ປະຖົມມະການ 14
14
ອັບຣາມຊ່ວຍຊີວິດໂລດ
1ໃນເວລານັ້ນ ເມື່ອອຳຣາເຟນເປັນກະສັດແຫ່ງຊີນາ,#14:1 ຄື ບາບີໂລນ ເຊັ່ນດຽວກັບຂໍ້ 9 ອາຣິໂອກກະສັດແຫ່ງເອນລາຊາ, ເຄໂດລາໂອເມກະສັດແຫ່ງເອລາມ ແລະ ຕີດານກະສັດແຫ່ງກົວອິມ, 2ກະສັດເຫລົ່ານີ້ໄດ້ພາກັນໄປສູ້ຮົບກັບເບຣາກະສັດແຫ່ງໂຊໂດມ, ບີຊາກະສັດແຫ່ງໂກໂມຣາ, ຊີນັບກະສັດແຫ່ງອັດມາ, ເຊເມເບກະສັດແຫ່ງເຊບົວອິມ ແລະ ກະສັດແຫ່ງເບລາ (ຄືເມືອງໂຊອາ). 3ຕໍ່ມາກະສັດທັງໝົດເຫລົ່ານີ້ໄດ້ຮວມກຳລັງກັນຢູ່ທີ່ຮ່ອມພູສິດດິມ (ຄືຮ່ອມພູທະເລຕາຍ). 4ເປັນເວລາສິບສອງປີທີ່ກະສັດເຫລົ່ານີ້ໄດ້ຂຶ້ນກັບກະສັດເຄໂດລາໂອເມ, ແຕ່ໃນປີທີສິບສາມພວກເພິ່ນໄດ້ພາກັນກະບົດ.
5ໃນປີທີສິບສີ່ ກະສັດເຄໂດລາໂອເມ ແລະ ກະສັດທີ່ເປັນພັນທະມິດກັບເພິ່ນຈຶ່ງໄດ້ອອກໄປ ແລະ ຊະນະຊາວເຣຟາອິມໃນອັດຊະທາໂຣດການອີມ, ຊາວຊູຊິມໃນຮາມ, ຊາວເອມິມໃນກີຣິອາດທາອິມ 6ແລະ ຊາວໂຮຣີໃນແຖບເນີນພູຂອງເສອີ, ໄກອອກໄປເຖິງເອນປາຣານໃກ້ທະເລຊາຍ. 7ແລ້ວພວກເຂົາກັບຄືນມາ ແລະ ໄປທີ່ເອນມິດສະປັດ (ນັ້ນຄືກາເດັດ), ແລ້ວພວກເຂົາໄດ້ຊະນະເຂດແດນທັງໝົດຂອງຊາວອາມາເຫລັກ ລວມທັງຊາວອາໂມຜູ້ທີ່ໄດ້ອາໄສຢູ່ໃນຮາຊາໂຊນ ຕາມາ.
8ແລ້ວກະສັດແຫ່ງໂຊໂດມ, ກະສັດແຫ່ງໂກໂມຣາ, ກະສັດແຫ່ງອັດມາ, ກະສັດແຫ່ງເຊບົວອິມ ແລະ ກະສັດແຫ່ງເບລາ (ນັ້ນຄືໂຊອາ) ໄດ້ຍົກທັບອອກໄປຕັ້ງບ່ອນສູ້ຮົບທີ່ຮ່ອມພູສິດດິມ 9ຕໍ່ສູ້ກັບເຄໂດລາໂອເມກະສັດແຫ່ງເອລາມ, ຕີດານກະສັດແຫ່ງກົວອິມ, ອຳຣາເຟນກະສັດແຫ່ງຊີນາ ແລະ ອາຣິໂອກກະສັດແຫ່ງເອນລາຊາຄື: ກະສັດສີ່ຄົນຕໍ່ສູ້ກັບກະສັດຫ້າຄົນ. 10ໃນເວລານັ້ນ ຮ່ອມພູສິດດິມມີບໍ່ຢາງໝາກຕອຍຫລາຍບ່ອນ ແລະ ເມື່ອກອງທັບຂອງກະສັດແຫ່ງໂຊໂດມ ແລະ ກະສັດແຫ່ງໂກໂມຣາປົບໜີມານັ້ນ, ບາງຄົນກໍຕົກລົງໄປໃນບໍ່ນັ້ນ ແລະ ສ່ວນທີ່ຄົນເຫລືອກໍໜີໄປຍັງໂນນພູຕ່າງໆ. 11ກະສັດທັງສີ່ໄດ້ຢຶດເອົາສິ່ງຂອງຂອງໂຊໂດມ ແລະ ໂກໂມຣາພ້ອມທັງອາຫານທັງໝົດຂອງພວກເຂົາ; ຫລັງຈາກນັ້ນ ພວກເຂົາກໍໜີໄປ. 12ພວກເຂົາໄດ້ຈັບເອົາໂລດຫລານຊາຍຂອງອັບຣາມ ແລະ ຊັບສົມບັດຂອງລາວໄປນຳດ້ວຍ, ເນື່ອງຈາກວ່າລາວອາໄສຢູ່ໃນໂຊໂດມ.
13ມີຄົນໜຶ່ງໜີລອດມາໄດ້ ແລະ ນຳເລື່ອງນີ້ມາບອກອັບຣາມຊາວເຮັບເຣີ. ເວລານັ້ນ ອັບຣາມໄດ້ອາໄສຢູ່ໃກ້ຕົ້ນໄມ້ໃຫຍ່ຂອງມຳເຣ ຊາວອາໂມຜູ້ເປັນນ້ອງຊາຍ#14:13 ຫລື ຍາດພີ່ນ້ອງ ຫລື ພັນທະມິດຂອງເອັດຊະໂຄນ ແລະ ອາເນ, ຜູ້ທີ່ໄດ້ຮ່ວມເປັນພັນທະມິດກັບອັບຣາມທຸກຄົນ. 14ເມື່ອອັບຣາມໄດ້ຍິນວ່າຍາດພີ່ນ້ອງຂອງເພິ່ນຖືກຈັບໄປເປັນຊະເລີຍ, ເພິ່ນຈຶ່ງລະດົມຜູ້ຊາຍທີ່ຜ່ານການອົບຮົມທີ່ເກີດໃນຄົວເຮືອນຂອງເພິ່ນ 318 ຄົນ ແລ້ວໄປໄລ່ຕາມພວກເຂົາໄປໄກຈົນເຖິງເມືອງດານ. 15ໃນຊ່ວງກາງຄືນອັບຣາມໄດ້ແບ່ງຄົນຂອງເພິ່ນເພື່ອເຂົ້າໂຈມຕີພວກເຂົາ ແລະ ເພິ່ນໄດ້ໄລ່ພວກເຂົາ, ຕິດຕາມພວກເຂົາໄປໄກຈົນເຖິງເມືອງໂຮບາ, ເຊິ່ງຢູ່ທາງທິດເໜືອຂອງເມືອງດາມັສກັດ. 16ເພິ່ນໄດ້ກອບກູ້ເອົາສິ່ງຂອງທັງໝົດ ແລະ ນຳເອົາໂລດຜູ້ເປັນຍາດພີ່ນ້ອງຂອງເພິ່ນ ແລະ ຊັບສົມບັດຂອງລາວກັບຄືນມາໄດ້ ພ້ອມດ້ວຍພວກແມ່ຍິງ ແລະ ຄົນອື່ນອີກ.
17ຫລັງຈາກທີ່ອັບຣາມກັບຈາກການເອົາຊະນະເຄໂດລາໂອເມ ແລະ ບັນດາກະສັດທີ່ເປັນພັນທະມິດກັບເພິ່ນແລ້ວ, ກະສັດແຫ່ງໂຊໂດມກໍໄດ້ອອກມາພົບເພິ່ນຢູ່ທີ່ຮ່ອມພູຊາເວ (ນັ້ນຄືຮ່ອມພູຂອງກະສັດ).
18ແລ້ວກະສັດເມຄີເຊເດັກແຫ່ງຊາເລັມ#14:18 ຄື ເຢຣູຊາເລັມໄດ້ນຳເຂົ້າຈີ່ ແລະ ເຫລົ້າອະງຸ່ນອອກມາໃຫ້. ເພິ່ນເປັນປະໂລຫິດຂອງພຣະເຈົ້າຜູ້ສູງສຸດ, 19ແລະ ເພິ່ນໄດ້ອວຍພອນອັບຣາມໂດຍກ່າວວ່າ,
“ຂໍໃຫ້ອັບຣາມໄດ້ຮັບພອນຈາກພຣະເຈົ້າຜູ້ສູງສຸດ,
ຜູ້ສ້າງສະຫວັນ ແລະ ໂລກ.
20ແລະ ສັນລະເສີນພຣະເຈົ້າຜູ້ສູງສຸດ,
ຜູ້ໄດ້ມອບສັດຕູທັງຫລາຍໄວ້ໃນມືຂອງທ່ານ”.
ແລ້ວອັບຣາມຈຶ່ງໄດ້ມອບໜຶ່ງສ່ວນສິບຂອງທຸກສິ່ງໃຫ້ແກ່ເພິ່ນ.
21ກະສັດແຫ່ງໂຊໂດມໄດ້ກ່າວກັບອັບຣາມວ່າ, “ຂໍຈົ່ງມອບປະຊາຊົນຄືນໃຫ້ເຮົາ ແລະ ຈົ່ງເກັບສິ່ງຂອງນັ້ນໄວ້ສຳລັບທ່ານເອງ”.
22ແຕ່ອັບຣາມຕອບກະສັດແຫ່ງໂຊໂດມວ່າ, “ຂ້ານ້ອຍໄດ້ຍົກມືຂຶ້ນປະຕິຍານຄຳສາບານຕໍ່ພຣະເຈົ້າຢາເວຜູ້ສູງສຸດ, ຜູ້ສ້າງສະຫວັນ ແລະ ໂລກໄວ້ວ່າ, 23ຂ້ານ້ອຍຈະບໍ່ຮັບສິ່ງໃດທີ່ເປັນຂອງທ່ານ, ແມ່ນແຕ່ດ້າຍ ຫລື ສາຍຮັດເກີບເສັ້ນດຽວ, ເພື່ອວ່າທ່ານຈະບໍ່ສາມາດເວົ້າໄດ້ເລີຍວ່າ, ‘ເຮົາເຮັດໃຫ້ອັບຣາມຮັ່ງມີ’. 24ຂ້ານ້ອຍບໍ່ຂໍຮັບສິ່ງໃດເວັ້ນແຕ່ສິ່ງທີ່ຄົນຂອງຂ້ານ້ອຍໄດ້ກິນໄປແລ້ວ ແລະ ສ່ວນແບ່ງທີ່ເປັນຂອງຜູ້ຊາຍທີ່ໄປກັບຂ້ານ້ອຍຄື: ອາເນ, ເອັດຊະໂຄນ ແລະ ມຳເຣນັ້ນ. ໃຫ້ພວກເຂົາໄດ້ຮັບສ່ວນແບ່ງຂອງພວກເຂົາ”.
اکنون انتخاب شده:
ປະຖົມມະການ 14: LCV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.