Markus 11
11
Yesu nitadoꞌi mintama i Yerusalem
(Mat. 21:1-9, Luk. 19:28-38, Yoh. 12:12-15)
1Tòna dungkuꞌ‑mo i Yerusalem ti Yesu sola: pasikolaNa, dea‑mo i àlaꞌna lipu: Betpage pang Betania, i matepaꞌna Mungku Saitun, na pantuyu Yesu ti idua pasikolaNa lumao dolung. 2Na pasakiꞌ teꞌ, “Nao: se i Betpage, lipu: ung ta hele heteꞌ se too. Dea to u tama se i lipu: to, u mangitaa se besa anaka keledai nipintaiꞌ‑ing, ung dang ara‑kang na pimmantoi:‑i tau. Hùraꞌ‑ingko se ti keledai to pang baha mai. 3Pang ìna ara tau marràho‑ko se teꞌ, ‘Aka pu u hùraꞌ‑ingko se ti keledai ti?’ konai:‑ko se teꞌ, ‘Na parallui Tuangki, pang Na uleing‑da sahe:.’ ”
4Lumanna‑mi ti idua pasikolaNa to, pang mangkorai: anaka keledai nipintaiꞌ‑ing i baba: rasang i minanaꞌ dalang. Na hùraꞌna‑ming se ti keledai to. 5Tau ung si tèdeꞌ pai anto mingkutiki mao i dei: se teꞌ, “E! Aka ti ung nu pukauꞌ se? Aka pu u hùraꞌ‑ingko se ti anaka keledai ti?” 6Na sùmuinna‑mi se mène: ti ung ladu na pusua: Yesu mao i dei: se. Na pimmànaꞌinna‑mi tau to‑i se ti pasikolana Yesu mambaha keledai to.
7Tòna deaꞌ‑mi se i Yesu, na lapìngi‑mi se kayaꞌ i sòhongnanna ti keledai to. Na pimmantoina‑mi Yesu. 8Boso: tau ung mantadoꞌi‑I mambìniꞌ kayaꞌ i sòhongnanna‑i se pai dalang. Ara ho ti ung si mangilaꞌ kalidina bunga i lummu: dalang ung na ala‑i se nai kinete: i minanaꞌ dalang. 9Tau ung si midolung pang tau ung si mingulaꞌ nai keboꞌ mikako-kakoang‑i se nasang teꞌ,
“Hosana!*#11:9a Hosana! Sua: Ibrani, palleona Pudi ti Puang!
Nipudi te ung bùruꞌ i laling konana Puang!*#11:9b Mas. 118:25-26.
10Nipasakke ti kadatuang ung bùruꞌa, ung mène: kadatuangna ampeta Daud!
Nipudi ti Puang i kaoneang ung kamìnang iaho!”
11Tampàkang Yesu bùruꞌ i Yerusalem. MintamanNa‑mi i kaoneang Tamming Kabussùngang pang Na paressa nasang. Hampoꞌ sàbaꞌ hengia‑mo, sumuleNa‑mi mao i lipu: Betania sola: sampulo: idua pasikolaNa.
Yesu mantunna: lòpo: ara
(Mat. 21:18-19)
12Àlo i hingkoꞌna, tòna missòhong‑mi se nai lipu: Betania, burorang ti Yesu. 13Nai karaona Na ita ti santoaꞌ lòpo: ara ung marommo: sala: daungna, pambàtiꞌ ha tempona‑mi hoa: ti lòpo: ara. Jadiꞌ, lumao ti Yesu manghele araa‑raka hoana.*#11:13 Parallu niìsang moa teꞌ i laling biasanna lòpo: ara tempona hoa:, mihùngang dolung, màli: na midaung. Palleona, moi hang dea‑mi tempona lòpo: ara, ìna tau manghele teꞌ midaung‑mo, mading na ranung moa teꞌ araa hoana. Hele ho catatan kaki i Mat. 21:19. Hampoꞌ tòna deaꞌ‑mo i lòpo: to, hari: aka Na korai: sangadi daungna pòteng. 14Musuana‑mi ti Yesu mao i lòpo: ara to moa teꞌ, “Hang hoao:‑do hura: deaꞌ tùrungna!” Pang na sàding pasikolaNa ti suana Yesu.
Yesu mampasahu pumpubaloko nai kaoneang Tamming Kabussùngang
(Mat. 21:12-13, Luk. 19:45-48, Yoh. 2:13-16)
15Deaꞌna‑mi se i Yerusalem ti Yesu sola: pasikolaNa, pang Yesu lumao pole i kaoneang Tamming Kabussùngang. I anto mampasahu pumpubaloko pang tau ung si mambalaꞌ. Na haling-haling‑ing ti mejanna pumputukaꞌ seeng, pang esòngangna pumpubaloko kudaꞌ merpati,*#11:15 pumputukaꞌ seeng pang tau ung si mubaloko pang ung mambalaꞌ. Hele catatan kaki i Mat. 21:12. 16pang ha mampatinai‑I tau mambaha aka-akanna mampalengkeꞌ pangàloangna Tamming Kabussùngang. 17Na paturona‑mi Yesu ti tau i anto teꞌ, “Ha u ìsang‑ko se naꞌ moa teꞌ i laling Suraꞌna Puang nironno: mène: tee, ‘TammingKu nikonaia tamming kaoneang musumbayang nasang tau.’*#11:17 Yes. 56:7. Hampoꞌ u babe se pukobuangna tau ung làsi:!” 18Na sàding kapala-kapala imang pang ung si manarangna i aluku, to sua: to. Mangokaꞌna‑mi se dalang manghùlìngi Yesu, ha umma‑i to, mapanaꞌ pinanaha‑i se, sàbaꞌ nasang tau mimàha mampisàdìngi pipaturoNa. 19Sitauꞌ hengi, Yesu pang pasikolaNa mampalii: Yerusalem.
Pipaturo: nai lòpo: ara
(Mat. 21:20-22)
20I hingkoꞌna i miluhengi, Yesu pang pasikolaNa lumao pole i Yerusalem pang pone:‑i se i lòpo: ara to. Na hele‑i se ti lòpo: to, màlo‑mo deaꞌ mao i oaꞌna. 21Na kalehainna‑mi Petrus to i maloe. Na konaina‑mi mao i Yesu teꞌ, “O Rabi, hele! Lòpo: ara ung ladu Ta tunna:, mate‑mo.”
22Na sùmui Yesu teꞌ, “Patongang‑ko se mao i Puang! 23Matantu te ung Ku pusua: matung e teꞌ Isai-sai ti ung musua: mao i mungku tee teꞌ, ‘Titeiꞌ pang titibe‑ko mao i laling tasiki!’ nasang to, nipukauꞌa mao i dea, deinti ha bata-bata‑i pang na patongang moa teꞌ aka ti ung na konai: to, tongang-tongang nipaaraa. 24Deanna‑mo to, Ku pusua: matung teꞌ, Aka pòteng ti ung nu palau se mangola: pusumbayang, patongang‑ko se moa teꞌ ìnang u tarimaa se, pang nipukauꞌa matung. 25Pang ìna u musumbayang se, hampoꞌ pinanahammu kadetu mao i tau sintàna:, pantengkai:‑ing dolung ti tau to, mangking Amammu i suruga mampantengkai:‑ingkodo ho kasalaangmu. [26Ìna ha u pantengkai:‑ingko se ti tau sintàna:, Amammu ho i suruga ha mampantengkaiing‑ko se kasalaangmu.]”
Pingkutìkang mampatu: kuasanna Yesu
(Mat. 21:23-27, Luk. 20:1-8)
27Yesu pang pasikolaNa bùruꞌ pole i Yerusalem. Pang tòna mammulao-lao ti Yesu i laling kaoneang Tamming Kabussùngang, bùruꞌ ti kapala-kapala imang, ung si manarangna i aluku tu Yahudi pang ung si matua:-tuana tu Yahudi mao i Yesu. 28Mingkutiki‑i se moa teꞌ, “Aka ti pingkakìniangMu mampukauꞌ nasang te? Isai ti ung mampakuasa‑Ko?”
29Na sùmuinna‑mi Yesu moa teꞌ, “Baꞌ Ku mingkutìka‑kang. Ìna u sùmui se, Ku konaia‑ko ho matung isai ti ung mampakuasa‑Kaꞌ mampukauꞌ nasang te. 30Pudoiꞌna Yohanes, isai ti ung mampakuasa? Puang? dea‑raka tulino. Aka ti pisùmummu se?”
31Silàha:-làhana‑mi se teꞌ, “Ìna ta konai: se Puang, Na konaia teꞌ, ‘Baꞌ aka pu dang nu patongang‑ko se deꞌ?’ ” 32Hampoꞌ ha harani‑i se ho mangkonai: teꞌ, “Tulino,” sàbaꞌ mariaꞌ‑i se mao i tau boso:, sàbaꞌ nasang tau mangkonai: teꞌ ìnang nabi‑da ti Yohanes. 33Jadiꞌ, na sùmui‑i se moa teꞌ, “Ha ki ìsang‑ika.”
Na oanna‑mi Yesu mao i dei: se teꞌ, “Ìna mène: to, ha Ku konaii:‑ko ho matung isai ti ung mampakuasa‑Kaꞌ mampukauꞌ nasang te.”
اکنون انتخاب شده:
Markus 11: skx
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
