2 Corintios 3
3
Ajk'utunelab' re i k'ak' trat
1Are kqab'ij iri chiwe, ¿Moq o ni kkib'ij chi xa ukojik qa'ij yoj kqa'an tan chik chiwach? Qeta'am chi je o jujun k'utunelab' keupon iwu', kuk'am kiwuj kojb'al re ki'ij chiwach, man kkaj ike chi keik'ulaj ni iwu'. Yoj oj keje taj pacha ike; nti uchak kqak'ut jun wuj chiwach; xaq nti wuj kqatz'onoj chiwe yix, kojb'al re qa'ij chkiwach i winaq pa taq tinimit. 2Yix ix are i wuj chi kajwax chqe yoj: Jun wuj chi tz'ib'tal pqak'ux, ile konojel keta'am uwach xaq ketiki chrajlaxik. 3Lik k-aljinik chi yix ix jun wuj tz'ib'tal rumal i Cristo chi kqak'ut yoj chke i winaq; xwiri, are ti ru' tinta ix tz'ib'tal wi, lik ru' Lo'laj Utewal i Dios k'aslik ix tz'ib'tal wi. I tz'ib' le chi u'anom, antal ti chwach ab'aj, wo'or pkik'ux i winaq utz'ib'am wi.
4Lik kul qak'ux che i Dios rumal i Cristo, chi lik qatzij ile, 5man are i Dios kuya chqe chi kojtiki chu'anik uchak ire. We to' qatukel yoj, lik kojtiki ti chu'ankil ile. 6Are ire xuya chqe ronojel wach i rajwaxik che uchak re i k'ak' trat. I ujer trat tz'ib'talik, xa are jun atb'al tzij pkiwi i winaq. Xwiri wo'or are i trat k'ak' are i Lo'laj Utewal i Dios kchakun pqak'ux. I ujer trat xupetsaj i kamik pqawi; xwiri i k'ak' trat kupetsaj i Lo'laj Utewal i Dios pqawi, yab'al re i k'aslemal chqe.
7I ujer trat chi uya'om i Dios che i mam Moisés, tz'ib'tal kan chwach ab'aj#3.7 Éxodo 24.12.; are xujach ile che i mam Moisés, i nim laj uchomal i Dios xwalch'in che upalaj i mam Moisés xaq lik xkanaj che. Te'uri i aj Israel xkich'ij ti utaqexik uchomal i Dios che upalaj i mam Moisés, tupu kok'ilal kchup che. I ujer trat le, nim uchomal i Dios rok'am loq, xwiri xa xupetsaj i kamik pqawi. 8Xwiri wo'or, mas nim ni uchomal kpe pqawi rumal Lo'laj Utewal i Dios chi ok'anel re i trat k'ak'. 9I ujer trat lik nim uchomal i Dios xuk'am loq, tupu xupetsaj i kamik pqawi; xwiri mas nim ni uchomal i Dios rok'am i tzijonb'al chi kojuyijb'a man koj-on utz chwach i Dios. 10I ujer trat chi chom te'eq, wo'or nti chik uchomal chwach i trat k'ak' chi mas lik nim uchomal. 11I ujer trat, lik nim uchomal i Dios xuk'am loq, tupu xa attal u'ij, xwiri mas nim ni uchomal i trat k'ak' chwach i ujer trat le, man k-e ij saq chrij.
12Lik kul qak'ux che i trat k'ak' le, chi nti uk'isik, rumali ko qak'ux chub'ixkil (kquwaj ti uwach). 13Nti uchak kqa'ano pacha xu'an i mam Moisés ujer; ire xuch'uq upalaj ru' jun k'ul man kraj taj k-iltaj kumal i aj Israel are kchup uchomal i Ajwal che. Man i chomal le naj taj kuch'ijo. 14Xwiri, i aj Israel, xkita ti ub'e ile, (chi xa attal u'ij i ujer trat le). Xaq k'a are o wi wo'or, kkita ti ub'e ile. Man are kkajlaj i ujer trat, xwi che i tzij le kkikoj wi u'ij; ke'eloq chi junam ru' pacha ch'uqtal kiwach ru' k'ul. I pacha k'ul le kel ti che kiwach we je re ti Cristo. 15K'a are je o wi wo'or; are kkajlaj i tzij chi utz'ib'am kan i mam Moisés, ke'eloq chi pacha o jun k'ul uch'uqum kinojb'al. 16Xwiri jun winaq are kujach rib' che i Ajwal, i k'ul le kelsax uri che chi uch'uqum unojb'al. 17Man i Ajwal are Utewal i Dios. Xaq ipa o wi i Utewal i Ajwal, chila nti chik jun k-anaw k'ax chawe. 18Qonojel yoj ch'uqtal ti chik qapalaj; oj keje chik pacha jun ilb'al ib', chi k-aljin uchomal i Ajwal chqe; kok'ilal kojjalwachixik k'a kojmajaw na pacha i Ajwal. Ile k-ani chqe rumal Utewal i Ajwal.
اکنون انتخاب شده:
2 Corintios 3: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala