Lawa a wúlu-bɔlen 15
15
Giĩ a gɔ̀
1Dɛnaa Lawa boo da ka Muizu laanka Aarɔn nɛ á pɛ ǹ nɛ: 2Ka boo da Izirayeli minin lɛn nɛ ka pɛ ǹ nɛ:
Giĩ woo giĩ, kii mu a da a din li ǹ busu ná a giulun ganaa, kii mu a da miɛ̃ lɛ n *gɔ̀ lɛa. 3Ta a giulun nə toɛ á n kiɛ, hinlaa ta a n kuĩ á golee ne, gɔ̀ nɛ, ǹ dɛnaa a gɔ̀ nɛ.
4Giĩ mɛn bɛ́, kii mu a da a din li ǹ busu ná a ganaa, bɛ̀ á waa piì mɛn la, bɛa piì lɛ dɔ n gɔgɔrɛ koe. Bɛ̀ á giã màn woo màn la, a n gɔgɔrɛ koe.
5Bɛ̀ min mɛn nə́ n gɔn da bɛa piì lɛ ganaa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.
6Busulə lɛ giã màn mɛn la, bɛ̀ min mɛn giã bɛa màn lɛ la, ǹ dɛnaa doamaa nɛ, a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃. 7Bɛ̀ min mɛn nə́ n gɔn da busulə lɛ paǹ mɛn ganaa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.
8Min mɛn bɛ́ yoreene landa wɔ paǹ li, bɛ̀ giĩ busulə lɛ sɛ̀ kaa bɛ ganaa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃.
9Bɛ̀ giĩ busulə lɛ dii màn woo màn la á woo zii ni, bɛ n màn gɔgɔrɛ biɛ. 10Màn woo màn, bɛa giĩ busulə lɛ giã la, bɛ̀ min mɛn nə́ n gɔn da bɛ ganaa, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃. Bɛ̀ min mɛn dɔ́ bɛ miã màn lɛ saa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.
11Bɛ̀ bɛa busu lɛ tɔrɔ tá min mɛn ganaa, bɛ̀ ǹ dɛnaa nə n gɔn pii wa, yǎa a n gɔn da min mɛn ganaa, ǹ dɛnaa doamaa nɛ, a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃. 12Màn mɛn bɛ́ ǹ nə́ zɛnaa ka gì ni, bɛ̀ giĩ busulə lɛ nə́ n gɔn da bɛ ganaa, ǹ doamaa nɛ, ǹ bɛa màn lɛ yu. Bɛ̀ ǹ mɛn nə gɔn màn lɛa, ǹ doamaa nɛ ǹ bɛ pii.
13Kii mu a da a din li ǹ busu mɛn goã giĩ lɛ ganaa, bɛ̀ á nya, a doamaa nɛ a n yii da lɛawaa sɔbaa, a gɔ̀ bɔma-a ǹ lɛawaa lɛa. Bɛ kio, a na a mɔnaan pii, a n zoo mu yoreen li, á die *yoreen koe. 14Lɛawaa kiwisibaa ǹ wɔ pinaa, a wuruun màn paa hinlaa zɛrɛkantoan màn paa kũ, a da ǹ kɔ Lawa a wúlu-bɔle la, kɔn yɛ ǹ kion kɛ a kiɛnlɛ-a, Dɛnaa Lawa yɔrɔ-a. 15Lawa a wúlu-bɔle die a bàanan lɛn goon baa sii baraa sawaa ǹ *wúlu màn lɛa, a ǹ goon baa wúlu màn tiɛ̃ lɛa. Wúlu-bɔle lɛ gɔ̀ bɔma-a ǹ landa zɛnaa bɛa giĩ lɛ a lɛa, kɔn yɛ ka Dɛnaa Lawa nɛ ǹ kion kɛ yɔrɔ-a, a kii mu a da a din li lɛ taman yii.
16Bɛ̀ giĩ giulun pisəə, a doamaa nɛ, a n zoo duduu. Sɛnɛ, a n goɛ̃ gɔ̀dɛnaa lɛa, yǎa wasa woe miɛ̃. 17Mɔnaa woo mɔnaa, hinlaa kɔmalɛ woo kɔmalɛ, á n ki lɛa, bɛ̀ giĩ giulun pisəə a ganaa, ǹ doamaa nɛ ǹ bɛ pii. Sɛnɛ, a n goɛ̃ màn gɔgɔrɛ lɛa, yǎa wasa woe miɛ̃.
18Bɛ̀ lɔ giã kun ka giĩ ni, ǹ doamaa nɛ, ǹ nə n zoo. Sɛnɛ, maǹ goɛ̃ gɔ̀dɛnan lɛa, yǎa wasa woe miɛ̃.
Lɔ a gɔ̀
19Bɛ̀ lɔ a mui tá a ganaa yǎa mà soo, a n goɛ̃ gɔ̀dɛnaa lɛa, yǎa lɛawaa sɔbaa. Bɛ̀ min mɛn dɔ nə́ n gɔn da a ganaa, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃. 20Bɛ̀ lɔ a mui lɛ tá a ganaa, bɛ̀ á waa tán màn woo màn la, bɛ̀ á giã màn mɛn dɔ la, bɛ n gɔgɔrɛ koe.
21Bɛ̀ min mɛn nə́ n gɔn da a waa ǹ piì ganaa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.
22Bɛ̀ á giã màn mɛn la, bɛ̀ min mɛn kɔsɔ giã bɛ la, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.
23Bɛ̀ màn mɛn tá a waa ǹ piì lɛ la, hinlaa a giã ǹ bǎã lɛ nɛ, bɛ̀ min mɛn nə́ n gɔn da bɛ ganaa, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.
24Bɛ̀ giĩ giã kun ni bɛa biikoo kɛ lɛ gɔ́ɔ̃ nɛ, a mà lɛ n die kiɛ a ganaa. Bɛ̀ á n baa miɛ̃ lɛn, bɛa giĩ lɛ n goɛ̃ gɔ̀dɛnaa lɛa, yǎa lɛawaa sɔbaa. Bɛ̀ á waa piì mɛn dɔ la, bɛ n gɔgɔrɛ koe.
25Bɛ̀ lɔ lɛ a lɛawaa ba a ganaa wa, a n mà dɔ kiɛ lɛawaa damata gɔ́ɔ̃ nɛ, hinlaa bɛ̀ a lɛawaa kũ á kiɛ̃, á n tɔn mà lɛ kiɛ, a n goɛ̃ gɔ̀dɛnaa lɛa a mà-kaa biikoo lɛ tumaa gɔ́ɔ̃ nɛ, ka a bɛ́ gɔ̀dɛnaa lɛa lɔn, bɛ̀ a lɛawaa tá a ganaa.
26Bɛ̀ bɛa mà-kaa lɛ tá a ganaa, bɛ̀ á waa piì woo piì la, bɛ̀ á giã màn woo màn dɔ la, bɛ n goɛ̃ gɔgɔrɛ, ka a bɛ́ gɔgɔrɛ koe lɔn, bɛ̀ á daa yǎa lɔ lɛ a lɛawaa tá a ganaa.
27Bɛ̀ min mɛn nə́ n gɔn da ǹ ganaa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃.
28Bɛ̀ a mà-kaa lɛ nya, a n yii da lɛawaa sɔbaa doo, a tɔn goã yoreene. 29A lɛawaa kiwisibaa ǹ wɔ pinaa, a wuruun màn paa hinlaa zɛrɛkantoan màn paa kũ, a da ǹ kɔ Lawa a wúlu-bɔle la, kɔn yɛ ka Lawa nɛ ǹ kion kɛ a kiɛnlɛ-a. 30Wúlu-bɔle lɛ na a goon baa sii baraa sawaa ǹ wúlu màn lɛa, a na a goon baa wúlu màn tiɛ̃ lɛa. Mà-kaa mɛn goã á lɔ lɛ baa gɔ̀dɛnaa lɛa, wúlu-bɔle lɛ bɛa gɔ̀ bɔma-a ǹ landa zɛnaa a lɛa, kɔn yɛ ka Dɛnaa Lawa nɛ ǹ kion kɛ yɔrɔ-a.
31Muizu laanka Aarɔn ganaa, ka pɛ Izirayeli minin lɛn manɛ: Bɛ̀ gɔ̀ tá ka mɛn ganaa, n giã tìãlɛ-a. Masɛ a giã ǹ kion mɛn bɛ́ ka bii, bɛ̀ ka gɔ̀ lɔ bɛ ganaa wa, ka a re giɛ̃ wa.
32Landa mɛn bɛ́ a tan, a din nə ka bɛ nɛ. A n giĩ wɔ paǹ li, bɛ̀ kii mu a da a din li ǹ busu tá a ganaa, hinlaa giulun a pisəə mɛn bɛ́ min biɛ gɔ̀dɛnaa lɛa, bɛ̀ bɛ tá a ganaa. 33A n lɔ dɔ wɔ paǹ li, bɛ̀ a lɛawaa tá a ganaa. A n giĩ laanka lɔ wɔ paǹ li, bɛ̀ kii a da a din li ǹ busu tá a ganaa, ka giĩ mɛn dɔ bɛ́ á giã kun ka lɔ gɔ̀dɛnaa nɛ.
اکنون انتخاب شده:
Lawa a wúlu-bɔlen 15: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.