Matius 19
19
Yesu mupaturo: mampatu: kasiholiang
(Mrk. 10:1-12)
1Tòna mantampàki‑mo pipaturona to ti Yesu, kakarang nai Galilea pang bùruꞌ i pangalanna Yudea i heteꞌna Uhai Yordan. 2Tau boso: mangulaꞌ‑I, pang Na pumatalete: i anto.
3Bùruꞌna‑mi ti pira-pira tu Parisi mangkakaꞌi Yesu. Mingkutiki‑i se moa teꞌ, “Manuruꞌ Kinta:, mampatu: atorang-atorang Musa, mading naꞌ tau mangholi bahinena moi katong aka pòteng?”
4Na sùmui Yesu teꞌ, “Ha u basa‑mo: se naꞌ i Suraꞌna Puang teꞌ Dea ung mantampa tulino, nai mula tau ‘mampaara muane pang bahine’?*#19:4 Par. 1:27, 5:2. 5Pang Na pusua: teꞌ, ‘Deanna‑mo to, dea ti muane mampaliia amanna pang inanna pang mamesa sola: bahinena, pang nai iduanna miluhali besa kalae:.’*#19:5 Par. 2:24. 6Jadiꞌ, hang idua‑i se hura:, sangadinna besa‑rai:. Deanna‑mo to, aka ti ung na pabesa‑mo Puang, hang mading‑i na pasisaraka tulino.”
7Musuana‑mi se ti tu Parisi mao i Yesu teꞌ, “Ìna mène: to, aka ti sàbaꞌna Musa mambabe atorang moa teꞌ muane mading manghengi‑ing suraꞌ kasiholiang mao i bahinena, ìna tau to mangkapelai: mangholi‑i?”*#19:7 Hele i Ul. 24:1.
8Na sùmui Yesu teꞌ, “Musa mangkanàhai:‑ko se mangholi bahinemu sàbaꞌ makarraꞌ ti pinanahammu se, hampoꞌ nai pararanna hang mène:‑ida to. 9Deanna‑mo to, Ku pusua: matung teꞌ, Isai-sai ti ung mangholi bahinena, pambàtiꞌ bahine to hang malahang‑i, mangking silopaka pole bahine sintàna:, tau to malahang.”
10Ladu nai anto, musua:‑i se ti pasikolaNa mao i Yesu teꞌ, “Ìna mène: to ti pipaturo: ung tongang mampatu: kasiumpuꞌang muane mao i bahinena, belo: sule: hanaii‑mi silopaka.”
11Na sùmui Yesu teꞌ, “Hang nasang‑ida tau mantarima ti sua: to,*#19:11 sua: to. Ara ho tassereꞌ sintàna: mangkonai: pipaturo: te. tau ung si na patantu‑moda teng Puang. 12Sàbaꞌ ara tau ung dang silopaka sàbaꞌ mate lino nai aranna. Ara ho ung dang mio: silopaka sàbaꞌ nisinni: mène: oloꞌ-oloꞌ. Pang ara ho ti ung dang silopaka sàbaꞌ na kàtui kalenanna mangking hela mintongang mallayani Puang. Isai-sai ti ung hela mantarima dalang tee, na pukauꞌ‑i.”
Yesu mampasakke pira-pira anaka
(Mrk. 10:13-16, Luk. 18:15-17)
13Nai anto, ara tau ung mambaha anaka mao i Yesu mangking Na palummàngi palaꞌ pang Na pusumbayang‑ing. Hampoꞌ na ràho pasikolana Yesu ti tau to‑i se. 14Na konaina‑mi Yesu teꞌ, “Patinai‑i se ti ana-anaka ti mai! Hau apuꞌ se, sàbaꞌ tau ung si mène:‑mo te ti ung mangampu kadatuang suruga.” 15Na palummànginna‑mi palaꞌ mampasakke ana-anaka to‑i se. Kakarangna‑mi se nai anto.
Tau ung mangura ung sukiꞌ
(Mrk. 10:17-27, Luk. 18:18-27)
16Tempo to, ara besa muane ung mangura bùruꞌ mao i Yesu pang mingkutiki teꞌ, “O Tungguru, aka ti ung belo: parallu ku pukauꞌ mangking ku mangkorai: katuhoang ung màle?”
17Hampoꞌ na sùmui Yesu teꞌ, “Oꞌ aka pu u Mi kutiki mampatu: aka ti ung belo:? Besa‑ida teng ti ung belo:, dea‑mo Puang. Hampoꞌ ìna u mangkapelai: mangkorai: tuho:, parallu u mantoroꞌi parenta-parentanna Puang.”
18Mingkutiki ti tau to teꞌ, “Parenta ummanna to?”
Na sùmui Yesu teꞌ, “Hau mupatei, hau malahang, hau mumanau, hau mampusua: passabii ung dang tongang, 19sangadi‑i ti amammu pang inammu pang pulemu‑i ti solamu mène: u mampulemu kalaemu.”*#19:18-19 Hele i Kel. 20:12-16, Im. 19:18.
20Na oanna‑mi ti tau to teꞌ, “Nasang ti to, ku toroꞌi‑mo. Aka kang ti ung parallu?”
21Na sùmui Yesu teꞌ, “Ìna u mangkapelai: hari: salaiangna, baꞌ nao:, baloko nasang ti barang-barangmu, hengi‑ing mao i tau ung si mase-mase ti seengna, pang nai anto u mangkoraia kaaraang i suruga. Ladu to, mai‑mo: mangulaꞌ‑Kaꞌ.”
22Hampoꞌ na sàdingna‑i tau to ti suana Yesu, malai silentong pinanaha masussa, sàbaꞌ mantangaꞌ kasukiꞌangna ung maranga.
23Musuana‑mi mao i pasikolaNa ti Yesu teꞌ, “Matantu te ung Ku pusua: matung e teꞌ Marempa‑da ìnang ti tau ung sukiꞌ miluhali taunna Puang i kadatuangNa. 24Pang Ku pusua: ho matung teꞌ, Làbi madàli‑da ti besa unta mangola: hàlo: jarung nai none: tau ung sukiꞌ mintama i kadatuangna Puang.”
25Tòna massàding‑mi se pusuana Yesu ti pasikolaNa, mimàha‑i se tungka. Na konai:‑i se teꞌ, “Baꞌ, ìna mène: to, kami polea‑mo naꞌ helaa nipasalamaꞌ, ung mase-mase?”
26Na hele Yesu ti pasikolaNa pang Na sùmui teꞌ, “Mao i tulino, hari:‑da ung hela. Hampoꞌ mao i Puang, nasang hela‑da Na pukauꞌ.”
Kamaupaꞌang mangulaꞌ Yesu
(Mrk. 10:28-31, Luk. 18:28-30)
27Musuana‑mi ti Petrus teꞌ, “Mangaka ti kami? Nasang angkanna ki palii:‑mo mangulaꞌ‑Ke. Pang aka ti ung ki koraia?”
28Na oanna‑mi Yesu teꞌ, “Matantu te ung Ku pusua: matung e teꞌ I lino ung baru, tòna Anaka Tulino mesònga i esòngang kadatuangNa, dio se ung mangulaꞌ‑Maꞌ mesònga ho i sampulo: idua esòngang kadatuang mamparenta sampulo: idua rapu tu Israel. 29Pang nasang tau ung mampalii:‑mo rasangna, dea‑raka kaanna dea‑raka adinna, amanna dea‑raka inanna, anakàna dea‑raka kinetena sàbaꞌ Koi:, mangkoraia sangatuꞌ lùpiꞌna nai none: aka ti ung na palii:‑mo pang mangkorai: katuhoang ung màle.
30Hampoꞌ boso: tau ung iaho i latenna miluhalia ung i hoiꞌ, pang ung i hoiꞌ miluhalia ung iaho.”
اکنون انتخاب شده:
Matius 19: skx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
