Jěnisis 14
14
1E diyakind‘ o hwi ja Amrafěl upolo mua Shainar, Ariâk upolo mua Elasar, Kidarlaomar upolo mua Elam, na Taidal upolo mua Goim;
2Ka bâ‐ba ha eduka na Bera upolo mua Sâdam, na Birsha upolo mua Gomâra, na Shainab upolo mua Adma, na Shěměbar upolo mua Ziboim, na upolo mua Bela, e jadi Zoar.
3Ekaba běhěpi ba latakind‘ o itaba ja Sidim i jadi manga ma vianga.
4Ba dilakiděndi Kidarlaomar jomu ja mepuma na mepuma mebale, ndi, o upuma mua jomu na melalo, ka bâ‐ba loguwa.
5O upuma mua jomu na menai ka Kidarlaomar a pâ, na mepolo me diyaki na ju, ka bâ‐ba bweya ba Refaim o Ashterâth‐Karenaim, na ba Zuzim o Ham, na ba Emim o itaba ja Kiriathaim,
6Na ba‐Hâri o ukodi muabu mua Siěr, kwanga na ’la o El Peran, e jadi pyělě na nginga.
7Ka bâ‐ba timba, ka bâ‐ba pâ o idango ja Mishpat, e jadi Keděsh, ka bâ‐ba bweya etomba ya ba‐Amalak yěhěpi, na ba Amâr tepě, ba diyakidi o Hazězân‐Tamar.
8Ka omě wa vala upolo mua Sâdam, n‘ upolo mua Gomâra, n‘ upolo mua Adma, n‘ upolo mua Ziboim, n‘ upolo mwa Bela, e jadi Zoar; ka bâ‐ba lata na bâ o eduka o itaba ja Sidim;
9Na Kidarlaomar upolo mua Elam, na Taidal upolo mua Goim, na Amrefal upolo mua Shainar, na Ariâk upolo mwa Elasar; mepolo menai me yanaki na mepolo metano.
10Nandi itaba ja Sidim i diyaki ti na mbela ja vitwa via he; ka upolo mua Sâdam na mua Gomâra ba kweya, ka bâ‐ba kwa omě: ka ba dikanakidi ba kweya o ukodi.
11Ka bâ‐ba nângâ jumba ja Sâdam na ja Gomâra jěhěpi, na beja bea yambwěngo beěhěpi, ka bâ‐ba vala.
12Ka bâ‐ba nângâ Lât, mwana wa mwana‐nyangwě na Ebream, a diyakidi o Sâdam, na jumba jaju, ka bâ‐ba vala.
13¶ Ka moto umbâkâ a kweyakidi a viya, ka mâ‐a languwa Ebream ya Hibru; ikabojana a diyakindi baka na bele bea oak bea Mamre wa Amor, mwana‐nyangwě na Eskâl, na mwana‐nyangwě na Anar; ekaba ndi ba latanakiyedi na Ebream.
14O Ebream a běki yokango na mwana‐nyangwě a bweyudwěndi mbwedi, ka mâ‐a valana kama ja bahayi baju ba yokudwěngo ilalo, na jomu na bahayi logwambi, ba jakudwě o ndabo ’aju mětě, ka mâ‐a yonganě bâ o Dan.
15Ka mâ‐a pěhě mâ mětě na bahayi baju na bulu, ka mâ‐a bweya bâ, ka mâ‐a yonganě bâ kwanga na ’la o Hoba, e jadi o enâ ya Damaskâs ya eměngwě.
16Ka mâ‐a timba na jumba jěhěpi, na mwana‐nyangwě Lât tepě, na jumba jaju, na bajo tepě, na bato.
17¶ Ka upolo mua Sâdam a vala ka lata na ju (o mâ‐a timbakidi oviya iweya ja Kidarlaomar na mepolo me diyaki na ju) o itaba ja Sheva, i jadi itaba j‘ upolo.
18Ka Mělkizeděk, upolo mua Selěm a vana pěmbě na ivě; a diyakindi prist ya Anyambě ya oba mětě.
19Ka mâ‐a vambiya mâ ibâtâ, na, Ibâtâ na Ebream ya Anyambě ya oba mětě, uduwi mua oba na he;
20Na ibâtâ na Anyambě ya oba mětě, e di věngo baloni bâvě o enâ ’vě. Ka mâ‐a vě mâ ya jomu ja beěhěpi.
21K‘ upolo mua Sâdam a vâ na Ebream, na, Věkě ’mba bato, wa nângâ jumba âvě mětě.
22Ka Ebream a vâ n‘ upolo mua Sâdam, na, Mbi ndi betěngo enâ ’amě o Jěhova, Anyambě ya oba mětě, uduwi mua he na oba,
23Na, mba nânge nyângě tombe uhinga mua ikogo, tombe elombo e jadi eâvě, o banga wa vâ, na, Umba ndi kenidě Ebream.
24Kabo nyanga ya mawanja e jakidi, na mbeyi ya bato ba kěki n‘ umba, Enar, na Eshkâl, na Mamre; ba nângâke mbeyi ’abu.
اکنون انتخاب شده:
Jěnisis 14: BNG1895
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Published by the American Bible Society in 1895, 1926.