2 Corintios 1
1
Utzil wachij
1Yin in apóstol man keje ile xraj i Ajwal chwe, junam ru' i qachalal chwach i Cristo ma Timoteo kqaya pan rutzil iwach yix chi ix jutzob'aj re i Dios; chila pa tinimit Corinto, xaq chke i qachalal chwach i Cristo chila pa jyub' Acaya pa ix o wi yix. 2Kintz'onoj utzil chomal re i Qaqajaw Dios, xaq re i Ajwal Jesucristo piwi; xaq kintz'onoj chke chi kkiya i utz olem pik'ux.
Tioxinik che i Dios
3Nim u'ij i Dios chi xaq i Uqajaw i Qajwal Jesucristo; man Ire are i Qaqajaw chi kril tob'al qawach; chi xaq are i Dios chi lik arewi kukub'saj qak'ux. 4Ire kukub'saj qak'ux are oj o chupam i k'ax, man keje ile xaq yoj kqakub'saj ni kik'ux ni'pa i je o pa k'ax. Lik keje pacha ukub'saxik qak'ux u'anom i Ajwal chqe yoj. 5I Cristo lik xutij i k'ax qumal yoj, xaq yoj kqatij i k'ax junam ru' ire. We nim i k'ax kqatijo, xaq nim ukub'sab'al qak'ux uri kuya i Cristo chqe. 6Yoj, we kqatij i uyej, chiwe yix i utz man kiriq kub'sab'al ik'ux xaq iwelik chisaq rumal. Xaq keje ile, we i Ajwal ukub'sam qak'ux yoj, xaq kukub'saj ik'ux yix are kpe i k'ax piwi pacha i xojik'aw wi yoj, ru' unimal ik'ux kich'ij na. 7Lik kul qak'ux che chi kixsach taj. Qeta'am chi kitij ni k'ax, xwiri i Ajwal lik kukub'saj ni ik'ux.
8Wachalal chwach i Cristo, kqaj chi kiwetamaj ni'pa i k'ax xqatij chila pa ulew Asia. Ni'pa i k'ax le lik nim; laj xqach'ij ti ucho'ab', rumali xqach'ob' yoj chi lik kojkamik. 9Saq laj tzij lik xqana yoj chi lik ch'ikom chik qa'ij che i kamik, xwiri utz xe'eloq man rumal ile lik xqakub'a qak'ux che i Dios, chi kewalijsaw i kamnaq xqakub'a ti qak'ux che qib' yoj. 10I Dios xojresaj pu'ab' i kamik le chi oj o te'eq chwach; xaq k'a ktijin chqato'ik. Kul qak'ux che man kumayij ti qato'ik pacha ax ku'an wi. 11We yix kojito, lik kixlapan ru' i Dios re kuya i utz pqawi yoj, we lik je k'i kelapan ru' i Dios pqawi yoj, xaq lik je k'i uri kkitioxij che rumal i utzil chomal chi kuya chqe.
I ma Pablo xub'ij chke wach rumal x-e ti pa Corinto
12Xaq wo'or, qachalal, o i kojkikot rumal: Man kqana pqak'ux chi yoj, waral chwach i jyub' ta'aj, lik utz i qak'aslemal chkiwach konojel; xaq iwu' yix, saq laj tzij yoj qa'anom ile rumal ti qanojb'al yoj, ile rumal xqakub'a qak'ux che nim laj rutzil uk'ux i Dios. 13Ni'pa taq i wuj chi qatz'ib'am b'i chiwe, lik are wach taq i kqach'ob'o chi kusaqirsaj chiwe. Chikub'a ik'ux che wach taq i kiwil chwach, xaq wach i kita che. Are i kqaj yoj, chi lik kita ni ub'e wach i qach'ob'om. 14Xwiri yix ya xita jub'i' ub'e wach i kqa'ano. Rumali chi are kk'un tan chik i Qajwal Jesucristo lik kixkikot ni qumal yoj, xaq keje ni yoj uri kojkikot ni iwumal yix.
15Yin, kul ink'ux chiwe; rumali xinch'ob'o, chi are kin-e pa Macedonia, nab'e kinik'aw iwu' yix. 16Xaq xinch'ob' te'eq, are kink'un chik, kinik'aw julaj chik iwu' man lik kixkikot rumal. Xaq xinch'ob'o chi kinito ni che in-b'e are kin-e k'a pa Judea. 17¿Xatab'a xa chu'ankil xinch'ob' ile? ¿Xatab'a kin-an yin pacha kki'an jujun winaq chi ku'on keb' kik'ux ru' i wach taq kkib'ij? 18I Ajwal are ajsaqinel chqij, chi yoj kixqat'or taj, lik ku'on ti keb' qak'ux. 19Man i Jesucristo, chi Uk'ojol i Dios. Lik kt'oron taj man ni'pa i kub'ij lik ku'an na lik are ire le chi xqapaxsaj utzijol chiwe yix. I Jesucristo, ni'pa i kub'ij, lik qatzij. 20Xa rumal ire, k-antaj ni ronojel ni'pa usujum i Ajwal chqe. Rumali, are kqakoj u'ij i Ajwal, kqab'ij “Lik keje ile ch-antaj na” rumal ire. 21Lik are i Dios u'anom chqe, chi yoj junam iwu' yix, lik kul qak'ux che i Cristo; xaq lik are ire oj ucha'om. 22K'utb'al re chi oj re Ire, xukoj jun retal chqe, ile are i retal re i Lo'laj Utewal.
23Yin u'onom loq xinch'ob' enam iwu' chila pa Corinto, xwiri xin-e taj. I Dios krilo chi xa rumal xwil tob'al iwach yix, i Dios reta'am ink'ux man xwaj taj kixinyaja. 24Yoj kqaj ti kqa'an pen chiwe che wach taq i kikojo. Are i kqaj yoj, kixqato churiqik i kikotemal. Man yix lik kul chik ik'ux che i Cristo.
اکنون انتخاب شده:
2 Corintios 1: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala