Jěnisis 20
20
1Ka Ebreham a tamuwa oviya ovaně na ’la o pělě ya ehe těyeně ya diko, ka mâ‐a diya o hanganě ya Keděsh na Shur, ka mâ‐a yěngidě o Girar.
2Ka Ebreham a vâ o pělě ya mwad‘ ’aju Serah, na, A ndi iluku jamě: ka Ebimelek upolo mua Girar a lomidě, ka mâ‐a nângâ Serah.
3Ka Anyambě a viya o Ebimelěk a jadi o ndâtâ na bulu, ka Mâ‐a vâ na ju, na, Umbwakiyate, wa běndi ekengo, tina ya mwajo tě uâvě a di nângângo: a ndi mwada wa mot‘ upâkwě.
4Nandi Ebimelěk a diyakite a t‘ o bakama o mâ‐a jadi: ka mâ‐a vâ, na, Jěhova! o ka weya tepě etomba eyamu?
5Mâ mětě a‐u vâkâ n‘ umba, na, A ndi iluku jamě? na mâ mětě mwajo, na, A ndi ndomi ’amě? O hohonganěngo ya ebumulem‘ ’amě na mahuwa ma benâ beamě ndi ibeamě be hanidi ekae.
6Ka Anyambě a vâ na ju o ndâtâ, na, E, Mbi yowěngo na o hango ekae na hohonganěngo ya ulema muâvě; n‘ Umba tepě Mbi himbakidě âvě o iha ja bobe o pěl‘ ’amě; ovaně nd‘ Umba‐Mbi ha bâbâkid‘ âvě o kupanakě mâ.
7Nandi, timbakě momo tě mwad‘ ’aju: ikabojana a nd‘ usâki, a ka kaliyand‘ o pěl‘ ’âvě, vâkâna o diyendi: nd‘ oningě o timbě mâ, yowakě, na, o ka wandi pâkwěpâkwě, âvě, na ibeâvě beěhěpi.
8Ka Ebimelěk a punda imuwa n‘ ubwa, ka mâ‐a ndiya bahayi baju běhěpi, ka mâ‐a languwa belombo těkabe beěhěpi o matâ mabu: ka bamo tě ba banga jângâ ütě.
9Jâ ndi ja Ebimelěk ja ndiya Ebreham, ka mâ‐a vâ na ju, na, O lě hwě hango na? Mbi lě âvě beviyango nde, eâvě e pâdě ’mba na o ivende jamě bobe boněně? O hayi ’mba behadi be ha lukakidi o hama.
10Ka Ebimelěk a vâ na Ebreham, na, O yěněki lě nde, eâvě e di hanango elombo těkae?
11Ka Ebreham a vâ, na, Ikabojana mbi piviyaki, na, Mbambayě, jângâ ja Anyambě i ’bě o iboko těkavi; ndi ba ka weyi ’mba o pělě ya mwad’ ’amě.
12Ndi mbambayě, a tepě iluku jamě; a ndi mwan‘ ’a paia, ndi à ’bě mwana‐jaie: ka mâ‐a bě mwad‘ ’amě.
13E diyakindi, o Anyambě a pangaki ’mba mbi dikaka ndabo ’a paia, mbi vâki na ju, na, Ekaně e ndi kěngâ eâvě e ka levidě ’mba; o loboko lěhěpi ilahu lo ka pâyě, vâkâ, o pěl‘ ’amě, na, A ndomi ’amě.
14Ka Ebimelěk a nângâ medâmbě, na nyati, na bahayi ba bamo, na bahayi ba bajo, ka mâ‐a vě beâ Ebreham, ka mâ‐a timbě mâ mwad‘ ’aju Serah.
15Ka Ebimelěk a vâ na ju, na. Umbwakiyate, ehiki ’amě e nd‘ o boho bwâvě: diyaka o yâ e tândâkid‘ âvě.
16Ka mâ‐a vâ na Serah, na, Umbwakiyate, mbi věngo ndomi ’avě tâjen ya bepěhi bea hika etano; umbwakiyate, e nd‘ o âvě‐o didi udibi mua mihâ, o ba didi na nâvě běhěpi ba jadi; na o pělě ya bapâkwě běhěpi, o ndi tundwěngo.
17¶ Ka Ebreham a kaliya Anyambě: ka Anyambě a yongě Ebimelěk, na mwad‘ ’aju, na bahayi baju ba bajo: ka bâ‐ba ja bana.
18Ikabojana Jěhova a diyakindi a diba memi ma ndabo ya Ebimelěk měhěpi, n‘ itato ja Serah, ya mwada Ebreham.
اکنون انتخاب شده:
Jěnisis 20: BNG1895
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Published by the American Bible Society in 1895, 1926.