اعمال 17
17
پولُس تے سِیلاس تھِسّلُنِیکے ءچ
1اِیندے بعد پولُس تے سِیلاس، امفِپُلِس تے اَپُلّونیہ ءچوں تھیندے ہوئے تھِسّلُنِیکے آئے جِتھاں یہُودیاں دا ہِک عبادت خانہ ہا۔ 2پولُس آپنڑے دستور دے مطابق عبادت خانے ءچ گِیا تے ترے سبتاں تئیں خُدا دے کلام ءچوں اُنہاں نال بحث کریندا ریہا۔ 3او اُوندا مطلب واضح کریندا تے ثابت کریندا ہا جو ”المسیح دا ڈُکھ چاوݨ تے مُردیاں ءچوں زندہ تھیوݨ لازمی ہا“ تے ایہ جو ”جِیں یسُوع دی تبلیغ مَیں کریندا ہاں اُوہو المسیح ہے۔“ 4کُجھ یہُودی اِیں گالھ کُوں مَن تے پولُس تے سِیلاس نال رَل گئے تے اِینویں ای بہُوں سارے خُدا پرست یُونانی تے معزز عورتاں وی۔
5پر یہُودیاں حسد دے سببّوں بازاری لوکاں ءچوں کُجھ بدمعاشاں کُوں آپنڑے نال گِھدا تے شہر ءچ ہنگامہ شروع کر ڈِتا تے یاسون دے گھر اُتے حملہ کر ڈِتا کیوں جو پولُس تے سِیلاس کُوں لوکاں دے سامنڑے گِھن آوݨ چاہندے ہَن۔ 6پر جِیں ویلے اُنہاں کُوں او نہ مِلے تاں یاسون تے بہُوں سارے ڈُوجھے مسیحی بِھرانواں کُوں گِھیل تے شہر دے حاکماں دے کولھ گِھن گئے تے چیخ تے آکھیا ”او بندے جِنہاں ساری دُنیا کُوں اُلٹ پُلٹ کر ڈِتے، ہُنڑ اِتھاں وی آ گئے ہِن، 7تے یاسون اُنہاں کُوں آپنڑے گھر ءچ ٹِکایا ہے۔ ایہ سبھ لوک رومی بادشاہ قیصر دے حُکماں دی مخالفت کریندن تے آدھے ہِن جو بادشاہ تاں کوئی بِیا ای ہے جِیندا ناں یسُوع ہے۔“ 8ایہ گالھ سُنڑ تے عوام تے شہر دے حاکم گھبرا گئے۔ 9تے اُنہاں یاسون تے باقی مسیحی لوکاں کُوں ضمانت اُتے چھوڑ ڈِتا۔
پولُس تے سِیلاس بیرِیہ ءچ
10رات تھیندے ای مسیحی بِھرانواں پولُس تے سِیلاس کُوں اُتھوں کنُوں بیرِیہ دو روانہ کر ڈِتا۔ جِیں ویلے او اُتھاں پُجے تاں یہُودی عبادت خانہ ءچ گئے۔ 11ایہ لوک تھِسّلُنِیکے دے لوکاں کنُوں زیادہ چنگے ہَن کیوں جو اُنہاں پیغام کُوں بہُوں شوق نال قبول کیتا تے او ہر روز خُدا دے کلام دا مطالعہ کریندے ہَن جو واقعی ایہ گالھیں اِینویں ای ہِن یا نئیں۔ 12بس بہُوں سارے یہُودی تے معزز یُونانی مرد تے عورتاں وی اِیمان گِھن آئے۔ 13جِیں ویلے تھِسّلُنِیکے دے یہُودیاں کُوں پتہ لگیا جو پولُس بیرِیہ ءچ خُدا دے کلام دی تبلیغ کریندا پِیا ہے تاں او اُتھاں وی آ پُجے تے لوکاں کُوں ہنگامہ کرݨ اُتے اُکساوݨ لگے۔ 14وَل بِھرانواں فوراً پولُس کُوں سمندر دے کنڈے دو روانہ کر ڈِتا پر سِیلاس تے تِیمُتِھیُس بیرِیہ ءچ ای ریہے۔ 15جیہڑے لوک پولُس دے نال ساتھی دے طور تے گئے، او اُونکُوں اتھینے ءچ چھوڑ تے اِیں حُکم نال وَل آئے جو سِیلاس تے تِیمُتِھیُس جلدی تُوں جلدی پولُس دے کولھ آوݨ۔
پولُس اتھینے ءچ
16جِیں ویلے پولُس اتھینے ءچ اُنہاں دا اِنتظار کریندا پِیا ہا تاں ایہ ڈیکھ تے جو سارا شہر بُتاں نال بھریا پِیا ہے، اُوندا ہاں سڑ گِیا۔ 17اِیں واسطے او عبادت خانہ ءچ یہُودیاں تے خُدا پرست یُونانیاں نال بحث کریندا راہندا ہا تے اُنہاں کُوں وی جیہڑے اُونکُوں ہر روز بازار ءچ مِلدے ہَن۔ 18کُجھ اِپکُوری تے ستوئیکی فیلسُوف#17:18 اِپکُوری لوک خوشی حاصل کرݨ کُوں زندگی دا مقصد سمجھدے ہَن جِیں ویلے جو ستوئیکی آپنڑے آپ کُوں اِخلاق تے ضبط ءچ رکھنڑا زیادہ اہم سمجھدے ہَن۔ اُوندے نال بحث ءچ پے گئے۔ اُنہاں ءچوں کُجھ آکھیا، ”ایہ بکواسی کیا آکھنڑ چاہندا ہے؟“ کُجھ ایہ آکھنڑ لگے جو ”ایہ تاں اجنبی دیوتیاں دی خبر ڈیوݨ آلا لگدے۔“ کیوں جو پولُس یسُوع تے قیامت دی خوشخبری ڈیندا ہا۔ 19وَل او اُونکُوں شہر دی مجلس ءچ گِھن گئے جیہڑی اریوپگُس ناں دی پہاڑی اُتے تھیندی ہئی تے آکھنڑ لگے ”ساکُوں ڈسا جو ایہ نوِیں تعلیم جیہڑی تُوں ڈیندیں کیا ہے؟ 20اساں تیڈے مُنہ کنُوں بہُوں حیران کرݨ آلے گالھیں سُنڑدے پئے ہیں۔ اساں ایہ جاننڑاں چاہندے ہیں جو اِنہاں دا کیا مطلب ہے؟“ 21(کیوں جو اتھینے دے لوک کیا مقامی کیا پردیسی، آپنڑا سارا وقت صرف نویں نویں گالھیں سُنڑݨ یا سُنڑاوݨ ءچ لنگھیندے ہَن۔)
22پولُس اریوپگُس دی مجلس دے اَدھ ءچ کھڑا تھی تے آکھیا جو ”اتھینے آلیو! مَیں ڈیدھا ہاں جو تُساں ہر گالھ ءچ بہُوں مذہبی ہیوے۔ 23کیوں جو جِیں ویلے مَیں تُہاڈے شہر ءچ پِھردا پِیا ہم تاں میڈی نِگاہ تُہاڈے معبُوداں اُتے وی پئی۔ مَیں ڈِٹھا جو ہِک قُربان گاہ اُتے ایہ لِکھیا ہا ’نا معلوم خُدا کیتے۔‘ بس جِینکُوں تُساں بغیر جانڑدے ہوئے پُوجدے ہیوے، مَیں تُہاکُوں اُونہئی دی خبر ڈیندا ہاں۔
24جِیں خُدا دُنیا تے اُوندے سارے چیزاں کُوں پیدا کیتا او اسمان تے زمین دا مالک ہے۔ او ہتھ دے بنڑائے مندراں ءچ نئیں راہندا۔ 25او اِنسان دے ہتُھوں خدمت نئیں گِھندا کیوں جو او کہیں چیز دا مُتھاج نئیں، او تاں سارے اِنساناں کُوں زندگی، ساہ تے سارا کُجھ ڈیندے۔ 26اُوں ہِک بندے ءچوں لوکاں دی ہر قوم کُوں پیدا کیتا تاں جو پُوری زمین آباد تھیوے، تے اُوں اُنہاں دی زندگی دا وقت تے راہنڑ کیتے حد بندی مقرر کیتی۔ 27خُدا ایہ سبھ کُجھ کیتا، تاں جو او اُونکُوں گولھنڑ تے اُوندے نیڑے آ تے اُونکُوں پا گِھننڑ، بھانویں او ساڈے ءچوں کہیں کنُوں دُور نئیں۔ 28کیوں جو اساں اُوندے ءچ زندہ، ٹُردے پِھردے تے موجود ہیں جِینویں جو تُہاڈے کُجھ شاعراں وی آکھیا ہے جو ’اساں تاں اُوندی اولاد وی ہیں۔‘
29جے اساں خُدا دی اولاد ہیں تاں ساکُوں ایہ نئیں سوچنڑاں چاہیدا جو خُدا تعالیٰ دی ذات سونے، چاندی یا پتھر دی مُورت ہے جیہڑی کہیں اِنسان دی ماہرانہ کاریگری ہووے۔ 30خُدا ماضی دی ایجھی جہالت کُوں نظرانداز کر ڈِتا پر ہُنڑ او سارے اِنساناں کُوں ہر جاہ حُکم ڈیندے جو توبہ کرݨ۔ 31کیوں جو اُوں ہِک ڈینہہ مقرر کر ڈِتے جِیں ویلے او عدل نال ساری دُنیا دی عدالت اُوں بندے دے ذریعے کریسی جِینکُوں اُوں مقرر کیتا ہے۔ تے اُونکُوں مُردیاں ءچوں زندہ کر تے ایہ گالھ سارے اِنساناں اُتے ثابت کر ڈِتی ہے۔“
32جِیں ویلے لوکاں مُردیاں دی قیامت دے بارے ءچ سُنڑیا تاں اُنہاں ءچوں کُجھ اِیں گالھ کُوں کِھل ءچ اُڈا ڈِتا پر کُجھ آکھیا جو ”اساں اِیں موضوع تے وَل کہیں ویلے تَیں تُوں سُنڑسوں۔“ 33اِیں واسطے پولُس اُنہاں ءچوں نِکل گِیا۔ 34پر کُجھ لوک پولُس نال آ مِلے تے اِیمان گِھن آئے۔ اُنہاں ءچوں ہِک دِیونُسییُس اریوپگُس دی مجلس دا رُکن ہا تے دَمَرِس ناں دی ہِک عورت ہئی تے اُنہاں دے علاوہ بئے وی ہَن۔
اکنون انتخاب شده:
اعمال 17: SKRV
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Modern Central Saraiki Bible © 2024 Strategic Resource Group
