Markus 7
7
Parentanna Puang pang adaꞌna ampe-ampena tu Yahudi
(Mat. 15:1-20)
1Ara pimbesa Yesu na pukobui: tu Parisi sola: pira-pira ung si manarangna i aluku tu Yahudi sipolai: nai Yerusalem. 2Mangita‑i se pira-pira pasikolana Yesu manne:, mampake kangkang ung si burere, dea‑mo manne:‑mi se dang miase:‑kang siulaꞌ adaꞌna ampe-ampena‑i se. 3-5Deanna‑mo to, mingkutiki‑i se mao i Yesu moa teꞌ, “Mangaka ti pasikolaMu to, manne: dang miase:‑kang? Aka pu dang na mantoroꞌi‑i dasse: adaꞌna ampe-ampeta?” Sàbaꞌ tu Parisi pang nasang tu Yahudi ung si manuruꞌ, mangulaꞌ adaꞌna ampe-ampena‑i se. Dea‑mo, na pimalii‑i dasse: ti manne: i dang miase:‑kàngi. Pang aka ti ung na ala‑i se nai pasaꞌ, hang na anne:‑mi se i dang niase:‑kai:. Pang boso: atorang sintàna: nai ampe-ampena ung na tokaꞌ pàraꞌ‑i se, mène: cara mangasei: enùngang, anneang, parewa dapoꞌ sintàna: ung nai tembaga, pang kaoneang maturu manne:.*#7:3-5 maturu manne:. Hele catatan kaki i Mat. 9:10.
6Na sùmuinna‑mi Yesu moa teꞌ, “E tau ung si tangkasi:, mampatu: dio se, malleo: tungka ti ung na pupihuyang nabi Yesaya, ung nironno: i Suraꞌna Puang moa teꞌ,
‘TaungKu te, i beuna teng ti Ku na sangadi,
hampoꞌ i laling pinanahanna‑i se Ku na keboꞌi.
7Hari: palleona Ku na pinombai‑i se,
sàbaꞌ atorangna tulino ti ung na pipaturo:‑ing se, na konai: pipaturo: ung nai Koi:.’*#7:6-7 Yes. 29:13.
8Parentanna Puang u pakaliung se teng, pang atorangna tulino u tokaꞌ pàraꞌ se.
9U manarang‑mo se tungka mantumpaꞌ parentanna Puang, mangking u tùrung se teng i atorangmu se, 10pambàtiꞌ ladu‑mo u na padeaꞌ‑ing se Musa te parenta tee moa teꞌ, ‘Sangadi‑i ti amammu pang inammu!’*#7:10a Kel. 20:12. pang, ‘Isai-sai ti ung mampusua: kadetu amanna dea‑raka inanna parallu nipatei.’*#7:10b Kel. 21:17. 11hampoꞌ u konai: se teꞌ, ‘Ìna tau musua: mao i tudolunna teꞌ, Aka ti àla: ung ku hengi‑ingko se, ku turo:‑mo miluhali kurban (palleona pinomba mao i Puang).*#7:11 kurban i laling sua: Ibrani, palleona pinomba. 12baꞌ ha mading‑i hura: ti kurban to, na pampulemu‑ing tudolunna.’ U konai: se teꞌ, ‘Pumali‑mo, sàbaꞌ na pinomba‑ming mao i Puang.’ 13Jadiꞌ, nai atorangmu se teng ti ung nu kasiossoꞌ‑ing, u hùlìngi‑mo se ti pusuana Puang. Boso: kang ti ung mène: te ung nu pukauꞌ se.”
14Na hàngona‑mi pole Yesu ti tau boso: pang musua: moa teꞌ, “Pisàdìngi‑ko se nasang, mangking u pahang‑ko se ti tee! 15Hari:‑da aka ung nai sòhongna ung mintama i tau hela mamburerei‑i. Sangadinna, sua:-sua: ung missòhong nai tau, dea‑mo to ti ung mamburerei‑i. [16Isai ti ung kitalinga, na pisàdìngi‑i!]”
17Tòna mintama‑mo i rasang ti Yesu, mampalii: tau boso: to, mingkutiki ti pasikolaNa mao i Yesu, mampingkutik‑ing palleona rampeang i langena:. 18Misùmunna‑mi ti Yesu mao i dei: se moa teꞌ, “Ha mintama‑mi ho naꞌ i tangaꞌmu se? Ha u pahang‑mo: se naꞌ moa teꞌ ung mintama i takona tau ha hela‑i mamburerei tau to? 19Sàbaꞌ ung mintama to, hang mangola:‑i pinanaha, sangadinna mangola: balammang pang tùrung missòhong.” (Sua:-suana Puang Yesu to mampumakàso: moa teꞌ nasang ung niannena hang nipiapuꞌ‑ing.) 20Na konai: ho Yesu teꞌ, “Ung missòhong nai pinanahanna tau, dea‑mo to ti ung mamburerei‑i. 21Sàbaꞌ nai laling, dea‑mo nai pinanahanna, sòhong ti tangaꞌ-tangaꞌ ung kadetu ung mambùruꞌ‑ing tau to mampukauꞌ ung dang belo:, dea‑mo kauꞌ ung sikalantùki, mumanau, mupatei, 22malahang, lammuꞌ inaha, bulituku, mutangkasi:, kihulu atena, mapaꞌ, mampusua: kadetu tau sintàna:, patiapaꞌ, pang mapantangaꞌ ung bebe. 23Nasang ung kadetu to, sòhong nai laling pinanaha, pang dea‑mo to ti ung mamburerei tau.”
Bahine tu Siria Penisia ung mupatongang
(Mat. 15:21-28)
24Kakarangna‑mi ti Yesu nai anto pang lumao i pangalanna kaparentaangna lipu: Tirus. Mintama i besa tamming pang hang mio:‑I àla: ara tau ung mangìsang‑I, hampoꞌ kaoneangNa hang hela‑i nihuni‑ing. 25Mala, ara sule: besa bahine, na sàdingna‑i ti Yesu, lumanna‑mi pang mukalimuntuꞌ tumunnuku i kokoꞌNa. 26Bahine to handei: tu Yahudi, hampoꞌ tu Siria Penisia. Mingkalemu mao i Yesu mangking mampasahu dihata bulituku nai anakàna bahine. 27Musuana‑mi ti Yesu mao i bahine to mampake rampeang moa teꞌ, “Eloꞌna‑mo boro‑kang ti ana-anaka, sàbaꞌ hang sipatu:‑ida mangala kinanne: ung niàna:‑ing ana-anaka pang nitammo‑ing asu.”*#7:27 Hele catatan kaki i Mat. 15:26.
28Hampoꞌ na sùmui bahine to moa teꞌ, “Tongang Tuang. Hampoꞌ tòna manne: ti anaka, asu ung i hoiꞌna meja mading‑da ho manganne: ung sikàda:.”
29Musuana‑mi ti Yesu mao i bahine to moa teꞌ, “Sàbaꞌ sua:-suamu to ti, dihata bulituku malai‑mo nai anakàmu. Jadiꞌ, nàmo:!”
30Mangulena‑ming mao i tammingna. Na kabùruꞌinna‑mi ti anaka to, mànaꞌ maturu i paturuang, pang dea to dihata bulituku malai sìda‑moda. Hari: hura:.
Yesu mampakulii: tau ung pidaꞌ liu
31Kakarang‑mi se ho ti Yesu nai pangalanna kaparentaangna Tirus mangola: i pangalanna Sidon, lumao i Tasiki Galilea, mangola: lummu: i Dekapolis. 32Tau i anto mambaha besa muane ung pidaꞌ liu pang ung dang sapata ho musua:, mao i Yesu, mingkalemu mangking nipumatalete:. 33Na saràkinna‑mi Yesu nai tau boso:. Na patama ti hùngang kangkangNa i talinganna tau to. MitangkudunNa‑mi mao i hùngang kangkangNa, pang Na pake marrupaꞌ lilana tau to. 34Tumongana‑mi ti Yesu, marriuꞌ pinanahanNa, pang musua: mao i tau to moa teꞌ, “Efata!”*#7:34 sua: Aram. palleona, “Tuhangka‑ko!” 35Tuhangkanna‑mi ti talinganna tau to, salihùraꞌ ho ti ung mangkapuꞌ lilana, pang marrara‑mo makàso: musua:.
36Mupasakiꞌna‑mi ti Yesu mao i tau i anto, “Hau mupatidoluang se mao i isai-sai.” Hampoꞌ sa: niapuꞌ-apuꞌna‑i se, sa: mupatidolu-doluangna‑i se. 37Mimàha‑i se tungka pang musua:‑i se moa teꞌ, “Nasang ung Na pukauꞌ, belo:. Moi ung pidaꞌ Na pupiluhali pasàding, moi ung bebe Na pupiluhali musua:.”
اکنون انتخاب شده:
Markus 7: skx
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
