युहन्ना 9
9
जोलोमसोङको कान्हाहेङ इसु एल्पाका
1एअ्नि इसु हानिकाताङ पालाउ एअ्मि जोलोमसोङको कान्हाहेङ तिङहि। 2वाको चात्यागेलाइ वासेहेङ हिअ्हि, “मास्टर, हासु पाप पाहि? या बे याको आबा आमाइ? कालाउ या कान्हा जोन्मिहि।” 3इसु दोअ्हि, “नाते या पाप पाहि ना याको आबा आमाइ, कालाउबुङ परमेस्वरको काम इदोइ द्याङता देखाल ज्याको दोअ्तेङ दोङ वा कान्हा जेङका। 4कासेहेङ दिङगिल्काको कामगेलाइ केलाइ दिना हिलाउ दोङ पालिगोयाङ। न्हिसिङ जेङकान्हुअ्सो हासुङ काम पालि माद्वावा। 5दुनियाता हिपाधाउ कादोङ दुनियाको फाइसालाम्का।”#मत्ति ५:१४; युहन्ना ८:१२
6इदोइ काथा दोअ्तेङ वा भोनोता थोअ्हि रो थोअ्चिहोइ भोनो मोअ्तेङ कान्हाको मिँता लाइपिहि। 7कालाउ वा इङकोहेङ दोअ्हि, “हाने, सिलोआमको (जाइको माने दिङगिल्का) चावान्दिता हानितेङ झा।” इङको हानितेङ झाहि रो तिङका जेङतेङ घुरिहि।
8इङकोको भेरपाकोलाइ रो इङकोहेङ भिक र्हेका तिङकालाइ दोअ्हि, “योम्तेङ भिक र्हेका द्याङ हाइ याआङ माको?”
9आधिमि दोअ्हि, “या इङकोङ।” बोमि दोअ्हि, “माको, या इङकोङभाइका तिङखे।” इङको दोअ्हि, “एइ, का इङकोङ।”
10कालाउ एम्बालाइ इङकोहेङ हिअ्हि, “नाङको मि हेसापा हेन्हाहि कुनु?”
11इङको दोअ्हि, “इसु दोअ्का एअ्मि द्याङ भोनो मोअ्तेङ काङको मिँता लागाइपितेङ दोअ्हि, ‘सिलोआमको पोखरिता हानितेङ झा।’ कालाउ इन्ता हानितेङ झाघा रो का तिङका जेङघा।”
12एम्बालाइ इङकोहेङ हिअ्हि, “इङको हिसो हि कुनु?”
इङको दोअ्हि, “का माग्याङका।”
13इङकोन्हुअ्सो कान्हा जेङका इङको द्याङहेङ एम्बालाइ फरिसिगेलाइकोता चुमाहि। 14जेदोङ दिना इसु इङकोको मिँ हेपिका हिघाहि, इङको माइसाका दिना हिघाहि। 15फरिसिगेलाइ इङकोहेङ हिअ्हि, “ना हेसापा तिङका जेङन्हा?” इङको एम्बालाइहेङ दोअ्हि, “वा काङको मिँता भोनो मोअ्तेङ लाइपिहि, कालाउ का झाघा रो तिङका जेङघा।”
16फरिसिगेलाइता आधिमि दोअ्हि, “इङको द्याङ परमेस्वर पाहासो लोका माको, हाइपानु इङको माइसाका दिना मामानिखे।”
कालाउबुङ आधिमि दोअ्हि, “हेसापा पापि द्याङ इस्का कामगेलाइ पालि द्वावा?” एसापा एम्बालाइको माझाता बेमेल जेङलि हानिहि।
17फरिसिगेलाइ इङकोहेङ आरोङ हिअ्हि, “वा नाङको मि हेपिहि, एला वाको बारेता ना हाइ दोअ्खेना?”
इङको दोअ्हि, “वा परमेस्वर पाहासो धुइका द्याङ।”
18मिँ तिङका द्याङको आबा आमाइहेङ काइतेङ माहिअ्पाधाउ यहुदिगेलाइ इङको कान्हा हिघाहि रो तिङका जेङहि दोअ्तेङ खान्धुर मापाहि। 19कालाउ एम्बालाइ ओबालाइहेङ हिअ्हि, “हाइ या नेलाइकोङ चान जाइ जोलोमसोङ कान्हा हिघाहि? कालाउ हेसापा इङको तिङलि दोका जेङहि?”
20इङकोको आबा आमाइ एम्बालाइहेङ दोअ्हि, “एइ, या केलाइको चान रो या जोलोमसोङ कान्हा हिघाहि। 21कालाउबुङ या हेसापा तिङका जेङहि रो याको मि हासु हेपिहि इङको केलाइ माग्याङ। इङकोको बोइसा थेम्का हि, इङकोहेङ दोङ हिअ्सु। ताइको बारेता इङको ताइमिङ दोअ्तावा।” 22इङकोको आबा आमाइ यहुदि आगुवागेलाइदोफा थिघाखे। हाइदोनु जाइ वासेहेङ ख्रिस्ट दोअ्तेङ मन्जुर पाखे, इङकोहेङ कचहरिसाअ्सो ओल्हिपालि गोयाङ दोअ्तेङ एम्बालाइ लाम्फादोङ राजि जेङका हिघाखे। 23इदोङभाअ्सिङ इङकोको आबा आमाइ “याको बोइसा जेङका हि, यासेहेङ दोङ हिअ्सु” दोअ्का हिघाखे।
24कालाउ एम्बालाइ इङको कान्हा द्याङहेङ न्हेखे काइतेङ दोअ्हि, “परमेस्वरहेङ पारताप पि। केलाइ गिन्हाखे, इदोइ द्याङ पापि।”
25इङको दोअ्हि, “वा पापि हि बे मान्थु, का माग्याङका। एलोङ काथा खिनिङ का गिखा, का कान्हा हिघाखा, कालाउबुङ एला तिङका जेङघा।”
26एम्बालाइ इङकोहेङ दोअ्हि, “वा नासेहेङ हाइ पाहि? वा नाङको मि हेसापा हेपिहि?”
27इङको एम्बालाइहेङ दोअ्हि, “का नेलाइहेङ लाम्फादोङ दोअ्होइका, कालाउबुङ नेलाइ माहिङसुन्हा। एला आरोङ हाइपालि इङकोङ काथा हिङलि भोसुखेना? नेलाइ बुङ वाको चात्या जेङलि भोसुखेना बे हाइको?”
28एम्बालाइ इङकोहेङ चेरतेङ दोअ्हि, “ना कि वाको चात्या, कालाउबुङ केलाइ ते मोसाको चात्या। 29केलाइ गिन्हाखे मोसादोफा परमेस्वर धुइका हिघाहि, कालाउबुङ केलाइ मागिन्हाखे इदोइ द्याङचाहिँ हिताको।”
30इङको एम्बालाइहेङ दोअ्हि, “हिसिका भारभुसाइका काथा! वा हितासो लोहि नेलाइ मागिसुखेना, कालाउबुङ काङको मि वा हेपिहि। 31केलाइ गिन्हाखे, परमेस्वर पापिगेलाइको काथा माहिङखे, कालाउबुङ परमेस्वरहेङ थिका रो वाको इछा साअ्का द्याङको काथा परमेस्वर हिङखे। 32दुनियाको लाम्फासोङ एलाथिकापा जोलोमकोङ कान्हाको मि हासुङ हेपिका हेअ्लाउ बुङ हिङका मान्थु। 33एदि इदोइ द्याङ परमेस्वरसो मालोका हिनु वा हाइदोङ पालि मादोधावा।”
34एम्बालाइ इङकोहेङ दोअ्हि, “ना पापता जोन्मिका हिघान्हा, हाइ एला ना केलाइहेङ धिरपालि भोखेना?” कालाउ एम्बालाइ इङकोहेङ कचहरिसाअ्सो बाहार ओल्हिपागिल्हि।
हाङसाको कान्हा
35जेलाउ यहुदि आगुवागेलाइ इङकोहेङ ओल्हिपागिल्हि दोअ्का इसु हिङहि कालाउ इङकोहेङ दुसुतेङ दोअ्हि, “हाइ ना का द्याङको चानहेङ खान्धुर पाखेना?”
36इङको वासेहेङ दोअ्हि, “मास्टर, वा हासु हि? का वासेहेङ खान्धुर पाङका।”
37इसु इङकोहेङ दोअ्हि, “ना वासेहेङ तिङका हिन्हा, कालाउ नादोफा धुइका वादोङ।”
38इदोइ हिङतेङ इङको वासेहेङ सेउपातेङ दोअ्हि, “प्रभु, का खान्धुर पाङका!”
39इसु दोअ्हि, “का नियाको भाअ्सिङ इदोइ दुनियाता लोघा, हाइपानु मातिङकालाइ तिनाको रो तिङकालाइचाहिँ कान्हा ज्याको।”
40इदोइ काथा हिङतेङ वाको भेरपा हिका फरिसिगेलाइता आधिमि वासेहेङ दोअ्हि, “हाइ केलाइ बुङ कान्हा कुनु?”
41इसु एम्बालाइहेङ दोअ्हि, “नेलाइ कान्हा हिनुते पापको दुस माजेङसुधाना, कालाउबुङ नेलाइ ‘केलाइ तिङन्हाखे’ दोअ्सुखेना, इदोइभाअ्सिङ नेलाइको पाप हितेङह्यावा।”
اکنون انتخاب شده:
युहन्ना 9: DHIM
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2025 by Nepal Bible Society and Wycliffe Bible Translators, Inc.
