Oroomusa 10

Ɓa zúifùwa làa bìa yínɔń ɓa à bìo sã̀ a Ɲúhṹso yi

1Wàn zàwa lè wàn hĩ́nni, bìo wi ĩ sĩi yi làa sòobɛ́ɛ na á ĩ wee fìo le Dónbeenì cɔ̃́n ɓa *zúifùwa dã́ní yi, lé ɓa kã̀níló bìo. 2Mu bon, ĩ dà à bío mu ɓa ɲii le ɓa ɓɛ̀ntĩ́n henía le Dónbeenì bìo làa sòobɛ́ɛ, ɛ̀ɛ ká mu yara binbirì á ɓa yí zũ. 3Bìo le Dónbeenì wee wé ò o nùpue térén le yahó á ɓa yí zũ, á ɓarɛ́n míten wi ɓa cà bìo ɓa à wé ká ɓa à térén le yahó. Lé kà síi á ɓa pã́náa bìo wee wé ò o nùpue térén le Dónbeenì yahó. 4Mu bon, lé o *Krista nɔn ó o *Mɔyiize làndá bèró bìo ɲii súráa, bèra a na à bìa ɓúenɓúen na wee dé mí sĩa o Krista mu yi, à bán térén le Dónbeenì yahó.

5Bìo ó o Mɔyiize bía ho làndá na wee wé ò o nùpue térén le Dónbeenì yahó dã́ní yi lé bìo kà: «Yìa wee wé bìo ho làndá bò henía wón yìo á à wé lua ho pànká yi.»#10.5 Mi loń Levii nùwã vũahṹ (Lévitique) 18.5 6Le sĩidéró o Krista yi dã́ní yi na wee wé ò o nùpue térén le Dónbeenì yahó á bìo kà lé bìo bía: Yí bío ũ sĩi yi le «lé o yɛ́n á à yòo ho wáayi?» Mu wee zéení le lé o yɛ́n á yòó wé ó o Krista ɓueé lii. 7Mún yí bío ũ sĩi yi le «lé o yɛ́n á à lii ho nì-hɔ̃́nbó-lóhó yi?» Mu wee zéení le lé o yɛ́n á lií vèení a Krista ɓa nì-hía tĩ́ahṹ.

8Ká bìo kà lé bìo bía: «Le bíonì ɓueé ɓó foǹ. Dén bíonì so lé dìo wee zéení le sĩidéró o Krista yi bìo.»#10.8 Mi loń Làndá zéeníló vũahṹ (Deutéronome) 30.12-14 Lé lerɛ́n bíonì mu á wa wee bue. 9Ká fo tà bía wéréwéré le o Yeesu lé o Ɲúhṹso, ká fo dó ũ sĩi binbirì le le Dónbeenì vèenía wo léra ɓa nì-hía tĩ́ahṹ, á fo ò fen. 10Mu bon, le sĩi na wee dé le Dónbeenì yi binbirì lé bìo wee wé ò o nùpue térén le yahó. Yìa bía mí sĩidéró o *Krista yi bìo wéréwéré, wón ɓànso á le Dónbeenì á à fení. 11Mu bon, bìo kà lé bìo túara le Dónbeenì bíonì vũahṹ yi: «Nùpue lée nùpue na dó mí sĩi le Dónbeenì yi wón máa nìyi.»#10.11 Mi loń Ezayii vũahṹ 28.16 12Ɓa *zúifùwa làa bìa yínɔń ɓa zúifùwa á hueekaró mía yi. Ɓa ɓúenɓúen lɛɛ́ra o Ɲúhṹso nì-kéní yi, wón na wee wé mu tentemu làa bìa ɓúenɓúen na wee fìo mu o cɔ̃́n. 13Mu bon, bìo kà lé bìo túara le Dónbeenì bíonì vũahṹ yi: «Nùpue lée nùpue na à ve o Ɲúhṹso, ó ò kã̀ní.»#10.13 Mi loń Zowɛɛle vũahṹ 3.5

14Ɛ̀ɛ ká ɓa so dà à ve o Ɲúhṹso ká ɓa yí dó mí sĩa wo yi le? Á ɓa so dà à dé mí sĩa wo yi ká a ɓúi yí zéenía o bìo á ɓa yí ɲá le? Á ɓa so dà à ɲí mu ká a ɓúi yí buera mu le? 15Á mu so dà à bue ká a ɓúi yí tonkaa mu bìo yi le? Làa bìo mu túararáa le Dónbeenì bíonì vũahṹ yi kà síi: «Bìa wee ɓuen lè hã bín-tentewà á miló sĩ-wɛɛ ɓɛ̀ntĩ́n wi làa sòobɛ́ɛ.»#10.15 Mi loń Ezayii vũahṹ 52.7 16Ká ɓa ɓúenɓúen màhã́ yí bò le Dónbeenì bín-tente yi. Mu bon, bìo kà lé bìo ó o *Ezayii bía: «Ɲúhṹso, lé o yɛ́n yàá dó mí sĩi le bín-tente na wa wee bue yi?»#10.16 Mi loń Ezayii vũahṹ 53.1 17Lé kà síi á le sĩidéró le Dónbeenì yi wee lé le bíonì na ó o nùpue wee ɲí yi, á le bíonì mu lé o Krista bìo bueró.

18Àwa, le ĩ tùa mia: O *Isirayɛɛle nìpomu á yí ɲá le bín-tente mu le? Ɓa ɲá le. Bìo kà lé bìo túara le Dónbeenì bíonì vũahṹ yi:

«Le Dónbeenì bín-tente

á bɛ̀nbɛ́ra hã lùa ɓúenɓúen.

Le buera nɔn

ho dĩ́míɲá nùpua ɓúenɓúen yi.»#10.18 Mi loń Lení vũahṹ (Psaumes) 19.5

19Le ĩ wíoka tùa mia: Á lé o Isirayɛɛle nìpomu yí zũna mu kúará le? Àwa, á bìo kà lé bìo ó o *Mɔyiize fèra bía mu dã́ní yi:

«Ĩ ì wé á bìa yínɔń ĩ nìpomu

á mi ì dí lè le yandee.

Ĩ ì wé á mi sĩa á à cĩ̀

mu nìpomu na hácírí mía yi.»#10.19 Mi loń Làndá zéeníló vũahṹ (Deutéronome) 32.21

20Le *Dónbeenì ɲi-cúa fɛɛro Ezayii yàá henía mí sĩi ò o bía bìo kà:

«Bìa lá yí máa cà mi

á yú mi.

Bìa lá yí máa fìo dɛ̀ɛ ĩ cɔ̃́n

á ĩ zéenía lè ĩten.»#10.20 Mi loń Ezayii vũahṹ 65.1

21Ká a Isirayɛɛle nìpomu dã́ní yi, á le Dónbeenì ɲi-cúa fɛɛro Ezayii pá bĩnía le le Dónbeenì bía bìo kà: «Làa wizooní ɓúenɓúen ká ĩ wee dá ĩ níi ve o Isirayɛɛle nìpomu na yí máa bè ĩ bíonì yi, à ɓa kã́a.»#10.21 Mi loń Ezayii vũahṹ 65.2

اکنون انتخاب شده:

Oroomusa 10: box

های‌لایت

به اشتراک گذاشتن

مقایسه

کپی

می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید

در مورد Dónbeenì páaníi fĩnle vũahṹ اطلاعات بیشتر کسب کنید

Oroomusa 10

آیات محبوب کتاب مقدس از
Oroomusa 10

بشنويد Oroomusa 10

كتاب‌ مقدس:

Bwamu

ترجمه: Dónbeenì páaníi fĩnle vũahṹ - box

Oroomusa 10

Oroomusa 10

آیات محبوب کتاب مقدس از Oroomusa 10

بشنويد Oroomusa 10

كتاب‌ مقدس:

Bwamu

ترجمه: Dónbeenì páaníi fĩnle vũahṹ - box

Oroomusa 10

آیات محبوب کتاب مقدس از
Oroomusa 10