Bɔ bɛ̀rɛbaa nɛ 22
22
1«Bɛ̀ ǹ nə́ wurumu dɛ tèlò-n wurumubaa ǹ bǎã nɛ, á gã, a gɛ̀-dòo bɔ banban. 2Sɛnɛ, bɛ̀ sii lɛ na á yɛ wasa yii ni, bɛa gɛ̀-dòo bɔ tan. Bɛ̀ màn ba wurumu lɛ lon, a tá màn lɛ a dɛnaa sarɛɛ-n wa, a dinmaa lɛ nə n siɛ̃, a giɔ̀mɔ bɛa màn lɛ saraa.
3«A tɔɔ mɛn koã, dii, dundun hinlaa sère, bɛ̀ ǹ nə́ bɛa yiikoonaamaa yɛ a gɔn, a n tɔɔ lɛ koe, a kɔsɔ da la.
Min kɔsɔ a màn ziziɛ̃
4«Bɛ̀ min woo a tɔɔn lɛduə̃, á toa ǹ nə́ ǹ miã kɔsɔ a wuru màn sɔ̃, tɔɔdɛnaa lɛ doamaa nɛ, a ǹ miã lɛ a wuru màn lɛ saraa ka a din a wuru sonbore màn nɛ.
5«Bɛ̀ min tɛ da don ganaa, yǎa bɛa tɛ lɛ nə n da wɔlɔ la, á woo ǹ miã kɔsɔ a wuru màn-kurii kũ, hinlaa á kũ bɛ̀ á tɔn lon, tɛ lɛ a dali doamaa nɛ, a wurudɛnaa lɛ saraa.
6«Bɛ̀ min daa wɔrɔ hinlaa màn sonbore kɔ́n koa ǹ miã li, yǎa wurumu da saa ǹ miã lɛ a kion, bɛ̀ wurumu lɛ yɛ, a n bɛa wɔrɔ hinlaa màn lɛ a laman màn paa sarɛɛ. 7Bɛ̀ ǹ wurumu lɛ yɛ wa, kiondɛnaa lɛ doamaa nɛ, a Lawa baa siére lɛa, a n liɛ mà asɛ nə ǹ miã kɔsɔ a màn lɛ saa wa. 8Bɛ̀ kɔn liere-kɔ yɛ min paa bii, dii lɛa, dundun lɛa, sère, hinlaa mɔnaa lɛa, ka màn tɔrɔ kɔsɔ nɛ, a na á papaã, ǹ nə́ pii a wɔ paǹ li, «a din nə́ ke», min paa kɛ lɛ, ǹ didie n màn lɛ biɛ a din wɔ lɛa, bɛn doamaa nɛ, ǹ da Lawa yɔrɔ-a. Bɛ̀ Lawa zɛ̀rɛ koa ǹ mɛn ganaa, bɛ nə ǹ miã kɔsɔ kɛ sarɛɛ, ka màn lɛ a laman màn paa nɛ.
9«Bɛ̀ min dundun koa ǹ miã kɔsɔ li, hinlaa dii, sère, hinlaa tɔɔ tɔrɔ kɔsɔ, bɛ̀ tɔɔ lɛ gã, hinlaa bɛ̀ á busu da a din ganaa, hinlaa bɛ̀ mɛnaa minin la wolen nə́ kũ, siére ná a yɛ á sii la wa, 10bɛa min lɛ nə n liɛ ka Dɛnaa tɔ nɛ, ǹ miã kɔsɔ lɛ yɔrɔ-a, mà asɛ na a màn lɛ saa wa. Tɔɔdɛnaa lɛ n lɛ koe bɛa liɛ lɛ ganaa, min kɛ lɛ dɔ a màn lɛ doo sarɛɛ wa. 11Sɛnɛ, bɛ̀ maǹ nə́ tɔɔ lɛ koã a li, a na a dòo sarɛɛ ǹ dɛnaa la. 12Doo, bɛ̀ don siĩ baraa na á tɔɔ lɛ wɔ̃woɛ̃ kɔn, a n die bɛa wɔ̃woɛ̃-kɔn lɛ nɛ, a nyaa siére sii lɛa. A ba tɔɔ wɔ̃woɛ̃-kɔn lɛ dòo sarɛɛ wa.
13«Bɛ̀ min nə́ ǹ miã kɔsɔ a tɔɔ nyɛnɛ a lon, yǎa tɔɔ lɛ busu da a din ganaa, hinlaa á gã bɛ̀ ǹ dɛnaa lɛ ná a banban, tɔɔ lɛ a nyɛnɛli lɛ doamaa nɛ, a na a dòo saraa. 14Bɛ̀ sii lɛ na á n zɛnaa tɔɔ lɛ a dɛnaa yii ni, tɔɔ-nyɛnɛli lɛ a màn kɔ́n sarɛɛ wa. Bɛ̀ a na á tɔɔ lɛ kũ, a n woe dí nyɛɛ nɛ, á sarɛɛ, a n die ka tɔɔ lɛ a dí nya ǹ giɔ̀mɔ nɛ.
Minbuiinin bii siin kɔsɔn
15«Bɛ̀ giĩ nɛniɛ giĩ-doɛ̃baã wole kũ, á waa kun ni, a doamaa nɛ a na a gɔn si ǹ giɔ̀mɔ saraa, a baa a lɔ lɛa. 16#TDP 22.28-29. Bɛ̀ nɛniɛ lɛ di nə́ n piã mà a koe la wa, ka bɛ din yii ni, giĩ lɛ n wɔrɔ sarɛɛ, ka ǹ bɛ́ nɛniɛ giĩ-doɛ̃baã wole gɔn si ǹ giɔ̀mɔ sarɛɛ lɔn.
17«Ka baran lɔ kɔ́lɔnbaali toa a yii n koo wa.
18 #
TDP 18.10-11. «Bɛ̀ min mɛn waa kun ka tɔɔ nɛ, ǹ bɛ dɛ a gã.
19 #
LWS 18.23; 20.15-16; TDP 27.21. «Bɛ̀ min wúlu bɔ dì ganaa Dɛnaa goon toto kɛ kio, bɛa dɛnaa doamaa nɛ, a n dɛ a gã.
20 #
TDP 17.2-7. «Ka baran mɛnaa gùli la wa, ka baran fuu nyaa-n wa. A giala, ka dɔn nə́ goã gùlin lɛa Ezipti gána nɛ. 21#BBN 23.9; LWS 19.33-34; TDP 24.17-18; 27.19. Ka baran fuu nyaa lɔ giɔɔrɔ kɔ́n nɛ, ka nɛ-toen kɔ́n nɛ wa. 22Bɛ̀ ka fuu nyaa nɛ, yǎa a n lɛ dɛ masɛ Lawa ganaa, ma á re a lɛ miɛ̃. 23Ma foo á re busi ka li, ma ka kɔ ǹ la, ǹ ka dɛ ka gɔya san nɛ, kaa lɔn nə giɔɔrɔn baa, kaa nɛnyaanan nə nɛ-toenən baa.
24«Bɛ̀ ka giɔ̀mɔ da ka miã doobaa ganaa, ka baran zɛnaa nɛ ka giɔ̀mɔ-dali gialakunun wɔ bɛ́ lɔn wa. Ka baran pɛ mà a da saraa ka là-n wa. 25#LWS 25.35-38; TDP 15.7-11; 23.19-20. Bɛ̀ min ná a dɔnkɛ gole kɔ n la, á màn si, mà asɛ á re n sarɛɛ a tɔn si, ka kɔ la bɛ̀ wasa baa miɛ̃. 26#TDP 24.10-13. A giala, bɛ lɛ na a kɔmalɛ goon lɛa, a tá a din gɔ̀nɔn kuĩ ni tèlò-n. Bɛ̀ n kɔ la wa, a n die wɛɛ tán ka wàa nɛ? Bɛ̀ á n lɛ dɛ masɛ ganaa, ma á re a lɛ miɛ̃. A giala, makara-dɔ̃li n ka masɛ Lawa nɛ.
27«Ka baran sɔ kɔ Lawa ganaa wa. Ka baran boo baraa dɔ da ka tɔrɔ minin nyɛɛnaandɛnaa kɔ́n ganaa wa.
28 #
NDS 23.5. «Ka doamaa bie ka goã kio ka masɛ Lawa wɔ gii ni, *belee wɔ paǹ li wa, duvɛ̃ nɛ ka *olivie nyɔɔ nɛ.
«Ka kaa nɛgiĩ bibinaan koa masɛ din wɔn lɛa. 29Ka zɛnaa bɛa yɔrɔ kɛ lɛ la ka kaa diin ni, kaa sèren ne. Ǹ nɛ bibinaa lɛ gɔ̀lɔ̀n lɛa, ka ǹ toɛ kunun ǹ dan nɛ lɛawaa sɔbaa ǹ yɛ kio. A lɛawaa kiwisibaa ǹ wɔ pinaa, ka dɛ *wúlu màn lɛa, ka kɔ masɛ la.
30 #
LWS 17.15. «Ka doamaa nɛ ka goã ma din wɔn lɛa. Bɛ̀ don siĩ baraan nə́ tɔɔ mɛn wɔ̃woɛ̃ kɔn don á gã, ka baran bɛ siĩ sɔ̃ wa. Ka zũ ginin la.»
اکنون انتخاب شده:
Bɔ bɛ̀rɛbaa nɛ 22: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.