Thuhil kikna 11
11
Topa ii Letna
1“Topa na Pathian it vun, a thukham theampo zui tawntung vun. 2Topa tung pan na sin sate tungtawnin ama taw kisai na heak thute tuni in phawk vun. Tuabangin a hete sia na tate hi ngawlin, noma na hi uh hi. Topa letna, a vaangletna, a thahatna, 3le nalamdang lakna a vawtte mu nu hi. Ama ii Egypt kumpipa tung le a ngamsung theampo ah a nasepna sa te mu nu hi.#Pu 7:8—12:13 4Egypt ngalkapte ii hong del lai in Topa in Egypt ngalkaphonpi sia a siphute le a siphu ngalleangte taw San Tuipi sungah tuitaa in a bo siat sakna thu mu nu hi. #Pu 14:28 5Hi mun na thet uh ma in sennealngam sungah Topa in note atu hong sepsaknate na he uh hi. 6Reuben nam Eliab ii tapate Dathan le Abiram tungah Topa ii nasepna phawk kik vun. Mihing theampo ii mu in leitang kihong a ama sia a innkuan puite, a puanbukte le a naseamte le a ngannote theampo taw valhtum hi. #Mi 16:31-32 7Hi hi, Topa ii nasep lian theampo a mute noma nu hi.
Kamciamsa Ngam ii Thuphate
8“Tuni in kong piak thukham theampo zui vun. Tua hile na tum natu ngam sia ngun kaantan in lua thei tu nu hi. 9Tuaciang Topa ii na taanghpupite tung le a suan a paalte tungah piak tu in a ciam ngampha le ngamnuam ah khansau in na nungta tu uh hi. 10Noma laak tu ngam sia nidang in na teenna uh Egypt ngam bang hi ngawl hi. Tualai ah thaicii na poai uh ciang lo sungah tui piak natu luam to in haksa takin na na seam uh hi; 11ahizong na tum natu ngam sia mualte le leikuamte omna ngam hi a, nguatui nga na ngam ahi hi. 12Topa na Pathian in hi ngam keamcing a, kum tawntungin cing hi.
13“Tua hi a, tuni in kong thupiakte zui vun; Topa na Pathian sia na thin theampo taw it in, a na seam vun. 14Tuabang na hi uh le, Topa in na ngam sungah a kisap ciangin tuuk ngua, khaal ngua hong zusak tu a, note atu in antang, sapittui le olive thaute, 15le na ngannote atu in lopa om tu hi. Na du an pawpo na nei tu uh hi. 16A dang pathiante biakna le a na sepna taw in Topa kung pan noma le noma lam kipialsak heak vun. 17Tuabang na hi uh le no tungah Topa thin uuk tu hi. Ama in nguatui hangsak tu a, leiko leih in an piang ngawl tu hi. Tuaciang Topa in note hong piak ngam le lei sia pha napi tua munah na thi pal tu uh hi. #Thiam 26:3-5; Thkna 7:12-16; 28:1-14
18“Hi kong thupiakte na thin le na lung sungah ciamtee vun. Na baan ah sawm tavun a, hong phawksak tu in na tal ah suang vun. 19Na tate tungah hil vun. Inn ah na om ciang ahizong na va ciang ahizong, na tawlngak ciang le na nasep ciang ahizong na tate sonpui vun. 20Na innkha khuamte tung le na kongbiangte tungah at vun. #Thkna 6:6-9 21Tuasia ciang Topa na Pathian ii na taanghpupite tungah piak tu in a ciamsa ngam sungah noma le na tate, kum tam mama na nungta tu uh hi. Lei ii tungah van a om lai teng tua munah na teang tu uh hi.
22“No kong piaksa thukham theampo thumaan takin zui vun: Topa na Pathian it vun a, a thupiak theampo seamin, ama tungah thumaan vun. 23Tuasia ciang, mainawt in na pai uh kawmin tua minamte theampo ama in notkeak tu a, note sangin a lianzaw le a hatzaw mite ii leitang na la tu uh hi. 24Na sina lei theampo note neisa hi tu hi. Na ngam zaina uh sia thangsang sennealngam pan saksang Lebanon mual dong, nisuana sang Eupharates ngun dong, nitumna sang Mediterranean tuipi dong hi tu hi. #Jos 1:3-5 25Tua ngamsung na paina po ah Topa na Pathian ii hong kamciam bangin ama in, mihingte ii kiitak hong hisak tu uh a, kuama in note hong khaam zo buatu uh hi.
26“Tuni in note na teal tu in thupha khat le haamsiatna khat kong pia hi — 27Tuni in kong piak Topa na Pathian thupiakte na zui uh le thupha khat hi a, 28ahizong Topa na Pathian thupiakte zui ngawlin na biak ngeingawl pathian dangte na bia uh le haamsiatna khat ahi hi. 29Na laak tu uh ngam sungah Topa in hong paipui ciang, Gerizim Mual pan thupha na thangsak tu uh a, Ebal Mual pan haamsiatna na thangsak tu uh hi. #Thkna 27:11-14; Jos 8:33-35 30(Hi mualte nii sia Jordan Kuam ah a teang Canaan mite ngamsung Jordan ngun ii nitumna sangah om hi. Tua mualte sia nitumna sangah om a, Gilgal khua nai Moreh thingkung thiangthote taw kikhuala ngawl hi.) 31Topa na Pathian ii hong piakna ngam a lua tu in Jordan ngun na kaantan tu uh hi. Tua ngam la in na teen uh ciang, 32tuni in kong piak thukhamte theampo pha takin zui vun.
اکنون انتخاب شده:
Thuhil kikna 11: SCB2
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Siyin Chin Bible © Bible Society of Myanmar, 2016