Jěnisis 9
9
1Ka Anyambě a vambiya Noa na bana baju ibâtâ, ka Mâ‐a vâ na bâ, na, Janakani, o ka vuhakani, wa londani o he.
2Jângâ janyu na mahihi manyu be ka diyi na tito ja he jěhěpi, na o lonâni la oba lěhěpi, na o belombo be landakě o he běhěpi, na o bejaka bea manga beěhěpi; be věwěngo o benâ beanyu.
3Elombo e ninganakě yěhěpi e jadi na ’měnâ e ka diyandi bejaka beanyu; Mbi věndi inyěni belombo beěhěpi panika behavu bea betongo.
4Ndi, o jakeni mehoni na eměnâ ’aju, makiya ma omě.
5Pâkwěpâkwě Mbi ka uwandi makiya ma beměnâ beanyu; o benâ bea tito yěhěpi ndi o Umba‐Mbi ka uwě mâ, na o benâ bea moto; o benâ bea mwana‐nyangwě ya moto nd‘ Umba‐Mbi ka uwě eměnâ ya moto.
6Moto wěhěpi a tâkidě makiya ma moto, a ka tâkudwě tepě imaju makiya na moto: ikabojana o egâlani ya Anyambě nd‘ eaju e velanaki moto.
7Ndi ’nyěni, janakani, wa vuhani; janakani nangudi o he, wa vuhani omě.
8¶ Ka Anyambě a kala na Noa na bana baju naju, na,
9Umbwakiyate, Umba, Mbi ka yâdidi pang‘ ’amě n‘ inyěni, n‘ ibângâ janyu o mbuhw‘ ’anyu;
10Na ekeha e di mihâ n‘ inyěni yěhěpi, n‘ inâni, na embe, na tito yěhěpi ya ’hiki n‘ inyěni; oviya be pumakě o ark beěhěpi na ’la o tito ja ehiki jěhěpi.
11Mbi ka yâdidi pang‘ ’amě na nâvě; na mehoni meěhěpi meà jiludwě pě na miba ma ujambě, na ujambě muà viye pě ka jilidě he.
12Ka Anyambě a vâ, na, Ndembo ya pang‘ ’amě e hakě o hwě n‘ inyěni o jadi na ekeha e di mihâ yěhěpi e didi o inyěni o jadi, nd‘ ekaně; na ’la mbamba na mbamba:
13Mbi těkiděndi epambo ’amě o bevindi, yâ ndi e ka diyě ndembo ya panga o hangan‘ ’ahu na he.
14E ka diyandi, o ’Mba‐Mbi ka pâdě bevindi o he, epambo tě e ka yěněněndi o bevindi:
15Vâkâna Mbi yongiděndi panga o hangan‘ ’ahu n‘ inyěni na ekaha e jadi mihâ ya mehoni meěhěpi; na miba mà pâye pě ujambě ka jilidě mehoni meěhěpi.
16Na epambo e ka diyandi o bevindi; n‘ Umba‐Mbi ka hili yâ, ovaně nd‘ o Umba‐Mbi ka yongidě panga ya egombe yěhěpi o hanganě ya Anyambě na ekeha yěhěpi e di mihâ ya mehoni meěhěpi me jadi o he.
17Ka Anyambě a vâ na Noa, na, Ekaně ndi ndembo ya pang‘ ’amě e di yâdiděngo o hangan‘ ’ahu na mehoni meěhěpi me didi o he.
18¶ Bana ba Noa, ba pumakidi o ark, ndi Shěm, Ham, na Jefěth; Ham ndi hangwě ya Kenan.
19Bana ba Noa balalo nd‘ ekaba: he yěhěpi e yambakudwěndi na bâ.
20Ka Noa a yalě idiya ja uliyi, ka mâ‐a liya mwanga mua ivě.
21Ka mâ‐a mâtâ ivě, ka mâ‐a peya; ka mâ‐a diya uhamba o utema mua mâkâ muaju.
22Ka Ham, hangwě ya Kenan, a yěně uhamba mua hangwě, ka mâ‐a ’la ka languwa bana ba hangwě babale o uhěngě.
23Ka Shěm na Jefěth ba nângâ unamba, ka bâ‐ba kahidě muâ o maběkě mabu, ka bâ‐ba vala utimbě‐na‐mbuhwa, ka bâ‐ba vihidě uhamba mua hangw‘ ’abu; myoho meabu utimbě‐na‐mbuhwa, bà yěne tepě uhamba mua hangw‘ ’abu.
24Ka Noa a ’muwa oviya o ipeya ja ivě jaju, ka mâ‐a yowě nyanga ya mwan‘ ’aju wa nděmbě e haki mâ.
25Ka mâ‐a vâ, na, Jâki na Kenan: uhayi mua uhayi ndi umuaju u ka diyě o bana ba hangwě ba jadi.
26Ka mâ‐a vâ, na, Ibâtâ na Jěhova Anyambě ya Shěm; Kenan a diyake uhayi muaju.
27Anyambě a kenakě Jefěth: a diyake o myâkâ mea Shěm; na Kenan a diyake uhayi muaju.
28¶ Ka Noa a diya, o ujambě u běki tombango, kama ja mepuma ilalo na mabo matano.
29Hwi ja Noa jěhěpi i diyakindi kama ja mepuma ibuwa na mabo ma mepuma matano: ka mâ‐a wa.
اکنون انتخاب شده:
Jěnisis 9: BNG1895
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Published by the American Bible Society in 1895, 1926.