Hechos 3
3
Rutzirsaxik jun achi klis rumal i ma Pedro
1Xuk'ulmaj jun ij, chi ma Pedro xaq i ma Wan xe'e prachoch i Dios che oxib' or re uqajb'al ij, chi are i or re i lapanik ru' i Dios. 2Chila o jun achi chi klis raqan chralaxik chi lik ij ij kkiya pa jun okb'al che i rachoch i Dios chi ub'i: “Uchija Chom”, man kutz'onoj pwaq chke i winaq are ke'ok b'ik. 3I achi chi klis le, are xeril i ma Pedro xaq i ma Wan chi ya ke'ok b'i prachoch i Dios, are uri k'iyal mul xutz'onoj utzil chke chi kkiya pwaq che. 4Ike xkik'am utaqexik i achi le, te'uri ma Pedro xub'ij che:
—Chojataqej.
5I achi le xu'ano pacha xb'ix che man xuch'ob' ire chi o kya' kan che. 6Xwiri ma Pedro xub'ij che:
—Yin nti anpwaq xaq nti saqpwaq wu', xwiri ni'pa i o wu' kinya ni chawe: Pub'i i Jesucristo chi aj Nazaret kinb'ij chawe chi chatwalijoq xaq chatb'inoq.
7Are xb'itaj ile, i ma Pedro xuchap pan che u'ab' wiqab'im xaq xuwalijsaj anoq, are uri lik juntir xpe ucho'ab' umapil raqan i uwi taq ra'. 8I klis le lik juntir xtak'i anoq xaq xujeq b'inik; lik utukel kb'inik xok b'i ku' ike prachoch i Dios, lik kel chikaj chukojik u'ij i Dios. 9Ni'pa i winaq chi xkil i achi le chi kb'inik xaq kukoj u'ij i Dios, 10lik xkib'isoj rumal ni'pa xkilo, man keta'am chi achi le kkub'i te'eq chutz'onoxik usipon pa jun okb'al che i rachoch i Dios chi ub'i “Uchija Chom”.
Ulapanik ma Pedro chila che “Uwach Ja re ma Salomón”
11I achi klis le chi xutzirsaxik, lik kero'taj ti chik i ma Pedro xaq i ma Wan. Are uri konojel i winaq lik kkib'isoj rumali xe'e pa'anem prachoch i Dios che i k'ijib'al chi ub'i “Uwach ja re ma Salomón”, man chila je o wi ike 12I ma Pedro, are xrilo chi xemoltaj i winaq, xub'ij chke: Ix aj Israel, ¿B'uchak chi kkib'isoj taq iri? ¿B'uchak kik'am qataqexik chi pacha taq yoj xojutzirsaw i achi le, pacha taq yoj xoj-anaw che chi xb'inik xaq pacha taq o pqa'ab' u'anik ile? 13Are u-Dios ma Abraham, ma Isaac xaq i ma Jacob, xaq ki-Dios i qatit qamam, uya'om nim laj u'ij rajchak chi are i Jesús, chi xijach yix pki'ab' i atol tzij are xraj te'eq ro'taxik b'i ma Pilato, xwiri yix xiwaj taj. 14Xitz'onoj ti ro'taxik b'i i achi chi lik ch'am, xaq lik suk'ulik, yix xa xitz'onoj ro'taxik b'i jun chi ajkamsanel laj winaq. 15Keje xi'an yix ile chi xikamsaj b'i jun chi are kyaw qak'aslemal. Xwiri i Dios xuwalijsaj che i kamik, yoj qeta'am chi ile lik qatzij man xqil ronojel ni'pa xk'ulmaxik. 16I xyaw ucho'ab' umapil raqan i klis le chi kiwilo chi xaq lik iweta'am uwach yix, are ukub'ib'al k'uxij che i Jesús, ile x-antajik man yoj qakub'am qak'ux che i ucho'ab' ire, rumali chi lik xutzirik chrij pacha xiwilo le.
17Ix, wachalal chwach i Cristo, yin weta'am chi yix xaq i iwaj-atzil iweta'am taj wach kixtijin chu'anik are xikamsaj i Jesús. 18Xwiri i Dios xu'an na chrij pacha xeutaq i profeta chub'ixkil ujer chi i Cristo lik kkam na. 19Rumal uri chijalwachij ik'aslemal xaq chijacha iwib' pu'ab' i Dios man keje ile kukuy imak chiwe. 20Man xutaq li i Jesús iwu' tob'al iwe pa k'ax chi are chatal chik rumal Ire k'a chuxeb'al ij saq loq, chi i Cristo lik iwe yix. 21Tupu wo'or lik rajwaxik chi i Jesucristo kk'iji ni chikaj k'a kuriq ni i ij chi i Dios ku'an tan chik k'ak' che ronojel ni'pa olik, chrij pacha xkib'ij i profeta chke i winaq ujer. 22I mam Moisés xutzijoj chke i qatit qamam ujer: I Ajwal chi i-Dios yix ku'an na chi chixol yix kel jun profeta chi keje pacha yin. Chixkojon che ronojel wach i kub'ij chiwe, 23man konojel ni'pa kekojon ti che i profeta le, lik ke'elsax nu b'i pa tinimit.
24Konojel ni'pa i profeta chi kjeqan li ru' ma Samuel xaq ni'pa jub'an chik is keje kib'im kan ile chrij taq i iji. 25Iwonojel yix lik o iwe che i sujunik re i Dios xaq i trat chi xeutaq i profeta chub'ixkil chke iwatit imam ujer. Man i Dios xub'ij che mam Abraham: Konojel i nimaq taq tinimit chi je o chwach i jyub' ta'aj lik kkiriq ni utzil chomal kumal amuq axikin.#3.25 Génesis 12.3; 22.18. 26I Dios are xuwalijsaj chik Uk'ojol che i kamik, nab'e xutaq b'i iwu' yix chuya'ik utzil chomal piwi man keje ile, yix chijujunal kijalwachij ni ik'aslemal; xcha i ma Pedro chke.
اکنون انتخاب شده:
Hechos 3: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala
