Markus 5
5
Yesu mampasahu dihata bulituku
(Mat. 8:28-34, Luk. 8:26-39)
1Deaꞌ‑mi se i heteꞌna tasiki, i pangalanna tu Gerasa. 2Màli: minguluꞌ nai lemmang ti Yesu sola: pasikolaNa, sàhe: mai ti besa tau ung na sosoko dihata bulituku, nai kaburuꞌ, mampasikorai:‑I. 3Tau to, leta: i anto i liokoꞌ pukaburuꞌang, pang hari:‑da hura: moi besa tau ung hela mampungu‑i, moi mampake rante. 4Buttinna pabuuna, nene‑mo nipungu‑i rante, hampoꞌ na kàtu teng ti rantena pang na bare: ti langkena. Hari:‑da besa tau ung hela malloloꞌ‑i. 5Àlo hengi kalao-lao pai liokoꞌ pang i mungku-mungku, na pasianu mikei:-kei: pang mangkoyong-koyòngi kalaena mampake hatu. 6Tòna mangita‑mo Yesu nai karaona, miruru: mampasikorai:‑I. Tòna bùruꞌ‑mo i heleꞌNa, mukalimuntuꞌ tumunnuku, 7-8na pasianu mikei: moa teꞌ, “E Yesu, Anakàna Puang ung Kamìnang Iaho, aka ti ung Nu pukauꞌa mao i koi:?”
Musuana‑mi ti Yesu mao i dea moa teꞌ, “E dihata bulituku, sòhong‑ko nai tau tee!”
Na konaina‑mi pole tau to moa teꞌ, “Hampoꞌ musumpa‑Ko dolung i heleꞌna Puang moa teꞌ, ‘Hang Ku keneꞌ-keneꞌa‑mo:do’!”
9Mingkutikìna‑mi ti Yesu mao i tau to moa teꞌ, “Isai ti konamu?”
Misùmunna‑mi moa teꞌ, “Konaku nikonai: Boso:,*#5:9 Boso:. Sua: Yunani Legiun, palleona kamamesaang nai tantara Roma ung 6.000 bosona. Jadiꞌ, Boso:. sàbaꞌ ìnang ki maranga.” 10Na palau tungka mao i Yesu mangking hang nipasahu‑i malai nai kaoneang to. 11A, dùkuꞌ i anto, ara sampolaiang bahi ung boso: tarrang muokaꞌ manne: i matepaꞌna mungku. 12Na palaunna‑mi dihata bulituku to‑i se moa teꞌ, “Suo:‑kang teng mingeliꞌ mao i bahi to‑i se. Patinai‑kang mampintamai‑i!”
13Na sùmui Yesu ti pampalaunna‑i se moa teꞌ, “Nàmo: se!” Sòhongna‑mi ti dihata bulituku to‑i se pang mintama i bahi to‑i se. Bosona bahi to, nikapang idua sàbunna. Ràha miruru: pang tùrung sumampo mao i tasiki, deaꞌ mate pàhuꞌ.
14Miruruna‑mi se ti pikuyaꞌna bahi to mao i lipu: pang i pangalanna, mampinghare:‑ing mao i ampunna. Lumanna‑mi ti tau massabii kadadiang to. 15Bùruꞌ‑i se mao i Yesu, manghele, oꞌ makàso:‑mo to tau ung na katama dihata bulituku. Mesong pang mipakeang‑mo. Mariaꞌna‑mi se mao i Yesu. 16Tau ung mangita mata kadadiang to, mupatidoluang mao i tau ung bùruꞌ to, aka ti ung jadi mao i tau ung na katama dihata bulituku pang mao i bahi. 17Na palau‑i se tungka mao i Yesu mangking malai, mampalii: lipuna‑i se.
18Tòna millanto pole ti Yesu i lemmang, tau ung na katama dihata bulituku i langena:, mampalau mao i Yesu mangking nipatinai mimpola:. 19Hampoꞌ hang Na patinai‑i. Sangadinna, Na suo: moa teꞌ, “Sumule:‑mo: mao i tanandapoꞌmu, mao i tau sola: lipumu, pang paìsàngi‑i se ti nasang aka ung na pukauꞌ‑mo Puang matung pang mangaka ti malemunNa mao i dio!” 20Lumanna‑mi to tau to, mampakareba i Dekapolis aka ti ung na pukauꞌ‑mo Yesu mao i kalaena, pang miluhali mimàha‑i se nasang.
Yesu mampatuho: anakàna Yairus pang mampumatalete: besa bahine ung na leo: miraa: tùrung-tùrung
(Mat. 9:18-26, Luk. 8:40-56)
21Sumulena‑mi pole ti Yesu mangola: lemmang, pang tau boso: bùruꞌ ho mallebo‑I i minanaꞌ tasiki. 22Ha masai‑i nai anto, bùruꞌ ho ti besa tau, dea‑mo ketua jamaa i anto ung nikonai: Yairus. To na ita‑mi ti Yesu, mukalimuntuꞌna‑mi tumunnuku i heleꞌNa, 23pang mingkalemu mao i Yesu moa teꞌ, “Anakàku bahine masantaꞌ mipanaꞌ, mène: ung matea‑ko e. Mai‑ingnaꞌko manghele, mangking salamaꞌ pang lupu tuho:.” 24Lumanna‑mi ti Yesu sola: tau to.
Tau boso: mangulaꞌ‑I pang silìsi-lìsik‑ing mandùkuꞌi Yesu. 25I lummu: dalang, ara besa bahine ung sampulo:‑mo idua heaꞌna masainna na leo: miraa: morai tùrung-tùrung. 26Makeneꞌ‑mo lumao mupakuli: i pira-pira pumpupakuli:, dea pùna lòsoꞌ‑mo nasang ti aka ung ara i dea, hampoꞌ hari: mabàlina. Sa: masantaꞌ-santaꞌna sule:. 27Na sàding‑mo bahine to ti patidoluangna Yesu. Jadiꞌ, nai keboꞌ mao mandùkuꞌi Yesu i lummuna tau boso: pang mangerong kayaꞌNa. 28Sàbaꞌ na tangaꞌ moa teꞌ, “Asalang ku erong teng ti kayaꞌNa, ku mataletea‑moko.” 29Tempo dea ho teng to, pàda: ti sainna, pang na sàding ti kalaena matalete:‑mo.
30Tempo dea ho teng to, na ìsang Yesu moa teꞌ ara kuasa ung missòhong nai kalaeNa, màli: mingkuhaling pàli i tau boso: pang mingkutiki moa teꞌ, “Isai ti ung mangerong kayaꞌKu?”
31Na sùmui pasikolaNa moa teꞌ, “U ita kalenanna ti tau boso: siummang-ummang i sidungkuꞌMu. Aka U mingkutiki pole kang‑do ho moa teꞌ, ‘Isai ti tau ung mangerong kayaꞌKu?’ ”
32MiheleNa‑mi pàli i tau boso: ti Yesu mangokaꞌ isai ti ung mangerong‑I. 33Bahine to mariaꞌ‑mo pang tumaradidi:, sàbaꞌ na ìsang‑mo aka ti ung bùruꞌ mao i kalaena. Lumanna‑mi mukalimuntuꞌ tumunnuku i heleꞌna Yesu, pang sola: pinanaha mabusana mampatidolu mintuꞌna mao i Yesu. 34Musuana‑mi ti Yesu mao i bahine to moa teꞌ, “O anàKu, kapatongangangmu mampasalamaꞌ‑mo:. Nàmo: sìnang kabeloang, ha umma‑i to, u matalete:‑mo nai saimmu!”
35Tarrang maang musua:, bùruꞌ‑mo ti tau deanna ketua jamaa pang musua: teꞌ, “Mate‑moda ti anakàta. Aka kang buaꞌna ta massussa-sussai Tungguru?”
36Hampoꞌ hang na talingai‑i Yesu ti pusuana‑i se to, pang musua: mao i ketua jamaa moa teꞌ, “Patongang teng! Hau mariaꞌ!” 37Na apuꞌna‑mi ti nasang tau ung mimpola:, sangadi Petrus, Yakobus pang Yohanes adinna Yakobus. 38Mai: se i tamming ketua jamaa, pang i anto na lampiꞌ Yesu ti tau mitaru, mampilabui: mantalihuhu: kumàraka. 39MintamanNa‑mi pang musua: mao i tau to‑i se moa teꞌ, “Aka pu u mitaru se pang mantalihuhu: kumàraka? Anaka tee hang mate‑ida, sangadinna letona‑da teng.” 40Hampoꞌ na patahai‑i se.
Na suona‑mi Yesu sòhong ti tau to‑i se, màli: Na baha‑i ti amanna pang inanna anaka to, pang itàlu pasikolaNa mintama i kamaraꞌna anaka to. 41Na tokaꞌna‑mi ti kangkangna pang musua: moa teꞌ, “O anàKu, tèdeꞌ‑mo:!”*#5:41 I laling sua: Aram, “Talita kum!” 42Tèdeꞌna‑mi ti anaka to pang mammulao, sàbaꞌ sampulo:‑mo idua heaꞌna umuruꞌna. Mimàha‑i se tungka. 43Na piapuꞌna‑ming tungka Yesu mao i dei: se, mangking hau na ara besa tau mangìsang aka to ung jadi, pang Na pisuona‑ming nipakanne: ti anaka to.
اکنون انتخاب شده:
Markus 5: skx
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
