2 Corintios 8
8
Kraj i Dios chi oj ti xuy chkito'ik ni'pa i o rajwaxik chke
1Wo'or, Wachalal chwach i Cristo, kqaj kqalap chiwe wach utzil chomal u'anom i Dios chke i jutzob'aj re ire pa ulew Macedonia. U'anom chke chi lik utz kik'ux. 2Alaj ile, man tupu je ik'awnaq chupam uk'iyal taq k'ax, lik kekikotik; tupu je nib'a', i kisipon chi kkiya'o lik nimaq pacha taq je b'eyomab'. 3Yin xwilo chi lik ronojel kik'ux xkiya kipwaq, ronojel ni'pa i xetiki che; xaq o mas uwi xkiya b'ik. 4Lik xkitz'onoj utzil chqe chi kqaya chke chi kekito pan i tinimit re i Ajwal chila pa Jerusalén. 5Xwi ti xkiya'o pacha i qach'ob'om yoj, mas xkiya b'i puwi ile. Man nab'e xkijach kib' che i Ajwal, te'uri xkijach kib' chqe yoj pacha uch'ob'om i Dios. 6Rumali xqab'ij yoj che i ma Tito chi utz we yix kik'is umolik i tonik chi xujeq umolik ire chixol yix u'anom loq. Ile aljinsab'al re i k'axnab'al ik'ux chke i qachalal. 7Yix lik utz i ki'ano: Lik nim ukub'ib'al ik'ux che i Ajwal; lik ix utz chub'ixkil wach uch'ob'om i Ajwal, xaq lik kita ub'e utzij, xaq ix sik'aj chu'anik pacha kraj ire, xaq lik k'ax kojina'o. Lik utz ktijin relik ronojel wach i ki'ano, rumali kwaj yin xaq ix utz chusipaxik i pwaq, tob'al ke i qachalal.
8Ile, wachalal, su' ti kin-an pen chiwe we ki'an ile. Xwi kinb'ij chiwe wach kki'an i jub'an chik ajkojol utzij i Ajwal chi lik je sik'aj chkito'ik i kachalal. Xinb'ij ile chiwe ilb'al re we qatzij o i k'axnab'al ik'ux yix. 9Lik iweta'am wach i nim laj rutzil uk'ux i Qajwal. Ire b'eyom, xwiri xu'an nib'a' che rib' anb'al re i utz chiwe yix. Keje xu'an ire le man kixb'eyomar ni yix rumal unib'a'il ire.
10Wo'or kinb'ij ni chiwe wach innojb'al yin chuya'ik i pwaq tob'al ke i qachalal; kmajaw chiwe we ki'an na pacha xijeq li u'ankil. Ronojel ik'ux xijeq te'eq li umolik i pwaq junab'ir; xu'an ti keb' ik'ux chu'ankil. 11Xwiri, wo'or chik'isa u'anik; xaq chi'ana ru' ronojel ik'ux, pacha ujeqik xi'an yix che i pwaq, chijacha ni'pa i kixtiki che. 12We jun lik kraj ktonik, xaq kuya'o ni'pa ktiki che, i Ajwal kuk'amo ni'pa i kuya'o; kutz'onoj ti mas che we nti ru'.
13Are ti xinb'ij we kitij uyej rumal kito'ik i qachalal. 14Are kwaj yin mijun kutij uyej, ni yix, xaq ni ike. Wo'or, ni'pa i pwaq chi kajwax ti chiwe yix, kuriq ni uchak chke ike wach i rajwaxik chke. Moqxa k-on panoq, kajwax ti chik chke ike, te'uri kixkito tan chik yix. We keje kki'an ile, ke'eloq chi kkito uri kib' chkiwach. 15Ke'el uri pacha kub'ij uwuj i Dios: “I jujun chi lik k'i xkik'amo lik nti pich' uwi i keb' k'ox xkanaj ku', xaq i jujun chi xa jub'i' xkik'amo xqare xtz'aqat i keb' k'ox chwi ki'ab'.”#8.15 Keje ile tz'ib'tal kan chupam uwuj i Dios: Éxodo 16.18.
Tzij tob'al re i ma Tito xaq i je rachi'il
16K'amori che i Ajwal man u'anom che i ma Tito chi kraj ire kixuto keje pacha i kwaj yin. 17Are xinb'ij che chi k-e iwu', ire lik xraj k-e chiwilik man xaq uch'ob'om chi utz kixuto na.
18Are k-e ire xaq kqataq b'i jun chik qachalal chwach i Cristo ru', chi lik utz laj ajpaxsanel i utz laj tzij k'ak' re i Dios; konojel keje ile kkib'ij pa taq jutzob'aj re i Dios. 19Xwi ta la ile, xaq i jutzob'aj re i Dios le xkib'ij chi utz we k-e ire qu' chujachik i pwaq chke i qachalal je nib'a'. I jachb'al re i pwaq le, kqa'ano kojb'al re u'ij i Ajwal, xaq k'utb'al re chke chi yix lik kiwaj keito. 20Ke'e ni jub'an qachalal qu' man mijun kutzukuj tzij chqij wach kqa'an che uk'iyal pwaq chi moltajnaq. 21Ni'pa i kqa'ano, kqa'an che chi pusuk' kqa'an wi, xwi ti chwach i Ajwal, xaq chkiwach i winaq.
22Are ke'e i keb' le iwu' chumolik i pwaq, xaq kqataq chub'i jun chik qachalal chwach i Cristo ku'. Ya qilom chik k'iyalmul chi ire lik sik'aj chkito'ik i qachalal chwach i Cristo, xaq wo'or lik kraj k-e iwu' man kul uk'ux chiwe wach i ki'an na. 23I ma Tito, moqxa o i kkitz'onoj pachin ire; chib'ij chke chi ire wachi'il yin che uchak i Cristo tob'al iwe yix; ire ink'exel yin iwu' yix. Xaq i jub'an chik qachalal chwach i Cristo chi kerachi'ilaj b'ik, moqxa ktz'onox chiwe je pachinoq; chib'ij chi je taqtal b'i iwu' kumal i jutzob'aj re i Dios waral. Rumal wach i kki'an ike ri, lik koksax u'ij i Cristo. 24Rumali chik'utu i k'axnab'al ik'ux chke, man je ni'pa i jutzob'aj re i Dios kketamaj chi lik qatzij k'ax keina'o. Xaq kketamaj na chi qatzij i xqab'ij, chi yix lik ix utz laj taq qachalal.
اکنون انتخاب شده:
2 Corintios 8: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala