མད་ཐཱ། 28
28
ཡེ་ཤུ་འཆི་བ་ནས་གསོན་པོ་བཞེངས་པ།
(མར་ཀུ། ༡༦:༡-༡༠; ལུ་ཀ། ༢༤:༡-༡༢; ཡོ་ཧ་ནན། ༢༠:༡-༡༠)
1ངལ་གསོ་གིན་ཉིན་མ་གཤམ་ནས་བདུན་ཕྲག་གི་ཉིན་མ་དང་པོ་གོ་ལ། གནམ་ཟ་ར་ཟི་རི་ལ་མིར་ཡམ་མག་ད་ལི་ནི་དང་མིར་ཡམ་གཞན་མ་གོ་དུར་ཁྲོད་ལྟ་རུ་སོང་བ་ལགས། 2དེ་ནས་ལམ་སང་གཙོ་བོའི་བང་ཆེན་གཅིག་ནམ་མཁའི་ཞིང་ཁམས་ནས་འོ་དུ་རུ་བབས་ཏེ་ས་ཡོམ་ཆེ་གཅིག་བརྒྱབ་པ་ལགས། དེ་ནས་ཁོང་པ་ཕེབས་ཏེ་དུར་ཁྲོད་ཀྱི་ཕོང་གིན་གོ་ཧ་ལ་རིལ་རེ། འོ་དེའི་ཐོག་ལ་བཞུགས་པ་ལགས། 3ཁོང་པ་ཡི་ཞལ་གློག་མར་ཅོག་རེ་དང་། ཁོང་པ་ཡི་ན་བཟའ་གོ་ཁ་བ་ཅོག་རེ་དཀར་བོ་འོད་ད་ལགས། 4དེ་ནས་སྲུང་མཁན་ཀྱ་ཁོང་ལ་འཇིགས་ཏེ། འདར་ཏེ་མི་གཤིན་པོ་ཅོག་རེ་བྱུང་བ་ལགས།
5ཡིན་ནའང་བང་ཆེན་གྱིས་སྐྱེས་དམན་གཉིས་བོ་ལ་གསུངས་བ་ལགས། མ་འཇིགས། ཁྱེད་གཉིས་བོ་རྒྱང་ཤིང་ཁར་ལ་བཀྲོངས་ཀྱིན་ཡེ་ཤུ་ལ་བཙལ་ལ་ལགས་སྨྲས་རེ་ང་ལ་ཤེས་ཡས་འོད། 6ཁོང་པ་ཡིས་གསུངས་ཀྱིན་ཅོག་རེ། ཁོང་སྐུ་གསོན་པོ་བཞེངས་ཚར་ཏེ་དུ་རུ་མིན་འདུག།ཤོག།ཁོང་པ་བཞག་ས་ས་ཆ་གོ་ལྟོས། 7དེ་ནས་མགྱོགས་སེ་སོང་རེ། ཁོང་པ་ཡི་ཉེ་གནས་ཀྱ་ལ་ཁོང་པ་འཆི་བ་ནས་གསོན་པོ་བཞེངས་ཚར་འདུག་སྨྲས་རེ་ཤོད། དེ་ནས་ཁོང་པ་ཁྱེད་ཀྱ་ནས་ཨེན་ལ་ག་ལིལ་དུ་ཕེབས་ཀྱི་ལགས། དེ་ནས་འོ་དུ་རུ་ཁོང་པ་ལ་མཇལ་གྱི་ལགས་སྨྲས་རེ་ཤོད། ད་ངས་ཁྱེད་ཀྱ་ལ་བཤད་ཚར་འོད།
8ད་ཁོང་ཀྱ་འཇིགས་སྐྲག་དང་དགའ་སྤྲོ་ཡིས་ཁངས་རེ། ལུ་ལུ་དུར་ཁྲོད་ནས་ཉེ་གནས་ཀྱ་རྩ་རུ་བང་བཏང་རེ་བཤད་དུ་སོང་བ་ལགས།
9དེ་ནས་ལམ་སང་ཡེ་ཤུ་ཁོང་ཀྱ་གདོང་དུ་ཕེབས་ཏེ་ཁོང་གཉིས་བོ་ལ་གསུངས་བ་ལགས། ཁྱེད་ཀྱ་ལ་ཞི་བདེ་འོང་བར་ཤོག།དེ་ནས་ཁོང་གཉིས་བོ་ཁོང་པ་ཡི་གདོང་དུ་འོངས་རེ། ཁོང་པ་ཡི་ཞབས་ལ་འཇུས་རེ་ཕྱག་འཚལ་བ་ལགས། 10དེ་ནས་ཡེ་ཤུ་ཡིས་ཁོང་གཉིས་བོ་ལ་གསུངས་བ་ལགས། ཁྱེད་ཀྱ་མ་འཇིགས། སོང་ལ་ངའི་སྤུན་ཀྱ་ལ་ག་ལིལ་དུ་སོང་སྨྲོས། དེ་ནས་འོ་དུ་རུ་ཁོང་ཀྱ་ཡིས་ང་ལ་མཐོང་གི་ལགས།
སྲུང་མཁན་ཀྱ་ཡིས་ལབ་བཟོས་བ།
11ད་འོ་དེ་སྐྱེས་དམན་གཉིས་བོ་འགྲོའི་གང་ལ། སྲུང་མཁན་ཀྱ་ནས་རིང་འགའ་རྒྱལ་ས་རུ་སོང་རེ། གི་བྱུང་གིན་གི་རི་མཆོད་དཔོན་ཆེ་ལ་བཤད་པ་ལགས། 12དེ་ནས་མཆོད་དཔོན་ཆེ་ཀྱ་རྒན་པ་ཀྱ་མུ་ལ་འཛོམས་ཏེ། གྲོས་བྱས་རེ་དམག་མི་ཀྱ་ལ་དམི་ཅིག་གི་ཨ་ལེ་སྟེར་ཏེ། 13དེ་རེ་སྨྲས་བ་ལགས། ཁོའི་ཉེ་གནས་ཀྱ་མཚན་ལ་འོངས་རེ་འེ་ཀྱ་གཉིད་ཤོར་ཏེ་བསྡད་དེ་གང་ལ། ཁོས་རོ་བརྐུས་རེ་ཁྱེར་ཏེ་ལ་སོང་སྨྲས་རེ་མི་མང་ཀྱ་ལ་ཤོད། 14དེ་ནས་འདི་ལབ་དེ་སྤྱི་ཁྱབ་ཀྱི་ཨམ་མཆོག་རུ་གོ་ན། འེ་ཀྱ་ཡིས་ལབ་སྒྲིག་སྟེ་ཁྱེད་ཀྱ་ལ་རྙོག་གྲ་དེ་ནས་བཏོན་དོ། 15འོ་བྱས་རེ་ཁོང་ཀྱ་ཡིས་ཨ་ལེ་གོ་སྲུང་མཁན་ཀྱ་ཡིས་ཁྱེར་ཏེ་གི་བྱེད་དུ་བཅུག་གིན་གོ་བྱས་བ་ལགས། དེ་ནས་གཏམ་འདི་དི་རིང་ཐུག་པའི་ཡ་ཧུ་དཱ་པ་ཀྱ་ཡི་ཁོག་ཏུ་དར་འོད་ད་ལགས།
མཐའ་མའི་བཀའ་ལོན།
(མར་ཀུ། ༡༦:༡༤-༡༨; ལུ་ཀ། ༢༤:༣༦-༤༩; ཡོ་ཧ་ནན། ༢༠:༦-༨)
16ད་ཉེ་གནས་བཅུ་གཅིག་པ་ཀྱ་ཡེ་ཤུ་ཡིས་གསུངས་ཀྱིན་ཅོག་རེ། ག་ལིལ་གྱི་རི་རུ་སོང་བ་ལགས། 17དེ་ནས་ཁོང་ཀྱ་ཡིས་ཁོང་པ་ལ་མཇལ་ལི་གང་ལ། ཁོང་ཀྱ་ཡིས་ཕྱག་འཚལ་བ་ལགས། ཡིན་ནའང་རིང་འགའ་ཡིས་དོགས་པ་བྱས་བ་ལགས། 18དེ་ནས་ཡེ་ཤུ་ཁོང་ཀྱ་རྩ་རུ་ཕེབས་ཏེ་གསུངས་བ་ལགས། གནམ་ས་གཉིས་ཀྱི་དབང་གི་རི་ང་ལ་གནང་འོད་ད་ལགས། 19འོ་བྱས་རེ་སོང་། དེ་ནས་མི་རིགས་གི་རི་ལ་ཉེ་གནས་བཟོས། དེ་ནས་ཡབ་དང་། སྲས་དང་། དམ་པའི་ཐུགས་ཉིད་ཀྱི་མཚན་ནས་ཁོང་ཀྱ་ལ་ཁྲུས་གསོལ་སྟེར། 20དེ་ནས་ངས་ཁྱེད་ཀྱ་ལ་བསླབས་ཀྱིན་བཀའ་གི་རི་སྲུང་ཡས་ལ་ཁོང་ཀྱ་ལ་སློབས། དེ་ནས་མཐའ་ཡི་དུས་ཐུག་པའི་ནམ་ཡིན་ན། ང་ཁྱེད་ཀྱ་མུ་ལ་འོད་སྨྲས་རེ་ཧ་གོ་ར་བྱེད།།
اکنون انتخاب شده:
མད་ཐཱ། 28: LOY
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. and Nepal Bible Society
