Jěnisis 12
12
1Ka Jěhova a vâ na Ebream, na, Věngěměkě o ehe ’âvě, na o etâkâ ’âvě, na o ndabo ya hângwě, na ’la o ehe ’amě e ka levid‘ âvě.
2Mbi ka pangand‘ âvě etomba eněně, n‘ Umba‐Mbi ka vambiyand‘ âvě ibâtâ, n‘ Umba‐Mbi ka pangi dina jâvě i kenaka; na nâvě wa diya ibâtâ.
3Mbi ka vambiyandi ba vambaki âvě ibâtâ ibâtâ; na a hâkâkě âvě ndi uamě a ka hâkě: o âvě o jadi nd‘ o makaka ma he měhěpi ma ka vambudwě ibâtâ.
4Nonaně nd‘ o Ebream a kěkidi, pani‐ka Jěhova a kalaki na ju; ka Lât a vala na ju: Ebream a diyakindi mabo ma mepuma hěmbwědi na mepuma metano utodu o mâ‐a věngěměkid o Keran.
5Ka Ebream a nângâ mwad‘ ’aju Sera, na Lât mwana wa mwana‐nyangwě, na belombo beabu ibeabu be yolakidě beěhěpi, na malina mabu ma pahakiyedi o Keran: ka bâ‐ba vala na ’la o ehe ya Kenean: ka bâ‐ba pâ o ehe ya Kenean.
6Ka Ebream a pudunganě o ehe tě na ’la iboko via Shikěm, o ele ya oak ya More. Ba Keneanait ba diyakind o ’gombe těně, o ehe tě.
7Ka Jěhova a pumiya o Ebream a jadi, ka Mâ‐a vâ, na, O ibângâ jâvě ndi ijamě i ka věyě ehe těkae. Ka mâ‐a longiya Jěhova e pumakiyi mâ âltar.
8Ka mâ‐a věngěmě oviya omě na ’la o ukodi mua mbuhwa ya Běthel, ka mâ‐a huma mâkâ muaju, Běthel o pělě ya manga, Ai o pělě ya ’hiki: ka mâ‐a longiya Jěhova âltar omě, ka mâ‐a dakiya dina ja Jěhova.
9Ka Ebream a tamuwa, a kěkě bokěkě o pělě ya diko.
10¶ Nja e diyakindi o ehe těyeně: ka Ebream a huba o Ijipt ka yěngidě ovoně; ikabojana nja e diyakindi eitě o ehe tě.
11E diyakindi, o mâ‐a pâkidi pyělě n‘ ingiya ja o Ijipt, ka mâ‐a vâ na mwad‘ ’aju Sara, na, Umbwakiyate, mbi yowěngo na o ndi elanga ya mwajo e hilakwě.
12E ka diyandi, o ba Ijipt ba ka yěn‘ ’âvě, ba ka vwi, na, Ekaně a ndi mwad‘ ’aju: vâkâna ba ka weyi ’mba, ndi ba ka tatand‘ ’âvě mihâ.
13Mbi hâhâlâkiděnd‘ âvě, na, vâkâ, na, o ndi iluku jamě: vâkâna e ka diyi bwamu n‘ umba o pěl‘ ’âvě.
14¶ E diyakindi, o Ebream a pâkidi o Ijipt, na o ba Ijipt ba yěněki mwajo tě na a ndi elanga mětě:
15Ka benami bea Fereo ba yěně mâ, ka bâ‐ba bendě mâ o Fereo a jadi; ka mwajo tě a valanwě o ndabo ya Fereo.
16Ka mâ‐a ha Ebream bwamu o pěl‘ ’aju: a diyaki na medâmbě, na nyati, na buru bea myomi na bea myadi, na bahayi ba bamo, na bahayi ba bajo, na kaměl.
17Ka Jěhova a yěnidě Fereo na ndabo ’aju njuke na bevuva beněně, o pělě ya mwada wa Ebream, Sera.
18Ka Fereo a ndiya Ebream, ka mâ‐a vâ, na, Ekae e lě nde eâvě e di ’mba hango? O ’nyakidě lě o languwa ’mba na a ndi mwad‘ ’âvě na nde?
19E lě nde eâvě e vâki, na, A ndi iluku jamě? na ovaně nd‘ umba‐mbi ka nângě mâ na mâ‐a bě mwad‘ ’amě. Nandi, umbwakiyate mwad‘ ’âvě, nângâkâ mâ, na nâvě wa vala o njea ’vě.
20Ka Fereo a sombiyě bato o pěl‘ ’aju: ka bâ‐ba validě mâ, na mwad‘ ’aju, na belombo beaju be diyanakidi beěhěpi.
اکنون انتخاب شده:
Jěnisis 12: BNG1895
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Published by the American Bible Society in 1895, 1926.