Bɔ bɛ̀rɛbaa nɛ 2
2
Muizu a yɛ boo
1Levii tɔrɔ min goon ne, á lɔ saa a din tɔrɔ minin bii. 2#NDS 7.20; EBR 11.23. Lɔ lɛ daa á nɔ̀ si, á nɛ yɛ, nɛginin lɛa. Lɔ lɛ yɛ mà a nɛ lɛ á siĩni, á duru mui sɔɔ gɔ́ɔ̃ nɛ. 3A bɛ́ a ba boe la á toɛ durii-n doo, a kiɛ̃ bɛa biikoo kɛ la wa, á ga tiɛ̀rɛɛn li nɛ lɛ wɔ lɛa, zɛnaa-n ka bùruu ni, á gón laanka gɔn wùsu lɔlɔkɔn, á lɔ a ganaa. Á nɛ lɛ da a nɛ, á woo da tán buu ni, tà lɛ lɛkoro ganaa. 4Nɛ lɛ gololɔ giã tiãlɛa, á ga nɛ lɛ walan, sii mɛn bɛ́ re yii, a bɛ dɔ̃.
5Á daa yaa, bɛ̀ *Faarahɔn a nɛlɔ na á daa n zoo tà lɛ lɛ-a, bɛ á zɛnɛɛ bɛ̀ a dí-nyalin man tɔ we tà mu lɛ para li. Kii a nɛlɔ lɛ bɛ́ á tiɛ̀rɛɛn lɛ yɛ buu lɛ nɛ, a ná a dí-nyali goon dia, mà a wo saa. 6A ná a lɛ bũ, á ga nɛnyaan lɛ ganaa. Nɛginin ni, a n wuu pii. Nɛ lɛ makara kũ. A din pɛ mà Ebrəən nɛnyaan goon ne.
7Nɛnyaan lɛ gololɔ daa, á pɛ Faarahɔn a nɛlɔ lɛ nɛ kɛnɛn: «Ń tá li ma wo ga nɛ-tooli li *Ebrəə lɔn bii ma da nɛ, bɛ nyɔ kɔ nɛ lɛ la?»
8Kii a nɛlɔ lɛ pɛ nɛ mà a woo.
9Nɛnɛn lɛ woo lɛ dia nɛ lɛ dan la. Kii a nɛlɔ lɛ pɛ-n kɛnɛn: «Wo ka nɛ kɛ nɛ, n nyɔ kɔ la n too, ma dinmaa n die n sarɛɛ.»
Lɔ lɛ nɛ lɛ si á too.
10 #
NDS 7.21. Nɛ lɛ bɛ́ á gole kɔ, á wusoo á woo kɔ kii a nɛlɔ lɛ la. A na á n baa a gɔn ka a din a nɛgiĩ bɛ́ lɔn, a ná a tɔ kɔ Muizu, (bɛ giala mà "bɔ mu li"), a giala a din mà asɛ na á bɔ mu li.
Muizu a baa si a wo Madiã gána nɛ
11 #
EBR 11.24. #
NDS 7.23-28. Muizu bɛ́ á gole kɔ, biikoo kɔ́n dɔ, á soo á woo ǹ dɔɔ̃n Izirayeli minin li, á ǹ nɔmaa ǹ dí babaraan kɛn yɛ. Á Ezipti gána min goon yɛ a din dɔɔ̃n Ebrəə min goon dii. 12A bɛ́ á n yɔrɔ bɔyaa á ga a paran tumaa li, á dɔ̃ mà min banban, á Ezipti gána min lɛ dɛ, a ná a gere duru nyɔɔsɔ̃ giulun. 13A lɛawaa, á soo doo, á woo a din dɔɔ̃nɔn lɛn min paa yaa, Ebrəə minin lɛa, zia diɛ. Á pɛ zɛ̀rɛdɛnaa lɛ nɛ mà wàa na á baa a tá ǹ miã kɔsɔ dii?
14Giĩ lɛ mà a ganaa: «Die na á n koa kii laanka kiri-wɔle lɛa wɔsɛn mìi la? Ma n giɛ li n masɛ dɔ dɛ, ka n bɛ́ ń Ezipti min kɛ dɛ lɔn?»
Nyɛ́ɛ Muizu kũ, á pɛ kɛnɛn: «Haya, maa sii lɛ bɔ kanaa kəni!»
15 #
NDS 7.29; EBR 11.27. Faarahɔn bɛa sii kɛ lɛ ma, á goã li a Muizu dɛ. Sɛnɛ, Muizu soo á n bɔ Faarahɔn a bǎã nɛ, á woo giã Madiã gána nɛ, á golee tù goon genli. 16Madiã gána a wúlu-bɔlen kiã a nɛlɔn man nə́ goã sɔbaa. Ǹ nə́ daa mu si tù lɛ-a, ǹ nə́ kiɛ goon ne ǹ díi a tɔɔn wɔ lɛa. 17Sɛnɛ, tɔɔn-lɛduə̃lin nə́ daa ǹ loo. Muizu tɔ́n yoo á daa ǹ gu ganaa, á mu kɔ ǹ tɔɔn la. 18Nɛlɔn lɛn nə́ wusoo, ǹ nə́ daa ǹ díi Zetro kɛ li, a tɔ n Reweli dɔn. Á nɔ̀n da ǹ la: «Wàa na á baa ka wusoo, ka daa lɛliɛ nɛ kɛnɛn pelo?»
19Ǹ nə́ pɛ ǹ díi lɛ nɛ mà Ezipti gána min goon na á ǹsɛn si tɔɔn-lɛduə̃lin lɛn la pelo, mà a din na á mu si, á kɔ ǹsɛn la dinin, á kɛ kaa ǹsɛn tɔɔn lon.
20Zetro pɛ a nɛlɔn lɛn manɛ kɛnɛn: «Sɛnɛ, bɛa dɛnaa lɛ á maa? Ka ǹ ka toa maa? Ka lɛ dia la, a da màn bii.»
21Muizu lɛ kɔ á giã bɛa giĩ kɛ lɛ li. A ná a nɛlɔ lɛ goon kɔ la lɔ lɛa, a tɔ n Sipora. 22Á nɛginin goon yɛ, Muizu ná a tɔ kɔ Gɛrsɔn, bɛ giala mà "gùli", a giala mà asɛ na á gùli baa bǎã kɔsɔ nɛ.
Lawa bɛ́ á Muizu bɔ lɔn mà a Izirayeli bɔ bɛ̀rɛbaa nɛ
23A bɛ́ á belebɔ bɛ kio, Ezipti gána a kii lɛ gã. Izirayeli nɛnyaanan lɛn bɛ́ nɔmaa gɔ́ɔ̃ nɛ, ǹ nə́ gini, ǹ nə́ n lɛ dɛ. Bɛa bɛ̀rɛbaa lɛ gɔ́ɔ̃ nɛ, ǹ nyankɔ dii á dɔ Lawa ganaa. 24#SGK 15.13-14. Lawa nə́ ǹ ginii lɛ ma. Lawa yiri gisĩ ka lɛ kɔ kɔn la kɛ nɛ, a din doa kɔn ka Abrahamu ni, ka Izaaki laanka Zakɔba nɛ. 25Lawa yii Izirayeli nɛnyaanan lɛn yɛ, á ǹ sii lɛ dɔ̃.
اکنون انتخاب شده:
Bɔ bɛ̀rɛbaa nɛ 2: SCE2013
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Catholic Edition Bible © Bible Society of Burkina Faso, 2013.