Jěnisis 17
17
1O Ebream a diyakidi a bě mabo ma mepuma ibuwa na mepuma ibuwa, ka Jěhova a pumiya Ebream, ka Mâ‐a vâ na ju, na, Umba ndi Anyambě ya ngudi yěhěpi: tamwaka o boho bwamě, na nâvě wa diya hanjâbiyěngo.
2N‘ Umba‐Mbi ka hi panga ’amě o hangan‘ ’ahu na nâvě, n‘ Umba‐Mbi ka vuhěnd‘ âvě nangudi.
3Ka Ebream a kwa o boho bwaju; ka Anyambě a kala na ju, na,
4Umbwakiyate, opěl‘ ’amě, pang‘ ’amě e ndi na nâvě, o ka diyandi hangwě ya betomba beitě.
5Dina jâvě ja tubwě pě, na, Ebream, ndi dina jâvě i diyake Ebreham: jambojana hangwě ya betomba beitě ndi eamě e pangidi âvě.
6N‘ Umba‐Mbi ka pangand‘ âvě o diyaka n‘ ijadi iněně, n‘ Umba‐Mbi ka pangi betomba oviya o âvě‐o jadi, na mepolo me ka viyand‘ o âvě‐o jadi.
7Mbi ka yâdidi pang‘ ’amě o hangan‘ ’ahu na nâvě n‘ ibângâ jâvě o mbuhwa ’vě, o mbamba na mbamba jabu, panga ya egombe yěhěpi, idiya ja Anyambě ’âvě, na y‘ ibângâ jâvě o mbuhwa ’vě.
8N‘ Umba‐Mbi ka věndi âvě n‘ ibângâ jâvě o mbuhwa ’vě, ehe tě y‘ iyěngidě jâvě ekae, ehe ya Kenean yěhěpi; n‘ Umba‐Mbi ka diyandi Anyambě ’abu.
9¶ Ka Anyambě a vâ na Ebreham, na, O pěl‘ ’âvě, tataka pang‘ ’amě n‘ ibângâ jâvě o mbuhwa ’vě, na ’la o mbamba na mbamba jabu.
10Ekae ndi panga o hangan‘ ’ahu na nâvě eanyu e ka tatě n‘ ibângâ jâvě o mbuhwa ’vě; Mua‐momo wěhěpi o inyěni o jadi a ka hěběkwě.
11O ka hěběkwěni o hâkâ ya mehoni meanyu; yâ ndi e ka diyě ndembo ya panga o hangan‘ ’ahu na nâvě.
12A ja di hwi logwambi utodu o inyěni‐o jadi a ka hěběkwě, mua‐momo wěhěpi o mbamba na mbamba janyu, a jakwě o ndabo ’âvě, na ba hambakwě na dâlě, na mwěngi u ha ’bě ibângâ jâvě.
13A jakwě o ndabo ’âvě, na a hambakwě na dâlě jâvě ba hěběkwě: pang‘ ’amě e ka diyaka panga ya egombe yěhěpi o mehoni meanyu.
14Mua‐momo a ha ibě hěbwěngo o hâkâ ya mehoni meaju, a di na hâkâ ya uhoni muaju ù hěbwě, ilina tědině i ka lenakwě o bato baju ba jadi, ikabojana a weyi panga ’mě.
15¶ Ka Anyambě a vâ na Ebreham, na, O pělě ya mwad‘ ’âvě Sera, o tubake pě mâ na Sera, ndi dina jaju i diyake, na, Serah.
16Mbi ka vambiyi mâ ibâtâ, na Umba‐Mbi ka věndi âvě tepě mua‐momo o mâ‐a jadi; e, Mbi ka vambiyi mâ ibâtâ, na mâ‐a ka diyi nyangwě ya betomba; mepolo mea bato me ka viyandi oviya o mâ‐a jadi.
17Jâ ndi ja Ebreham ja kwa o boho bwaju, ka mâ‐a yâ, ka mâ‐a vâ n‘ ulema muaju, na, A bě kama ya mepuma utodu a ka ji pě? Na Serah a ka jandi, a bě mabo ma mepuma ibuwa?
18Ka Ebreham a vâ na Anyambě, na, A! te Ishmeěl a ndi a diyaka o boho bwâvě!
19Ka Anyambě a vâ, na, Nyawě, ndi, mwad‘ ’âvě Serah a ka jand‘ âvě mua‐momo; o ka vangidi mâ dina, na, Aizak; Mbi ka yâdidi pang‘ ’amě na ju panga ya egombe yěhěpi, n‘ ibângâ jaju o mbuhw‘ ’aju.
20Opělě ya Ishmeěl, Mbi yokiyend‘ âvě: umbwakiyate, Mbi vambiyi mâ ibâtâ, Mbi ka pangi mâ a janaka, n‘ Umba‐Mbi ka vuhi mâ nangudi; a ka ji jomu ja mepolo na mepolo mebale, Mbi ka pangi mâ etomba eněně.
21Ndi Mbi ka yâdidi pang‘ ’amě na Aizak, wa Serah a ka jayě na nâvě hohonganěngo o egombe těkae o upuma upâkwě.
22Ka Mâ‐a dika ikala na ju, ka Anyambě a beta oba oviya Ebreham a jadi.
23¶ Ka Ebreham a nângâ mwan‘ ’aju Ishmeěl na ba jakwě o ndabo ’aju, na ba hambakwě na dâlě jaju, na momo wěhěpi wa bamo ba ndabo ya Ebreham; ka mâ‐a hěbidě hâkâ ja mehoni meabu, o bwâ buhwa tě, panika Anyambě a vâki na ju.
24Ebreham a diyakindi a bě mabo ma mepuma ibuwa na mepuma ibuwa utodu, o hâkâ ya mehoni meaju e hěběkudwě.
25Mwan‘ ’aju Ishmeěl a diyakindi jomu ja mepuma na mepuma melalo utodu, o mâ‐a hěběkudwě o hâkâ ya mehoni meaju.
26Bwâ buhwa tě te bwa Ebreham na mwan‘ ’aju Ishmeěl bo hěběkudwě.
27Ka bamo ba ndabo ’aju běhěpi, ba jakudwě o ndabo ’aju, na ba hambakudwě na dâlě, na ba bangi, ba hěbwě na ju.
اکنون انتخاب شده:
Jěnisis 17: BNG1895
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Published by the American Bible Society in 1895, 1926.