ओनु पले आले नु ङेखती कर ते जाणती कर कि ओ ब़ोहत समय कनु ये दशा मां पला, ओकनु पूछले, “का तु ठीक हुवणे चाहवी?”

7ओह बिमारा ने केहले, “हे गुरु जी, माये गोढु कुई वी बन्दे कोनी कि जिसे बेले पाणी हलाले जाये तां मनु कुण्डे मां उतारो। पर माये पुज़ते-पुज़ते ङुजा माये कनु पेहले उतरती जाये।”

8ईशु ने ओनु केहले, “ऊठ, आपणी खाट चा ते टोर-फेर।” 9ऊं बन्दे तुरन्त ठीक हुती गेले, ते आपणी खाट चती कर टुरु फिरु लाग़ला।

ओ ङिओ सब्त चा ङिओ हुता। 10ऐवास्ते यहूदी नेते ओनु किहुं लाग़ले, “आज़ तां सब्त चा ङिओ छै, तनु खाट चवणी वाजिब कोनी।”

11ओ बन्दे ने वां लौका नु केहले, “जेह्णे मनु ठीक करले ओणे ही मनु केहले, ‘आपणी खाट चा ते टोर-फेर।’ ”

12वाणे ओकनु पूछले, “ऊं बन्दे कूण छै, जेह्णे तनु केहले, ‘खाट चा ते टोर-फेर?’ ”

13पर जको ठीक हुती गेला ओ ना जाणता कि ओ कूण छै जेह्णे ओनु ठीक करले, कांकि वे जग़हा मां घणी भीड़ हुवणे चे वजह ईशु उठु चाह्‍ला गेलता।

14यां बाता चे बाद ईशु ने ओनु मन्दरा मां ङेखले ते ओनु केहले, “ङेख, तु चंगा हुती गेला। बल्ति पाप ना करियो कङी इसड़े ना हो कि ऐकनु भारी आफत दुधे उपर आती पड़े।”

15ओह बन्दे ने जती कर यहूदी नेता नु केहती ङिले, “जेह्णे मनु ठीक करले ओह ईशु छै।” 16ये वजह कनु यहूदी ईशु नु सताऊं लाग़ले, कांकि ओह इसड़े-इसड़े काम सब्त चे ङिओ करता। 17ऐचे उपर ईशु ने वानु केहले, “माया ब़ा हमा तक काम करे, ते मैं वी करे।”

18ऐ वजह कनु यहूदी होर वी ज्यादा ओनु मारणे ची कोशिस करु लाग़ले, ओह ना बल्कि सब्त चे ङिओ ची विधि तरोड़ता, पर नरीकारा नु आपणा ब़ा केहती कर, आपणे आप नु नरीकारा चे बराबर ठहराता।

पूता चा अधिकार

19ऐचे उपर ईशु ने वानु केहले, “मैं तम्हानु सच्‍च-सच्‍च किहे पला, पूत आपणे आप कहीं वी ना कर सग़ी, सेर्फ ऊं जको ब़ा नु करते ङेखे, कांकि जिसे-जिसे काम ब़ा करे वानु पूत वी वे ही रीति लारे करे। 20कांकि ब़ा पूता लारे प्रेम करे ते जको-जको काम ओह आप करे वे सारे आपणे पूता नु ङिखाणे। ते याकनु वी बङे काम ओनु ङिखाणी, कि तम्ही अचम्भा करा। 21कांकि जिंवे ब़ा मरले आला नु उठाणे ते जीते करे, यूं करती पूत वी जानु चाहो ओनु जिवावे। 22ते ब़ा काया वी न्यां ना करी, पर न्यां करने चे सारे काम पूता नु सोंपती ङिले, 23ऐवास्ते कि सारे लौक जिंवे ब़ा चा कद्दर करी यूंही पूता चा वी कद्दर करा। जको पूता चा कद्दर ना करी ओह ब़ा चा जेह्णे ओनु भेज़ले कद्दर ना करी।

24“मैं तम्हानु सच्‍च-सच्‍च किहे पला, जको माया वचन सुणती कर माये भेज़णे आले उपर विश्‍वास करे अनन्त जीवन ओचा छै ते ओचे उपर सजा ची आज्ञा नी हुवी पर ओ मौत कनु पार हुती कर हमेशा ची जीन्दगी मां घिरती चुकला। 25मैं तम्हानु सच्‍च-सच्‍च किहे पला, ओह समय आवे पला ते हमा छै, जाये मां मरले आले नरीकारा चे पूता ची अवाज सुणे ते जको सुणे वे जिंवे। 26कांकि जिसी रीति लारे ब़ा आपणे आप मां जीवन राखे, वे रीति चे लारे ओणे पूता नु वी अधिकार ङिला कि आपणे आप मां जीवन राखो। 27बल्कि ओनु न्यां करने चा वी अधिकार ङिला ऐवास्ते मैं इन्साना चा पूत छै।

28“ऐचे कनु अचम्भा ना करा, कांकि समय आवे पला कि जितने कब्रा मां छी ओची अवाज सुणती कर निकलती आवे। 29जेह्णे भलाई करली वे जीवन चे पुनरुत्थान वास्ते जीते हुती जाये, ते जेह्णे बुराई करली वे ङण्ड चे पुनरुत्थान वास्ते जीते हुती जाये।

ईशु चे बारे मां ग़वाही

30“मैं आपणे आप कहीं वी ना कर सग़ी, जिंवे सुणे उसड़ा ही न्यां करे ते माया न्यां सच्‍चा छै, कांकि मैं आपणी मर्जी ना पर आपणे भेज़णे आले ची मर्जी चाहवे।

31“अगर मैं आप ही आपणी ग़वाही ङिये, ते माई ग़वाही कुई सच्‍ची नी मनी। 32हेक नेरा छै जको माई ग़वाही ङिये, ते मनु पता छै जको माई ग़वाही ङिये वा सच्‍ची छै। 33#यूह 1:19–27; 3:27–30तम्ही यूहन्‍ना कनु पूछवाले ते ओणे सच्‍चाई ची ग़वाही ङिली। 34पर मैं आपणे बारे मां बन्दे ची ग़वाही ना चाहवी, तां वी मैं ये बाता ऐवास्ते किहे कि तम्हानु उद्धार मिले। 35यूहन्‍ना तां ब़लता ते चमकता हुला ङीवा हुता, ते तम्हानु थोड़ी देरी तक ओचे सोज़ले मां खौश रेहणे आच्छे लाग़ले। 36माया कनु हेक नेरा ग़वाह छै, जाई ग़वाही यूहन्‍ना ची ग़वाही कनु बङी छै। कांकि जको काम ब़ा ने मनु पुरे करने वास्ते सोंपले ईं काम जको मैं करे वे माये ग़वाह छी कि मनु ब़ा ने भेज़ले। 37#मत्ती 3:17; मरकु 1:11; लूक 3:22ते ब़ा जेह्णे मनु भेज़ले ओणे ही माई ग़वाही ङिली। तम्ही ना कङी ओचा शब्द सुणला ते ना ओचा रुप ङेखला, 38ते ओचे वचना नु मना मां टिकाती ना राखा, कांकि जानु ओणे भेज़ले ओचे उपर विश्‍वास ना करा। 39तम्ही पवित्रशास्त्र मां सोधा कांकि तम्ही समझा कि ओचे मां तम्हानु अनन्त जीवन मिले। ते ओही पवित्रशास्त्र छै जको माई ग़वाही ङिये, 40बल्ति वी तम्ही अनन्त जीवन गेहणे वास्ते माये गोढु आणे ना चाहवा।

41“मैं बन्दा कनु कद्दर ना चाहवी, 42पर मैं तम्हानु जाणे कि तम्चे मां नरीकारा चा प्रेम कोनी। 43मैं आपणे ब़ा चे नांवा कनु आला, ते तम्ही मनु ना मना। अगर कुई आपणे ही नांवा कनु आवे, तां ओनु तम्ही मनती गिहा। 44तम्ही माये मां विश्‍वास किवें कर सग़ा? कांकि तम्ही तां आपस मां हेके ङुजे चा कद्दर चाहवा ते ओ कद्दर नु तां ना ङेखा जको सेर्फ नरीकारा कनु आवे। 45इसड़े ना सोचा कि मैं ब़ा नरीकारा चे आग़ु तम्हानु दोषी ठहरावी। जको तम्हानु दोषी ठहरावे ओ तां मूसा छै, जाये उपर तम्ही आपणी आस लाली भिले। 46अगर तम्ही मूसा उपर विश्‍वास करा, तां तम्ही माये उपर वी विश्‍वास करा हा, कांकि ओणे माये बारे मां लिखले। 47जिसे बेले तम्ही, जको मूसा ने लिखले ओचे उपर तम्ही विश्‍वास ना करा, ते बल्ति माये वचना उपर किवें विश्‍वास करा?”

اکنون انتخاب شده:

यूहन्‍ना 5: ODR

های‌لایت

به اشتراک گذاشتن

مقایسه

کپی