'Olic 73
73
SAKA TOLO A MALOLODAY CUDAD
('Olic 73--89)
O Nika Mo^cel no Kawas
O 'olic ni Asaf.
1So'linay sini'ada ko Kawas to Israil,
manga'ay ko pidipot Ningra to makoracay ko faloco' a tamdaw.
2Nikawrira, kinapinapi:nato kako a sakapolinan, mangatato a tahoriyac ko wa'ay ako,
3nawhani ma'inap kako to nika cakat no 'orip no malata'angay a tamdaw,
ma'araw ako ko nika cidafong no tatiihay a tamdaw i, ngaliwngiw ko faloco' ako.
4Nawhani awaay ko pades nangra,
ci'icel a tanektek ko tireng nangra.
5Caay ka matiya o tao cangra a misemsem,
caay ka matiya o tao cangra a milifet to pades.
6Kala saka^res#73.6 saka^res -- o roma i, 'iray (ka'amis). han nangra ko pisatakaraw nangra,
kalariko' han nangra ko pikari'ang to tao.
7Sahto o tatiihay ko masadakay i faloco' nangra,
matomes no misa'fitay ko harateng nangra.
8Matawa cangra a milokes to tao,
o tatiihay ko sowal nangra,
misatakarakaraw cangra a miples to tao.
9Milokes cangra to Kawas i kakarayan,
miples cangra to tamdamdaw i hkal.
10Saka, halofinawlan no Kawas a pasayra i cangraan,
laccay sa ko faloco' nangra a paso'lin to sowal nangra.
11Sowal sa cangra, <<Caay ka fana' ko Kawas,
caay pakahapinang Cingra o Isatakaraway,>> saan.
12Mahaenay ko tatiihay a tamdaw,
makadofahayto cangra i, mitongal haca to dafong cangra.
13Kako sa to no mako i, mina'on a ma'imer to tireng,
caay paka^ses a ciraraw,
o pihaen ako i, awaay ko ^poc haw?
14Kawasaw, padesen Iso kako a misaromi'ad,
tfocen Iso kako to dafadafak.
15Ano nisowalan ako konini a dmak i 'alomanay i,
caay ko so'linay ko faloco' a finawlan Iso kako.
16Misa'icel kako a miharateng to sakafana'aw tonini a dmak i,
'arawhani, awaay ko ^poc, o sakaroray aca ako.
17Yo tayrato kako i Fangcalay Pita'ongan i,
itiyato a mahapinang ako ko pahrekan no tatiihay a tamdaw.
18Tlien Iso cangra i kamlengay a pala,
ta matolo' cangra itira a matkop.
19Ccay a mlet cangra a matkop,
tada o katalawan ko pahrekan nangra.
20Matiya o lmed cangra, dafak sato i, malasawadto,
Tapangaw, mapalalto Kiso i, awaayto a ma'araw cangra.
21O nano cihinapecay ko faloco' ako a masmer a miharateng,
22matiya o 'a'adopen kako a maapa,
caay ka fana' kako to dmak Iso.
23Nikawrira, mararid kako a mikapot i Tisowanan,
mararid ko kamay Iso a mikayat i takowanan.
24Pakaynien Iso i pipa'icel a sowal ko pikrid i takowanan,
saikorayto i, o hahamhamen Iso kako a pacomod i 'dil Iso.
25Cimaho ko roma a kacifaloco'an ako i kakarayan saw?
Cimaho ko roma a kacifaloco'an ako i hkal saw?
26O tatadanca ko tireng ato faloco' ako,
nikawrira, o malo'icel ako ko Kawas,
o sakalmed ako a tahada'oc Cingra.
27Caay ka ^ca ka patayen Iso koya miliyasay i Tisowanan,
o caay ka so'lin ko faloco' i Tisowanan i, o tatkopen Iso cangra.
28Nikawrira, kako to no mako o mingataay to Kawas i, tadamanga'ay,
o malopiki'adingan ako ko Isatakaraway a Tapang,
o papalosiyang kako to dmak Iso a ma^min.
اکنون انتخاب شده:
'Olic 73: AMIS2019
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2019