Lawa a wúlu-bɔlen 17
17
Yoreenbaa
(17—22)
Landa mɛn bɛ́ a tan mà wɔ paǹ li
1Dɛnaa Lawa boo da ka Muizu ni, á pɛ nɛ: 2Boo da ka Aarɔn laanka a nɛgiĩn ni, ka Izirayeli minin lɛn tumaa nɛ, n pɛ ǹ nɛ: Dɛnaa Lawa dí mɛn pɛ, bɛ n ka kɛ nɛ:
3Bɛ̀ Izirayeli min lɛ mɛn tá dii dii, ta sère ne hinlaa bòe ne, á boe la a dɛ ǹ giã ǹ bǎã kɛ nɛ, hinlaa, ǹ giã ǹ bǎã lɛ kio dinin. 4Sɛnɛ, bɛ̀ a da ka tɔɔ lɛ nɛ, kɔn yɛ ǹ kion kɛa kiɛnlɛ-a bɔrɔ, á kɔ Dɛnaa Lawa la a gɔ ǹ *wúlu màn lɛa, a giã ǹ bǎã kɛ yɔrɔ-a wa, a mà mɛn kaa, bɛa dɔlɔ á re n boe a ganaa. Bɛa dɛnaa kɛ lɛ, ǹ loo ǹ bɔ Izirayeli minin bii. 5Bɛ á die toɛ Izirayeli minin lɛn ba re woe ka ǹ tɔɔn nɛ don, mà maǹ biɛ wúlu màn lɛa wa. Ǹ tá re die ǹ koe Lawa a wúlu-bɔle la, Dɛnaa Lawa wɔ lɛa, kɔn yɛ ǹ kion kɛa kiɛnlɛ-a. Ǹ tá re wúlu boe ǹ ne Dɛnaa Lawa wɔ lɛa, barka da Dɛnaa Lawa nɛ ǹ wúlu mànan lɛa. 6Wúlu-bɔle lɛ die a bɛa tɔɔ lɛ a mà pɛsɛ̃ Dɛnaa Lawa a *wúlu bɔ ǹ bǎã kɛ ganaa, kɔn yɛ ǹ kion kɛa kiɛnlɛ-a. A nyɔɔ ke, a die a bɛ tã wúlu màn lɛa, a tɛmaa gìĩ n kɔɔ̃n Dɛnaa Lawa ganaa. 7Bɛ̀ á n baa miɛ̃, ǹ ba re ǹ wúlu mànan dii butumu nyínin kɛn ganaa doo wa. Maǹ nə́ Lawa bɔlɔ tii, ǹ tá bɛa dìn kɛn lɛn miãn kio. Kɛ n landa lɛa ǹ mìi ni miɛ̃ duduu, ǹ tɔrɔn tumaa wɔ lɛa, a ná a ba n bɔyɛɛ wa.
8A pɛ ǹ nɛ dɔn, min woo min, á n Izirayeli tɔrɔ lɛa, hinlaa á n gùli lɛa giã nɛ ǹ bii, bɛ̀ a tá tɔɔ biɛ wúlu màn tiɛ̃ hinlaa wúlu màn tɔrɔ kɔsɔ lɛa, 9bɛ̀ ǹ dɛnaa da nɛ kɔn yɛ ǹ kion kɛa kiɛnlɛ-a á wúlu bɔ nɛ Dɛnaa Lawa wɔ lɛa wa, ǹ bɛa min lɛ loo ǹ bɔ Izirayeli tɔrɔn bii.
10 #
SGK 9.4; LWS 7.26,27; 19.26; TDP 12.16,23; 15.23. Min woo min, á n Izirayeli tɔrɔ lɛa, hinlaa á n gùli lɛa giã nɛ ǹ bii, bɛ̀ ǹ mɛn màn mà wɔ a lɛ-n, masɛ á die n bɔyɛɛ man yɔrɔ da bɛa dɛnaa la, ma loo ma bɔ Izirayeli tɔrɔn bii. 11#EBR 9.22. A giala, màn yiikoonaa tumaa a yiikoonaabaa na a mà nɛ. Masɛ dɔ n má mà lɛ kɔ ǹ la, má ǹ nə ǹ dinin sii baraa sawaa ǹ wúlu bɔ nɛ, wúlu bɔ ǹ bǎã kɛ lalan. Mà lɛ n toɛ min a sii baraan nə n toa nɛ, a giala, yiikoonaabaa lɛ n mà nɛ. 12Bɛ lɛ na á toa má pɛ Izirayeli minin lɛn manɛ: Ka kɔn nyan toa ka màn mà wɔ ka lɛ-n wa. Gùli mɛn bɛ́ giã nɛ ka bii, bɛ dɔ nyan toa a màn mà wɔ a lɛ-n wa.
13Bɛ̀ Izirayeli min lɛ mɛn màn dɛ dɔ ganaa, hinlaa gùli mɛn bɛ́ giã nɛ ǹ bii, ta bɛ na á màn lɛ dɛ, siĩ gòã siinaa-n hinlaa bàan nɛ ǹ nə́ soɛ̃, ǹ dɛnaa doamaa nɛ, a na a mà kaa tán, a tii kɔ lɛ. 14A giala, bɛ̀ màn yii á koo ǹ mɛn waáraa, a yiikoonaabaa lɛ n ka a mà nɛ. Bɛ lɛ n ke má pɛ Izirayeli minin lɛn manɛ, máa ǹ nyan toa ǹ màn kɔn a mà wɔ ǹ lɛ-n wa. A giala, màn din tumaa a yiikoonaabaa, a mà nɛ. Bɛ̀ min mɛn wɔ a lɛ-n, ǹ doamaa nɛ ǹ bɛa dɛnaa loo.
15Min woo min, gána lɛ a min ni hinlaa gùli ni, bɛ̀ màn gã a din li, hinlaa don mànan man nə́ wɔ̃woɛ̃ kɔn, bɛ̀ ǹ mɛn bɛ sɔ̃, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃ a tɔn *yoreen koe. 16Bɛ̀ ǹ dɛnaa na a mɔnaan pii á n zoo wa, ǹ dɛnaa a sii baraa na a din mìi ni.
اکنون انتخاب شده:
Lawa a wúlu-bɔlen 17: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.