Bɔ bɛ̀rɛbaa nɛ 33
33
Yoo a zii tɔ wɔ
1 #
SGK 12.7; 26.3; 28.13. Dɛnaa boo da Muizu ni, á pɛ: «N bɔ bǎã kɛ nɛ, n din laanka zaman kɛ lɛ, ń soo ǹ ne n nə ǹ bɔ Ezipti gána nɛ. Man liɛ má n lɛ kɔ Abrahamu la, Izaaki ni ka Zakɔba nɛ ka gána mɛn nɛ, má pɛ ǹ nɛ, máa ma á re koe ǹ nɛnyaanan la, ka bɛa zii kũ. 2Ma á re lon a dia dí-a wole goon diɛ n nyɛɛnɛ, ma á re Kanaan minin lui, ka Amɔɔrɔ minin ni, Ɛti laanka Perɛzi minin ni, Ivii laanka Zebuzu minin ni. 3Ka wɔ bɛa gána kɛ lɛ nɛ, tɔɔ-too laanka tán-kɔsiɛ á bǐɛ̃ koe a nɛ. Ma a boe la ma wo kun ka nɛ bɛa gána kɛ lɛ-n wa, a giala, ka n tɔrɔ too kaka-a lɛa, ma tɔn kiɛ̃ ma ka dɛ ma ka nya zii la.»
4Zaman lɛ bɛ́ á bɛa makara boo kɛ ma, ǹ yɔrɔ kɔsɛ parsiini, min goon din yɛ, a ná a nyaǹ bɔ ǹ mànan wɔ wa. 5A giala, Dɛnaa na á pɛ Muizu ni, mà a pɛ Izirayeli nɛnyaanan lɛn manɛ: «Ka n tɔrɔ too kaka-a lɛa. Bɛ̀ ma biikoo boɛɛn kooro saa, ma tɔ wɔ kun ka nɛ, ma tɔn ka dɛ, ma ka nya kooro. Kanna kəni, ka kaa nyaǹ bɔ ǹ mànan waa ka ǹ kaa tán, ma doamaa bɛ́, ma màn mɛn zɛnaa ka nɛ, ma á re bɛ doɛ̃.»
6Izirayeli nɛnyaanan lɛn nə yoo lɔn, ǹ nə́ n bɔ Orɛbu kele kɛ li, ǹ nə́ ǹ nyaǹ bɔ ǹ mànan wɔ toa.
Kɔn yɛ ka Lawa nɛ ǹ kion
7Ǹ zii tɔ wɔ lɛ gɔ́ɔ̃ nɛ, bɛ̀ ǹ nə́ golee ǹ nə́ giã bǎã mɛn nɛ, Muizu na á goã mɔnaa kion sonbore lɛ siɛ, a na a lɛ bɔ, a doa para li, sɔsɔɔ ǹ giã ǹ bǎã lɛ ganaa. Á bíi: «Kɔn yɛ ka Lawa nɛ ǹ kion.» Min woo min, á n giɛ li a n mɔrɔ Dɛnaa ganaa kəni, bɛa dɛnaa n soe a n bɔ ǹ giã ǹ bǎã lɛ nɛ, a wo kɔn yɛ ǹ kion kɛ nɛ. 8Bɛ̀ Muizu din tá woe a nɛ, min tumaa n yui lon, didie golee a din a kion kiɛnlɛ-a, a ga a ganaa, yǎa a woe doe kion lɛ nɛ. 9Bɛ̀ Muizu á kion lɛ gɔ́ɔ̃ nɛ, bara kɛ n gisĩ, a da golee kion lɛ a kiɛnlɛ-a, Dɛnaa boo da nɛ. 10Bɛ̀ zaman lɛ yii tá bara lɛ ganaa golee-n kion lɛ a kiɛnlɛ-a lɔn gɔrɔ, ǹ tumaa n yui, didie nə n musin kumii tán a din a kion kiɛnlɛ-a. 11Dɛnaa na á goã boo diɛ kɔn ka Muizu ni buə̃buə̃, ka minin bɛ́ boo diɛ kɔn nɛ lɔn. Bɛ kio, Muizu n wusii, a da giã ǹ bǎã lɛ nɛ, bɛ á zɛnɛɛ bɛ̀ a kiodɛnaa tɔntɔraa ke, Nuunu a nɛgiĩ lɛa, a tɔ n Zozoe, bɛ̀ bɛ sɛ tɔn soo, á n bɔ mɔnaa kion lɛ-n wa.
Muizu n Lawa bíi mà a da giã ǹ li
12Muizu pɛ Dɛnaa lɛ nɛ: «Á ke, n din nə ń pɛ masɛ nɛ, mà ma wo ka zaman kɛ lɛ nɛ. Sɛnɛ, n bɛ́ re min mɛn diɛ kun ka masɛ nɛ dɔmalɛ wole lɛa, n bɛ nyaa ma-n wa. A da yaa, n din dɔ nə ń goã ń pɛ mà n tá ma doɛ̃ ka ma tɔ nɛ, mà ma kɔɔ̃n kɔ n ganaa. 13Sisia kəni, bɛ̀ a kɔɔ̃n kɔ n ganaa sonbore, zii nyaa masɛ nɛ, ma boo la ma n din dùũ dɔ̃, ma tɔn kɔɔ̃n kɔ n ganaa, a wo nyɛɛnɛ. N yiri koa a-n dɔn, mà tɔrɔ kɛ lɛ nə n din wɔ lɛa.»
14Dɛnaa Muizu lɛ si: «Ma n giɛ li masɛ dinmaa daa, ma wo susui kɔ ǹ la?»
15Muizu dɔ́ pɛ nɛ: «Bɛ̀ n dinmaa a die, n wo kun ka wɔsɛn nɛ wa, n baran pɛ mà wɔ n bɔ kànaa, wɔ wo bǎã kɔsɔ-n wa. 16Man die doɛ̃ wàa dɔ li dɔn, mà wɔ tá kɔɔ̃nɛ n ganaa, ma din laanka maa zaman kɛ nɛ? Bɛ̀ n din tá tɔ we wɔ nyɛɛnɛ, wɔ bie re doɛ̃ bɛ lɛ li wa? Hiĩ! N nə n die nyɛɛ wɔ-n dɔn, mà wɔ ba goon ka tɔrɔ gialakun kɛ kɔ́n nɛ kanaa kɛ gɔ́ɔ̃-n wa, ma din laanka maa zaman kɛ nɛ.»
17Dɛnaa tɔ́n pɛ Muizu ni: «N boo mɛn da sisia ke, ma á re bɛ lɛ dɔ zɛnɛɛ. A giala, ma á doɛ̃ taãn-taãnɛ, máa n kɔɔ̃n kɔ ma ganaa.»
18Muizu ná a nyankɔ á pɛ: «Dɛnaa, a toa kəni, masɛ nə n gugurubaa tɛ-pɛle kɛ yɛ ka ma yii ni.»
19 #
RƆM 9.15. Dɛnaa lɛ tɔ́n pɛ: – Man die kiɛ̃ n yɔrɔ-a, ma maa bǐɛ̃ kɛ tumaa nyaa n nɛ, ma ma din tɔ pɛ n nɛ: «Dɛnaa.» Bɛ̀ min mɛn kɔɔ̃n kɔ masɛ ganaa, man makara boe bɛ ganaa, man din nyaa nɛ. Bɛ lɛ nɛ, má makara bɔ n ganaa, má n din nyaa nɛ. 20N ba boe la n masɛ yɔrɔ yɛ wa, a giala, minbuiin nɛ a boe la a masɛ yɔrɔ yɛ, a yii wusoo a goã koo wa. 21Bǎã kɔ́n nə́ ke ma genli, giã kɔlɔ kɛ la. 22Bɛ̀ má kiɛ̃ ka maa gugurubaa tɛ-pɛle kɛ nɛ ǹ mɛn waáraa, ma á re n nyɛnɛɛ, ma n da kele lɛ kɔ́sɔ nɛ, man gɔn kɔ n lɛ. 23Bɛ kio, ma á re n gɔn zoɛ̃, n tá re ma dɔ̀ɔ̃ koe yii, sɛnɛ, ma yɔrɔ ke, n ba boe la n bɛ yɛ wa.
اکنون انتخاب شده:
Bɔ bɛ̀rɛbaa nɛ 33: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.