Hechos 11
11
Uya'ik retamaxik chke jutzob'aj re i Dios aj Jerusalén ni'pa i chak u'anom ma Pedro
1I apostolab' xaq i qachalal chwach i Cristo chi je o pa Judea, xya' retamaxik chke chi i winaq chi ne te aj Judío xaq xkikoj utzij i Dios. 2Xwiri are xupon ma Pedro chila pa Jerusalén, xyaj kumal jujun chke i jutzob'aj chi kekojon che i Cristo chi xki'an i circuncisión. 3Xkitz'onoj che:
—¿B'uchak xeasolij i winaq chi ne te aj Judío xaq xatij awa ku'?
4Are uri ma Pedro xujeq ulapik ronojel chke wach taq xuk'ulmaj. Xub'ij chke:
5—Yin, are in o pa tinimit Jope, tz'aqat kintijin che i lapanik ru' i Dios, are uri xwil pinwach chi xqaj li pacha jun nim laj sawan, yut'tal che kajib' utzam, xqaj li chikaj xupon k'a ipa in o wi yin. 6Xink'am utaqexik kwilb'ej re wach o chupam, are uri xwilo chi je o chikop kajib' kaqan xaq je o itzel taq chikop, je o i kejukukik xaq je o i tz'ikin. 7Are uri xinta jun ch'awb'al chi xub'ij chwe: “Chatwalijoq ma Pedro, cheakamsaj i chikop le xaq cheatija.” Xcha. 8Xwiri yin xinla' uwach che: “Kintij taj Ajwal, yin lik mijuyak intijom i ch'am ti laj taq chikop xaq i utz taj;” xincha. 9Are uri i ch'awb'al aj chikaj xub'ij chik chwe: “Ni'pa u'anom chik ch'am i Dios che, mab'ij yet chi ch'am taj.” Xcha. 10Ile oxmul xuk'ulmaj, te'uri x-e chik i k'ul le chikaj. 11Are uri xaq che i or le, xeupon oxib' achiyab' chi je taqtal b'i chintzukuxik, chila ru' ja ipa oj o wi te'eq; ike le je petnaq pa tinimit Cesarea. 12I Lo'laj Utewal i Dios xub'ij chwe chi lik minxij wib' che i enam ku' ike. Xaq waqib' qachalal chwach i Cristo aj Jope xe'e wu'. Qonojel xojok b'i chi rachoch i ma Cornelio, 13xub'ij chqe chi ire xril uwach jun ángel chi rachoch, chi xwinaqir chwach, xub'ij che: Cheataqa b'i achiyab' pa tinimit Jope chusik'ixik ma Simón chi xaq ma Pedro kb'ix che; 14ire kub'ij ni chawe wach uto'ik ak'aslemal yet xaq kik'aslemal konojel awalk'uwal ka'ano; xub'ij i ángel che. 15Are xinjeq lapanik ku', xk'un i Lo'laj Utewal i Dios pkiwi, lik keje pacha i k'unik xu'an pqawi yoj chuxeb'al loq. 16Are uri xk'un chink'ux wach ub'im kan i Ajwal: Qatzij chi ma Wan xuqajsaj ya pkiwi i winaq, xwiri yix, kuqajsaj ni i Lo'laj Utewal i Dios piwi. 17Rumali, i Dios we kuya chke ike, pacha uya'om chqe yoj, chi qakojom i Ajwal Jesucristo, ¿Xatab'a kin-atij yin ru', i wach kraj u'anik i Dios?
18I qachalal chwach i Cristo chi je aj Jerusalén are xkita ile, xech'aw ti chik, xkikoj u'ij i Dios, xkib'ij:
—¡I Dios xaq uya'om chke i ne te aj Judío chi utz kkijach kib' pu'ab' ch'akb'al re kik'aslemal saqil! —Xecha.
I jutzob'aj re i Dios chila Antioquía
19Chrijil ukamsaxik ma Esteban, xjeqan i ch'oj chkij i winaq chi kekojon che i Dios, rumali chi o jujun chke xe'anmajik, xe'e pa tinimit Fenicia, pa tinimit Chipre chi setel chwi i mar, xaq pa Antioquía. Chila pa taq tinimit le xe'ok chub'ixkil i utz laj tzij k'ak' re i Dios, xwi chke aj Judío winaq xkib'ij wi. 20Xwiri je o jujun chke ike chi kikojom i Dios, chi je aj Chipre xaq aj Cirene; are xeupon pa tinimit Antioquía xaq xe'ok chuk'utik i utz laj tzij re i Ajwal xaq chke i winaq chi ne te aj Judío. 21I ucho'ab' i Ajwal lik o ku' ike, xaq xeuto rumali je k'i i winaq xkikoj i Ajwal.
22I jutzob'aj re i Dios pa Jerusalén are xketamaj i tzijonik le, xkitaq b'i ma Bernabé ku' chila pa tinimit Antioquía. 23Are xupon ma Bernabé, xrilo chi i Dios lik uya'om utzil chomal pkiwi, rumali chi lik xkikotik. Te'uri xeupixb'aj konojel chi lik chkijikb'a kik'ux che i Dios xaq lik mko'taj i Ajwal. 24Keje ile xub'ij ma Bernabé chke, man ire lik utz laj winaq, o Lo'laj Utewal i Dios ru' xaq lik kul uk'ux che i Dios. Rumali chi lik je k'i i winaq xkijach kib' pu'ab' i Ajwal.
25Chrijil chik ile, i ma Bernabé x-e pa tinimit Tarso chutzukuxik ma Saulo. 26Are xuriqo, xuk'am b'i ru' pa tinimit Antioquía, chila xek'iji wi jun junab' ku' i jutzob'aj re i Dios, ktijin chuk'utik utzij i Dios chke k'iyal winaq. Chila pa tinimit Antioquía xb'ix wi nab'e mul chke i tijoxelab', “Winaq chi kekojon che i Cristo”.
27Che taq i ij le, je o jujun profeta, xe'el pa tinimit Jerusalén, xe'e pa tinimit Antioquía. 28Jun chke, ma Agabo ub'i, xtak'i anoq, rumal Lo'laj Utewal i Dios chi o puk'ux, xub'ij chi kpe ni jun nim laj wa'jal che ronojel uwach i jyub' ta'aj. X-on panoq lik xuk'ulmaj ile che taq i ij are o ma Claudio pa nim laj atol tzij pa Roma. 29Are uri i winaq chi kekojon che i Dios chi je o pa tinimit Antioquía xkich'ob' kito'ik i winaq chi kekojon che i Dios chi je jeqel pa tinimit Judea; chkijujunal xkiya jalajuj taq b'iroxik chrij wach xetiki chuya'ik. 30Keje ile xki'ano, ni'pa i sipon chi xkimolo, xkitaq b'i chkij ma Bernabé xaq i ma Saulo, man kkiya pan chke i je uwi ujolom i tinimit Judea.
اکنون انتخاب شده:
Hechos 11: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala
