Hechos 18
18
Ma Pablo o pa Corinto
1Chrijil ile, i ma Pablo xel pa tinimit Atenas x-e pa tinimit Corinto. 2Chila xuriq wi jun aj Judío chi ma Aquila ub'i, ire le aj pa ulew Ponto. I ma Aquila xaq i rixoqil chi ati Priscila, k'ate je k'unnaq pa tinimit Italia. Xe'el li pa Italia man i ajawinel ma Claudio xuya i taqanik chi konojel aj Judío ke'el li chila pa tinimit Roma. I ma Pablo x-e chkisolixik, 3xwiri xuriq chwach chi xaqjun kichak, ma Pablo aj-anol k'ul ripraq re ja pacha kki'an ike; rumali chi xkanaj kan ku' re kechakun junam. 4Pa taq sábado, i ma Pablo k-e pa ja re molb'al ib' ke i judío, chila xub'ij utzij i Dios chke aj Judío xaq chke i ne te aj Judío, lik xuyu'uj kixikin.
5Ma Silas xaq i a Timoteo, are elik b'i ke pa tinimit Macedonia, xeupon chila pa tinimit Corinto, are uri i ma Pablo lik xuya rib' chub'ixkil i utz laj tzij k'ak' re i Dios xaq lik xusaqij chke aj Judío chi i Jesús are i Cristo. 6Xwiri i aj Judío le xe'ok chu'anik koywal che, xaq chub'ixkil itzel taq tzij; are uri ma Pablo xukirij u'u' chkiwach, k'utb'al re chi lik xumaj ti uwach ni'pa i kki'ano xaq xub'ij chke:
—Ile lik chiwij yix xitzukuj wi we ktaq li tojpen piwi. Lik inmak ti yin, wo'or lik xwi chik chke i ne te aj Judío winaq kinb'ij wi i utzij i Dios.
7Xel chila pa ja re molb'al ib' ke i judío, x-e chi rachoch jun achi ma Ticio Justo ub'i, ire le lik kukoj u'ij i Dios xaq i rachoch o chila chuk'ulel i ja re molb'al ib' ke i judío. 8I ma Crispo chi are i aj-atzil re i ja re molb'al ib' ke i judío, xkojon che i Ajwal junam ku' konojel i ralk'uwal. Xaq k'iyal winaq aj Corinto, xkikojo are xkita i utz laj tzij k'ak' xaq xqajsax ya pkiwi. 9Che jun a'ab', i Ajwal xuk'ut rib' puwach ma Pablo xaq xub'ij che: Maxij awib' xaq mamayij ub'ixkil intzij chke i winaq. 10Man yin lik in o awu' xaq mijun ktiki chu'anik k'ax chawe, man lik je k'i inwinaq je o che i tinimiti; xcha. 11Rumali chi ma Pablo xkanaj jun junab' ru' nik'aj chila pa tinimit Corinto chuk'utik utzij i Dios chke i winaq.
12X-on panoq, che taq i ij are o ma Galión pa aj-ok'al utzam che i ulew Acaya, i aj Judío xkimol kib' chu'anik ch'oj chrij ma Pablo; xkik'am b'i chwach i atb'al tzij, 13xaq xkib'ij che i aj-ok'al utzam i tinimit:
—I achi ri ktijin chkiyu'uxik i winaq chukojik u'ij i Dios, ile lik usuk' taj chwach i qa'atb'al tzij yoj, xecha.
14I ma Pablo kraj te'eq kch'awik, are uri i ma Galión xub'ij chke aj Judío:
—Wetene o jun umak u'anom chwach i atb'al tzij xaq we o jun nim laj umak u'anom che jun winaq, lik kinmin neri wib' yin chixol yix ix aj Judío, chutayik chiwe; 15xwiri, ile to' tzij, to' b'iyaj xaq to' pacha kub'ij i atb'al tzij yix, chiyijb'a uri chiwach man yin kwaj ti kinmin wib' chuxol itzij; keje ile xub'ij i aj-ok'al utzam i tinimit chke.
16Rumali xeresaj li pa atb'al tzij. 17Are uri konojel xkichap ma Sóstenes chi are jun aj-atzil re i ja re molb'al ib' ke i judío xaq xki'an k'ax che chila chwach i atb'al tzij. Xwiri ma Galión nti re che wach taq xki'ano.
Urox solinik re ma Pablo pa Antioquía
18I ma Pablo lik k'a xkanaj kan k'iyal ij pa Corinto. Te'uri xeu'ijla kan i qachalal chwach i Cristo, xe'ok b'i pa barco junam ru' ati Priscila xaq i ma Aquila enam ke pa ulew Siria. Xwiri are xqaj chuchi' i mar chila pa kelb'al b'i barco, i ma Pablo xresaj b'i ronojel uwi pa Cencrea, man kutz'aqatsaj jun sujunik chi u'anom che i Dios. 19Are xeupon pa tinimit Éfeso, i ma Pablo xeuya kan ati Priscila xaq i ma Aquila chila, ire x-e pa ja re molb'al ib' ke i judío, xlapan ku' konojel ni'pa i kimolom kib' chila. 20Are uri ike k'iyal mul xkitz'onoj utzil che ma Pablo chi kkanaj kan keb' oxib' ij chila; xwiri ire xraj taj, 21lik xeu'ijla kan ru' i tziji: “We kraj i Dios, kixolinsolij tan chik”.
Chrijil chik ile, x-an chub'i pa barco, xel chila pa Éfeso. 22Are xupon pa Cesarea, x-e pa Jerusalén chuya'ik rutzil kiwach i jutzob'aj re i Dios. Te'uri x-e pa tinimit Antioquía.
Ma Pablo kb'in che ulew Galacia xaq i Frigia
23Are xik'aw keb' oxib' ij, x-e chik chkisolixik i winaq chi je o che i jalajuj taq k'ijib'al re i tinimit Galacia xaq re i Frigia, chuya'ik ukowil kik'ux konojel i winaq chi je kojonnaq che i Dios.
Ma Apolos kub'ij utzij i Dios pa Éfeso
24Che taq i ij le, o jun aj Judío chi ma Apolos ub'i xupon pa nim laj tinimit Éfeso, ire le lik o u'ij man alaxel re i nim laj tinimit Alejandría. Lik are jun achi chi kuriq kiyu'uxik i winaq, xaq lik reta'am wach kub'ij uwuj i Dios chi tz'ib'tal kanoq. 25Ire lik k'uttal utzij i Ajwal che xaq lik uya'om uk'ux chuk'utik ru' i saq laj tzij ni'pa i reta'am chrij i Jesús, tupu xwi reta'am i k'utunik chi ub'im kan i ma Wan chi Ajqajsanel Ya. 26I ma Apolos le, lik ru' ukowil uwach xujeq ub'ixkil i utz laj tzij pa ja re molb'al ib' ke i judío; xwiri are xkita i ati Priscila xaq i ma Aquila, xkisik'ij b'i ku' kitukel, are uri lik xkisaqij mas usuk' i utz laj tzijonik re i Dios che. 27Chrijil chik ile, ma Apolos xraj enam pa ulew Acaya, rumali chi i qachalal chwach i Cristo xkiya ukowil uk'ux, xaq xkitz'ib'aj b'i jun wuj chke i jutzob'aj chi je kojonnaq che i Dios chila pa ulew Acaya, chi utz uk'ulaxik ma Apolos chki'ana ku'. Are xupon pa ulew Acaya, lik xeuto i qachalal chwach i Cristo, man rumal rutzil uk'ux Ire, kikojom i Jesús, 28i ma Apolos lik chkiwach konojel i winaq xula' uwach chke aj Judío chi lik ketiki ti chruwaxik uwach chi lik saq laj tzij i Jesús are i Cristo; xub'ij chke chi keje ile tz'ib'tal chupam uwuj i Dios.
اکنون انتخاب شده:
Hechos 18: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala
