2 Corintios 5
5
1Qeta'am chi yoj oj pacha jun ja, chi xa es uwi, chi kuch'ij ti naj. Xwiri qeta'am chi i ja le we xk'is uwach, i Dios uyijb'am jun qachoch chila chikaj chi lik kjar taj, k-e ij saq chrij. Ile, are i Dios yijb'awnaq; winaq ti yijb'awnaq. 2Yoj, tz'aqat oj o chi waral chwach i jyub' ta'aj lik kqach'ob' chupam i ja ipa kojk'iji wi ronojel ij saq, man qeta'am chi we oj o chik chila, lik utz uri kojk'iji'ik. 3Man keje ile tupu kmaj kan i qa'u' xwiri chila chikaj kojch'ani taj. 4Tz'aqat oj o che i qach'akul waral, kojk'achirik, kojjilawik. Qatzij, qas ti kqaj kojel chupam i qach'akul re waral; are i kqaj yoj, wetene kpe i qach'akul k'ak' chrij i qach'akul re i waral. Keje ile, i qach'akul chi to' kkamik, xa kchupsax ni uwach uri rumal i qach'akul chi nti chik ukamik. 5Are i Dios x-anawik chi xqariq i qach'akul k'ak' le, xaq uya'om Lo'laj Utewal Ire pqanima ilb'al re chqe chi lik kuya ni chqe pacha i usujum.
6Rumali, kqasach ti ukowil qak'ux. Qeta'am chi tz'aqat oj o che i qach'akul re i waral, oj o ti uri che i qach'akul re aj chikaj, oj nti uri ru' i Ajwal. 7Tupu kqil ti uwach xwiri lik kqakub'a qak'ux che. 8Qasachom ti ukowil qak'ux. Kqaj ne yoji kqo'taj kan i qach'akul aj waral, man kqaj kojjeqi chila ru' i Ajwal. 9Rumal uri kqaya qak'ux chu'anik wach i chom kril ire, tupu k'a oj o waral che i qach'akul, xaq we oj o chik chila ru' Ire. 10Man qonojel yoj chqajujunal, koj-el chwach i Cristo, man ku'at ni tzij pqawi wach i qa'anom are oj o che i qach'akul waral chwach i jyub' ta'aj, we utz i qa'anom, o we utz ti qa'anom.
I tzijonik re i chomb'al ib' ru' i Dios
11Qeta'am chi lik rajwaxik kqakoj u'ij i Ajwal, rumali kqab'isoj ub'ixkil utzij chke i winaq man keje ile kekojon che Ire, utz wetene keje yix iweta'am wach i qanojb'al yoj. 12Mich'ob' yix moqxa kojtijin taq chukojik qa'ij yoj. Xwi kqaj kixqato chi retamaxik wach i kqa'ano, man utz chi kixkikot qumal yoj. Te'uri kixtiki chub'ixkil wach i utz kqa'an yoj, la'b'al ni uwach chke ike chi kkikoj ki'ij man chom kech'awik, xwiri nti kuchakuj. 13Mixk'ix chqe rumal wach i kqa'ano. We oj ch'uj kib'ij yix, xa rumal i Ajwal uri oj keje ile. We xaq oj ti ch'uj, xaq utz kel chiwe yix. 14Keje kqa'an ile, man kqaj u'anik pacha kraj i Cristo chqe, man lik nim i k'axnab'al uk'ux chqe. Qeta'am chi o jun xkam pqak'exel qonojel; xe'el uri chqe pacha xojkam yoj qonojel. 15I Cristo xkam pqak'exel qonojel, man ni'pa i je k'as rumal ukamik Ire, kki'an ti chik pacha i to' kkaj ike. Are i kki'ano, pacha kraj i jun chi xkamik xaq xwalij chkixol i kamnaq tob'al ke.
16Yoj wo'or, are kqa'at tzij che u'ij jun winaq, kqa'an ti chik pacha kki'an i to' je re uwach i jyub' ta'aj. Qatzij, yoj ujer xqa'at tzij che u'ij i Cristo pacha kki'an ike, xqakoj ti u'ij. Xwiri, wo'or qeta'am chik uwach, xaq qakojom u'ij. 17Jun, we o chik che i Cristo, ke'el uri k'ak' laj winaq chik. I taq re ujer xukanaj kanoq; ronojel is k'ak' chik. 18Ronojel ile, are i Dios k-anaw chqe. U'anom chqe, chi rumal i Cristo qachomarsam qib' ru'. Xaq xuya i chak chqaqul chi kqato konojel i winaq chkichomarsaxik kib' ru' ire. 19Kqab'ij chke chi i Dios o che i Cristo, are o chwach i jyub' ta'aj lik xutzukuj uchomaxik kib' i winaq ru' i Dios. Xaq kuya ti kimak i winaq puk'ux; man oj utaqom yoj chub'ixkil ile chke i winaq. 20Rumali yoj, chi oj utaqon i Cristo, oj pacha uk'exel ire chiwach yix. Ni'pa i kqab'ij ke'el chiwe pacha are i Dios klapan iwu'. Rumal uri, wo'or puk'exel i Cristo, kqab'ij chiwe: Chichomaj iwib' ru' i Dios. 21I Cristo nti umak xu'ano; xwiri i Dios xu'an jun ajmak che rumal i qamak yoj, we xqajach qib' che i Cristo, are uri i Dios ku'an chqe chi nti chik qamak, rumal i Cristo.
اکنون انتخاب شده:
2 Corintios 5: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala