Maraka 14
14
Yawutu cɛɛnni kiri wɔ lu kɔlɔmaan ki
(Matiyu 26.1–5; Luki 22.1–2; Yuhana 11.45–53)
1Yawutu kiri wɔ Jonbikɔ ɲaannabyɛ ki, kí wuru bwuru tuutuubali ki nu-a ninwɔ̀ ru, niŋ ɲaannabyɛ ki wuru yiri-ra saa ra sunŋ fuuli i. Kirinŋ tɛ sarakawɔrɔtɔnŋ kiri ŋununtiŋ kiri fa sariya kalimɔɔ kiri i ǹʼceeli-li arì i Yesu kilɛn du ru. 2Kí tu arìmaŋ tɛ : « Yi fa wú pa ɲaannabyɛ ki ru kì, a niŋ ma, konaŋ ki a jɔrɔkɔ yibɛɛ cɛfan, kí i yi kari. »
Mari wɔ̀ ŋuŋ kini jii ki bo-i Yesu ŋununu
(Matiyu 26.6–13; Yuhana 12.1–8)
3Ŋì i Yesu tu nufinŋ nu-a tuutiŋ Simɔŋ wɔ mani nu Bɛtani kili ki ru, mari bɛɛ i na duaŋ pyaanŋ bɛɛ wu. Niŋ duaŋ ki ramɔni wuru kwɔ kpaafuru wu, ŋì i faa ŋuŋ kini jii sɛlɛsɛli bɛɛ ra, nwɔ̀ i dɔri-ra tu naridi. Niŋ ŋuŋ ki fani kpaafuru wuru kusɛbɛ. Nmari i duaŋ ki tɔnŋ nagbɛri, nmari i ǹʼciiru ŋuŋ ki bo Yesu ŋununu.
4Koŋ wɔ̀ri wuru nmaŋ, nini bɛɛ ri tɔnŋ i kwulu, kí i ǹʼbi arìmaŋ tɛ tu : « Ka ŋuŋ kini jii ka ruli ŋuŋ ki ǹʼdanwɔ? 5Ŋuŋ kini jii ka wuru-ra so ju-i warifɔ daŋ yaabwununtaanŋ na#14.5 warifɔ daŋ yaabwununtaanŋ na : Niŋ jalinŋ ki wuru kɛɲɛ-a niŋ waari ru tɔnŋ kiri wɔ baaradaŋ jiri tenŋ sali i. (300), ǹʼjalinŋ ki i wɔri gbɛwɔ ri tɛ. » Kí i jɛbi mari ki gbɛ kusɛbɛ.
6Nka Yesu tu : « Á nmari tu nmaŋ. Nfɛnŋ na, ábɛɛ i nmari tɔnkɔli-li? Nmari nwɔ̀ ma-i míŋ tɛ, niŋ shɔ-i dɛ! 7Gbɛwɔ kiri i ábɛɛ fan ǹʼkaŋ waarinŋ bataa ru. A waaci wɔ̀ di ábɛɛ tɛ, ábɛɛ ra so shɔɔrinŋ ma-i kí tɛ. Nka míŋ kɔniŋ a tu ábɛɛ fan waarinŋ bataa ru kì. 8Nmari a so ǹʼna bi ki ma-i. Nmari míŋ firi ki kini ki di-i, ŋì i bo saali ki jɛŋ. 9Sɛli ki ra, míŋ a ǹʼbi ábɛɛ tɛ ńʼtu Kirinŋ wɔ Wulujii ki na sunjo juniɲa ki mani woo mani nu, ńʼtu mari ka mabi ki a na bi nmaŋ, konaŋ kiri i arì ɲakilila bo nmari bi tɛ. »
Yudasi Isikariyɔti wɔ Yesu janfa bi ki
(Matiyu 26.14–16; Luki 22.3–6)
10Yudasi Isikariyɔti, ninwɔ̀ wuru Yesu wɔ kalindaŋ bwununfuuli ki bɛɛ tenŋ i, niŋ i ta ǹʼbi Kirinŋ tɛ sarakawɔrɔtɔnŋ kiri tɛ tu afinŋ a so Yesu de-i kí gbɛfɛ. 11Ntiŋ wɔ wulu ki i di kí tɛ kusɛbɛ, kí i arì tɔnŋ wɔri, tu arì ra wari wɔri wú tɛ. Niŋ na, Yudasi i tu ɲaan shɔɔrinŋ ceeli-la, wú a so Yesu de-i kí gbɛfɛ ɲaan wɔ̀ tɛ.
Yesu fa awɔ kalindaŋ kiri wɔ Paki ɲaannabyɛ ki nu bi ki arìmaŋ fan
(Matiyu 26.17–25; Luki 22.7–14, 21–23; Yuhana 13.21–30)
12 Bwuru tuutuubali ɲaannabyɛ ki sunŋ jɔnɔ ki, saawɔrinŋ bulaaŋ wuru kilɛn-a saraka Paki ki ru niŋ jibi wɔ̀ sun, Yesu wɔ kalindaŋ kiri i ntiŋ nanɔri tu : « Ábɛɛ i ǹʼtɛ yi i ta ɲaannabyɛ ki nufinŋ ki ramɔni á tɛ da? »
13Yesu i awɔ kalindaŋ koŋ fuuli cin, ntiŋ tu kí tɛ : « Á ta kili ki ru. Ábɛɛ ta so kili ki ru, ábɛɛ fa shuru bɛɛ ra ta fu. Ju duŋ i ji ntiŋ ŋununfaninmwuŋ. Á ta ǹʼpa niŋ shuru ki cɛfan. 14A ntiŋ ta de kaniŋ wɔ̀ sun, á i ǹʼbi niŋ kanintiŋ ki tɛ, tu kalimɔɔ ki ǹʼbi, tu afinŋ fa awɔ kalindaŋ kiri ra na Jonbikɔ ɲaannabyɛ ki nufinŋ ki nu fudaŋ wɔ̀ ru, tu niŋ da? 15Ntiŋ a ta fudaŋ bɛɛ ji ábɛɛ wu sankasoŋ sun, yibɛɛ maku i finŋ woo finŋ na, nini bataa i ǹʼnu, ǹʼciiru ki ramɔnimaan i ji-i. Á i nufinŋ ki ramɔni niŋ nu. »
16Niŋ kalindaŋ kiri i tiri kili ki ra, kí i ta bi kiri ja miŋ tu Yesu yìrì ɲaanbi wuru ɲaan wɔ̀ tɛ. Kí i Jonbikɔ ɲaannabyɛ ki nufinŋ kiri ramɔni nmaŋ.
17Cii ki so-i, Yesu fa awɔ cindaŋ bwununfuuli ki i na. 18Kí sɔɔmaan ki tu-i nufinŋ ki nu-a, Yesu i ǹʼbi tu : « Sɛli ki ra, míŋ a ǹʼbi ábɛɛ tɛ ńʼtu ábɛɛ wɔ̀ri fa míŋ i nufinŋ ki nu-a, ńʼtu ábɛɛ ru koŋ tenŋ a na míŋ de ńʼɲa kiri gbɛfɛ. »
19Kalindaŋ kiri tɔnfɔɔmaan kiri bataa tenŋ tenŋ i ntiŋ nanɔri tu : « Míŋ yɛ wa? »
20Yesu i kí rupwulu tu : « Ábɛɛ cindaŋ bwununfuuli ki bɛɛ tenŋ yɛ, nwɔ̀ i a gbɛ ki de-a míŋ fan kukulu tenŋ nu, niŋ bɛɛ yɛ. 21Koŋ Danshuru ki a beeni miŋ tu ǹʼsɛbɛ-i Kirinŋ wɔ wulu ki ru ɲaan wɔ̀ tɛ ntiŋ bi ki sun, nka konwɔtiŋ a ntiŋ de ɲa kiri gbɛfɛ, bɔni i nintiŋ wɔ. Hali niŋ shuru ki ji-ri kì, niŋ pari wuru ntiŋ sun. »
Ŋuntiŋ ki wɔ fani wɔlinŋ ki
(Matiyu 26.26–30; Luki 22.15–20; Korɛntitɔnŋ kiri (1) 11.23–25)
22Ŋì i Yesu fa awɔ kalindaŋ kiri tu nufinŋ ki nu-a, ntiŋ i bwuru ki shi, ntiŋ i baraka bi Kirinŋ tɛ. Ntiŋ i ǹʼnucɛn cɛn, ntiŋ i ǹʼwɔri kalindaŋ kiri tɛ, ntiŋ i ǹʼbi : « Á ka mwu, niŋ i míŋ firi ki i. »
23Niŋ kɔɔtɛ, ntiŋ i dunfɛnŋ kulu ki shi, ntiŋ i baraka bi Kirinŋ tɛ, ntiŋ i ǹʼwɔri kí tɛ, kí bataa i ǹʼbɛɛ mwunu. 24Yesu tu kí tɛ tu : « Ka i míŋ cunŋ ki i, Kirinŋ wɔ tɔnwɔri ki cɛ sɔɔ cunŋ ki. Ǹʼkɔnkɔli-i koŋ mwɔɔnna bira. 25Sɛli ki ra, míŋ a ǹʼbi ábɛɛ tɛ ńʼtu, míŋ a dunfɛnŋ mwunu kili kì, fɔ jibi wɔ̀ míŋ a na dunfɛnŋ ŋunaŋ ki mwunu Kirinŋ wɔ Masabi ki ru. »
26Kí Kirinŋ gbɛ shu kiri pɔri kɔ-i waarinŋ wɔ̀ ru, kí i po tiri Olinfyetɔnŋ ki sun.
Pyɛɛri kaan bi ki Yesu tɛ
(Matiyu 26.31–35; Luki 22.31–34; Yuhana 13.36–38)
27Yesu i ǹʼbi awɔ kalindaŋ kiri tɛ tu : « Ábɛɛ bataa ra na bili, á i míŋ tenŋ tu, sabu ǹʼsɛbɛ-i tu :
‹ Míŋ a na saa faa ki kilɛn,
saa kiri bataa ra jeɲe. ›#Jakaliya 13.7.
28Nka, a míŋ na ŋmɛni po san konkwuu kiri kanfɛ, míŋ a na tiri ábɛɛ jɛŋ Galile sɔɔta ki ru. »
29Pyɛɛri tu ntiŋ tɛ tu : « Hali konaŋ ki bataa bili, kí i ábɛɛ tu, míŋ a bili ŋí i ábɛɛ tu fyewu kì. »
30Yesu tu Pyɛɛri tɛ : « Sɛli ki ra, míŋ a ǹʼbi miŋ tɛ, ńʼtu ɲandaŋ kiri ra so bulu sun kaan fuuli jiŋ, ńʼtu miŋ a ǹʼbi kaan byaŋ, tu miŋ míŋ tɔ-a kì. »
31Nka Pyɛɛri i ǹʼbi furu tu : « Hali míŋ fa ábɛɛ ji-a kilɛn yimaŋ fan, míŋ a ńʼkaan ábɛɛ tɛ fyewu kì. » Ntiŋ kaashi kiri bataa i mìŋ wulu tenŋ ki bi.
Yesu wɔ Kirinŋ nafɛ ki Gɛtisemanɛ
(Matiyu 26.36–46; Luki 22.39–46)
32Yesu fa awɔ kalindaŋ kiri i po ta mani bɛɛ ru, nwɔ̀ tɔ i tu Gɛtisemanɛ. Ntiŋ tu kí tɛ : « Á sɔɔ kwumaŋ, míŋ a ta Kirinŋ nafɛ. »
33Ntiŋ fa Pyɛɛri fa Yakuba fa Yuhana i ta jɛŋ pyaanniŋ. Ciirufɔni i ntiŋ kila, ntiŋ gbɛɛra i tɛɛ kusɛbɛ. 34Ntiŋ i ǹʼbi kí tɛ tu : « Tɔnfɔɔ ki a míŋ kilɛn. Á tu á ɲaanna míŋ fan kwumaŋ, á fa ɲinintan kì. »
35Ntiŋ i ta jɛŋ pyaanniŋ, ntiŋ i Kirinŋ nafɛ, tu ǹʼji-a so ma-i tu niŋ waaci ki ru cɔɔri ki fa afinŋ kila kì. 36Ntiŋ tu : « Míŋ Tiŋ, ábɛɛ waa-ra bi tɔri tenŋ na kì. A míŋ mwu ka cɔɔri ka wu. Nka míŋ dintɛ bi ki fa ma kì, fɔ ábɛɛ dintɛ bi ki. »
37Ntiŋ i a pwulu na kalindaŋ kiri maŋ ki ru, ntiŋ i na kí kila ɲinintan-a. Ntiŋ tu Pyɛɛri tɛ tu : « Simɔŋ, miŋ i ɲinintan-a wa? Miŋ so tu-i nʼɲaanna hali ŋi i lɛɛri tenŋ kila míŋ fan kì wa? 38Á tu á ɲaanna, á i Kirinŋ nafɛ-ri, nwɔma á fa na sunnɛɛn bo bijɛ ma sun kì, sabu konanmini ciiru ki faa-a bi shɔɔrinŋ ma ɲakili ki ra, nka yìrì ma ki so firi ki gbɛ kì. »
39Ntiŋ i a san kí tɔntɛ, ntiŋ i ta Kirinŋ nafɛ mìŋ ɲaan tenŋ ki tɛ sɛbɛ. 40Ntiŋ i a pwulu na fa kí wu ɲinintan-a sɛbɛ, sabu ɲini ki ta wuru kí ru, ŋì i kí ɲaninaŋ kiri pwun. Kí so wulu kila bi-i ntiŋ tɛ kì.
41Ntiŋ pwulu na kaan byantɔnŋ ki, ntiŋ i na kí kila ɲini ki tan-a sɛbɛ, ntiŋ tu kí tɛ : « Ábɛɛ i faa ɲinintan-a, á i á rufaan-ni wa? Ǹʼkɔ-i, waaci ki so-i. Á ǹʼshɛɛli, kí a Koŋ Danshuru ki de bijɛmatɔnŋ kiri gbɛfɛ kaa. 42Á jɔrɔkɔ, yi tiri. Konwɔtiŋ a míŋ de kí gbɛfɛ, ninki i yiri-ra kaa. »
Yesu paka ɲaan ki
(Matiyu 26.47–56; Luki 22.47–53; Yuhana 18.3–12)
43Yesu tu-i niŋ wulu ki bi-a, Yudasi, ninwɔ̀ wuru ntiŋ wɔ cindaŋ bwununfuuli ki bɛɛ ɛ, niŋ i na konaŋ kwuru ki wu. Baamwuru ri fa bali li wuru kí gbɛ. Kirinŋ tɛ sarakawɔrɔtɔnŋ kiri ŋununtiŋ kiri fa sariya kalimɔɔ kiri fa Yawutu cɛɛnni kiri wɔ cintɔnŋ ni wuru-i. 44Yudasi, Yesu janfatɔnŋ ki ǹʼbi wuru kí tɛ tu : « A míŋ na ta konwɔtiŋ co bidintɛbi coolinŋ tanka ɲaan tɛ, nintiŋ ki i Yesu ki i, á ntiŋ pa, á i tiri ntiŋ wu, ntiŋ fa a mwu kì. »
45Niŋ ɲaan ki tɛ, Yudasi so-i mani wɔ̀ ru, wú i a kpari Yesu tɛ, wú i ǹʼbi ntiŋ tɛ tu : « Kalimɔɔ. » Niŋ kɔɔtɛ, wú i a kɔlɔkɔli Yesu wu arɔɔ bidintɛbi coolinŋ tanka ɲaan ki tɛ.
46Niŋ ma-i, kí i Yesu pa. 47Koŋ wɔ̀ri wuru Yesu fan, nini nu koŋ tenŋ i awɔ baamwuru ki sari, niŋ i ta Kirinŋ tɛ sarakawɔrɔtɔnŋ kiri ŋununtiŋ sinaŋ ki wɔ joŋ ki tɔɔn tenŋ tɛri san nmaŋ.
48Yesu tu kí tɛ tu : « Ábɛɛ na-i baamwuru ri fa bali li wu míŋ pamaŋ ki ru, míŋ i koŋ kaanmaan a, ŋí i fɛɛn-ni kpeeri sun wa? 49Míŋ wuru ábɛɛ fan jibi woo jibi Kirinfusinaŋ ki ra nmaŋ, ŋí i konaŋ kiri kali-li, ábɛɛ jɛɛn á i míŋ pa kì. Nka á bili ǹʼna tu niŋ ma, nwɔma Sɛbɛ ki ru wulu ki i nafaa. »
50Cindaŋ kiri bataa i bili pani san Yesu ra, kí i ntiŋ tenŋ tu nmaŋ.
51Ɲɔrɔkɔ bɛɛ i ǹʼpa Yesu cɛfan, bininkanŋ bantenŋ miniminimaan wuru niŋ sun. Konaŋ ki ru, ǹʼbɛɛ ri i ntiŋ pa. 52Ntiŋ i a fwurushi po san bininkanŋ ki ru, ntiŋ i niŋ tu kí gbɛɛra, ntiŋ i fɔni a sunwɔ wu.
Kí ta-i Yesu wu Yawutu kiri wɔ kitikwurutoŋ ki ɲaanfɛ
(Matiyu 26.57–68; Luki 22.54–55, 63–71; Yuhana 18.13–14, 19–24)
53Kí i Yesu pa tiri Kirinŋ tɛ sarakawɔrɔtɔnŋ kiri ŋununtiŋ sinaŋ ki wɔ mani nu. Kirinŋ tɛ sarakawɔrɔtɔnŋ kiri ŋununtiŋ kiri fa cɛɛnni kiri fa sariya kalimɔɔ kiri i arì rakɔli niŋ mani nu. 54Pyɛɛri i tu gbiila, ntiŋ i a da tiri-ri kí cɛfan, fɔ ntiŋ i ta so Kirinŋ tɛ sarakawɔrɔtɔnŋ ki wɔ kaniŋ ki sun. Ntiŋ i ta sɔɔ kaniŋ ki ɲaannasuutɔnŋ kiri tɔntɛ tuu fwuu ki ra.
55Kirinŋ tɛ sarakawɔrɔtɔnŋ kiri ŋununtiŋ kiri fa Yawutu kiri wɔ kitikwurutoŋ ki wuru mani ceeli-la Yesu mwɔɔn nu, nwɔma arì i ntiŋ kilɛn, nka kí mani kila kì. 56Koŋ mwɔɔnna i puru ri ye Yesu wu, nka kɔ́ɔ́ wulu kiri wuru arìmaŋ sɔsɔ-a. 57Koŋ bɛɛ ri i jɔrɔkɔ, kí i puru ye Yesu wu tu : 58« Wú ǹʼbi-i yibɛɛ ɲaanna tu : ‹ Konaŋ kiri ka Kirinfusinaŋ ka wɔ̀ tan-i, míŋ a niŋ gwu, ŋí i ǹʼtɔri tan sunŋ byaŋ i, ǹʼta ru, konanmini gbɛ a nwɔ̀ tan kì. › »#Yuhana 2.1. 59Nka hali niŋ konaŋ kiri wɔ wulu kiri so fu-i kì.
60Niŋ ɲaan ki tɛ, Kirinŋ tɛ sarakawɔrɔtɔnŋ kiri ŋununtiŋ ki i jɔrɔkɔ tu konaŋ ki faninmwuŋ, ntiŋ i Yesu ranɔri tu : « Koŋ kari i wulu wɔ̀ bi-a miŋ bi sun, miŋ tu dɔɔkunŋ? Miŋ a kí rupwulu kì wa? »
61Nka Yesu i a gbansan, ntiŋ finŋ tɔri bi kì. Kirinŋ tɛ sarakawɔrɔtɔnŋ kiri ŋununtiŋ ki i ntiŋ nanɔri sɛbɛ tu : « Minki i Kirinŋ Ɲaannakonshimaan ki i wa? Yibɛɛ i nwɔ̀ ki gbɛ-a, miŋ i niŋ Danshuru ki i wa? »
62Yesu i ntiŋ nupwulu tu : « Aawe, MÍŊ YƐ. Ábɛɛ ra na Koŋ Danshuru ki sɔɔmaan ki ja Sobataatiŋ ki pantɛ. Niŋ kɔɔtɛ, á i ǹʼyirira ja kirinpɔli ki ra loŋ kiri faninmwuŋ.#Shu kiri 110.1; Daɲɛli 7.13. »
63Niŋ ma-i, Kirinŋ tɛ sarakawɔrɔtɔnŋ kiri ŋununtiŋ ki tɔnkwulumaan ki i awɔ juulinŋ kiri gbɛri san a sun, ntiŋ i ǹʼbi tu : « Yibɛɛ faa shɛɛri danwɔ ceeli-la kili?#Sarakawɔrɔtɔnŋ kiri 21.10. 64Ábɛɛ yɛrima kiri Kirinŋ tɔ li wulu ka rama wú tɔnŋ na kì wa? Ábɛɛ tu dɔɔkunŋ? »
Kí bataa tu : « Wú fa kilɛn kakan-i. »
65Ǹʼbɛɛ ri i arì lɛju cu-ri Yesu sun. Kí i ntiŋ ɲaanna kɔli, kí i ntiŋ bwɔ-ri gbɛŋuŋ na, kí i ntiŋ nanɔri-ri tu : « Nkɛnŋ miŋ bwɔ? » Ɲaannasuutɔnŋ kiri yɛrima kiri i ntiŋ pa, kí i gbɛta ri bo ntiŋ cufɛ.
Pyɛɛri tu afinŋ Yesu tɔ-a ki
(Matiyu 26.69–75; Luki 22.56–62; Yuhana 18.15–18, 25–27)
66Pyɛɛri sɔɔmaan ki wuru kaniŋ ki sun, mani ki cɛɛra, Kirinŋ tɛ sarakawɔrɔtɔnŋ kiri ŋununtiŋ ki wɔ jonmari bɛɛ i na. 67Niŋ jonmari ki i Pyɛɛri ja tuu ki ra, nmari i ntiŋ shɛɛli kusɛbɛ, nmari i ǹʼbi : « Miŋ yɛri ki wuru Nansarɛtitɔnŋ kiri wɔ Yesu ki fan. »
68Nka Pyɛɛri i mari ki sɔsɔ, ntiŋ i ǹʼbi : « Mari ki, míŋ nintiŋ tɔ-a kì. Míŋ mɔɔn wulu ki tamaŋ tɔ-a kì. » Niŋ kɔɔtɛ, ntiŋ i jɔrɔkɔ ta fu ki demantɔnŋ ki ra. [Ɲandaŋ kiri i bulu.]
69Niŋ kɔɔtɛ, mìŋ jonmari tenŋ ki i na Pyɛɛri ja, nmari i ǹʼbi niŋ mani nu tɔnŋ kiri tɛ tu : « Ka shuru ka i Yesu fan tɔnŋ ki bɛɛ ɛ. » 70Pyɛɛri i ǹʼsɔsɔ sɛbɛ.
Waaci pyaanŋ kɔɔtɛ, niŋ mani nu tɔnŋ kiri i ǹʼbi Pyɛɛri tɛ sɛbɛ tu : « Sii ǹʼna ǹʼnu kì, miŋ i kí fan, sabu miŋ yɛrima ki i Galiletɔnŋ i. »
71Niŋ mani nu, Pyɛɛri i a kɔni, ntiŋ tu : « A míŋ puru bi ábɛɛ tɛ, Kirinŋ fa míŋ tu kì! Ábɛɛ i koŋ wɔ̀ wulu bi-a, míŋ ntiŋ tɔ-a kì. »
72Mìŋ manaanŋ tenŋ ki ru, ɲandaŋ kiri kaan fuluntɔnŋ ki i bulu. Pyɛɛri ɲakili i bo Yesu wɔ wulu bimaan ki ra a tɛ tu : « Ɲandaŋ kiri ra so bulu sun kaan fuuli jiŋ, miŋ a ǹʼbi kaan byaŋ, nʼtu miŋ míŋ tɔ-a kì. »#Maraka 14.30. Pyɛɛri i ŋuntan kusɛbɛ.
اکنون انتخاب شده:
Maraka 14: JOB
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc.
