Pusuana 21
21
Silate a Kivawtna
(Thuhil kikna 15:12-18)
1“Israel te tungah a nuai a thukhamte pia in: 2Hebrew mi sila in na lei uh le, kum luk sung na hong sepsak tu hi. Kum sali kumin bangma pia ngawlin kisuaktasak tu hi. 3Na silapa sia na sila a sua lai in zi nei ngawl ahile hong nusiat ciang a zi tonpui ngawl tu a, ahizong zi neisa ahile a zi tonpui thei tu hi. #Thiam 25:39-46 4A topa in zi neisakin, tanu tapa a nei le a zi le a tano teng a topa ii neisa hi tu a, ama nguak pai tu hi. 5Ahizong silapa in ka topa, ka zi, ka tate ka it hi ci in suataksak tu a nop ngawlna thu hong pualaak le, 6a topa in ama biakpiakna munah paipui tu hi. Tualai kongkha ahibuale kongkha khuam neal in ama dingsak tu a, a bil vutvangsak tu hi. Tuaciang a nuntak tawntung ama sila hi tu hi.
7“Mihing khat in a tanu sia sila tu in a zuak le, pa silate bangin suakta thei ngawl tu hi. 8Tua nu a zi tu in a nei nuam khat ii tungah kizuak a, ahizong tua pa in a dei bua le, tua nu sia a pa kungah kizuak kik tu hi; a topa in ngamdangmite tungah zuak thei ngawl tu hi, banghang ziam cile ama in tua nu a phatvawt ngawl sa ahihang hi. 9Pasal khat in a tapa a piak tu in sila numei khat a lei le tanu khat bangin vawt tu hi. 10Mihing khat in zi ni a nei le a zi masa sia nidang a piak ngeiza an, puan le a nga tuakte a kibangin pia suak tu hi. 11Ama in a zi masa tungah hi bangin a vawt tu te a khuangkhim buale liausum bangma la ngawlin a suataksak kul tu hi.
Ngongtatna taw kisai Thukhamte
12“Mihing khat vua in a that sia peuma kithatlum tu hi. #Thiam 24:17 13Ahizong thalup sawm ngawlpi khutkhial tha ahile ama atu ka tealsa munah ngammuangin om tu a, suakta thei tu hi. #Mi 35:10-34; Thkna 19:1-13; Jos 20:1-9 14Ahizong mihing khat thin uuk in midang khat a thatlum lui le ka biaknatau beal tu in a tai zong kithat veve tu hi.
15A nu ahibuale a pa a vua sia kithatlum tu hi.
16Mihing khat zuak tu ahizong, sila in khoai tu ahizong a ngu sia kithatlum tu hi. #Thkna 24:7
17A nu ahibuale a pa a haamsiat sia kithatlum tu hi. #Thiam 20:9; Mt 15:4; Mk 7:10
18-19Mihing nii kihau in, khat pa in a dang khat pa suangtum taw suu ahibuale a khuttum taw thong a, ahizong a thatlum buanale tua pa daan kipia ngawl tu hi. Tua a thuakpa sia lupmuntung ngak ahihang, tua zawkciang tho thei in doipua a paina ah ciangkhut zak a kul le, dam ngawlin a om hun sung a supna teng a thaman liau tu a, a dam dong ou tu hi.
20Mihing khat in a silapa ahibuale a silanu mol khat taw saatin thakhat thu a thi paih le, a saatpa daan kipia tu hi. 21Ahizong a sila sia ni khat, ni nii in a thi bua le, a topa daan kipia ngawl tu hi. A neisa a sup sia a kicing daan ahi hi.
22Mihingte kihau a naupaai numei khat nasakin, a tuamdang khat pawpo taw a liam hi ngawl napi a nau a lal le, a nasakpa in tua numei nu pasal ii a ngetza, thukhente thu khen bangin liau tu hi. 23Ahihang tua numei a kiliamsua le tua daan sia nuntakna atu nuntakna ma, 24mittang atu mit, hatang atu ha, khut atu khut, peang atu peang, #Thiam 24:19-20; Thkna 19:21; Mt 5:38 25meikaang atu meikaang, liamna atu liamna, chidup atu chidup ma hi tu hi.
26Mihing khat in a silanu ahibuale a silapa saatin a mit a taw le, a mittang atu in tua sila sia suaktasak tu hi. 27A ha tang khat a tongsak le a ha taangin tua sila sia suatakna pia tu hi.
Ngan Tote ii Vaipuak
28Khuital khat in mihing khat a siilum le tua khuital suang taw kideanglum tu a, a sa kine ngawl tu hi; ahizong a neipa daan kipia ngawl tu hi. 29Ahizong tua khuital in ngual a sik zongsang sa hi in, a neipa tungah a kidop natu kison zo napi khum ngawlin — mihing khat a siilum le tua khuital sia suang taw kideanglum tu a, a neipa zongh kithatlum tu hi. 30Ahizong tua a neipa sia a nuntakna a kihuukna in liausum a kipiasak le, a nget zaza a piak kul tu hi. 31Khuital khat in patangno khat ahibuale numeino khat a silum le tua zui tu ngeina sia taw ma a kibang hi tu hi. 32Khuital in sila numei khat ahibuale sila pa khat a silum le ngan neipa in sila topa tungah sum ngunntang sawmthum pia tu a, tua khuital suang taw kideanglum tu hi.
33Mihing khat in dum sitna a hon hang ahibuale dum to in a sit ngawl hu in, khuital ahibuale laa khat tua dum sungah a taak le, 34ama in tua nganno ii man liau nanak tu hi. Ngan neipa tungah a sum pia tu a, tua nganhing thi sia ama in tang thei tu hi. 35Mihing khat ii khuital khat in midang khat ii khuital a silum le amate nii in a nungta khuital sia zuakin, a sum hawm tu hi; khuital thi sia ii sa zongh hawm tu uh hi. 36Ahizong tua khuital sia ngual sik tu a zongsang khat hi ci in, kihe a, a neipa in khum ngawl ahile a dang khat pa tungah ama khuital nungta khat taw lo kik hamtang in sumsisak ngawl tu hi, ahizong khuital thi sia ama in tang tu hi.
اکنون انتخاب شده:
Pusuana 21: SCB2
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Siyin Chin Bible © Bible Society of Myanmar, 2016