Matiyu 21
21
Yesu de bi ki Yerusalɛmu kili ki ru
(Maraka 11.1–11; Luki 19.28–40; Yuhana 12.12–19)
1Yesu fa a cɛfantɔnŋ kiri i ta myɛ Yerusalɛmu tɛ, kí i ta so Olinfyetɔnŋ ki sun, Bɛtifagɛ kili ki tɔntɛ. Yesu i awɔ kalindaŋ koŋ fuuli cin ta arì jɛŋ. 2Ntiŋ tu kí tɛ :
« Á tiri á jɛŋ kili ka ra. Ábɛɛ ra ta sufaniŋ ɲiŋ bɛɛ kɔli ja, ǹʼdaŋ bulinŋ ki i ji ǹʼkankantɛ. Á i yìrì pili, á i na yìrì wu kwumaŋ. 3A koŋ ta ábɛɛ ranɔri, á i ǹʼbi ntiŋ tɛ tu Ŋuntiŋ ki maku yìrì ra. A niŋ ma, ntiŋ a yìrì tu ábɛɛ gbɛ shuu. »
4Niŋ ma-i, nwɔma Kirinŋ wɔ cintɔnŋ ki wɔ wulu ki i ǹʼnafaa tu :
5« Á ǹʼbi Siyɔntɔnŋ kiri tɛ tu :
Á ǹʼshɛɛli, ábɔɔ masa ki yirira i á tɛ,
ǹʼfaa sunjɛribi ki ra, ǹʼtunpamaan yɛ sufaniŋ kpirinŋ sun,
sufaniŋ daŋ i, sufaniŋ daŋ bulinŋ i. »#Jakaliya 9.9.
6Kalindaŋ kiri i tiri niŋ ɲaan ki tɛ, Yesu ǹʼbi wuru kí tɛ ɲaan wɔ̀ tɛ, kí i ta ǹʼma mìŋ ɲaan ki tɛ. 7Kí i na sufaniŋ ɲiŋ ki fa a daŋ ki wu Yesu tɛ. Kí i arɔɔ juulinŋ kiri san bili yìrì bwɔ sun, Yesu i tunpa sɔɔ nini sun. 8Konaŋ kiri ru, koŋ mwɔɔnna i arɔɔ juulinŋ kiri bili saa ki sun Yesu jɛŋ, ǹʼtɔri ri i jirinŋ da ri yali bo-ri saa ki sun.#21.8 Kí wuru ntiŋ gbɛ-a niŋ i. Niŋ wuru Yawutu kiri wɔ koŋ sinaŋ ŋununafuka ɲaan ki bɛɛ ɛ. 9Konaŋ kiri bɛɛ ri wuru Yesu jɛŋ, ǹʼtɔri ri i ji ntiŋ kɔɔtɛ. Kí bataa i fali-li, kí i ǹʼbi-ri tu :
« Yi baraka bi Kirinŋ tɛ, Dawuda Danshuru#15.22. ki bira!
Nwɔ̀ i na-a Ŋuntiŋ ki tɔ ra, Kirinŋ baraka de niŋ nu!
Sobataatiŋ Kirinŋ gbɛ kirinpɔlila mani narimaŋ kiri ru. »#Shu kiri 118.26.
10Yesu de-i Yerusalɛmu kili ki ru waarinŋ wɔ̀ ru, konaŋ ki bataa i jɔrɔkɔ tu arì kanŋ sun. Kí tu : « Ka a ji nkɛnŋ sa? »
11Konaŋ wɔ̀ri wuru Yesu cɛfan, nini i ǹʼbi-ri tu : « Yesu yɛ, cintɔnŋ wɔ̀ i po-a Nansarɛti kili ki ra, Galile sɔɔta ki ru. »
Jɔɔtantɔnŋ kiri kalikali po san bi ki Kirinfusinaŋ ki ru Yesu gbɛ
(Maraka 11.15–19; Luki 19.45–48; Yuhana 2.13–22)
12Kí so-i Yerusalɛmu, ntiŋ i ta de Kirinfusinaŋ ki kaniŋ ki ru. Ntiŋ i jɔɔ tantɔnŋ kiri fa arɔɔ kusatɔnŋ kiri kalikali po san nmaŋ. Ntiŋ i wari rucinitɔnŋ kiri wɔ tabali kiri curu fɛɛn, ntiŋ i kilaaŋ jutɔnŋ kiri wɔ sɔɔfinŋ kiri curu fɛɛn. 13Niŋ kɔɔtɛ, ntiŋ i ǹʼbi kí tɛ : « Ǹʼsɛbɛ-i Kirinŋ wɔ wulu sɛbɛ ki ru tu : ‹ Mɔ́ɔ́n fu ki a na dɔri tu Kirinŋ nafɛmaŋ i. › Nka ábɛɛ kɔniŋ ǹʼji-i kwunŋ ni nadumaŋ i. »#Esayi 56.7; Yeremi 7.11.
14Ŋì i Yesu tu Kirinfusinaŋ ki ra, ɲaanfwuu bɛɛ ri fa bɔlɔma bɛɛ ri i na ntiŋ tɛ, ntiŋ i nini kene. 15Kirinŋ tɛ sarakawɔrɔtɔnŋ kiri ŋununtiŋ kiri fa Sariya kalimɔɔ kiri Yesu wɔ botɔnsunbi mamaan kiri ja-i waarinŋ wɔ̀ ru, kí i ǹʼja tu tiraŋ kiri bataa fali-la Kirinfusinaŋ ki ru, kí i ǹʼbi-ri tu : « Nɔɔri bili Kirinŋ sun Dawuda danshuru ki bira! » Niŋ i kí tɔnfɔɔ. 16Kí tu Yesu tɛ tu : « Tiraŋ kiri i nwɔ̀ bi-a, miŋ i niŋ nama-a kɛ! » Yesu i kí rupwulu tu : « Míŋ i ǹʼnama-a cɔ! Ábɛɛ tu dɔɔkunŋ? Ábɛɛ ka mani ka kali ja Kirinŋ wɔ wulu ki ru sun kì wa? Ǹʼbi-i tu Kirinŋ ǹʼbi tu afinŋ a a gbɛ wulu ki de tiraŋ kiri fa danjeelinŋ kiri fɔn daru.#Shu kiri 8.3. »
17Niŋ kɔɔtɛ, ntiŋ i kí tu nmaŋ, ntiŋ i po san kili ki ru, ntiŋ i tiri Bɛtani kili ki ra, ntiŋ i ta san niŋ mani nu.
Yesu wɔ shɔ jirinŋ danka bi ki
(Maraka 11.12–14, 20–24)
18Niŋ sisarifuluntɔnŋ ki siira, kí pwulula ki Yerusalɛmu, bɛɛ i Yesu pa. 19Ntiŋ i shɔ#21.19 Isirayɛlitɔnŋ kiri wɔ shɔ ki ji i kaan-na. Nɛŋ i ji ǹʼdaŋ ki ru, ŋì i fwuu yibɛɛ tɛ wɔ kiri sun. jirinŋ bɛɛ ja saa ki tɔnŋ na. Ntiŋ i ta ǹʼnashɛɛli, ntiŋ ta daŋ tenŋ kila ǹʼna kì, duu da cɔmaan gbansanŋ i. Ntiŋ i ǹʼbi shɔ jirinŋ ki tɛ : « Miŋ a daŋ pa fɛsɛfɛsɛ kili kì. »
Mìŋ manaanŋ tenŋ ki ru, shɔ jirinŋ ki i furu.
20Ntiŋ wɔ kalindaŋ kiri i niŋ ja-i waarinŋ wɔ̀ ru, niŋ i bo kí tɔnŋ sun kusɛbɛ, kí i ǹʼbi-ri tu : « Ǹʼji dɔɔkunŋ, ka shɔ jirinŋ ka i furu manaanŋ tenŋ nu kɔɔn? »
21Yesu tu kí tɛ tu : « Sɛli ki ra, míŋ a ǹʼbi ábɛɛ tɛ, ńʼtu, a ábɛɛ bilinabi ki ma, á sii sii fyewu kì, ńʼtu nwɔ̀ ma-i shɔ jirinŋ ki wu kaa, ńʼtu ábɛɛ ra niŋ bishi ri ma, niŋ bantenŋ i kì, ńʼtu hali ábɛɛ ǹʼbi tu ka tɔnŋ ka a cɛn san a ta ru, tu ŋì i ta a kee wɛɛlufinju ki ru, ńʼtu ŋì a ma ninkunŋ. 22A ábɛɛ áwɔ Kirinŋ nafɛ ki tan bilinabi wu, ábɛɛ finŋ woo finŋ nafɛ, ábɛɛ ra ǹʼkila. »
Yesu wɔ sotinbi ki pomaŋ ki bi ki
(Maraka 11.27–33; Luki 20.1–8)
23Yesu ta-i Kirinfusinaŋ ki ra, ntiŋ i konaŋ ki kali-li niŋ mani nu. Kirinŋ tɛ sarakawɔrɔtɔnŋ kiri ŋununtiŋ kiri fa Yawutu cɛɛnni kiri i arì kpari ntiŋ tɛ, kí i ntiŋ nanɔri tu : « Miŋ i bi wɔ̀ri ma-a, miŋ yìrì ma-a sotinbi danwɔ wu? Nkɛnŋ niŋ ma ki so ki wɔri miŋ tɛ? »
24Yesu i kí rupwulu tu : « Míŋ yɛri ki a ábɛɛ ranɔri finŋ tenŋ pe bi sun, a ábɛɛ ja ji niŋ nupwulu, sotinbi wɔ̀ i ncusun-a míŋ i ńʼwɔ bi kiri ma-ni, míŋ a kila ŋí i niŋ pomaŋ ki bi ábɛɛ tɛ. » 25Yesu tu : « Nkɛnŋ Wutɔnŋ Yuhana cin-ni tu ntiŋ konaŋ kiri wu? Kirinŋ daa konaŋ ni? » Niŋ na, kí i ǹʼbi arìmaŋ tɛ tu : « A yibɛɛ ǹʼbi tu Kirinŋ i, ntiŋ a yibɛɛ ranɔri tu nfɛnŋ na yibɛɛ bili Yuhana na kì. 26Nka, a yibɛɛ ǹʼbi tu konaŋ i, yibɛɛ ra yi mwu konaŋ ki wu kì, sabu konaŋ ki bataa gbɛ, Yuhana i Kirinŋ wɔ cintɔnŋ i. »
27Niŋ ɲaan ki tɛ, kí i ǹʼbi Yesu tɛ tu : « Yibɛɛ ǹʼtɔ kì. »
Yesu i kí rupwulu sɛbɛ tu : « Niŋ na, konwɔtiŋ sotinbi ki wɔri-i, míŋ i bi kari ma-ni, míŋ yɛrima ki a niŋ ǹʼbi ábɛɛ tɛ kì. »
Yesu wulusuntalinŋ wɔ̀ bi-i danshuru fuuli bi ki sun
28Yesu tu : « Ábɛɛ nfɛnŋ bi-a ka mani ka sun? Danshuru fuuli wuru shuru bɛɛ gbɛ. Ntiŋ i ǹʼbi danshuru jɔnɔ ki tɛ tu : ‹ Míŋ danshuru, tiri baara ma ńʼwɔ ji ki ru jiŋ. ›
29Daŋ ki tu : ‹ Míŋ a ta kì. ›
Nka kɔɔtɛ, niŋ daŋ ki i na ntɔri bi, wú i tiri baara ki ma ji ki ru. 30Tiŋ ki i mìŋ wulu tenŋ ki bi danshuru fuluntɔnŋ ki tɛ. Niŋ tu : ‹ Míŋ ŋuntiŋ ki, míŋ a tiri. ›
Nka wú ta mani tɔri ru nmaŋ kì.
31Ka daŋ fuuli kari ru, ǹʼdanwɔ ki arì tiŋ ki dintɛ bi ki ma sa? »
Konaŋ kiri tu : « Danshuru jɔnɔ ki yɛ. »
Yesu tu : « Sɛli ki ra, míŋ a ǹʼbi ábɛɛ tɛ, ńʼtu ɲinisarakɔlɔtɔnŋ kiri fa nankulunmari kiri ra ábɛɛ jɛnkwuru Kirinŋ wɔ Masabi ki ru. 32Sabu Yuhana na-i telibi saa ki wu ábɛɛ kiri tɛ, ábɛɛ á tu á i bili ntiŋ na kì, nka ɲinisarakɔlɔtɔnŋ kiri fa nankulunmari kiri i ji bili ntiŋ na. Niŋ bataa jamaan ki kɔɔtɛ, ábɛɛ so ntɔri bi-i á i so bilinabi ma-i ntiŋ na kì. »
Baaramatɔnŋ juumaan kiri bi ki
(Maraka 12.1–12; Luki 20.9–19)
33Yesu tu : « Á wulusuntalinŋ ka rama sɛbɛ : Koŋ bɛɛ ɛrɛnsɛnŋ ji bo-i, ntiŋ i ǹʼnakuuli. Ntiŋ i ta san, ntiŋ i ɛrɛnsɛnŋ ju sanmaŋ ki ramɔni, ntiŋ i nangbaalinŋ bwɔ ǹʼɲaannasuutɔnŋ kiri tɛ. Niŋ kɔɔtɛ, ntiŋ i ɛrɛnsɛnŋ ji ki wɔri bunsanŋ na baara matɔnŋ bɛɛ ri tɛ. Ntiŋ i tiri wɔru.
34Ɛrɛnsɛnŋ kilɛn waari ki na-i so, ntiŋ i awɔ joŋ kiri bo na ɛrɛnsɛnŋ ji ki baara matɔnŋ kari tɛ, tu kí awɔ ɛrɛnsɛnŋ kilɛn lu ki mwu na a tɛ. 35Ɛrɛnsɛnŋ ji baara matɔnŋ kiri i giri bo jitiŋ ki wɔ joŋ kiri sun, kí i joŋ tenŋ bwɔ, kí i tenŋ kilɛn, kí i ǹʼbyantɔnŋ ki jɛri kwɔ ra. 36Ɛrɛnsɛnŋ jitiŋ ki i joŋ tɔri ri bo na kí tɛ, nwɔ̀ri mwɔ wuru ǹʼjɔnɔ kiri wu. Ji ki baara matɔnŋ kiri i nini ji ǹʼjɔnɔ kiri sali.
37Jitiŋ ki rakɔɔra i a danshuru ki bo ta kí tɛ. Ntiŋ tu : ‹ Kí a ta niŋ gbɛ wo! ›
38Nka ɛrɛnsɛnŋ ji ki baara matɔnŋ kiri jitiŋ ki danshuru ki naanna ja-i waarinŋ wɔ̀ ru, kí i ǹʼbi arìmaŋ tɛ tu : ‹ Mìŋ ka i kanishitɔnŋ ki i, á na, yi wú kilɛn, nwɔma kani ki i ji yi wɔ. › 39Niŋ na, kí i danshuru ki pa, kí i tiri ntiŋ wu ji ki kɔɔtɛ, kí i ntiŋ kilɛn. »
40Yesu tu : « Ábɛɛ cirasun, a ɛrɛnsɛnŋ jitiŋ ki ja na, ntiŋ a na nfɛnŋ ma ji ki baara matɔnŋ kari wu sa? »
41Konaŋ ki tu : « Ntiŋ a na niŋ koŋ juumaan kiri kilɛn kilɛnka jɛ ra, ntiŋ i baara matɔnŋ tɔri ri ceeli bo ɛrɛnsɛnŋ ji ki ru, nwɔ̀ri ra so ntiŋ wɔ lu ki wɔri-i ntiŋ tɛ a wɔri waari ru. »
42Yesu tu sɛbɛ : « Ábɛɛ ka mani ka kali Kirinŋ wɔ wulu sɛbɛ ki ru kì wa? Ǹʼbi-i tu :
‹ Fu tantɔnŋ kiri arì kaan-a kwɔ wɔ̀ tɛ,
ninki ji-i fu ki nɔnkɔnŋ sun kwɔ shɔɔrinŋ ki i.#Shu kiri 118.22–23.
Niŋ bi kiri bataa po-i Ŋuntiŋ ki ru,
yìrì i ji botɔnsunbi ri yibɛɛ ɲaanna. › »
43Yesu tu : « Niŋ ki ra, míŋ a ǹʼbi ábɛɛ tɛ, ńʼtu Kirinŋ a awɔ Masabi ki po san ábɛɛ gbɛfɛ, ŋì i ǹʼwɔri shiya tɔri ri tɛ, nwɔ̀ri ra ǹʼdintɛ bi ki ma. 44[Niŋ ɲaan ki tɛ, a nwɔ̀tiŋ fɛɛn niŋ kwɔ ki sun, ntiŋ wɔ kiri ra yali yali. A niŋ kwɔ ki fɛɛn nwɔ̀tiŋ sun, ŋì a ntiŋ bɔrɔkɔ.] »
45Kirinŋ tɛ sarakawɔrɔtɔnŋ kiri ŋununtiŋ kiri fa Farinsiyɛnŋ kiri niŋ wulusuntalinŋ kiri rama-i waarinŋ wɔ̀ ru, kí i ǹʼtɔ tu Yesu yìrì bi-a arìbɛɛ bi sun. 46Kí i ji ǹʼtɛ arì i ntiŋ pa, nka kí i kɛni konaŋ ki jɛŋ, sabu konaŋ ki gbɛ, Yesu wuru Kirinŋ wɔ cintɔnŋ i.
اکنون انتخاب شده:
Matiyu 21: JOB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc.
