'Olic 71
71
O Pitolon no Mato'asay
1 Tapangaw, milongoc kako to pipa'ading Iso i takowanan,
nanay caay pakatoleden Iso kako.
2O mo^celay Kiso, nanay padamaen, pa'oripenho kako!
Nanay tngilenho Iso ko pitolon ako, pa'oripen kako!
3Nanay o pilimekan a 'ongcoy ako Kiso a malamidipotay i takowanan a tanektekay a pisitaraan,
nawhani o pilimekan a 'ongcoy ako Kiso, o pisitaraan ako Kiso.
4Kawasaw ako, pa'oripen kako a paliyas nai tatiihay a tamdaw,
ta maliyas ako ko 'icel no mari'angay tatiihay a tamdaw.
5O Isatakaraway a Tapangaw, Kiso ko pafaloco'an ako,
nano ka^manganho ako a miti'er i Tisowanan.
6O Kiso ko parihadayay i takowanan nai tiyad no ina ako a hofocen,
saka, o 'orip ako a ma^min i, o miti'eray i Tisowanan.
O mamida'oc kako a pahmek i Tisowanan.
7Talacowa o kahinapecan no 'alomanay ko 'orip ako,
nikawrira, o tanektekay a piki'adingan ako Kiso.
8Saromi'ad sa kako a pahmek i Tisowanan,
mipalosiyang kako to nika tadamaan Iso.
9Ano mato'ato'as kako i, nanay caay liyasen Iso kako,
ano tadancanca kako i, nanay caay falahen Iso kako.
10Misahalaka ko 'ada ako to sapikari'angaw a mipatay i takowanan.
11Sowal sa cangra, <<O nifalahanto no Kawas cingra,
tata, lpelaw ita cingra, awaay ko papa'ading i cingraan,>> saan.
12Kawasaw, nanay caay piliyas Kiso i takowanan,
Kawasaw ako, nanay kalamkamen Iso a mipadama kako.
13Mamana malowid a matkop koya milooday i takowanan,
mamana mapakangodo koya sapiri'angananay i takowanan.
14Nikawrira, Kiso ko pafaloco'an ako to romi'ami'ad,
saka, matongal a matongal ko pipahmek ako i Tisowanan.
15O papasowal kako to nika mo^cel Iso,
ano caacaayho ka tadafana' kako to polong no dmak Iso a mipa'orip i,
o mamararid kako to romi'ad to dadaya a pasowal to pipa'orip Iso.
16O Isatakaraway a Tapangaw, o papahmek kako to tadamaanay a 'icel Iso,
deng o nika mo^cel Iso ko papalosiyangen ako.
17Kawasaw, nano ka^mangan ako a mapakafana' Iso kako,
saka, tahanini kako a mipalosiyang to kafahka'an a dmak Iso.
18Kawasaw, ano mato'ato'as kako a ma'ofad i,
nanay caay ka falahen Iso kako.
Ano palosiyang kako i tlotloc to pakayniay i sakowan a 'icel ato tadamaanay a 'icel Iso i,
nanay mikapot Kiso i takowanan.
19Kawasaw, tangasato i kakarayan ko nika mo^cel Iso,
malahciayto Iso ko tadamaanay a dmak,
awaay ko mikikakaay i Tisowanan.
20Kiso ko papilifetay i takowanan to adihayay a pades ato semsem,
nikawrira, palololen Iso a patanektek ko tireng ako,
Kiso ko saka^ca ka picomod ako i tadem.
21Kiso ko saka ikakato no i 'ayaway ko nika tanektek ako,
o tatayni Kiso a miliyaw a mihinom i takowanan.
22Kawasaw ako, o mamidatok kako a pahmek to nika so'lin Iso,
o Fangcalay a Kawas no Israil,
o mamidatok kako a pahmek i Tisowanan.
23Ano pahmek kako i Tisowanan i,
o mamilkal kako a misatata'ang to ngiha' a romadiw,
nawhani o pa'oripay Kiso i takowanan.
24O mamisaromi'ad kako a pasowal to nika mo^cel Iso,
nawhani oya sapikari'angananay i takowanan i, matfadto a mapakangodo.
اکنون انتخاب شده:
'Olic 71: AMIS2019
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2019