1 Corintios 14
14
Ch'ob'onik chrij i rajwaxik qe junam
1Lik chikowij iwib' che i k'axnab'al ik'ux chke i winaq, te'uri chirayij uriqik i sipon chi kpe ru' i Dios. Che i sipon le chi Dios kujacho, are lik utz, are usaqixik ub'ixkil chke i winaq wach ub'im i Dios chiwe. 2We o jun kch'aw che jun ch'ab'al chi ktataj ti ub'e, xwi ru' i Dios uri klapan wi; ku' ti winaq klapan wi, man ike kkita ti ub'e. Ile chi ktijin chub'ixkil are rumal Utewal i Dios, xwiri i usuk' i tzij le xa uwam uwach chke jub'an chik. 3Xwiri keje ti ile k-on i jun chi kub'ij chke i winaq wach u'aljinsam i Dios che. I utzij chke, are suk'b'al re kik'aslemal chwach i Dios, are yab'al ukowil kik'ux, xaq kub'sab'al kik'ux. 4We o jun kub'ij jun tzij chi ktataj ti ub'e, xwi che ire kajwax wi; xwiri we o jun kusaqij jun tzij chke i qachalal chi u'aljinsam i Dios che, i tzij le kusuk'b'a kik'aslemal i jutzob'aj re i Dios.
5Kwaj yin, wetene iwonojel yix kiriq jun ch'ab'al junwi, xwiri are mas kwaj yin, are uriqik ub'ixkil chke i qachalal wach utzij i Dios chke. Mas utz iri chwach i tzij chi kkita ti ub'e i winaq. Nti uchak ile chke we nti jun kb'iw chke wach usuk'. Xwiri we o jun kb'iw chke, kuriq uri uchak che i kik'aslemal chwach i Dios. 6Ix, wachalal chwach i Cristo, rumali, wetene kixinsolij, we kinlapan iwu' che i ch'ab'al chi ktataj ti ub'e, kuriq ti uchak chiwe. Xwiri we kinb'ij chiwe wach u'aljinsam i Dios chwe, ile kuriq uri uchak chiwe. Xaq we kink'ut chiwe wach i weta'am yin che i saq laj tzij re i Dios, kuriq uri uchak chiwe. Xaq we kinb'ij jun tzij chiwe chi petnaq ru' i Dios, xaq we kixintijoj che i b'e re i Dios, ile kuriq uri uchak chiwe.
7I ch'ab'al chi ktataj ti ub'e, kinjunamsaj ru' jun su' xaq ru' jun arpa; ile we utz ti uch'awsaxik k-anik, ktataj ti usuk' wach i k-ojmaxik. 8Xaq keje jun trompet ke i achiyab' chi je yij che i ch'oj, we utz ti uch'awsaxik k-anik, i achiyab' chi je yij che i ch'oj kewalij ti uri che i ch'oj. 9Xaq keje yix, wach i kel pichi', we saqil ti ub'ixkil kib'ij, ¿Wach retamaxik uri k-anik we suk'ul i kib'ij? I tzij le to' kk'ami b'i rumal i tew. 10Qatzij, lik k'iyal taq ch'ab'al o chwach i jyub' ta'aj; xwiri, chkijujunal i ch'ab'al le o usuk'. 11Xwiri yin, we kinta ti ub'e uch'ab'al jun chik, kin-el che ire pacha in aj naj, xaq ire kel chwe yin chi wach ti aj tinimit. 12Rumali, yix chi lik kirayij taq i sipon re Lo'laj Utewal i Dios, chitz'onoj che ni'pa taq ile chi kuriq uchak che i kik'aslemal i jutzob'aj re i Dios.
13Rumal uri, we o jun kch'aw che jun ch'ab'al chi kuta ti ub'e, chutz'onoj uri che i Dios chi k-aljinsax ni che wach usuk' kel i tzij le, man ku'aljinsaj chke i qachalal. 14Yin, we kinlapan ru' i Dios pa ch'ab'al chi kinta ti ub'e, are i wanima klapan ru' i Dios; man yin kinta ti ub'e wach kinb'ij. 15¿Wach kin-an ut? Ru' wanima Kinlapan ru' i Dios, xwiri xaq ru' inno'oj kintz'onoj ni che. Xaq o uchak kinb'ixan ni ru' i wanima, xwiri xaq keje ru' inno'oj kinb'ixan na. 16Yet, are kak'amwaj katioxij che i Dios, we xwi kab'ij ru' i tzij chi ktataj ti ub'e; i jun chi to' kuta ¿Wach uya'ik uri uwach ku'an awu' chutioxixik ile? Kuya taj, man kuta ti ub'e wach i kab'ij. 17Tupu i tioxb'al le chi ka'an che i Dios lik utz, lik chom; xwiri che i jun chik, nti k-on re che uk'aslemal chwach i Dios. 18Yin kintioxij che i Dios man uya'om chwe chi mas kinlap i tzij chi ktataj ti ub'e, mas kintiki yin che ile chiwach yix iwonojel. 19Xwiri, yin, are kinlapan ku' i jutzob'aj re i Dios, are kwaj yin, are kinb'ij i tzij chi ktataj ub'e xaq cheuto i jub'an chik man keje ile kenaw che. Mas utz keje ile kin-ano, tupu xa jo'ob' tzij kinb'ij; utz ni ile chwach i kinb'ij jo'mo' juchiy (10,000) tzij chi kkita ti ub'e.
20Wachalal chwach i Cristo, mi'an pacha i ak'alab' che ich'ob'onik. Qatzij, utz we pacha i ak'alab' chi k'amaja kemakunik; xwiri chi'ana che inojb'al pacha kinojb'al i nimaq. 21Chupam uwuj i Dios, keje iri kub'ij: “Che i tinimiti kinb'ij ni intzij chke ru' kichi' i junwi kich'ab'al. Kinb'ij intzij chke ru' kichi' i ne te kach aj tinimit. Tupu kin-an ile chke, ike kkikoj ti retalil che wach i kinb'ij. Keje ile xub'ij i Dios.”#14.21 Isaías 28.11-12. 22Che i tzij le chi tz'ib'talik, kqil yoj iri: Jun ch'ab'al chi ktataj ti ub'e, ile are k'utb'al re chke ni'pa k'amaja kekojon che i Ajwal; are ti k'utb'al re chke i je kojonnaq chik. Xwiri i je kojonnaq chik, kya' chke chi kkib'ij chke i kachalal wach i tzij chi u'aljinsam i Dios chke; are ti chke i k'amaja kekojonik. 23Man are imolom iwib' yix chi ix jutzob'aj re i Dios, we iwonojel kixok che i ch'ab'al chi ktataj ti ub'e, i we xe'ok jub'an chik winaq iwu' chi iwachi'il taj, o we kekojon ti che i Ajwal, kkib'ij ni uri chi xa ix ch'uj.#14.23 Rumal i ch'ab'al le chi kkita ti ub'e. 24Xwiri, we kixtijin chub'ixkil wach u'aljinsam i Dios chiwe, i we kok b'i jun iwu' chi iwachi'il taj, o we k'amaja kujach rib' che i Ajwal, ire kuna uri umak puk'ux are kuta wach i kixtijin yix chub'ixkil. Ire, iwumal yix, kuna uri ub'e chi ajmak. 25Keje ile k-aljin uri wach i ruwam rib' puk'ux i k-aljinsax ni che. Te'uri, ire kxuki'ik xaq kukoj u'ij i Dios; kub'ij na chi i Dios lik o iwu' yix.
Lik rajwaxik chi kojch'oqow taj
26Ix, wachalal chwach i Cristo, are kimol iwib', je o ni kkib'ixaj u'ij i Dios, xaq je o ni kkik'ut chke i jub'an chik; xaq je o ni kkib'ij wach u'aljinsam i Dios chke. Xaq je o ni kkib'ij jun tzij chiwe che i ch'ab'al chi ktataj ti ub'e; xaq je o ni kkib'ij ni chiwe wach usuk' i tzij le. Xwiri, ronojel taq ile, churiqa uchak che ik'aslemal chi ix jutzob'aj re i Dios. 27Are kech'aw che i ch'ab'al chi ktataj ti ub'e, chkijala ni kib' uri che i lapanik; xwiri xa je keb', o xa je oxib' kech'awik, mech'aw je k'i. Xaq o uchak chi o jun chik kusaqij chke konojel wach i xkib'ij le. 28We nti jun ksaqiw chke wach i kkib'ij, mech'aw uri pa jutz'ob'aj re i Dios we ktataj wach kkib'ij; xwi kelapan ru' i Dios kitukel. 29Xaq keje ike chi profeta chech'awoq je keb' o xa je oxib'; i jub'an o uchak chkita ub'e we lik ru' i Dios petnaq wi wach i kkib'ij, o we ru' taj. 30Ike chi je kul chutayik i jun chi ktijin che i lapanik, we xaqte'et o jun chke chi o i kub'ij i Dios che, i jun chi ktijin che i lapanik chuxlan ni uri che i lapanik. 31Keje ile, iwonojel yix chi o i tzij u'aljinsam i Dios chiwe, kixtiki chub'ixkil we kijal iwib'. We keje ile ki'ano, konojel kenawik, xaq konojel kk'iyar ukowil kik'ux. 32Ni'pa i je ajb'il re i tzij chi ktzijox chke rumal i Dios, we xpe jun tzij re i Dios pkijolom, are ike chi profeta. 33Man i Dios ire lik utz olem, ire ajsachol ti nojb'al.
Are kraj i Dios, utz, chom oj olik. Chi'ana yix pacha kki'an i je re i Cristo pa jutzob'aj re i Dios 34i ixoqib' to' ti kelapanik are imolom iwib' pa jutzob'aj re i Dios, man yatal ti chke chi kech'awik. O uchak kekojon chke i kachijil pacha kub'ij i ujer atb'al tzij. 35I ixoqib', we o kkaj kketamaj, chkitz'onoj chke i kachijil ru' ja; kumaj ti chke we kech'aw pa molb'al ib' re i jutzob'aj re i Dios. 36¿Xatab'a iwu' yix xpe wi i utzij i Dios? Iwu' taj. ¿Xatab'a xwi chiwe yix yatal wi? Xwi taj.
37We o jun chiwe yix, kuna ire chi profeta i kub'ij utzij i Dios chke i winaq, o we jun chik patan yatal che rumal i Lo'laj Utewal i Dios, chuta ub'e uri iri: I tziji chi xintz'ib'aj chiwe, are ub'im i Ajwal chi ki'ano. 38Xwiri, we o jun kkojon ti che wach inb'im, mixkojon uri che ire.
39Ix, wachalal chwach i Cristo, chiya iwib' chub'ixkil utzij i Dios;#14.39 Are ile mas kuriq uchak chke i iwachalal. xwiri, mi'atij i kech'aw che i ch'ab'al chi ktataj ti ub'e. 40Xwiri ronojel wach i ki'ano, chi'ana pacha kmajawik, suk'ul u'anik chi'ana.
اکنون انتخاب شده:
1 Corintios 14: ACHICUB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala