Bɔ bɛ̀rɛbaa nɛ 37
37
Lɛ kɔ kɔn la ǹ goo lɛ boo doo
1Besaleli *lɛ kɔ kɔn la ǹ goo lɛ zɛnaa ka kaasia gɔn nɛ, a sasabaa n gùrù yii paa ka talɛɛ, a pəməbaa n gùrù yii goon ka talɛɛ, a wo lon nə gùrù yii goon ka talɛɛ. 2Á sana yoreen yoreen kaa la, á kaa a gɔ́ɔ̃ la, á kaa a kanaa la, á sana dɔ a lɛkoro ganaa, a ná a lɛnpɛnɛ nɛ. 3Á sana kaaran màn sii zɛnaa goo lɛ wɔn lɛa, á ǹ doa a gùrù wɔkɔnlɛ ǹ bǎã sii kɛ ganaa. Á màn paa dɔ paǹ goon ganaa, màn paa paǹ goon kɛ dɔ ganaa. 4Á bàlàn zɛnaa ka kaasia gɔn nɛ, á sana kaa ǹ la. 5Á bàlàn lɛn wɔ goo lɛ a paǹan li kaaran yalan kɛn nɛ, goo lɛ a gũ ǹ bàlàn lɛa.
6Bɛ kio, á goo lɛ a lɛpii zɛnaa ka sana yoreen yoreen ne, a sasabaa n guru yii paa ka talɛɛ, a pəməbaa n guru yii goon ka talɛɛ. 7Á sana dɛ, á lon màn yiikoonaa nyín màn paa zɛnaa nɛ. A na á ǹ zɛnaa, á ǹ doa goo lɛpii lɛ a lɛkoron paanan ganaa. 8Á goon zɛnaa lɛkoro goon ganaa, goon kɛ dɔ n kɛ ganaa. Á lon mànan yiikoonaa nyínin lɛn zɛnaa, á ǹ doa kɔn ka lɛpii lɛ nɛ, gogoon ná a lɛkoron paanan ganaa. 9Lon màn yiikoonaa nyínin lɛn nə́ n nyàan lɛ bɔ, ǹ nə́ ǹ dia lon, ǹ nə́ n nyàa kan kɔ goo lɛpii lɛ lɛ. Ǹ yɔrɔ na á goã dia-n kɔn la, ǹ nə́ giɛ goo lɛpii lɛ ganaa.
Tabala boo
10Bɛ kio doo, á tabala goon zɛnaa ka kaasia gɔn nɛ, a sasabaa n gùrù yii paa, a pəməbaa n gùrù yii goon, a wo lon nə gùrù yii goon ka talɛɛ. 11Á sana yoreen yoreen kaa la, a ná a lɛkiri zɛnaa ka sana nɛ, a ná a lɛnpɛnɛ nɛ. 12A ná a lɛ dɔ doo ka gɔn kɔsɔ nɛ, pəmə ka gɔn tìsì bɛ́ lɔn, a ná a lɛnpɛnɛ nɛ, á sana kaa bɛa gɔn kɛ lɛ lɛkoro gana. 13Á sana kaaran màn sii zɛnaa tabala lɛ wɔn lɛa, á ǹ kaa a gòã màn sii kɛa gùrù sii ganaa. 14Á kaaranan lɛn doa, kunu a lɛ dɔ ǹ gɔnɔn kɛn lɛn li. Ǹ bɛ́ bàlàn mɛnɛn we tabala lɛ li, ǹ saa, bɛn man we kaaranan kɛn lɛn nɛ. 15Á bàlàn lɛn zɛnaa ka kaasia gɔn nɛ, á sana kaa ǹ la, bɛn man tabala lɛ saa ǹ bàlàn lɛa. 16Á tabala lɛ a màn bisinin tumaa zɛnaa ka sana yoreen yoreen ne: tasanan nɛ, gongonən ne, tàanan nɛ, yɔ zuməə ǹ mànan nɛ.
Bolon da ǹ bǎã boo
17Bɛ kio kəni, á bolon da ǹ bǎã lɛ zɛnaa ka sana yoreen yoreen ne. Á sana dɛ á zɛnaa nɛ: a giala nɛ, a bàlà nɛ, a tàanan nɛ, a kòròn ne ka a nyaǹan kɛn nɛ ka da buũn bɛ́ lɔn. Bɛn tumaa n zɛnaa-n kɔn ka a din sana goon lɛ nɛ. 18Gùrù sɔrɔ n boe a paran li, a gùrù sɔɔ n para goon, a sɔɔ dɔ n para goon kɛ dɔ ganaa. 19Gùrù goon ganaa, tàan sɔɔ ka da nɛ bɛ́ lɔn, kòròn laanka buũn ná a ganaa. Gùrù goon kɔsɔ dɔ ganaa, tàan sɔɔ ka da nɛ bɛ́ lɔn, kòròn laanka buũn ná a ganaa. A n miɛ̃ ka gùrù sɔrɔ lɛ din tumaa nɛ, boe bolon da ǹ bǎã lɛ ganaa. 20Bii wɔ a gùrù lɛ dinmaa ganaa, tàan sii ka da nɛ bɛ́ lɔn, kòròn laanka buũn ná a ganaa. 21Gùrù bibinaa màn paa mɛn bɛ́ boe bolon da ǹ bǎã lɛ ganaa, kòrò n bɛn giulun. Kòrò goon nə gùrù nyɔɔbaa màn paa kɛ dɔ giulun, boe bolon da ǹ bǎã lɛ ganaa. A n miɛ̃ ka gùrù sɔrɔ kɛ lɛ tumaa nɛ, boe bolon da ǹ bǎã lɛ ganaa. 22Kòròn lɛn laanka gùrùn lɛn tumaa n kɔn ka a dinmaa tumu lɛ nɛ, ǹ nə́ dɛ ǹ nə́ zɛnaa ka sana *yoreen ne. 23Á bolon sɔbaa zɛnaa a ganaa, ka ǹ lɛ bɔ ǹ banbaalanan nɛ, ka ton kaa ǹ mànan nɛ, sana yoreen lɛa. 24A na á bolon da ǹ bǎã lɛ laanka a màn bisinin tumaa zɛnaa, ka sana yoreen yoreen kilo pɔsɔɔ nɛ.
Màn gìĩ kɔɔ̃n tã ǹ bǎã
25Bɛ kio doo, á màn gìĩ kɔɔ̃n tã ǹ bǎã kɛ zɛnaa ka kaasia gɔn nɛ, a sasabaa n gùrù yii goon, a pəməbaa n gùrù yii goon. A gùrùn tumaa na á kɔnpɛ. A wo lon nə gùrù yii paa. A bìbìn man doa-n kɔn ka a din ni. 26Á sana yoreen yoreen yo á kaa la. Á kaa a lalan la, ka a gùrù sii lɛ a gɔnɔn tumaa nɛ, ka a bìbìn ni. 27Á sana kaaranan zɛnaa a lɛkiri lɛ giulun, a paǹan paanan li, a wàãn ganaa, a ná a gũ ǹ bàlàn wɔ bɛn nɛ. 28A na á bɛa bàlàn lɛn zɛnaa ka kaasia gɔn nɛ, á sana yo á kaa ǹ la.
29 #
BBN 30.22-38. Á minin bɔ a koa ǹ nyɔɔ sonbore kɛ zɛnaa, ka màn gìĩ kɔɔ̃n yoreen ne, tã ǹ wɔ lɛa. Nyɔɔ dí-nyali sonbore na á bɛa dí nya.
اکنون انتخاب شده:
Bɔ bɛ̀rɛbaa nɛ 37: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.