Maalʉko 11

Bhahumʼmwambɨɨlɨla ʉYeesu hu luseshelo hwi‑ibooma ɨlyɨ Yelusaleemu

(Mataayo 21:1-11; Luuka 19:28-40; Yoohani 12:12-19)

1Bhahapalamila afishe hwi‑ibooma ɨlyɨ Yelusaleemu, apalamane nɨ vipanga ɨvyɨ Besifaage nɨ Besaniya, ambali hwi‑igamba ɨlyɨ Mizeyituuni. ɄYeesu ahabhasonteelezya abhasundwe bhaakwe bhabhɨɨlɨ mwɨ‑ɨbho ishʉmi na bhabhɨɨlɨ, 2ahaga, “Bhalaji mu shipanga shiila sha shili pilongolela lyenyu. Lwa mwafiha mu shipanga muula, lubhilo lwene munza huyaaje ɨnyaana ndogobhi yɨ‑ɨkʉngwɨlwe, ɨyo ʉmuntu saga alɨnjɨle nka lumo azʉbhe pa mwanya yaakwe.#11:2 ɨnyaana ndogobhi yɨ‑ɨkʉngwɨlwe, ɨyo ʉmuntu saga alɨnjɨle nka lumo azʉbhe pa mwanya yaakwe ABhayahuudi bhahabhɨɨshɨle ɨndogobhi huje vibhe vyʉma vya‑anyeemule abhantu awe amazigo. Abhamwɨnɨ bhahapandaga mu ndogobhi lumo lwene. Abheene bhahapandaga mu falaasi ɨzyɨ lʉgʉ. Ɨpo ʉYeesu lwa‑ahapandile mu ndogobhi hu habhaazyo ɨho atʉʉha hu Yelusaleemu, ahali alolesya huje ʉmwene ahwɨnza hu tengaanu nanshi ʉmwɨnɨ ʉmwoloolo. Muyaawule na huyileete huliinɨ. 3Nkashele ʉmuntu ʉmo ahubhabhʉzɨɨlɨzya huje, ‘Yeenu mubhomba ɨsho?’, mugaje, ‘ɄMwɨnɨ ahuyanza, anza huyigalusye shɨɨshi lwene.’ ”#Bhaazya Zakaliya 9:9.

4Ɨpo bhahabhala, bhahayilola ɨnyaana ndogobhi yɨ‑ɨkʉngwɨlwe panzɨ apapalamani na pa lyango mwi‑idala igoosi, bhahayaawula. 5Abhantu bhamo bha bhahɨmɨlɨɨye paala, bhahabhabhʉzɨɨlɨzya bhahaga, “Mwɨ! Mubhomba yeenu ɨpo? Muhuyawulila yaashi ɨnyaana ndogobhi ɨyo?” 6Abhasundwe bhaala bhahabhaamula shiila ʉYeesu sha‑ahabhabhʉzɨɨzye huje, bhayangaje. Ɨpo bhahabhɨtɨshɨla abhasundwe bhaala huje, bhasogole nayo ɨndogobhi ɨyo. 7Bhahayitwala ɨnyaana ndogobhi ɨyo hwa Yeesu. Bhahaala amenda gaabho pa mwanya pa nyaana ndogobhi ɨyo. ɄYeesu ahazʉbha, ahakhala pa mwanya, ahanda ashʉʉle.#11:7 Enya Luuka 19:35, ɨshifwani ɨsha Yeesu pa mwanya pa nyaana ndogobhi. 8Abhantu bhahaala amenda gaabho mwi‑idala, bhamo bhahatema ɨnsamba zyɨ matʉndʉ mu magʉnda na huzyale mwi‑idala alolesye ɨnshɨnshɨ hwa mwene. 9Abhantu bhamo bhahanʼtagalilaga ʉYeesu, abhanjɨ bhahamʼmɨnjɨlɨlaga hwisinda. Bhonti bhahabwagaga ibwago bhahagaga,

“Amwamihwaje#11:9 Amwamihwaje Mu njango ɨyɨ Shiyunaani ɨsimbwilwe huje, Hosaana hwa huje, tifyʉle. ʉNgʉlʉbhɨ!

Asayiiwe wa‑ahwɨnza hwi‑ikhone lya Mwɨnɨ, ʉNgʉlʉbhɨ weetu!#Bhaazya ɨNsalifyo 118:26.

10Wusayiiwe ʉwumwɨnɨ ʉwa maama weetu ʉDaudi wa wuhwɨnza!

Amwamihwaje ʉNgʉlʉbhɨ ʉyo ali hu mwanya.”

11ɄYeesu ahatʉʉha mwi‑ibooma ɨlyɨ Yelusaleemu, ahashizanya nyɨɨma mu lubhaga lwɨ nyumba ɨmfinjile ɨya Ngʉlʉbhɨ.#11:11 nyumba ɨmfinjile ɨya Ngʉlʉbhɨ Bhaazya izwi Nyumba ɨmfinjile ɨya Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. Ahavyenya shinza ɨvintu vyonti vya vyahali paala. Ahasogola, ahabhala hu Besaniya peeka na bhasundwe bhaakwe ishʉmi na bhabhɨɨlɨ, pɨpo hwahali lyabheela.

ɄYeesu ahuliguna ikwi ɨlyɨ makʉ

(Mataayo 21:18-19)

12Ɨndaabhɨ yaakwe ʉYeesu na bhasundwe bhaakwe lwa bhaafuma hu Besaniya aweele hu Yelusaleemu, ɨnzala yahanʼnumile. 13Sha‑ali hutali, ahalilola ikʉ, lya lyahali na matʉndʉ aminji. Ahalipalamila ahwenye nkashele lili na makʉ. Lwa waafiha paala, ahalyaga saga lili na makʉ, lyoli lijejile ga matʉndʉ geene, pɨpo ahabhaazyo aha hwezye hahasɨɨle afishe. 14Ɨpo ahalibhʉʉzya ikwi liila huje, “Afume sanyʉʉnʉ na wiila, saga ʉnza hwezyaje amakʉ dumu.”#11:14 ɄYeesu lwa‑ahaligunaga ikwi ɨlyɨ makʉ, ahakuwaaga huje, ʉNgʉlʉbhɨ ahayihubhalonga aBhayahuudi, pɨpo saga bhali na mantongooni agɨ njendo ɨnyinza. Abhasundwe bhaakwe bhahagʉmvwa amazwi gaala.

ɄYeesu ahubhashɨmbɨzya abhachuluuzi mu nyumba ɨmfinjile ɨya Ngʉlʉbhɨ

(Mataayo 21:12-17; Luuka 19:45-48; Yoohani 2:13-22)

15Lwa bhaafiha hwi‑ibooma ɨlyɨ Yelusaleemu, ʉYeesu ahatʉʉha mu lubhaga lwɨ nyumba ɨmfinjile ɨya Ngʉlʉbhɨ. Ahanda hubhashɨmbɨzye hwʉnzɨ abhantu bha bhahakazyaga, na bhanjɨ bha bhahakalaga ɨvintu mu lubhaga lwɨ nyumba ɨmfinjile ɨya Ngʉlʉbhɨ. Ahapetulanya ɨmeeza zya bhaala bha bhahavunzanyaaga ɨmpɨɨya,#11:15 bhahavunzanyaaga ɨmpɨɨya Saga yahanziwaaga huje ɨmpɨɨya ɨzyɨ Shiluumi zibhombelwaje ɨmbombo mu nyumba ɨmfinjile ɨya Ngʉlʉbhɨ. Ɨshi, aBhayahuudi bhahavunzaga ɨmpɨɨya zyabho huje bhazyaje ɨmpɨɨya ɨzya‑abhombele ɨmbombo mu nyumba ɨmfinjile ɨya Ngʉlʉbhɨ. na matengo gaabho bha bhahakazyaga ɨnkʉnda. 16Nantele, saga ahanʼneshile ʉmuntu nʉʉmo ʉwa‑anyeemule ahantu hamo aha‑akazye ashizanye mu lubhaga lwɨ nyumba ɨmfinjile ɨya Ngʉlʉbhɨ.

17Mu manyizyo zyakwe ʉYeesu ahaga, “Bhʉlɨ, saga yahasimbwilwe mu Nsimbo ɨMfinjile, ʉNgʉlʉbhɨ ahayanjile huje, ‘Ɨnyumba yaanɨ yahayibha nyumba yɨ mpuuto hwa bhantu abhɨ nsi zyonti’?#Bhaazya Yesaaya 56:7. Leelo amwɨ, muyigalulɨɨnye abhe nanshi igwenya lya bhiibha!”#Bhaazya Yelemiya 7:11. 18Abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose lwa bhʉmvwa ɨzyo zyonti, bhahanzaga idala ɨlya hunʼgoje, pɨpo bhahamʼmwogopaga ʉYeesu. Nantele, abhantu bhonti bhahaswigaga ɨmanyizyo zyakwe. 19Lwa hwabha lyabheela, ʉYeesu na bhasundwe bhaakwe bhahasogola mwi‑ibooma.

Ikwi ɨlyɨ makʉ lya lyʉmɨle

(Mataayo 21:20-22)

20Nantele, shampwi yaakwe lwa bhaweela hwi‑ibooma ɨlyɨ Yelusaleemu, bhahalyaga ikwi liila lyʉmɨle lyonti ahwande hu malandazi gaakwe. 21ɄPeeteli ahiizuha amazwi ʉYeesu ga‑ahayanjile, ahamʼmʉʉzya ahaga, “Wee Mʼmanyizyi! Enya! Ikʉ lya wahaligunile lyʉmɨle!”

22ɄYeesu ahabhabhʉʉzya huje, “Munʼsʉbhɨlaje ʉNgʉlʉbhɨ. 23Lyoli ɨhubhabhʉʉzya, nkashele ʉmuntu saga asaaga nazimo mu mwoyo gwakwe lyoli ahwɨtɨha lwene huje, lya‑ayanga libhala‑abhombeshe, abhajiiye hulibhʉʉzye igamba ɨli huje, ‘Wee ligamba! Kumpuha, ʉyeepe ɨpa pʉ‑ʉhwɨli, ʉhwitaaje mu nsʉmbi,’ nɨ‑ɨzyo zibhala‑abhombeshe ɨsho. 24Ɨshi leelo ɨhubhabhʉʉzya huje, lwa mulaabha na‑apuute hohonti, mubhanje nʉ lwɨtɨho huje muhejelɨɨye, namwɨ munza hwambɨɨlɨle. 25Namwɨ lwa mupuuta, mukhobhoshelaje ʉmuntu wowonti wa‑abhabhombɨɨye ɨmbiibhi zimo. Ɨpo ʉDaada weenyu ʉwa hu mwanya anza hubhakhobhoshele namwɨ ɨmbiibhi zyenyu. 26Leelo amwɨ, nkashele saga muhubhakhobhoshela abhamwenyu, wope ʉDaada weenyu ʉwa hu mwanya saga anza hubhakhobhoshele ɨmbiibhi zyenyu.”#11:26 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani.

Ikhone lya Yeesu libhʉzɨlɨzɨwa

(Mataayo 21:23-27; Luuka 20:1-8)

27ɄYeesu na bhasundwe bhaakwe bhahafiha nantele hwi‑ibooma ɨlyɨ Yelusaleemu. Lwa bhahajendaga mu lubhaga lwɨ nyumba ɨmfinjile ɨya Ngʉlʉbhɨ, abhalongozi bha bhasayi bha Ngʉlʉbhɨ, abhamanyizyi abhɨ ndajizyo zya Moose na bhagoosi abhanjɨ bha Bhayahuudi bhahamʼmalila ʉYeesu. 28Bhahamʼmʉzɨɨlɨzya bhahaga, “Gaala gʉ‑ʉbhomba wiila, ʉbhomba hwi‑ikhone lya naanu?#11:28 ʉbhomba hwi‑ikhone lya naanu Bhahamʼmʉzɨɨlɨzya ɨsho hu nongwa yɨ mbombo zya Yeesu zya‑ahabhombile nanshi atʉʉshe hu Yelusaleemu hu luseshelo, ashɨmbɨzye abhantu mu nyumba ɨmfinjile ɨya Ngʉlʉbhɨ, amanyizye abhantu na ganjɨ aminji. Yʉ naanu ya‑aʼpiiye ikhone ɨlya‑abhombele ɨgo?”

29ɄYeesu ahabhabhʉʉzya huje, “Namwɨ, ɨnza hubhabhʉzɨɨlɨzye izwi limo. Nkashele mwanaamula, nanɨ ɨnza hubhabhʉʉzye huje, ɨgo ɨbhomba, ɨbhomba hwi‑ikhone lya naanu.” 30Ahabhabhʉzɨɨlɨzya huje, “ɄYoohani ahalyajile hwi, ikhone ɨlya hwozye abhantu? Lyahafumile hwa Ngʉlʉbhɨ awe lyahafumile hwa bhantu? Teenye mbʉʉzyi!”

31Bhahanda ajeehane bheene huje, “Nkashele tiyiga, ‘Lyahafumile hwa Ngʉlʉbhɨ,’ anza hutibhʉzɨɨlɨzye atɨ huje, ‘Yeenu mwahasintile humʼmwɨtɨshe?’ 32Leelo, nkashele tiyiga, ‘Lyahafumile hwa bhantu,’ abhantu bhanza‑aviitwe.” Bhahabhogopaga abhantu, pɨpo abhantu bhonti bhahamʼmwɨtɨɨshe ʉYoohani huje, ahali nʼkuwi wa Ngʉlʉbhɨ. 33Bhahamʼmwamula bhahaga, “Atɨ saga timɨɨnye lwonti.” Ɨpo wope ahabhabhʉʉzya huje, “Nanɨ saga ɨmbala hubhabhʉʉzye lwonti huje, ɨgo ɨbhomba hwi‑ikhone lya naanu.”

اکنون انتخاب شده:

Maalʉko 11: SBK

های‌لایت

کپی

مقایسه

به اشتراک گذاشتن