San Marcos 9
9
1Jesús bexi' tu ya'tio':
―Jach taj kin wei'k teche'x, a mok tiʌ way, yʌn tax jujuntu mʌnʌ' u kimi hasta ku yirik u tar tu ku wesintik K'uj a tiʌ kʌ' yete u muk'.
Jesús ku waysik u bʌj
(Mt. 17.1-13; Mt. 9.28-36)
2Kaj mʌni seis u k'ini, Jesús tu pʌya a Pedro yete Juan y a Jacobo, ij bino' ja'ri' tio' ix u jo' wits tu ne kʌ'nʌ. Y tita tu wich u kʌ'sa winiko' tu waysa' u bʌj a Jesús. 3U nok' wayi jach k'ux sʌk y ne cha'a, y tak ne ya'p ku p'o'a jump'e nok', mʌnʌ' u ne k'uchu sʌkta a bex u sʌki u nok'. 4Y tu yoxto' u kʌ'sa winik a Jesús tu yiro' u ye'sik u bʌj a Elías yete a Moisés tʌn u tsikbo' yete Jesús. 5Pedro kaj u ya'ti' a Jesús:
―Wʌjkʌ'si, ¡boj tsoyi ti teno' tu tio' way! Bi meto' oxp'e pʌsa, jump'e ti tech, jump'e ti a Moisés y jump'e ti' a Elías.
6Tu ne jak'i u yoro' u kʌ'sa winik a Jesús, ben a Pedro ya muj yej baij ku yei'k, 7Lʌji' kaj tari jump'e muya y toj ti xu'ri tu tio', y toj yok'o a muya jok' jump'e t'ʌn tʌn u yei'k: «A je' lʌji' in ti'a a jach otsi wirik, ue'x u t'ʌn.»
8Toj yayaj ka tu pʌkto', ya mix mok tu yiro' tiʌ yete tio' toj jari a Jesús tu juni'.
9Pachi ka tʌn u yensko' u witsi, Jesús tu ya'tio' u kʌ'sa winiko' mu' bin u yao' ti mix mok a ba' tu yiro', hasta ka lik'ik tu ka kuxta u Ti'a Xi'ra. 10Ben tu mukro' a ba' tu yiro', tak tʌn u k'atko' yete u bojo', baiki u k'at yei'k a Jesús ka tu ya'a u ka' lik'i tu kuxta. 11Y tu k'ato' ti' Jesús:
―¿Biken ku yei'ko' a ku kʌ'sko' u t'ʌn K'uj a toj u ts'ibtamʌ a Moisés uchik lʌji' pʌti ku bi yʌ tar a Elías?
12Jesús tu nuka tio':
―Jax to jʌy, a Elías lʌji' ku bin ya tar pʌti y lʌji' ku laj bin u ki uts'kintik a ba', ¿chen biken ku yei'k a tu ts'ibʌ' u t'ʌn a K'uj, a u Ti'a Xi'ra yʌnti' u mʌsik ne yaj ba' y ku bij p'akta'? 13Chen a ten ki wei'k teche'x, a Elías to yaj tari, ij meta' ti' tu woro a ba' u k'at meta' ti' a bex toj ts'ibʌ' yok'o u t'ʌn K'uj bik ku bin mʌn ti'.
Jesús ku jarik a kisin a akʌ' ti junturi' xi'ra
(Mt. 17.14-21; Lc. 9.37-43)
14Kaj u'ro' Jesús tu tio' a yʌno' u kʌ'sa winiko', tu yira ne pim winik tiʌ yete tio' y bexi' tio', a ku kʌ'sko' u t'ʌn K'uj a toj u ts'ibtamʌ a Moisés uchik tʌn u ts'iko' yete u kʌ'sa winiko'. 15Y kaj i'ri a Jesús ten a winiko', ne tsoyji u yoro' a winik y se'p' tu k'ʌna u yako' u t'ʌno'. 16Y Jesús tu k'ata ti' u kʌ'sa winiko':
―¿Baiki u yok'o tu ka ts'ike'x yete a ku kʌ'sko' u t'ʌn K'uj a toj u ts'ibtamʌ a Moisés uchik?
17Kaj u nuka junturi' a mok tiʌ tu pimai:
―Wʌjkʌ'si, tin tasa tech in ti'a, a akʌ' kisin tu yok'o a lʌji' tu p'ʌta mo' jak'ʌ u t'ʌn. 18Xik lara tu tiʌ, a kisin ku chukik y ku purik ix lu'm y ku ts'ek u jok'o u yom u chi', ku ts'ek u laj t'ʌn u koj y ku p'ata chichchich in ti'a, ti k'ata' ti' a kʌ'sa winiko' ka u jare ti', chen moj k'uchu u muk'o u jarik.
19Jesús tu nuka tio':
―¡A teche'x toj maj ki akse'x wore'x in t'ʌn! ¿Hasta tuk'in yʌnti' in p'ata yete teche'x? ¿Hasta tuk'in yʌnti' in muk'tike'x? Tase'x way a lay a mejen xi'ra.
20Y tasa' ti' a Jesús y a kisin ka tu yira a Jesús, chu'mpʌ u li'sik ti' a meje xi'ra p'is u p'uju u ya'ji y lubi ix lu'm y tʌn u chich wʌk'ʌstik u bʌj y bexi' tʌn u jok'o u yom u chi'. 21Jesús tu k'ata ti' u tet a xi'ra a ka kisin tu yok'o:
―¿Bon u yuchi bex ku mʌn ti' a ti'a?
U tet tu nuka:
―Toj tuk'in ne cho mejentʌ. 22Ne ya'p wʌts' tu pura ix k'ak' ix ja', ti' u kinsik, ben o yʌn ba' ja' metik, ch'ae otsi to' y ʌnto'.
23Jesús tu ya'ti':
―Wa ka ki' aksik ta wor ti' K'uj, je'e u metchʌ, ¡a mok ku ki' aksik tu yor ti', tu woro a ba' je'e u laj metchʌ!
24Se'p' kaj k'ʌ'm abotnʌj u tet a meje xi'ra,:
―Kin waksik tin wor ti'. ¡Ʌnten in más in ki aksik ti wor ti'!
25Ka tu yira Jesús tʌn u tar ne pim winik tu tiʌ, lʌji' kaj u k'eya a kisin, tu ya'ti':
―Kisin yaj moj jak'u t'ʌn y bexi' a mʌkʌ' u xikin, ten kin li'sik in t'ʌn ti tech, jok'en ti' a mejen xi'ra y ma' ya sut a woko ti'.
26Kaj abotnʌj a kisin y tu ka ts'a u ka lik'i ti'a meje xi'ra p'is u p'uju u yaj, pachi jok' ti, chen p'is kimen tu p'ʌta a meje xi'ra y ne pim winik chu'mpʌ u yei'ko': ¡A lay kimi! 27Chen a Jesús tu mʌcha u k'ʌ' a meje xi'ra, kaj u li'sa ch'ikta.
28Pachi a Jesús oki yok'o jump'e nʌj y u kʌ'sa winiko' tu k'ato' ti' tuk'in tu juna yʌno':
―¿Biken a teno' moj k'uchi in muk'o in jarik a kisin tu yok'o a lay a meje xi'ra?
29Jesús tu nuka tio':
―A je' a kisin je'e a jarik jari yete tuk'in chich ka t'ʌnik K'uj y ka muk'tik a jʌne'x.
Jesús ku ka ei'k u kimi
(Mt. 17.22-23; Lc. 9.43-45)
30Kaj jok'o' tita, mʌno' tu lu'mi Galilea, chen a Jesús mu' k'at ka etak tʌn u mʌn tita. 31To jari u k'at u kʌ'sik u kʌ'sa winiko', bex tʌn u yei'k tio':
—U Ti'a Xi'ra binukaj k'uba' ti' a winik y binukaj kinsa' chen ka mʌnʌk oxp'e k'in jeu' ka' lik'i kuxta.
32Chen u kʌ'sa winiko' a Jesús muj ki' uo' baij u k'at u yei'k a Jesús, y sajako' u k'atko' ti' a Jesús.
¿Mok a jach ne ch'ikyʌn?
(Mt. 18.1-5; Lc. 9.46-48)
33K'ucho' tu kʌjta Capernaum. Y tuk'in ya tio' ix nʌj, Jesús tu k'ata tio':
―¿Baij ka jumintiko' a ti wu'a yok'o bej?
34Chen tio' muj naj nuko', tu u yeo' lʌji' yok'o a tuku u k'at u yetko' moki más ch'ikyʌn o más t'o'o. 35Lʌji' ka kuraj Jesús y tu pʌya a doce u apóstoles y tu ya'tio':
―Wa mok u k'at lʌji' más pʌti, lʌji' yʌnti' u p'ata ne tu pach u bojo' y lʌji' yʌnti' u meaj ti' u bojo'.
36Pachi Jesús tu pʌya junturi' cho mejen y tu mʌsa tu chumuki y tu mek'a
37―A mok ku yaksik junturi' cho mejen yok'o a ten, ten ku yaksiken y a mok ku yaksiken, mo ja'ri' ten ku yaksiken, lʌji' ku yaksik a mok tu tuchi'ten.
A mok ket u yor yete to'
(Lc. 9.49-50)
38A Juan tu nuka ti' a Jesús:
―Wʌjkʌ'si, in wirbo' junturi' ku jarik kisin tu yok'o a winik yete a k'aba', chen tin wati' muj metiko', a ti' mo' tiʌ yete to'.
39Jesús tu nuka ti':
―Ma' wei'k mu' metik, ka wirik mʌnʌ' mok ku yei'k mo' tsoy ba' ti ten chen u ts'oko u yirik u ye'sa' ti' u muk' K'uj yok'o y k'aba'. 40A mok muj p'aktiko' lʌji' ket u yor yete to'. 41Jach taj kin wei'k teche'x, wa mok ku tich'ik teche'x ja' yok'o luch yok'o ten, a teche'x lʌji' u winik a Cristo, a lay a winik jeu' jach ts'aba ti' u bo'ri ti K'uj.
Ma' cheike'x u ts'ek a kʌxtik a k'ebʌn
(Mt. 18.6-9; Mt. 17.1-2)
42»Wa mok ku ts'ek u kʌxtik u si'pi a bex u yʌj chuniktʌ u yaksik tu yor ti ten, más ne tsoy wa ku jich'a u kar yete nukuch tunich, y ku pura' ix peta'. 43Wa a k'ʌ' lʌji' ku ts'ek a kʌxtik a k'ebʌn, xat'e, más ne tsoy a woko tuku ts'ek a kuxta tak mʌnʌ' a k'ʌ', chen mix tsoy tak yʌn a k'ʌ' y ka bin ix k'ak' tuba a k'ak' muj naj tu'pu tu woro k'in, 44tuba yʌn a nok'oi a muj kimi y mix a k'ak' muj tu'pu tu woro k'in. 45Wa a wok lʌji' ku ts'ek a kʌxtik a k'ebʌn, xat'e, más ne tsoy a woko tuku ts'ek a kuxta tak mʌnʌ' a wok, y ne mo' tsoy tak yʌn a wok chen ti' ka bin ix k'ak' tuba a k'ak' mo' bik u tupa'. 46Tuba yʌn a nok'oi a muj kimi y mix a k'ak' muj tu'pu tu woro k'in. 47Wa wich ku ts'ek a kʌxtik a k'ebʌn, jare, más tsoy a woko tu ku wesintik K'uj a tiʌ kʌ' tak jai' jump'e a wich, chen mo' tsoy tak yʌn tu ka'p'e wich y ka bin ix k'ak', 48tuba yʌn a nok'oi a muj kimi y mix a k'ak' muj tu'pu tu woro k'in.
49»Tu woro binukaj pura u ch'och'i yete k'ak' y tu woro a ba' ka k'ubik binukaj but'a u ch'och'i. 50A ch'och' ne tsoy, chen wa ku luk'u u ch'och'i. ¿Baij ka bin a mete ti u ka ch'och'ta? Ben, tsoykinta bʌje'x bex a ch'och' tsoy, y tsoy a wore'x a kʌjte'x yete a boje'x
اکنون انتخاب شده:
San Marcos 9: PLacNaha
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
