Matius 18
18
Isai ti ung kàle: iaho
(Mrk. 9:33-37, Luk. 9:46-48)
1Tempo to, bùruꞌ ti pasikolana Yesu pang mingkutiki teꞌ, “Isaingki sitongangna ti ung kamìnang iaho i laling kadatuang suruga?”
2Na hàngo Yesu ti besa anaka pang Na paone: i lummuna‑i se. 3MusuaNa‑mi teꞌ, “Matantu te ung Ku pusua: matung e teꞌ Ìna hang mabàli:‑ko se pang miluhali mène: anaka tee, hang mintamao: dosse: i kadatuang suruga. 4Deanna‑mo to, isai-sai ti ung mampaihoiꞌ kalaena pang mène: anaka tee, dea‑mo to ti ung kamìnang iaho i kadatuang suruga. 5Pang isai-sai ti ung mantarima anaka mène: tee sàbaꞌ Koi:, tau to sibali mantarima‑Maꞌ.”
Nai iaka ti ung mampahùling tulino
(Mrk. 9:42-48, Luk. 17:1-2)
6“Hampoꞌ isai-sai ti ung mampabùruꞌa marèneꞌ nai besanna tau tee‑i se ung nihele supi: ung mampatongang‑Kaꞌ, baꞌ nai none: na hukùnga Puang àlo i hunni ti tau to, belo: sule: ìna nipintaꞌi hatu ung lammuꞌ i barakona, màli: nitibe‑i mao i tasiki. 7Masolang ti lino sàbaꞌ ara ung massangkeꞌ. Pang ìnang tùrùnga‑da ara ti ung mène: to, hampoꞌ macilaka ti tau ung mambabe sangkeꞌ to!
8Ìna mènena kangkangmu dea‑raka kokoꞌmu mampahùling‑ko, lengkeꞌi pang tibe. Sàbaꞌ belo:‑da sule: sammaliang‑i ti kangkangmu dea‑raka kokoꞌmu hampoꞌ mintama i katuhoang ung màle, nai none: kànaꞌ ti kangkangmu dea‑raka kokoꞌmu hampoꞌ u nitibe mao i api ung dang ara podaꞌna. 9Pang ìna mènena matammu mampahùling‑ko, kalèteke malai pang tibe, sàbaꞌ belo:‑da sule: u kaloꞌ hampoꞌ mintama i katuhoang ung màle, nai none: kànaꞌ ti matammu hampoꞌ u nitibe mao i api naraka.”
Rampeang domba ung hùling
(Luk. 15:3-7)
10“Ku pusua: matung teꞌ, Hau manghele polu se besanna nai ung mène: ung supi: tee. Sàbaꞌ Ku pusua: matung teꞌ, Ara‑da malaikaꞌ-malaikaꞌna‑i se ung nene i heleꞌna AmangKu i suruga. [ 11Sàbaꞌ Anaka Tulino bùruꞌ mampasalamaꞌ tau ung hùling.]
12Mangaka ti pantangaꞌmu se? Ìna besa tau mangampui sangatuꞌ domba, pang hùling ti besa, aka ti ung na pukauꞌa? Tantu tau to mampaliia ung kamesaa: pulona kamesaa: i mungku pang mao mangokaꞌ to ung hùling. 13Matantu te ung Ku pusua: matung e teꞌ Ìna na korai: ti domba to, tau to làbi hakaa‑da mao i besa domba to nai none: domba ung kamesaa: pulona kamesaa: ung dang hùling. 14Mène:‑da ho to ti Amammu i suruga, hang mio:‑Ida ìna besanna nai ung mène: ung supi: tee hùling.”
Aka ti ung parallu u pukauꞌ ìna sola: dalangmu mampukauꞌ dosa matung
15“Ìna sola: dalangmu mampukauꞌ dosa matung, nao: marràho belo:‑i, hampoꞌ hau na ara tau sintàna:. Ìna u na pisàdìngi, baꞌ u korai: pole. 16Hampoꞌ ìna hang na pisàdìngi‑ko, baha ti besa dea‑raka idua kang tau. Sàbaꞌ nironno: i Suraꞌna Puang moa teꞌ, ‘Nasang kara-kara parallu na ùsuꞌi idua dea‑raka itàlu sabi, màli: na to ung nipantannaꞌ‑ing hang nibata-batai‑i.’*#18:16 Ul. 19:15. 17Ìna hang na pisàdìngi‑i ti tau to‑i se, padeaꞌ mao i jamaa. Pang ìna hang mio:‑i ho mampisàdìngi jamaa, àna: ti tau to miluhali ung dang mangìsang Puang, mène: tupassima.
18Matantu te ung Ku pusua: matung e teꞌ Aka-aka pòteng ti ung nu piapuꞌ‑ing se i lino, nipiapuꞌing‑da ho i suruga. Pang aka-aka pòteng ti ung nu àna: malleo: se i lino, niàna: malleoa‑da ho i suruga. 19Pang matantu ho te ung Ku pusua: matung e teꞌ Ìna nai àlaꞌmu se i lino tee ara idua tau mamesa pinanaha mampalau aka pòteng i laling musumbayang, pusumbayangna to, na tarimaa AmangKu i suruga. 20Sàbaꞌ iaka na kaonei: idua dea‑raka itàlu tau mukobu: sàbaꞌ Koi:, Ku one:‑ko i lummuna‑i se.”
Rampeang mampatu: mupantengkai:‑ing
21Nai anto Petrus mindùkuꞌ mao i Yesu pang mingkutiki teꞌ, “Tuang, ìna mantàdiku tùrung mampukauꞌ dosa mao i koi:, pimmiraa ku parallu mampantengkai:‑ing? Deaꞌ pimpitu?”
22Na sùmui Yesu teꞌ, “Handei: teng pimpitu‑i, sangadinna pimpitu pulona kali pitu! 23Sàbaꞌ i kadatuang suruga, niala rampeang besa datu: ung mangkapelai: mamparessa laporang seeng nai pegawai-pegawaina. 24Tòna marrara‑mo muparessa, nibaha mao i heleꞌna ti besa pegawaina ung kiindang pira-pira miliar. 25Hampoꞌ hang na hela‑i tau to ti mallessuꞌi indangna, jadiꞌ tuangna mampiparenta‑ing mangking tau to nibaloko sola: bahinena, anakàna, pang nasang ung na ampu mangking marrìngang-rìngàngi indangna. 26Mukalimuntuꞌna‑mi tumunnuku ti tau to i heleꞌna datu: pang mingkalemu teꞌ, ‘Tuang, sabaraꞌ‑kangkodo. Ku lessuꞌia‑ko nasang ti indangku.’ 27Na pulemu tuangna ti tau to, dea pu na pantengkai:‑ing pang na pakaliung‑mo teng ti nasang indangna.
28Hampoꞌ tòna sòhong‑mo ti tau to, sikorai: sola: pegawaina ung kiindang mao i dea besa‑i juta. Na tokaꞌ i barakona pang na tàko: ti solana to, pang na ongi‑ing teꞌ, ‘Bayaꞌ nasang ti indangmu!’ 29Mukalimuntuꞌna‑mi ti solana to i heleꞌna pang mingkalemu teꞌ, ‘Sabaraꞌ‑kangkodo. Ku lessuꞌia‑ko ti indangku.’ 30Hampoꞌ tau to hang sabaraꞌ‑i, sangadinna na pupitarungkuꞌ sule: ti solana deaꞌ na lessuꞌi ti indangna.
31To na ìsang‑mi se sola: pegawaina sintàna: ti aka to, masussa‑i se tungka pang mampinghare:‑ing nasang aka to mao i tuangna‑i se. 32Na hàngona‑mi datu: ti tau to pang na ongi‑ing teꞌ, ‘E tau ung kadetu pinanaha, nasang indangmu ku pakaliung‑mo sàbaꞌ u mingkalemu mao i koi:. 33Parallu‑do ho u mampulemu solamu mène: koi: mampulemu‑mo:.’ 34Lalaka tungka ti datu: to, dea pùna tau ung kadetu pinanaha to nipatama i putarungkuꞌang deaꞌ na lessuꞌi nasang ti indangna.
35Jadiꞌ, mène:‑da ho to ti ung na pukauꞌa AmangKu i suruga matung, ìna hang mampantengkai:‑ingko se mantàdimu nai pinanaha mabusamu.”
اکنون انتخاب شده:
Matius 18: skx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
