Matiyu 11
11
Wutɔnŋ Yuhana wɔ kalindaŋ kiri cin bi ki Yesu tɛ
(Luki 7.18–35)
1Yesu kɔ-i niŋ nacinwulu kiri ra awɔ kalindaŋ bwununfuuli ki tɛ waarinŋ wɔ̀ ru, ntiŋ i po, ntiŋ i ta niŋ sɔɔta ki ru kili kiri ra, ntiŋ i ta konaŋ kiri kali-li, ntiŋ i Wulujii ki sunjo-ri kí tɛ.
2Niŋ waari ru, Wutɔnŋ Yuhana i tu nkasu ki ru, ntiŋ i Kirisa mabi kiri rakali wulu kiri rama-ni. Ntiŋ i awɔ kalindaŋ kiri bɛɛ ri cin Yesu ranɔri tu : 3« Ǹʼbi-i tu koŋ wɔ̀ a na, miŋ i niŋ i daa, walima yi kakan yi i koŋ tɔri suu? »
4Yesu tu kí tɛ : « Á á pwulu ta Yuhana tɛ, ábɛɛ i nwɔ̀ rama-a, á i nwɔ̀ ja-ri, á ta niŋ nakali, tu 5ɲaanfwuu kiri maannaja-a, mwurunku kiri i tiri-ri, tuutiŋ kiri i kene-ni, tɔɔnkpilinŋ kiri i wulu lama-ni, konkwuu kiri i ŋmɛni-ni, niŋ fa tu Wulujii ki i sunjo-ri gbɛwɔ kiri tɛ, 6tu konwɔtiŋ sii-ra míŋ na kì, nintiŋ i wɔ shɔ-i. »
7Wutɔnŋ Yuhana wɔ kalindaŋ kiri arì pwulu-i waarinŋ wɔ̀ ru, Yesu i ntiŋ ɲaanbi-ri konaŋ ki tɛ, ntiŋ tu kí tɛ : « Ábɛɛ ta-ri nfɛnŋ shɛɛli jaŋ ki faninmwuŋ? Faa wɔ ɲɔɔnni nutimaanna wuru-i wa? 8A niŋ ji-i kì, ábɛɛ ta-ri nfɛnŋ shɛɛli? Juulinŋ tɔtiŋ botɔnŋ wuru-i wa? Á ǹʼtɔ tu juulinŋ tɔtiŋ botɔnŋ kiri masafu ri ru dɛ! 9Ábɛɛ ta-ri nfɛnŋ shɛɛli? Cintɔnŋ wuru-i wa? Aawe, sɛli ki ra, míŋ a ǹʼbi ábɛɛ tɛ, ńʼtu ntiŋ gbɛ cintɔnŋ wu. 10Sabu ǹʼsɛbɛ-i Kirinŋ wɔ wulu ki ru mani wɔ̀ ru, tu Kirinŋ tu :
‹ Míŋ a na ńʼwɔ cintɔnŋ ki cin ta miŋ jɛŋ,
ŋì i nʼwɔ saa ki ramɔni nʼjɛŋ ›,
niŋ i Yuhana wulu bi-a. 11Sɛli ki ra, míŋ i ǹʼbi-a ábɛɛ tɛ, ńʼtu mari tɔri dantenŋ daŋ ji konanmini kiri kanfɛ, tu Wutɔnŋ Yuhana gbɛ nwɔ̀ wu kì. Nka niŋ fa a fɔn na, kirinpɔlila Masabi ki ru koŋ pyaanŋ ki gbɛ-i ntiŋ wu. 12Ŋì i shi Wutɔnŋ Yuhana wɔ baara ki tɔnpa ki waaci ki sun, ŋì i na so dɔnsaŋ sun, kirinpɔlila Masabi ki i ceeli-la faan sun, koŋ wɔ̀ri sunfuru-i, niŋ kiri i ǹʼkila-a. 13Kirinŋ wɔ cintɔnŋ kiri bataa fa Musa wɔ sariya sɛbɛ kiri bataa wulubi-i Kirinŋ wɔ Masabi ki bi sun, fɔ ŋì i na so Wutɔnŋ Yuhana wɔ waaci ki sun. 14A ábɛɛ ji bili niŋ wulu kiri ra, á ǹʼtɔ tu Eli wɔ̀ wulu wuru bi-a, tu ntiŋ a na, tu Yuhana niŋ koŋ ki i.#Malaki 3.1. 15A wulu lama tɔɔn ji nwɔ̀tiŋ gbɛ, ntiŋ wulu lama.
16Míŋ a jiintɔnŋ kiri fa nkɛnŋ ni pyi sa? Kí fa tiraŋ ni po-i, nwɔ̀ri sɔɔ-ɔ kili ki ru furuba sɔɔmaŋ nu, kí i arì wulu saan wɔri-ri arìmaŋ tɛ tu :
17‹ Yibɛɛ kpilaaŋ fyɛ-i ábɛɛ tɛ,
ábɛɛ wɔshɛ kì.
Yi i beŋ shupɔri á tɛ,
á dumiŋ á makwuluye kì. ›
18Sɛli ki ra, Yuhana na-i, ntiŋ wuru bilaŋ nu-a kì, ntiŋ dumiŋ wuru dunfɛnŋ mwunu-na kì, kí nfɛnŋ bi ntiŋ bi sun? Kí tu : ‹ Ɲinijɛ ri i wú ru. › 19Koŋ Danshuru ki na-i, niŋ i bilaŋ nu-ni, ntiŋ i mwunufinŋ mwunu-ni, ábɛɛ tu : ‹ Ka weŋ ka i lɔrutɛfɛ, wulatiŋ i, ɲinisarakɔlɔtiiri fa bijɛmatiiri wɔ wɔshuru yɛ. › Nka, ɲakilitinbi wɔ̀ po-i Kirinŋ nu, niŋ wɔ telibi ki i tɔ-a a mabi kiri ra. »
Bɔni wɔ̀ a kili kaanmaan kiri kila
(Luki 10.13–15)
20Yesu awɔ botɔnsunbi mwɔɔnna kiri ma wuru kili wɔ̀ri ra, ntiŋ i jɛbi ki tɔnpa nini gbɛ, sabu yìrì ru konaŋ kiri ntɔri bi-ri arɔɔ bijɛ kiri ra kì. 21Ntiŋ tu : « Koransinitiiri, ŋì a juu ábɛɛ ra! Bɛtisayidatiiri, ŋì a juu ábɛɛ ra! Sabu kabakobi wɔ̀ri ma-i ábɛɛ tɛ, a nini ji wuru ma-ni Tiiri niŋ fa Sidɔnŋ#11.21 Tiiri niŋ fa Sidɔnŋ : Tiiri fa Sidɔnŋ wuru kili li wɔ̀ri ru konaŋ kiri mabi kiri juu wuru kusɛbɛ, Yawutu ri dumiŋ wuru-i ki. kili kiri ra, niŋ kili kiri ru tɔnŋ kiri wuru-ra ji ntɔri bi arɔɔ bijɛ kiri ra kɔ. Kí sɔɔmaan wuru-ra ji fwuujuulinŋ#11.21 fwuujuulinŋ : Fwuujuulinŋ Niŋ wuru waa rasɔɔ juulinŋ kiri niŋ waari ki ru. ni wu arì sun pwulu lu. 22Niŋ ki ra, míŋ a ǹʼbi ábɛɛ tɛ, ńʼtu Kirinŋ wɔ kiti kwuru ki shikaŋ ki ru, ńʼtu Tiiri fa Sidɔnŋ kili kiri ru tɔnŋ kiri wɔ kiti ki a na pari ábɔɔ ki wu.
23Ábɛɛ Kafarinawumutiiri, ábɛɛ ɲaanna tu ábɛɛ ra fɛshi fɔ á i so kirinpɔlila wa? Aayi dɛ! Ábɛɛ ra jɛri fɔ jaanama ki ciiru. Sabu botɔnsunbi wɔ̀ri ma-i ábɛɛ tɛ, a nini bishi ri ji wuru ma-ni Sodɔmu kili ki ra, ǹʼwuru-ra ji faa nmaŋ jiŋ. 24Niŋ ki ra, míŋ a ǹʼbi ábɛɛ tɛ, ńʼtu kiti kwuru shikaŋ ki ru, ńʼtu Sodɔmu sɔɔta ki ru tɔnŋ kiri wɔ kiti ki a na pari ábɔɔ ki wu. »
Yesu i ɲaanfɛfili ki wɔri-ra konanmini tɛ
(Luki 10.21–22)
25Niŋ waarinŋ ki ru, Yesu tu :
« Míŋ Tiŋ, ábɛɛ wɔ̀ i kirinpɔli ki fa pwɔkulinŋ ki sun Ŋuntiŋ ki i, míŋ i baraka bi-a ábɛɛ tɛ, sabu ábɛɛ bi wɔ̀ri radu-i, ɲakilitiŋ kiri fa bitɔtɔnŋ kiri sun, ábɛɛ nini ji-i koŋ pyaanŋ kiri wu. 26Aawe, míŋ Tiŋ, ábɛɛ ǹʼma-i ninkunŋ, sabu ninki ji-i ábɛɛ dintɛ bi ki i. »
27Ntiŋ i ǹʼbi konaŋ ki tɛ tu : « Míŋ Tiŋ ki finŋ kiri bataa de-i míŋ gbɛfɛ. Koŋ tɔri tenŋ Danshuru ki tɔ-a kì, duu Tiŋ ki tenŋ pe. Tiŋ Kirinŋ i nwɔ̀, koŋ tɔri tenŋ niŋ tɔ-a kì, duu Danshuru ki tenŋ pe, niŋ fa Danshuru ki ji ǹʼtɛ a i kí ji konwɔtiŋ wu. »
28Yesu tu kí tɛ sɛbɛ : « Á na míŋ tɛ, ábɛɛ wɔ̀ri yɛli-i, shii ki pwun-i ábɛɛ wɔ̀ri sun, míŋ a nufaan wɔri ábɛɛ tɛ. 29Á míŋ yɛsunsuu#11.29 yɛsunsuu : Yɛsunsuu ki i suu u, nwɔ̀ i bili-la jikaan naan kiri yɛ sun, nwɔma yìrì i so bulu cɛɛn-ɛ arìmaŋ fan. Niŋ suu ki i kɔli-la yaa ra naan kiri yɛ sun. ki tɔnŋ ki shi bili á yɛ sun, á i ncusun míŋ i á kini, sabu míŋ tɔnsunfili-i, ǹʼsunjɛrimaan i ji-i sɛbɛ. A ábɛɛ niŋ ma, ábɛɛ ra ɲaanfɛfili kila. 30Míŋ yɛsunsuu ki shimaŋ juu kì, niŋ fa mɔ́ɔ́n shii ki pwun kì. »
اکنون انتخاب شده:
Matiyu 11: JOB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc.
