'Olic 68
68
O Sakapakalowid a Radiw
O ccay a radiw, o 'olic ni Tafiti. Mapatorod i kakridan no paradiway.
1Nanay lomowad ko Kawas a mipaliwasak to 'ada Ningra,
ta milaliw i Cingraan koya mi'intelay Cingraan a tamdaw a ma^min.
2Matiya o nika liwasak no 'acfel ko pipaliwasak Ningra i cangraan,
matiya o kalaso'or no losok ko pipalasawad no Kawas to tatiihay a tamdaw.
3Nikawrira, o lalipahak ko mo^celay a tamdaw a pahmek a romadiw i ka'ayaw no Kawas.
4Pipasayra i Kawas a romadiw,
pahmeken a romadiw ko ngangan Ningra,
patalaen ko lalan noya tatayni a pakato'em.#68.4 pakato'em -- ano ^ca i, pakapaliding a mita'lif to nakohikohan.
O Tapang ko ngangan Ningra,
o lalipahak kamo i ka'ayaw Ningra.
5Itira i Fangcalay Pita'ongan ko aro' no Kawas,
malamama no pakoyoc ato pa'adingay to maponengay Cingra.
6O awaay ko palawinaan a tamdaw i,
paflien Ningra to loma' cingra,
tdalen Ningra ko marofoay a tamdaw a pakonira,
nikawrira, o pacoliay a tamdaw i,
pakamaro'en Ningra i kohkohan.
7Kawasaw, yo mikrid Kiso to finawlan Iso a pakayra i kohkohan a romakat i,
8mangernger ko sra, mafodo' ko kakarayan,
nawhani masadak ko Kawas no Sinay a lotok,
tayni a ma^pod ko Kawas no Israil.
9Kawasaw, tfaden Iso ko tata'angay a 'orad,
sngeren Iso ko makdalay a sra.
10Sarihaday sa ko aro' no finawlan Iso itira,
o sini'ada Iso ko sapidipot Iso to pakosiya a tamdaw.
11Palimo'ot ko Tapang,
saka, safrengan sa ko fafahiyan a patnak a paratoh,
12<<Milaliwto ko hongtingti ato sofitay nangra,>> saan.
Saka, misakilac to ni'afasan a maamaan ko i loma'ay a fafahiyan.
13Matiya o kohcalay a ^kim a topi a nengnengen ko nica'dongan nangra.
Matiya o cisapikpikay cangra to matdiay a tadamaanay a tada^kim.
(Nawiro i tini sa kamo i pasirian a caay ka tayra i piloodan saw? han nangra.)
14Yo paliwasaken no Ci'icelay a Kawas ko hongtingti i,
tfaden Ningra ko adihayay a so^da i Calmon a tokos.
15Wata: ko nika tadamaan no Pasan a tokos,
adihay ko kasa'apocopocok iso.
16Nawiro mikcor kiso nai itira i takaraway a 'apocok a mi^pec
to nipili'an no Kawas a malokamaro'an Ningra a Cion a lotok saw?
O mamida'oc ko Tapang a maro' tonini a lotok.
17Kriden no Kawas ko pinapina a 'ofad a sapilood a paliding nai Sinay a tokos a micomod i Fangcalay Kaitiraan.
18Macakat Cingra i takaraway a kakarayan,
kriden Ningra ko 'alomanay a mirpetan i piloodan.
Layapen Ningra ko sapacakat no pacoliay a tamdaw.
O a itira a maro' ko Tapang a Kawas.
19O papahmeken ko Tapang,
nawhani o mi'orongay Cingra to kartengay a 'inorong ita to romi'ami'ad,
o pa'oripay titaanan a Kawas Cingra.
20O pa'oripay a Kawas ko Kawas ita,
o Tapang Cingra, o pa'oripay titaanan a paliyas nai patay a Tapang Cingra.
21O papelpelen no Kawas ko fongoh no 'ada,
o fafonalen Ningra ko tangal no paci^ci sanay a ciraraw a tamdaw.
22O sowal no Tapang i, <<Kriden Ako ko 'ada namo a panokay nai Pasan a tokos,
pasadaken Ako cangra nai talolongay a riyar a panokay.
23Ta manga'ay kamo a pakayra i manawnaway a rmes nangra a romakat,
o tatayra ko waco namo a minacnac to rmes nangra,>> saan.
24Kawasaw, ma'araw no 'alomanay ko kasarayaray no mihaklongay i Tisowanan,
ma'araw nangra ko picomod Iso o Kawas o hongti ako i Fangcalay Kaitiraan.
25I sa'ayaw ko romadiway,
i aikor ko midatokay,
i sifo' ko mitampolinay#68.25 tampolin -- o no Padaka a sowal. a kaying.
26<<O papahmeken namo ko Kawas i kapolongan a sa'opo no finawlan,
kamo o tloc no Israil a ma^min pahmeken ko Tapang!>> saan.
27O sasafaay a Pinyamin a ngasaw ko sa'ayaway a romakat,
do^do sa i, o kakrikridan no Yuta a ngasaw ato mihaklongay i cangraan,
do^do sa i, o kakrikridan no Cipulun ato Naftali a ngasaw.
28Kawasaw, nanay patalahkalenho koya tadamaanay a 'icel Iso,
patalahkalenho koya nano sapa'orip Iso i tamiyanan a 'icel.
29Nanay pasadaken nai Fangcalay Pita'ongan Iso i Yirusalim,
oya pipaflian no hongtingti a pacakat i Tisowanan,
nanay patalahkalenho Iso koya tadamaanay a 'icel Iso.
30Nanay kakteren Iso ko Icip, oya i laloma'ay no 'ardo a 'a'adopen,
kakteren ko kasakitakit, oya masaflaway a okang a kolong ato tofor a kolong naira,
tangasa i pipitosor nangra a mita'ong i Tisowanan a pacakat to ^kim ko nika kter i cangraan.
Nanay laplapen Iso a paliwasak koya maolahay a milood a finacadan.
31O aira a tayni ko tarokos no Icip,
o papasayra i Kawas ko Kus a tamdaw a mipacakat to sapato'aya a dafong.
32Kamo o kasakitakit i hkal, karomadiw a pahmek to Kawas,
pipahmek kamo a romadiw to Tapang.
33Pipahmek a romadiw toya naniti:yaayho a pakakakarayanay a tayni a Tapang.
Pitngil, milkal Cingra a pasadak to tadamaanay a ngiha' Ningra.
34Palosiyangen ko nika tadamaan no 'icel no Kawas,
o mikowanay to Israil ko 'icel Ningra,
mildef to kakarayan#68.34 kakarayan -- o roma i, karayan (ka'amis). ko 'icel Ningra.
35Kawasaw, tada o kakangodoan Kiso i laloma' no Fangcalay a Kaitiraan.
O pafliay to 'icel ko Kawas no Israil, o pafliay to sakowan a 'icel i finawlan Ningra.
Pipahmek kamo to Kawas.
اکنون انتخاب شده:
'Olic 68: AMIS2019
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2019