'Olic 89
89
O 'Olic a Romadiw Yo Mapades ko Kitakit
O nitilidan ni Itan o Icra a tamdaw a 'olic, o sapasifana' o 'olic.
1 Tapangaw, o raromadiw kako pahmek a tahada'oc to sini'ada Iso,
o papararid kako a palosiyang to nika so'lin Iso.
2Mafana' kako, o mida'ocay ko sini'ada Iso,
matiya o nika tanektek no kakarayan a tahada'oc ko nika so'lin Iso.
3O sowal Iso i, <<O nao matatlekayto Kako ato nipili'an Ako a tamdaw,
maherekto Kako a mikton to sowal ci Tafitian o matayalay Ako,
4palahongtien Ako ko tlotloc iso a tahada'oc,
patanekteken Ako ko kalahongti iso tangasa i kasarayray no tloc iso han Ako,>> saan Kiso.
5 Tapangaw, romadiw a pahmek ko tahaf no kakarayan to kafahka'an a dmak Iso,
pahmek ko coyocoyoh a romadiw i kakarayan to nika so'lin Iso.
6 Tapangaw, awaay i kakarayan ko mikikakaay i Tisowanan,
awaay ko roma a kawakawas to milcaday i Tisowanan.
7O satadamaanay a tata'ongen a Kawas Kiso i sa'opo no kawakawas,
o kangodoan no i taliyokay Iso a coyocoyoh Kiso.
8 Tapangaw, O mikomoday a Kawas, awaay ko milcaday Tisowanan a ci'icel,
Tapangaw, o so'linay ko dmak Iso a ma^min.
9Makowan Iso ko riyar,
mapatrep Iso ko lodis.
10Pelpelen Iso ko fongoh no kangic no riyar ci Rahap a mipatay,
pakaynien Iso i tadamaanay a 'icel Iso ko sapilowid to 'ada Iso.
11O no Miso ko kakarayan, o no Miso haca ko sra,
o nisanga'an Iso ko hkal ato i laloma'ay nira a maamaan.
12O nisanga'an Iso konini a ma^min nai paka'amis tangasa i pakatimol,
pasayra i Tisowanan a milkal a romadiw ko Tapor a lotok ato Hirmon a taporo.
13Tadaci'icelay ko patlaw Iso,
tadamaanay ko 'icel Iso.
14O mo^celay ato marayasay a dmak ko paranaan no kitakit Iso,
o polong no dmak Iso i, o so'linay ato sini'adaay a ma^min.
15Tadamalmeday ko pa'olicay a romadiw a mita'ong i Tisowanan a tamdaw.
Tapangaw, o mapatdiay no sini'ada Iso ko 'orip nangra.
16O nano Miso ko sakasaromi'ad sa cangra a lipahak,
mipahmek cangra a romadiw to nika mo^cel Iso.
17O tadamaanay a 'icel Iso ko sakapakalowid niyam,
o nano mikomi Iso ko saka milkal kami a romadiw to sapakalowid a radiw.
18Nawhani, Kiso, o Tapang niyam, o midipotay i tamiyanan.
Kiso, o hongti niyam, o Fangcalay a Kawas no Israil.
O Niktonan no Kawas a Sowal ci Tafitian
19I ti:yaho pakaynien Iso i mapolosi ko pipasowal to so'linay a mitooray Tisowanan a finawlan.
Sowal sa Kiso, <<Mapatamohongto Ako ko ccay a ci'icelay a milood,
o nipili'an Ako cingra nai finawlan a palahongti.
20O nipili'an Ako ci Tafiti o matayalay Ako,
o nipatirengan Ako a pasimal cingra a palahongti namo.
21O papaflien Ako cingra to 'icel,
o 'icel Ako ko sakaki^mel ningra.
22Caay ko papakalowid i cingraan ko 'ada ningra,
caay ko mamafilo no tatiihay a tamdaw a milowid cingra.
23O paporaricen Ako ko misa'adaay i cingraan,
o papatayen Ako ko mi'intelay i cingraan.
24Pakaynien Ako i so'linay ato sini'ada ko pikapot Ako i cingraan,
ta parariden Ako cingra a pakalowid.
25O cacowaten Ako ko kitakit ningra nai Tnokay a riyar tangasa i Iofratis a 'alo.
26Wa sowal sa cingra i Takowanan,
<O Wama ako Kiso, o Kawas ako,
o midipotay ako Kiso, o pa'oripay takowanan,> saan.
27O papatirengen Ako cingra a palafisac a wawa,
o mamalasatadamaanay a hongti cingra i tini i hkal.
28O a 'imeren Ako a mido^do ko caay ka falic a olah Ako i cingraan,
caay ko papalasawaden Ako a tahada'oc ko katatlekan niyam.
29O mamida'oc ko tlotloc ningra a mikowan,
matiya o kakarayan a mida'oc ko pikowan ningra.
30<<Nikawrira, ano miliyang ko tlotloc ningra to rikec ako,
ano caay pido^do to lkakawa Ako,
31ano miliyas cangra to sifana' Ako,
ano caay ka 'imer to limo'ot Ako i,
32o tatfocen Ako cangra to nano raraw nangra,
o sasti'en Ako cangra to nano patlac nangra.
33Nikawrira, o mamararid Kako a sini'ada ci Tafitian,
o mamida'oc ko nika so'lin Ako i cingraan.
34Caay ko papalasawaden Ako ko katatlekan niyam,
caay ko lalodoten Ako ko niktonan Ako a sowal i cingraan.
35<<Kinaccay aca Kako a mitoro' to fangcalay a ngangan Ako a mikton to sowal,
saka, caay ko mamisafana' Kako ci Tafitian.
36Caay ko cacitolas ko tloc ningra a mararid,
o dadipoten Ako ko kitakit ningra a matiya o pipatdi no cidal a tahada'oc.
37O mamida'oc ko pikowan ningra a matiya o nika likat no folad,
o mamipawacay koya so'linay i kakarayan,>> saan.
O Rarom to Nika Tfad no Hongti
38Nikawrira, makter Kiso to nipili'an Iso a patireng a hongti,
mana'ay Kiso cingraan, falahen Iso cingra.
39Palasawaden Iso koya nika tatlekan Iso ato matayalay Iso,
fahkolen Iso i sra ko no hongti a tamohong ningra.
40Plengen Iso ko 'adipel no niyaro' ningra,
palasawaden Iso ko pisitaraan ningra.
41O pakayraay a romakat a tamdaw a ma^min i,
mitakaw a miala to kalomaamaan ningra.
Lokesen no i taliyokay a kitakit cingra.
42Papilowiden Iso ko 'ada ningra i cingraan,
palipahaken Iso ko 'ada ningra a ma^min.
43Palasawaden Iso ko ^poc no sapilood ningra a lalosidan,
saka, malowid cingra i kalaloodan.
44Palasawaden Iso ko 'icel no pikowan ningra,
tfaden Iso ko nika tomireng ningra a malahongti.
45Caho ko kato'asan ningra i, sanarikay han Iso cingra a militeng,
papihakecen Iso cingra a pakangodo.
O Pilongoc to Pipa'orip no Kawas
46 Tapangaw, tahacowa ko nika ^ca pikihar Iso i tamiyanan saw? Tahada'oc haw?
Tahacowa ko nika rafraf no kter Iso saw?
47Nanay haratengenho Iso ko nika kamoko' no 'orip ako.
Nanay haratengenho Iso ko nika o mamapohed a ma^min ko nisanga'an Iso a tamdaw.
48Cima ko mama^deng a misakakaya' to 'orip a caay ka patay saw?
Cima ko mama^deng a miliyas to sakowan no tadem saw?
49Tapangaw, i cowaayto ko wacay noya sini'ada Iso i 'ayaw saw?
I cowaayto koya nika so'lin Iso ci Tafitian saw?
50Tapangaw, nanay haratengenho Iso ko nika mapakangodo ko matayalay Iso,
nanay haratengenho Iso ko nipihadidi ako to pisamsam no roma a finacadan.
51 Tapangaw, milikaf ko 'ada Iso to nipatirengan Iso a hongti,
ano talacowacowa cingra i, likafen nangra cingra.
52Nanay mida'oc a mapahmek ko Tapang!
Amin! Amin!
اکنون انتخاب شده:
'Olic 89: AMIS2019
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2019