Markus 1
1
Yohanes Pumpudoiꞌ manghàngo tu Yahudi mantarima ung bùruꞌa, dea‑mo Yesu
(Mat. 3:1-6, 11-12, Luk. 3:3-6, 15-17, Yoh. 1:19-28)
1Dea‑mo te ti pararanna Kareba Belo: Yesu Kristus,*#1:1 Kristus. Hele catatan kaki i Mat. 1:1. Anakàna Puang. 2Mène: suana Puang ung nironno: i suraꞌ nabi Yesaya moa teꞌ,*#1:2a Puang Matua musua: mao i Datu: Pipasalamaꞌ i laling sua: ung nipupihuyang tee. “Hele, Ku mampantuyu suroKu mampidolung‑ingKo, ung mampumasilosoing‑Ko dalang,*#1:2b Kel. 23:20, Mal. 3:1. 3ung mikako-kakoang i padang ung tunini moa teꞌ, ‘Salokaꞌi‑ingko se pang pakahulo:‑ingko se dalang ti Puang!’ ”*#1:3 Yes. 40:3. 4mène:‑mo to ti Yohanes Pumpudoiꞌ mingèneꞌ i padang ung tunini pang mampikakoang‑ing moa teꞌ, “Mingkatobaꞌ‑mo: se pang pehea‑ko se ti kalaemu nidoiꞌ, mangking na pantengkai:‑ing Puang ti dosa-dosammu.” 5Bùruꞌna‑mi ti tau nai lipu: Yerusalem pang nasang pangalanna Yudea, mangakui dosanna‑i se pang nidoiꞌ i Uhai Yordan. 6Dea ti Yohanes mampake kayaꞌ nai hulunna unta pang salipiꞌ nai kuliꞌ,*#1:6 Hele catatan kaki i Mat. 3:4. pang kinannena dea‑mo kakommang pang ruo:. 7Mène: te ti isinna ung na pakareba moa teꞌ, “I hunningku araa ung bùruꞌ ung iaho nai koi:. Tumunnuku manghùraꞌ‑ing pòteng ulang sapatunNa pang, hang sipatu:‑kaꞌko. 8U ku doiꞌ se uhai, hampoꞌ Dea to ung bùruꞌa, u Na doiꞌa se Pinanaha Malìsong.”
Yesu na doiꞌ Yohanes
(Mat. 3:13-17, Luk. 3:21-22, Yoh. 1:32-34)
9Tempo to, Yesu bùruꞌ nai Galilea nai lipu: Nasareꞌ. Na doiꞌNa‑mi Yohanes i Uhai Yordan. 10Dea tòna millanto nai uhai ti Yesu, mangitanNa‑mi langiꞌ tuhangka pang Pinanaha Malìsong mène: merpati minguluꞌ mampintoàngi‑I. 11Nisàdingna‑mi ti sua: nai langiꞌ teꞌ, “Dio‑mo ti AnakàKu ung Ku pulemu. Ku masannang tungka mao i Dio.”
Yesu na kakaꞌi Datuna dihata bulituku
(Mat. 4:1-11, Luk. 4:1-13)
12Ha masai‑i nai anto, na baha Pinanahanna Puang mao i padang ung tunini. 13Leta: i anto ti Yesu ùpaꞌ pulona àlona masainna, na kakaꞌi Datuna dihata bulituku. One: i àlaꞌna oloꞌ-oloꞌ lampung, pang pira-pira malaikaꞌ bùruꞌ massommoꞌ‑I.
Yesu mamparara kamaꞌangNa i Galilea
(Mat. 4:12-17, Luk. 4:14-15)
14Tòna nitingkang‑mi ti Yohanes Pumpudoiꞌ, mao‑mo ti Yesu i Galilea mampadeaꞌ Kareba Belo: nai Puang moa teꞌ, 15“Bùruꞌ‑mo ti tempona ung na patantu Puang.*#1:15 Yeh. 7:12, Dan. 7:22. Na rara‑mo Puang ti muparenta. Mingkatobaꞌ‑ko se, pang patongang‑mo: se ti Kareba Belo:.”
Yesu manghàngo pasikolaNa ung parrara
(Mat. 4:18-22, Luk. 5:1-11)
16Tòna mammulao massalui Tasiki Galilea ti Yesu, mangita Simon pang pulengkeꞌna, dea‑mo Andreas. Tarrang‑i se mujallaꞌ i tasiki, sàbaꞌ pumpujallaꞌ‑i dasse:. 17Musuana‑mi ti Yesu moa teꞌ, “Hàmo: se. Ulaꞌ‑Maꞌ. U Ku pupiluhalia se pumpujallaꞌ tulino.” 18Na paliina‑mi se sahe: ti kamaꞌangna pang miluhali‑mo pasikolana Yesu.
19Na patùrung kang sangkìdoꞌ Yesu ti pammulaoangNa, mangitanNa‑mi Yakobus pang Yohanes, dea‑mo anakàna Sebedeus, i laling lemmangna tarrang mampabeloi: jallaꞌna‑i se. 20Na hàngo sahe: Yesu, pang na palii:‑i se ti amanna, dea‑mo Sebedeus, i laling lemmang sola: pira-pira taunna, pang mangulaꞌ‑I.
Yesu mupaturo: i Kapernaung pang mampumatalete: tau ung na katama dihata bulituku
(Luk. 4:31-37)
21Deaꞌ‑mo ti Yesu sola: to pasikolaNa i lipu: Kapernaung. Dea tòna àlo kapillìheang‑mo, mintama ti Yesu i tamming kapinombaang pang nipanghengi‑ing tempo mupaturo:. 22Nasang tau ung massàding, mimàha i laling pangaeNa mupaturo:. Sàbaꞌ mupaturo:‑Da sola: kuasa, sisala: tungka‑da to ung nene na sàding‑mi se. 23Tempo to, ara besa tau ung na katama dihata bulituku mintama i tamming kapinombaang. Tau to mikakoang 24moa teꞌ, “Ei Yesu tu Nasareꞌ, aka ti ung Nu pukauꞌa mao i kami? U mai naꞌ massolàngia‑kang? U ku ìsang, moa teꞌ Dio‑modo ti ung malìsong, ung bùruꞌ nai Puang.”
25Musuana‑mi ti Yesu mamparenta dihata bulituku to teꞌ, “Mànaꞌ! Pissòhong‑ko nai tau tee!” 26Na pibuuina‑mi ti mangkingking, mikei: pang missòhong.
27Nasangna‑i se mimàha, urungang silàha:-làha:‑mi se moa teꞌ, “Ei! Aka ti? Besa pipaturo: ung màle. Musua:‑Da sola: kuasa. Dihata bulituku pang Na parenta‑da, pang na toroꞌi.” 28Pàtu: dumallaꞌ ti kareba mampatu: Yesu i nasangna lipu: i Galilea.
Yesu mampumatalete: boso: tau
(Mat. 8:14-17, Luk. 4:38-41)
29Tòna missòhong‑mo nai tamming kapinombaang ti Yesu sola: Yakobus, Yohanes, pang pasikolaNa sintàna:, lumao i rasangna Simon pang Andreas. 30Siranna Simon bahine, tarrang i ale: na pupirarung. Jadiꞌ, sàhe: nipaìsàngi ti Yesu. 31LumanNa‑mi mantokaꞌ kangkangna bahine to, pang Na patèdeꞌ, na ola:‑ing hùling ti pirarungna. Pang dea‑moda ti ung mallayani‑i se.
32I malenanna, tòna lìli:‑mo ti kùlaꞌ, nasangna tau ung mipanaꞌ pang tau ung na katama dihata bulituku nibaha mao i Yesu. 33Nasang tau i lipu: to mapokong i heleꞌna rasangna Simon, 34pang Na pumatalete: ti boso: tau ung mipanaꞌ pang Na pasahu ti dihata bulituku. Ha Na kanàhai:‑i ti dihata bulituku musua: mampatu: Dea, sàbaꞌ hang sipatu:‑i mao i dei: se, na moi‑rika na ìsang‑i se isai‑i ti Dea.
Yesu mupaturo: i Galilea
(Luk. 4:42-44)
35Dungkuꞌ kùlaꞌ, tèdeꞌ‑mo ti Yesu. MissòhongNa‑mi nai rasang mao i kaoneang ung tunini mangking ara kanàha: musumbayang. 36Hampoꞌ Simon‑i se lumao mampidalang‑I. 37Dea to na korai:‑mi se, musua:‑i se moa teꞌ, “Nasang tau mangokaꞌ‑Ko. Sumule:‑Ke!”
38Na sùmui Yesu moa teꞌ, “Hari:. Hàme: se sule: i lipu:-lipu: sidùkuꞌna, mangking i anto ho Ku mampakareba Kareba Belo:, sàbaꞌ dea‑mo to ti patuna Ku bùruꞌ.” 39Lumanna‑mi ti Yesu sola: pasikolaNa i nasang pangalanna Galilea, mampakareba Kareba Belo: i tamming-tamming kapinombaang pang mampasahu dihata bulituku.
Yesu mampapàda: besa tau ung balala
(Mat. 8:1-4, Luk. 5:12-16)
40Ara besa tau ung balala bùruꞌ i Yesu, tùrung mukalimuntuꞌ i heleꞌNa pang mingkalemu moa teꞌ, “I mading‑i, papàda:‑kaꞌko, sàbaꞌ U makuasa‑do.”
41Makadainna‑mi ti pinanahanna Yesu. Na ànaꞌna‑mi ti kangkangNa mantokaꞌ tau to pang musua: moa teꞌ, “Mading. Pàda:‑mo:!” 42Hùlingna teng‑mo ti sainna tau to, belo:‑mo to‑da. 43Na suona‑mi Yesu malai ti tau to, pang Na apuꞌ moa teꞌ, 44“Kalehai tungka! Hau pusua:-sua: mao i isai-sai teng te aka te, sangadinna nàmo: i imang mampupiita kalaemu, pang pinomba‑ing ti pinomba ung mallìsòngi kalae:, mène: ung nipiparenta‑ing i atorang-atorang Musa,*#1:44 Hele i Im. 14:2-31. miluhali butti mao i dei: se.” 45Hampoꞌ lumao ti tau to mampakareba aka to, pang na sahuꞌ mao iaka-aka, dea pùna makuntu‑mo ti Yesu mintama i lipu:, sàbaꞌ na karopo tau boso:. Leta: i kaoneang-kaoneang ung tunini ti Yesu. Moi mène: to, tùrung ho lumao ti tau nai iaka-aka.
اکنون انتخاب شده:
Markus 1: skx
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
