Juan 18
18
Uchapik i Jesús
1I Jesús are xutzin chub'ixkil ile, are uri xe'e junam ku' utijoxelab' ch'aqa ya re i raqana Cedrón. Chila o jun chom laj k'ijib'al, pa tiktal wi tikon che'. 2Xaq i ma Judas chi xa keb' upalaj, man kujach i Jesús chke i ajch'oj chrij, ire reta'am i k'ijib'al le, man i Jesús lik k'iyalmul xkimol kib' ku' utijoxelab' chila. 3Are uri ma Judas xeupon junam ku' jutzob'aj achiyab' chi je yij che i ch'oj, xaq jujun ajchajinelab' re i rachoch i Dios, chi je taqtal b'i kumal i kaj-atzil i rajpatan i Dios, xaq kumal aj fariseo. Ike le lik kiyijb'am b'i kib' che i ch'oj, kok'am b'i kich'ich', kantil xaq i antorcha. 4Xwiri i Jesús reta'am chik ronojel wach taq kuk'ulmaj, are uri x-e pan chkik'ulaxik xaq xutz'onoj chke:
—¿Pachin kitzukuj?
5Ike xkila' uwach che:
—Kqatzukuj i Jesús chi aj Nazaret.
Are uri i Jesús xub'ij chke:
—I kib'ij le “are Yin”.
Ku' i winaq le o i ma Judas chi xa keb' upalaj, man kujach i Jesús pki'ab' ajch'oj chrij. 6I Jesús are xub'ij chke: “Yin iri” chi kinitzukuj, are uri ike xetzalij chkij xaq xetzaq pulew. 7Are uri i Jesús xutz'onoj chik chke:
—¿Pachin taq mer kitzukuj?
Ike xkib'ij chik:
—Kqatzukuj i Jesús, chi aj Nazaret —xecha.
8I Jesús xub'ij chik chke:
—Ya xinb'ij chiwe chi in are Yin. We yin kinitzukuj, chiya b'i chke i jub'an le ke'ek.
9Ile xuk'ulmaj man k-antaj na pacha ub'im kan i Jesús: “Inqajaw, konojel ni'pa i xeaya chwe, lik mijun chke xsachik.” 10Are uri i ma Simón Pedro xresaj li uch'ich' chi rok'am; lik xusok b'i uxikin wiqab'im jun achi chi ma Malco ub'i, chi rajchak i atz laj rajpatan i Dios. 11Are uri i Jesús xub'ij che ma Pedro:
—Chak'olo ach'ich' prachoch. Inqajaw we kuya i k'a laj ya le chwe re kintu'u ¿Xatab'a kintu' taj? —Xcha.
Uk'amik b'i i Jesús chwach i ma Anás
12I jutzob'aj achiyab' chi je yij che i ch'oj aj Roma, junam ru' i atz laj kaj-atzil chi rok'am utzam chke xaq i aj Judío chi je ajchajal re i rachoch i Dios, xkichap i Jesús xaq xkiximo. 13Nab'e xkik'am b'i chi rachoch ma Anás, man are uqajaw uji' ma Caifás chi are atz laj rajpatan i Dios che i junab' le. 14I ma Caifás le lik are ire xb'iw chke aj Judío, chi lik utz chke ike we xa jun achi kkamsax ni pkik'exel konojel i winaq.
I ma Pedro kub'ij chi reta'am ti uwach i Jesús
15I ma Simón Pedro xaq i jun chik tijoxel xeterej b'i chrij i Jesús. O jun chke i tijoxelab' le etamam uwach rumal i atz laj rajpatan i Dios; rumali chi xok b'i ru' i Jesús pa ja. 16Xwiri i ma Pedro xkanaj kan chisaq chwach uchija. Rumali i tijoxel chi etamam uwach rumal i atz laj rajpatan i Dios, xel chub'i chisaq, xutz'onoj jun utzil che ali chi chajal re uchija, chi kuya che ma Pedro kok b'ik; are uri xok b'i ma Pedro pa ja. 17Xwiri i ali le xutz'onoj che ma Pedro:
—Chata pe', ¿Yet ti b'awa at jun chke utijoxelab' i achi le?
Are uri ma Pedro xula' uwach che:
—Yin taj.
18Che i or le lik joron i tew, rumali i ajchakib' prachoch i Dios xaq i ajchajinelab' kinuk'um ki'a', rumali chi konojel je tak'al chi a' man kkimi'saj kib'. Xaq i ma Pedro xetak'al chila chkixol chumi'saxik rib'.
I atz laj ajsujul sipon ma Anás kutz'onb'ej i Jesús
19Are uri i atz laj rajpatan i Dios, xu'an i tz'onb'enik che i Jesús chkij utijoxelab' xaq chrij i uk'utunik Ire. 20I Jesús xub'ij che:
—Yin xinlapan chkiwach konojel i winaq; arewi xin-an i k'utuniki chke pa taq ja re molb'al ib' ke aj judío xaq prachoch i Dios chila ipa kkimol wi kib' konojel aj Judío; lik nti jun k'utunik in-anom ani'al. 21¿B'uchak katz'onoj chwe yin? Chatz'onoj chke i winaq chi je tawnaq intzij; are ike chkib'ij wach inlapom chke; man ike keta'am wach inb'im Yin chke —xcha.
22Are xb'itaj ile rumal i Jesús, are uri jun chke i ajchajinelab' re i rachoch i Dios xuxa' jun ab' che upalaj i Jesús xaq xub'ij che:
—¿Keje ula'ik uwach ile ka'an che i atz laj rajpatan i Dios?
23I Jesús xula' uwach che i chajinel re i rachoch i Dios:
—We o jun b'iroxik chi utz taj xinb'ij, chab'iji chwe wach i utz taj le; xwiri we utz i xinb'ij, ¿B'uchak uri chi xinach'ayo? —Xcha.
24Are uri i mam Anás xuyut' b'i i Jesús, te'uri xutaq b'i che ma Caifás, chi atz laj rajpatan i Dios.
I ma Pedro xruwaj chik uwach i Jesús
25Tz'aqat i ma Pedro k'a tak'al b'i chila chi a' chumi'saxik rib', are uri xtz'onox chik che:
—¿Yet at jun chke utijoxelab' i achi le?
Are uri ma Pedro xruwaj chik uwach, xub'ij:
—Yin taj.
26Chrijil chik ile jun chke i rajchak i atz laj rajpatan i Dios, chi rachalal i achi chi xelsax b'i uxikin che rumal i ma Pedro, xub'ij che:
—¿Xatwil ti b'ari ru' chila pa tikonb'al?
27Xwiri i ma Pedro xruwaj chik uwach; are uri lik che i or le, xch'aw i teren.
I Jesús xk'am b'i chwach ma Pilato
28Xkesaj b'i i Jesús chi rachoch ma Caifás, xkik'am b'i chila pa nim laj ja ipa ku'at wi tzij i ma Pilato chi aj Roma. Xwiri lik ktijin chik usaqirik rumali i aj Judío xe'ok ti chik pa ja ipa ku'at wi i tzij ma Pilato, man we ke'okik, ketz'itaj uri rumal i ch'am taj xaq kkiqel uri i atb'al tzij, lik kmajaw ti chik uri chke chi kkitij i wa'im re kinima'ij Pascua. 29Rumali xel li ma Pilato chisaq, chub'ixkil chke:
—¿Wach taq umak i achi le kikojo?
30I aj Judío xkib'ij:
—Wetene nti umak u'anom, wach taq uchak uri chqe chi kqak'am li chawach —xecha.
31I ma Pilato xub'ij chke:
—Chik'ama b'i yix; chi'ata tzij puwi pacha usuk' i'atb'al tzij yix.
Xwiri i aj Judío xkila' uwach che:
—Yoj chi oj aj Judío nti pqa'ab' ukamsaxik jun winaq.
32Keje uri ile chi lik x-antaj na pacha xub'ij i Jesús chrij ukamik. 33Are uri ma Pilato xok chub'i pa nim laj ja ipa ku'at wi i tzij, xusik'ij i Jesús ru', xutz'onoj che:
—¿Yet at Ajawinel ke aj Judío? 34I Jesús xub'ij che:
—¿Yet xach'ob' i tzij le chi xatz'onoj chwe o xa jub'an chik xkib'ij chawe?
35I ma Pilato xula' uwach che i Jesús:
—¿In aj Judío taq wa yin? I winaq re atinimit xaq i kaj-atzil i rajpatan i Dios, are ike le xatkiya pin-ab'. ¿Wach taq wa amak xa'ano?
36I Jesús xub'ij che:
—Wajawinik re ti uwach i jyub' ta'aj. Wetene aj waral lik je o te'eq winaqi kech'ojonik man keje ile kin-e ti pki'ab' aj Judío. Xwiri wajawinik re ti uwach i jyub' ta'aj.
37Are uri ma Pilato xutz'onoj che i Jesús:
—¿Qatzij Yet xab'ij chi at ajawinel?
I Jesús xula' uwach che:
—Qatzij i xab'ij le, Yin in ajawinel. Yin xinalax chi xaq xink'un chi chwach ulewi chusaqixik i saq laj tzij. Konojel i winaq chi je o che i saq laj tzij, kkita intzij.
38Are uri ma Pilato xub'ij chik che i Jesús:
—¿Wach i saq laj tzij le? —Xcha.
U'atik tzij puwi i Jesús man kkamsaxik
Are xutzin chik u'anik i tz'onb'enik le che i Jesús, i ma Pilato xel chali ukamul chkiwach aj Judío, xub'ij chke:
—Yin nti jun umak achi ri kinriqo. 39Xwiri yix uk'amom chik rib' chiwe chi are kk'un i nima'ij re i Pascua yin kwo'taj b'i jun chke ajprexil. ¿Kiwaj chi kwo'taj b'i Ajawinel ke aj Judío?
40Are uri konojel i winaq xesik'in chik chub'ixkil:
—¡Ire le mawo'taj b'ik! Are ¡Chawo'taj b'i ma Barrabás! Xecha.
I ma Barrabás le lik jun ili'om.
اکنون انتخاب شده:
Juan 18: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala
