Maalʉko 15

ɄYeesu pitagaalila lya nʼnongozi ʉPilaato

(Mataayo 27:1-2, 11-14; Luuka 23:1-5; Yoohani 18:28-38)

1Nashampwi lwene, abhalongozi bha bhasayi bha Ngʉlʉbhɨ, abhagoosi na bhamanyizyi abhɨ ndajizyo zya Moose, hwa huje ikoloti lyonti, bhahajeehana. Bhahamʼpinya ʉYeesu, bhahanʼtwala hwa Pilaato, ʉnʼnongozi wa Bhaluumi wa‑ahalongozyaga hu mukowa ʉgwɨ Yudeeya.

2ɄPilaato ahamʼmʉzɨɨlɨzya ʉYeesu ahaga, “Aawe ʉli Mwɨnɨ wa Bhayahuudi?” ɄYeesu ahamʼmwamula ahaga, “Weewe wayanga.” 3Abhalongozi bha bhasayi bhahanʼtaakaga ʉYeesu hu nongwa ɨnyinji lwene. 4ɄPilaato ahamʼmʉzɨɨlɨzya ʉYeesu nantele, ahaga, “Saga ʉhwamula nalimo? Enya sha bhahutaaka weewe ɨnongwa ɨnyinji.” 5Leelo, ʉYeesu saga ahamʼmwamula nalimo. Ɨpo ʉPilaato ahaswiga!

ɄPilaato ahunʼnonga ʉYeesu huje, bhanʼgoje

(Mataayo 27:15-26; Luuka 23:13-25; Yoohani 18:39-19:16)

6Ɨshi pa shikulukulu ɨshɨ Paasaka, ʉnʼnongozi ʉPilaato ahali na miiho aga hubhigulile ʉnʼkʉngwe weeka, ʉla abhantu bhahanʼnaabhaga huje, ayigulilwe. 7Ahali ʉmuntu ʉmo ʉyo itaawa lyakwe ahali yʉ Balaaba. Ʉmwene ahakʉngwɨlwe mu hoobhe peeka na bhamwabho, pɨpo bhonti bhahabhombile ʉvwalanganu nʉ goji. 8Ahabhaazyo hahaala ʉYeesu lwa‑ali hwa Pilaato, abhantu abhinji bhahabhala hwa Pilaato, bhahanʼnaabha huje, abhigulile ʉnʼkʉngwe weeka, nanshi sha‑ahalʉbhɨɨye abhombe. 9ɄPilaato ahabhaamula huje, “Wɨlɨ, muhwanza aje, ɨmbigulile ʉMwɨnɨ wa Bhayahuudi?” 10Ahayanjile ɨsho, pɨpo ahamɨɨnye huje, abhalongozi bha bhasayi bha Ngʉlʉbhɨ bhahanʼtwalile ʉYeesu hwa mwene hu nongwa yɨ jɨɨla yaabho lwene. 11Ɨpo abhalongozi bha bhasayi bhahayisooha ɨmpʉga ɨla ɨya bhantu huje, ɨnʼnaabhe ʉPilaato abhigulile ʉBalaaba. 12ɄPilaato ahabhabhʉzɨɨlɨzya nantele huje, “Ɨshi leelo, muhwanza ɨmbombe bhʉlɨ nʉ muntu ʉnʉ wa muyiga Mwɨnɨ wa Bhayahuudi?”

13Abhantu bhonti bhahɨtɨshɨla hwi‑ibwago bhahaga, “Nʼkhomeele pa shikhobheehanyo!” 14ɄPilaato ahabhabhʉzɨɨlɨzya huje, “Atulile yeenu?” Ɨpo abheene bhahazanzala tee abwaganishe, bhahaga, “Nʼkhomeele pa shikhobheehanyo!” 15ɄPilaato ahabhigulila ʉBalaaba, pɨpo ahanzaga huyisʉngwɨzye ɨmpʉga ya bhantu. Ahabhalajizya abhalwi bhaakwe huje, bhanʼshete ʉYeesu nʉ chapo, na hunʼkhomeele pa shikhobheehanyo.

Abhalwi bhahunʼsʉfwanya ʉYeesu

(Mataayo 27:27-31; Yoohani 19:2-3)

16Abhalwi bhahamʼmwega ʉYeesu, bhahabhala nawo pa shinamwɨnɨ sha Pilaato. Bhahabhʉngaanya ɨmpʉga ɨngoosi ɨya bhalwi. 17Bhahanʼkwatizya ʉYeesu ʉmwenda ʉmʼvuutu ʉgwɨ shimwɨnɨ. Bhahatabha ɨnsushe ɨyɨ mimvwa,#15:17 Enya Yoohani 19:2, ɨshifwani ɨshɨ nsushe ɨyɨ mimvwa. bhahanʼkwatizya hwi‑itwe. Bhahabhombile ɨsho humʼmɨɨshe abhe nkati yʉ mwɨnɨ, hunʼsʉfwanye. 18Bhahanda hunʼjebhule na hunʼnamushe, bhahaga, “Mwagona, wee Mwɨnɨ wa Bhayahuudi!” 19Bhahanʼkhomaga pi‑itwe ni‑ilanzi, bhahanʼswɨlɨlaga amatɨ, bhahanʼsugamililaga na humʼmʉndamilile pa nsi. 20Lwa bhaamala hunʼsʉfwanye, bhahamʼmwawula ʉmwenda ʉmʼvuutu guula, na hunʼkwatizye nantele amenda gaakwe. Bhahamʼfumya hwʉnzɨ, bhahasogola nawo abhale hunʼkhomeele pa shikhobheehanyo.

Bhahunʼkhomeela ʉYeesu pa shikhobheehanyo

(Mataayo 27:32-44; Luuka 23:26-43; Yoohani 19:17-27)

21Lwa bhali mwi‑idala, bhahakhomaana nʉ muntu ʉyo ahashilaga afume hu shipanga. Itaawa lyakwe ahali yʉ Siimoni, ahali nʼkhaaya wa hwi‑ibooma ɨlyɨ Kileene. Ʉmuntu ʉla ahali yise wa Alekizanda nʉ Luufo. Abhalwi bhahamʼbijiilizya huje, abhʉʉsye ɨshikhobheehanyo sha Yeesu. 22Bhahanʼtwala ʉYeesu pa bhahagaga Goligoota, hwa huje Pi‑Ifupa li‑Itwe. 23Bhahamʼpeela ʉYeesu ɨdivaayi ya bhahasangɨɨnye nʉ nʼnembo. Ʉnʼnembo ʉgwo gwahamʼmwavwaga ʉmuntu asahahwiyʉmvwaje haani amavune. Leelo, ʉmwene ʉYeesu ahakhaana amwele. 24Ɨpo bhahanʼkhomeela pa shikhobheehanyo paala,#15:24 Enya Mataayo 27:35, ɨshifwani ɨsha Yeesu pa shikhobheehanyo. bhahagabhana amenda gaakwe.#15:24 bhahagabhana amenda gaakwe Bhahabhombile ɨsho alɨngaane na miiho gaabho agɨ Shiluumi huje, abhalwi bha bhahunʼkhomeela pa shikhobheehanyo ʉmʼmomba mbiibhi, bheegaje amenda gaakwe. Bhahaduunya ɨnduunya#15:24 Bhahaduunya ɨnduunya Lumo abhalwi bhaala bhahabhɨɨshɨle ʉtusanzʉ twa tuli nɨ vimanyishizyo awe amawe ga gali na mataawa mu shɨlɨɨlo. Bhahabhombile ɨsho huje, weenu mu bheene ayeeje hantu heenu. huje weenu anza hweje mwenda bhʉlɨ.#Bhaazya ɨNsalifyo 22:18. 25Lwa bhahunʼkhomeela, yahali mu saala ɨya taatu nɨndaabhɨ.

26Bhahasimbile pa mwanya pa shikhobheehanyo ɨnsimbo ɨzyɨ malando gaakwe zya zyahagaga,

Ʉnʉ yʉ Mwɨnɨ wa Bhayahuudi

27Bhahanʼkhomelɨɨye na bhabhomba mbiibhi bhabhɨɨlɨ pa vikhobheehanyo. Weeka bhahanʼkhomelɨɨye hu lubhazu ʉlwa hu lɨɨlo ʉlwa Yeesu wope ʉwamwabho hu lubhazu ʉlwa hu mongo. 28Ɨpo zyahabhombeha ɨNsimbo ɨMfinjile zya ziyiga, “Bhahamʼmaazizya peeka na bhabhomba mbiibhi.”#15:28 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani. 29Abhantu bha bhahashizanyaaga mwi‑idala paala, bhahanʼnigaga na‑ayinzye amatwe gaabho bhahagaga, “Oogo! Aawe, wʉ‑ʉbhugulanya ɨnyumba ɨmfinjile ɨya Ngʉlʉbhɨ na huyizenje nantele hu nsiku zitaatu! 30Ɨshi leelo, teenye ʉhwifyʉle weewe, ʉyiishe pa shikhobheehanyo ɨpo.” 31Bhope abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose bhonti peeka, bhahanʼnigaga ʉYeesu. Bhahabhʉzanyaaga bheene bhahagaga, “Bhaya, abhanjɨ ahabhafyʉlaga, leelo apootwa ahwifyʉle yʉʉyo! 32Bhasi, ʉmwene ahwiyanga huje, yʉ Mʼfyʉli, ʉMwɨnɨ wa Bhaizilaeeli. Ɨshi teenye ayiishe pa shikhobheehanyo huje, tinʼnole na humʼmwɨtɨshe.” Na bhantu bhaala, bha bhahakhomeliilwe pa vikhobheehanyo peeka nawo, bhope bhahanʼnigaga.

Afwe hwa Yeesu

(Mataayo 27:45-56; Luuka 23:44-49; Yoohani 19:28-30)

33Afume mu saala nʼtanda ɨya pasanya afishe mu saala ɨya fundihandwɨmo (9), hwahabha hiisi mu nsi yonti. 34Ɨpo mu saala ɨya fundihandwɨmo (9), ʉYeesu ahakhoola ɨhoolo ɨngoosi ahaga, “Eloyi, Eloyi, lama sabakitaani?” Hwa huje, “Wee Ngʉlʉbhɨ waanɨ, Ngʉlʉbhɨ waanɨ, yeenu wandeha?”#Bhaazya ɨNsalifyo 22:1. 35Abhantu bhamo bha bhahɨmɨlɨɨye paala, lwa bhʉmvwa ʉYeesu zya‑ayanga, bhahaga, “Ahunʼkwizya yʉ Eliya ʉnʼkuwi wa Ngʉlʉbhɨ.”#15:35 ABhayahuudi abhinji bhahali bhahwɨtɨha huje ʉEliya saga afwiye nka lumo, lyoli ʉNgʉlʉbhɨ ahamʼmwejile mu nsi hu habhaazyo lwa‑ali mwʉmi na‑abhale nawo hu mwanya. Nantele bhahali bhasʉʉbhɨla huje ʉEliya anza hwɨnze nantele mu nsi. Bhaazya 2 aBhamwɨnɨ 2:11; Malaaki 4:5. 36Ʉmuntu ʉmo ahashɨmbɨla nalinaali, ahazubhiha ɨsabhula ɨnzelu mu divaayi ɨndozu, ahapinyila mwi‑ilanzi itali. Ahalibhʉʉsya hu mwanya, ahamʼpeela ʉYeesu huje, amwele. Ʉmuntu ʉyo ahayanga huje, “Leshi teenye nkashele ʉEliya abhala hwɨnze humʼmwisye pa shikhobheehanyo ɨpo!” 37ɄYeesu ahakhoola ɨhoolo ɨngoosi, ahafwa pɨnɨɨpo. 38Ɨpo mu nyumba ɨmfinjile ɨya Ngʉlʉbhɨ ʉwiizigo ʉwi‑igolole#15:38 Igolole ɨlyo lyahazigaga abhantu bhasahatʉʉhaje aPafinjile pa Pafinjile, pa‑akhala ʉNgʉlʉbhɨ. Bhaazya izwi Nyumba ɨmfinjile ɨya Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. wahazembuha pabhɨɨlɨ afume pa mwanya afishe pa nsi. 39Ʉnʼnongozi ʉmo ʉwa bhalwi wa‑ahɨmɨlɨɨye pitagaalila lya Yeesu, lwa wanʼnola ʉYeesu afwa nanshi shiila, ahayanga huje, “Lyoli ʉmuntu ʉnʉ ahali Mwana wa Ngʉlʉbhɨ!”

40Bhahali abhashɨ bha bhahenyaaga sha hutali. Mwʉnʉʉmwo ahali ʉMaliya ʉwa hu Magidaala, ʉSaloome nʉ Maliya ʉnyina wa Yoose nʉ Yaakobo ʉnʼdoodo. 41Abhashɨ ɨbho bhahamʼmɨnjɨlɨzyaga na humʼmombele ʉYeesu mu habhaazyo ɨho lwa‑ali hu mukowa ʉgwɨ Galilaaya. Bhahali paala na bhashɨ abhamwabho abhinji lwene, bha bhahabhalile peeka nawo hwi‑ibooma ɨlyɨ Yelusaleemu.

Asyɨlwe hwa Yeesu

(Mataayo 27:57-61; Luuka 23:50-56; Yoohani 19:38-42)

42Isiku lyɨnɨɨlyo lyahali pa Shihaanu, isiku ɨlya hwilɨngaanye hu nongwa yɨ Sabaato#15:42 ƗSabaato yahandaga isanya lwa liswa pa Shihaanu afishe lwa liswa pa Shiyeeluka. Ɨndajizyo zya Bhayahuudi saga zihwɨtɨha asyɨle ʉmuntu pi‑isiku ɨlyɨ Sabaato. ɨya Bhayahuudi apuute na‑atʉʉye. Lwa hwapalamila lyabheela, 43ahɨnza ʉmuntu ʉmo wa bhahagaga Yoosefu, nʼkhaaya wi‑ibooma ɨlyɨ Alimasaaya. Ahali wɨ nshɨnshɨ haani, nantele ahali palishimo mwi‑ikoloti igoosi ɨlya Bhayahuudi. Nantele, ahasʉbhɨlaga ahwɨnze hu wumwɨnɨ ʉwa Ngʉlʉbhɨ. Ʉyo ahabhala hwa Pilaato sinta wooga hunʼnaabhe huje, amʼmwɨtɨshɨzye abhale agweje ʉmʼvimba gwa Yeesu, agusyɨle nalinaali.

44Ɨpo ʉPilaato lwa wʉmvwa huje, ʉYeesu afwiye nalinaali shɨɨsho, ahaswiga! Ahanʼkwizya ʉnʼgoosi ʉwa bhagoosi bha bhalwi huje, asimishizye nkashele ʉYeesu afwiye lyoli. 45Lwa wasimishizya huje, ʉYeesu afwiye, ʉPilaato ahamʼmwɨtɨshɨla ʉYoosefu huje, agweje ʉmʼvimba. 46Ɨpo ʉYoosefu wope ahakala ikɨbha ɨlyɨ mpɨɨya ɨngoosi. Ahabhala pa shikhobheehanyo paala, ahiisya pa nsi ʉmʼvimba gwa Yeesu, ahaguniempeela ni‑ikɨbha liila. Ahagubhʉʉsya, ahabhala, ahagubhɨɨha ʉmʼvimba guula mu nkʉngwa ya yahabaniilwe mwi‑ilyalawe na hulibhungulusye iwe igoosi. Ahalibhɨɨha pa lyango pa nkʉngwa, ahadinda. 47Bhope ʉMaliya ʉwa hu Magidaala nʉ Maliya ʉnyina wa Yoose nʉ Yaakobo ʉnʼdoodo bhahenyaaga pa bhahasyɨlaga.

اکنون انتخاب شده:

Maalʉko 15: SBK

های‌لایت

کپی

مقایسه

به اشتراک گذاشتن